| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. து³தியஸிக்க²த்தயஸுத்தவண்ணனா
10. Dutiyasikkhattayasuttavaṇṇanā
91. த³ஸமே ஆஸவானங் க²யாதி எத்த² அரஹத்தமக்³கோ³ அதி⁴பஞ்ஞாஸிக்கா² நாம. ப²லங் பன ஸிக்கி²தஸிக்க²ஸ்ஸ உப்பஜ்ஜனதோ ஸிக்கா²தி ந வத்தப்³ப³ங்.
91. Dasame āsavānaṃ khayāti ettha arahattamaggo adhipaññāsikkhā nāma. Phalaṃ pana sikkhitasikkhassa uppajjanato sikkhāti na vattabbaṃ.
யதா² புரே ததா² பச்சா²தி யதா² பட²மங் தீஸு ஸிக்கா²ஸு ஸிக்க²தி, பச்சா² ததே²வ ஸிக்க²தீதி அத்தோ². து³தியபதே³பி ஏஸேவ நயோ. யதா² அதோ⁴ ததா² உத்³த⁴ந்தி யதா² ஹெட்டி²மகாயங் அஸுப⁴வஸேன பஸ்ஸதி, உபரிமகாயம்பி ததே²வ ப²ரதி. து³தியபதே³பி ஏஸேவ நயோ. யதா² தி³வா ததா² ரத்திந்தி யதா² தி³வா திஸ்ஸோ ஸிக்கா² ஸிக்க²தி, ரத்திம்பி ததே²வ ஸிக்க²தீதி அத்தோ². அபி⁴பு⁴ய்ய தி³ஸா ஸப்³பா³தி ஸப்³பா³ தி³ஸா ஆரம்மணவஸேன அபி⁴ப⁴வித்வா. அப்பமாணஸமாதி⁴னாதி அரஹத்தமக்³க³ஸமாதி⁴னா.
Yathāpure tathā pacchāti yathā paṭhamaṃ tīsu sikkhāsu sikkhati, pacchā tatheva sikkhatīti attho. Dutiyapadepi eseva nayo. Yathā adho tathā uddhanti yathā heṭṭhimakāyaṃ asubhavasena passati, uparimakāyampi tatheva pharati. Dutiyapadepi eseva nayo. Yathā divā tathā rattinti yathā divā tisso sikkhā sikkhati, rattimpi tatheva sikkhatīti attho. Abhibhuyya disā sabbāti sabbā disā ārammaṇavasena abhibhavitvā. Appamāṇasamādhināti arahattamaggasamādhinā.
ஸெக்க²ந்தி ஸிக்க²மானங் ஸகரணீயங். படிபத³ந்தி படிபன்னகங். ஸங்ஸுத்³த⁴சாரியந்தி ஸங்ஸுத்³த⁴சரணங் பரிஸுத்³த⁴ஸீலங். ஸம்பு³த்³த⁴ந்தி சதுஸச்சபு³த்³த⁴ங். தீ⁴ரங் படிபத³ந்தகு³ந்தி க²ந்த⁴தீ⁴ரஆயதனதீ⁴ரவஸேன தீ⁴ரங் தி⁴திஸம்பன்னங் படிபத்தியா அந்தங் க³தங். விஞ்ஞாணஸ்ஸாதி சரிமகவிஞ்ஞாணஸ்ஸ. தண்ஹாக்க²யவிமுத்தினோதி தண்ஹாக்க²யவிமுத்திஸங்கா²தாய அரஹத்தப²லவிமுத்தியா ஸமன்னாக³தஸ்ஸ. பஜ்ஜோதஸ்ஸேவ நிப்³பா³னந்தி பதீ³பனிப்³பா³னங் விய. விமொக்கோ² ஹோதி சேதஸோதி சித்தஸ்ஸ விமுத்தி விமுச்சனா அப்பவத்திபா⁴வோ ஹோதி. தண்ஹாக்க²யவிமுத்தினோ ஹி கீ²ணாஸவஸ்ஸ சரிமகவிஞ்ஞாணனிரோதே⁴ன பரினிப்³பா³னங் விய சேதஸோ விமொக்கோ² ஹோதி, ந க³தட்டா²னங் பஞ்ஞாயதி, அபண்ணத்திகபா⁴வூபக³மோயேவ ஹோதீதி அத்தோ².
Sekkhanti sikkhamānaṃ sakaraṇīyaṃ. Paṭipadanti paṭipannakaṃ. Saṃsuddhacāriyanti saṃsuddhacaraṇaṃ parisuddhasīlaṃ. Sambuddhanti catusaccabuddhaṃ. Dhīraṃ paṭipadantagunti khandhadhīraāyatanadhīravasena dhīraṃ dhitisampannaṃ paṭipattiyā antaṃ gataṃ. Viññāṇassāti carimakaviññāṇassa. Taṇhākkhayavimuttinoti taṇhākkhayavimuttisaṅkhātāya arahattaphalavimuttiyā samannāgatassa. Pajjotasseva nibbānanti padīpanibbānaṃ viya. Vimokkho hoti cetasoti cittassa vimutti vimuccanā appavattibhāvo hoti. Taṇhākkhayavimuttino hi khīṇāsavassa carimakaviññāṇanirodhena parinibbānaṃ viya cetaso vimokkho hoti, na gataṭṭhānaṃ paññāyati, apaṇṇattikabhāvūpagamoyeva hotīti attho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. து³தியஸிக்க²த்தயஸுத்தங் • 10. Dutiyasikkhattayasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7-10. து³தியஸிக்கா²ஸுத்தாதி³வண்ணனா • 7-10. Dutiyasikkhāsuttādivaṇṇanā
