| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
১০. দুতিযসিক্খত্তযসুত্তৰণ্ণনা
10. Dutiyasikkhattayasuttavaṇṇanā
৯১. দসমে আসৰানং খযাতি এত্থ অরহত্তমগ্গো অধিপঞ্ঞাসিক্খা নাম। ফলং পন সিক্খিতসিক্খস্স উপ্পজ্জনতো সিক্খাতি ন ৰত্তব্বং।
91. Dasame āsavānaṃ khayāti ettha arahattamaggo adhipaññāsikkhā nāma. Phalaṃ pana sikkhitasikkhassa uppajjanato sikkhāti na vattabbaṃ.
যথা পুরে তথা পচ্ছাতি যথা পঠমং তীসু সিক্খাসু সিক্খতি, পচ্ছা তথেৰ সিক্খতীতি অত্থো। দুতিযপদেপি এসেৰ নযো। যথা অধো তথা উদ্ধন্তি যথা হেট্ঠিমকাযং অসুভৰসেন পস্সতি, উপরিমকাযম্পি তথেৰ ফরতি। দুতিযপদেপি এসেৰ নযো। যথা দিৰা তথা রত্তিন্তি যথা দিৰা তিস্সো সিক্খা সিক্খতি, রত্তিম্পি তথেৰ সিক্খতীতি অত্থো। অভিভুয্য দিসা সব্বাতি সব্বা দিসা আরম্মণৰসেন অভিভৰিত্ৰা। অপ্পমাণসমাধিনাতি অরহত্তমগ্গসমাধিনা।
Yathāpure tathā pacchāti yathā paṭhamaṃ tīsu sikkhāsu sikkhati, pacchā tatheva sikkhatīti attho. Dutiyapadepi eseva nayo. Yathā adho tathā uddhanti yathā heṭṭhimakāyaṃ asubhavasena passati, uparimakāyampi tatheva pharati. Dutiyapadepi eseva nayo. Yathā divā tathā rattinti yathā divā tisso sikkhā sikkhati, rattimpi tatheva sikkhatīti attho. Abhibhuyya disā sabbāti sabbā disā ārammaṇavasena abhibhavitvā. Appamāṇasamādhināti arahattamaggasamādhinā.
সেক্খন্তি সিক্খমানং সকরণীযং। পটিপদন্তি পটিপন্নকং। সংসুদ্ধচারিযন্তি সংসুদ্ধচরণং পরিসুদ্ধসীলং। সম্বুদ্ধন্তি চতুসচ্চবুদ্ধং। ধীরং পটিপদন্তগুন্তি খন্ধধীরআযতনধীরৰসেন ধীরং ধিতিসম্পন্নং পটিপত্তিযা অন্তং গতং। ৰিঞ্ঞাণস্সাতি চরিমকৰিঞ্ঞাণস্স। তণ্হাক্খযৰিমুত্তিনোতি তণ্হাক্খযৰিমুত্তিসঙ্খাতায অরহত্তফলৰিমুত্তিযা সমন্নাগতস্স। পজ্জোতস্সেৰ নিব্বানন্তি পদীপনিব্বানং ৰিয। ৰিমোক্খো হোতি চেতসোতি চিত্তস্স ৰিমুত্তি ৰিমুচ্চনা অপ্পৰত্তিভাৰো হোতি। তণ্হাক্খযৰিমুত্তিনো হি খীণাসৰস্স চরিমকৰিঞ্ঞাণনিরোধেন পরিনিব্বানং ৰিয চেতসো ৰিমোক্খো হোতি, ন গতট্ঠানং পঞ্ঞাযতি, অপণ্ণত্তিকভাৰূপগমোযেৰ হোতীতি অত্থো।
Sekkhanti sikkhamānaṃ sakaraṇīyaṃ. Paṭipadanti paṭipannakaṃ. Saṃsuddhacāriyanti saṃsuddhacaraṇaṃ parisuddhasīlaṃ. Sambuddhanti catusaccabuddhaṃ. Dhīraṃ paṭipadantagunti khandhadhīraāyatanadhīravasena dhīraṃ dhitisampannaṃ paṭipattiyā antaṃ gataṃ. Viññāṇassāti carimakaviññāṇassa. Taṇhākkhayavimuttinoti taṇhākkhayavimuttisaṅkhātāya arahattaphalavimuttiyā samannāgatassa. Pajjotasseva nibbānanti padīpanibbānaṃ viya. Vimokkho hoti cetasoti cittassa vimutti vimuccanā appavattibhāvo hoti. Taṇhākkhayavimuttino hi khīṇāsavassa carimakaviññāṇanirodhena parinibbānaṃ viya cetaso vimokkho hoti, na gataṭṭhānaṃ paññāyati, apaṇṇattikabhāvūpagamoyeva hotīti attho.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. দুতিযসিক্খত্তযসুত্তং • 10. Dutiyasikkhattayasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৭-১০. দুতিযসিক্খাসুত্তাদিৰণ্ণনা • 7-10. Dutiyasikkhāsuttādivaṇṇanā
