| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
१०. दुतियसिक्खत्तयसुत्तवण्णना
10. Dutiyasikkhattayasuttavaṇṇanā
९१. दसमे आसवानं खयाति एत्थ अरहत्तमग्गो अधिपञ्ञासिक्खा नाम। फलं पन सिक्खितसिक्खस्स उप्पज्जनतो सिक्खाति न वत्तब्बं।
91. Dasame āsavānaṃ khayāti ettha arahattamaggo adhipaññāsikkhā nāma. Phalaṃ pana sikkhitasikkhassa uppajjanato sikkhāti na vattabbaṃ.
यथा पुरे तथा पच्छाति यथा पठमं तीसु सिक्खासु सिक्खति, पच्छा तथेव सिक्खतीति अत्थो। दुतियपदेपि एसेव नयो। यथा अधो तथा उद्धन्ति यथा हेट्ठिमकायं असुभवसेन पस्सति, उपरिमकायम्पि तथेव फरति। दुतियपदेपि एसेव नयो। यथा दिवा तथा रत्तिन्ति यथा दिवा तिस्सो सिक्खा सिक्खति, रत्तिम्पि तथेव सिक्खतीति अत्थो। अभिभुय्य दिसा सब्बाति सब्बा दिसा आरम्मणवसेन अभिभवित्वा। अप्पमाणसमाधिनाति अरहत्तमग्गसमाधिना।
Yathāpure tathā pacchāti yathā paṭhamaṃ tīsu sikkhāsu sikkhati, pacchā tatheva sikkhatīti attho. Dutiyapadepi eseva nayo. Yathā adho tathā uddhanti yathā heṭṭhimakāyaṃ asubhavasena passati, uparimakāyampi tatheva pharati. Dutiyapadepi eseva nayo. Yathā divā tathā rattinti yathā divā tisso sikkhā sikkhati, rattimpi tatheva sikkhatīti attho. Abhibhuyya disā sabbāti sabbā disā ārammaṇavasena abhibhavitvā. Appamāṇasamādhināti arahattamaggasamādhinā.
सेक्खन्ति सिक्खमानं सकरणीयं। पटिपदन्ति पटिपन्नकं। संसुद्धचारियन्ति संसुद्धचरणं परिसुद्धसीलं। सम्बुद्धन्ति चतुसच्चबुद्धं। धीरं पटिपदन्तगुन्ति खन्धधीरआयतनधीरवसेन धीरं धितिसम्पन्नं पटिपत्तिया अन्तं गतं। विञ्ञाणस्साति चरिमकविञ्ञाणस्स। तण्हाक्खयविमुत्तिनोति तण्हाक्खयविमुत्तिसङ्खाताय अरहत्तफलविमुत्तिया समन्नागतस्स। पज्जोतस्सेव निब्बानन्ति पदीपनिब्बानं विय। विमोक्खो होति चेतसोति चित्तस्स विमुत्ति विमुच्चना अप्पवत्तिभावो होति। तण्हाक्खयविमुत्तिनो हि खीणासवस्स चरिमकविञ्ञाणनिरोधेन परिनिब्बानं विय चेतसो विमोक्खो होति, न गतट्ठानं पञ्ञायति, अपण्णत्तिकभावूपगमोयेव होतीति अत्थो।
Sekkhanti sikkhamānaṃ sakaraṇīyaṃ. Paṭipadanti paṭipannakaṃ. Saṃsuddhacāriyanti saṃsuddhacaraṇaṃ parisuddhasīlaṃ. Sambuddhanti catusaccabuddhaṃ. Dhīraṃ paṭipadantagunti khandhadhīraāyatanadhīravasena dhīraṃ dhitisampannaṃ paṭipattiyā antaṃ gataṃ. Viññāṇassāti carimakaviññāṇassa. Taṇhākkhayavimuttinoti taṇhākkhayavimuttisaṅkhātāya arahattaphalavimuttiyā samannāgatassa. Pajjotasseva nibbānanti padīpanibbānaṃ viya. Vimokkho hoti cetasoti cittassa vimutti vimuccanā appavattibhāvo hoti. Taṇhākkhayavimuttino hi khīṇāsavassa carimakaviññāṇanirodhena parinibbānaṃ viya cetaso vimokkho hoti, na gataṭṭhānaṃ paññāyati, apaṇṇattikabhāvūpagamoyeva hotīti attho.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / १०. दुतियसिक्खत्तयसुत्तं • 10. Dutiyasikkhattayasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ७-१०. दुतियसिक्खासुत्तादिवण्णना • 7-10. Dutiyasikkhāsuttādivaṇṇanā
