| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೧೦. ದುತಿಯಸಿಕ್ಖತ್ತಯಸುತ್ತವಣ್ಣನಾ
10. Dutiyasikkhattayasuttavaṇṇanā
೯೧. ದಸಮೇ ಆಸವಾನಂ ಖಯಾತಿ ಏತ್ಥ ಅರಹತ್ತಮಗ್ಗೋ ಅಧಿಪಞ್ಞಾಸಿಕ್ಖಾ ನಾಮ। ಫಲಂ ಪನ ಸಿಕ್ಖಿತಸಿಕ್ಖಸ್ಸ ಉಪ್ಪಜ್ಜನತೋ ಸಿಕ್ಖಾತಿ ನ ವತ್ತಬ್ಬಂ।
91. Dasame āsavānaṃ khayāti ettha arahattamaggo adhipaññāsikkhā nāma. Phalaṃ pana sikkhitasikkhassa uppajjanato sikkhāti na vattabbaṃ.
ಯಥಾ ಪುರೇ ತಥಾ ಪಚ್ಛಾತಿ ಯಥಾ ಪಠಮಂ ತೀಸು ಸಿಕ್ಖಾಸು ಸಿಕ್ಖತಿ, ಪಚ್ಛಾ ತಥೇವ ಸಿಕ್ಖತೀತಿ ಅತ್ಥೋ। ದುತಿಯಪದೇಪಿ ಏಸೇವ ನಯೋ। ಯಥಾ ಅಧೋ ತಥಾ ಉದ್ಧನ್ತಿ ಯಥಾ ಹೇಟ್ಠಿಮಕಾಯಂ ಅಸುಭವಸೇನ ಪಸ್ಸತಿ, ಉಪರಿಮಕಾಯಮ್ಪಿ ತಥೇವ ಫರತಿ। ದುತಿಯಪದೇಪಿ ಏಸೇವ ನಯೋ। ಯಥಾ ದಿವಾ ತಥಾ ರತ್ತಿನ್ತಿ ಯಥಾ ದಿವಾ ತಿಸ್ಸೋ ಸಿಕ್ಖಾ ಸಿಕ್ಖತಿ, ರತ್ತಿಮ್ಪಿ ತಥೇವ ಸಿಕ್ಖತೀತಿ ಅತ್ಥೋ। ಅಭಿಭುಯ್ಯ ದಿಸಾ ಸಬ್ಬಾತಿ ಸಬ್ಬಾ ದಿಸಾ ಆರಮ್ಮಣವಸೇನ ಅಭಿಭವಿತ್ವಾ। ಅಪ್ಪಮಾಣಸಮಾಧಿನಾತಿ ಅರಹತ್ತಮಗ್ಗಸಮಾಧಿನಾ।
Yathāpure tathā pacchāti yathā paṭhamaṃ tīsu sikkhāsu sikkhati, pacchā tatheva sikkhatīti attho. Dutiyapadepi eseva nayo. Yathā adho tathā uddhanti yathā heṭṭhimakāyaṃ asubhavasena passati, uparimakāyampi tatheva pharati. Dutiyapadepi eseva nayo. Yathā divā tathā rattinti yathā divā tisso sikkhā sikkhati, rattimpi tatheva sikkhatīti attho. Abhibhuyya disā sabbāti sabbā disā ārammaṇavasena abhibhavitvā. Appamāṇasamādhināti arahattamaggasamādhinā.
ಸೇಕ್ಖನ್ತಿ ಸಿಕ್ಖಮಾನಂ ಸಕರಣೀಯಂ। ಪಟಿಪದನ್ತಿ ಪಟಿಪನ್ನಕಂ। ಸಂಸುದ್ಧಚಾರಿಯನ್ತಿ ಸಂಸುದ್ಧಚರಣಂ ಪರಿಸುದ್ಧಸೀಲಂ। ಸಮ್ಬುದ್ಧನ್ತಿ ಚತುಸಚ್ಚಬುದ್ಧಂ। ಧೀರಂ ಪಟಿಪದನ್ತಗುನ್ತಿ ಖನ್ಧಧೀರಆಯತನಧೀರವಸೇನ ಧೀರಂ ಧಿತಿಸಮ್ಪನ್ನಂ ಪಟಿಪತ್ತಿಯಾ ಅನ್ತಂ ಗತಂ। ವಿಞ್ಞಾಣಸ್ಸಾತಿ ಚರಿಮಕವಿಞ್ಞಾಣಸ್ಸ। ತಣ್ಹಾಕ್ಖಯವಿಮುತ್ತಿನೋತಿ ತಣ್ಹಾಕ್ಖಯವಿಮುತ್ತಿಸಙ್ಖಾತಾಯ ಅರಹತ್ತಫಲವಿಮುತ್ತಿಯಾ ಸಮನ್ನಾಗತಸ್ಸ। ಪಜ್ಜೋತಸ್ಸೇವ ನಿಬ್ಬಾನನ್ತಿ ಪದೀಪನಿಬ್ಬಾನಂ ವಿಯ। ವಿಮೋಕ್ಖೋ ಹೋತಿ ಚೇತಸೋತಿ ಚಿತ್ತಸ್ಸ ವಿಮುತ್ತಿ ವಿಮುಚ್ಚನಾ ಅಪ್ಪವತ್ತಿಭಾವೋ ಹೋತಿ। ತಣ್ಹಾಕ್ಖಯವಿಮುತ್ತಿನೋ ಹಿ ಖೀಣಾಸವಸ್ಸ ಚರಿಮಕವಿಞ್ಞಾಣನಿರೋಧೇನ ಪರಿನಿಬ್ಬಾನಂ ವಿಯ ಚೇತಸೋ ವಿಮೋಕ್ಖೋ ಹೋತಿ, ನ ಗತಟ್ಠಾನಂ ಪಞ್ಞಾಯತಿ, ಅಪಣ್ಣತ್ತಿಕಭಾವೂಪಗಮೋಯೇವ ಹೋತೀತಿ ಅತ್ಥೋ।
Sekkhanti sikkhamānaṃ sakaraṇīyaṃ. Paṭipadanti paṭipannakaṃ. Saṃsuddhacāriyanti saṃsuddhacaraṇaṃ parisuddhasīlaṃ. Sambuddhanti catusaccabuddhaṃ. Dhīraṃ paṭipadantagunti khandhadhīraāyatanadhīravasena dhīraṃ dhitisampannaṃ paṭipattiyā antaṃ gataṃ. Viññāṇassāti carimakaviññāṇassa. Taṇhākkhayavimuttinoti taṇhākkhayavimuttisaṅkhātāya arahattaphalavimuttiyā samannāgatassa. Pajjotasseva nibbānanti padīpanibbānaṃ viya. Vimokkho hoti cetasoti cittassa vimutti vimuccanā appavattibhāvo hoti. Taṇhākkhayavimuttino hi khīṇāsavassa carimakaviññāṇanirodhena parinibbānaṃ viya cetaso vimokkho hoti, na gataṭṭhānaṃ paññāyati, apaṇṇattikabhāvūpagamoyeva hotīti attho.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೧೦. ದುತಿಯಸಿಕ್ಖತ್ತಯಸುತ್ತಂ • 10. Dutiyasikkhattayasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೭-೧೦. ದುತಿಯಸಿಕ್ಖಾಸುತ್ತಾದಿವಣ್ಣನಾ • 7-10. Dutiyasikkhāsuttādivaṇṇanā
