| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
10. දුතියසික්‌ඛත්‌තයසුත්‌තවණ්‌ණනා
10. Dutiyasikkhattayasuttavaṇṇanā
91. දසමෙ ආසවානං ඛයාති එත්‌ථ අරහත්‌තමග්‌ගො අධිපඤ්‌ඤාසික්‌ඛා නාම. ඵලං පන සික්‌ඛිතසික්‌ඛස්‌ස උප්‌පජ්‌ජනතො සික්‌ඛාති න වත්‌තබ්‌බං.
91. Dasame āsavānaṃ khayāti ettha arahattamaggo adhipaññāsikkhā nāma. Phalaṃ pana sikkhitasikkhassa uppajjanato sikkhāti na vattabbaṃ.
යථා පුරෙ තථා පච්‌ඡාති යථා පඨමං තීසු සික්‌ඛාසු සික්‌ඛති, පච්‌ඡා තථෙව සික්‌ඛතීති අත්‌ථො. දුතියපදෙපි එසෙව නයො. යථා අධො තථා උද්‌ධන්‌ති යථා හෙට්‌ඨිමකායං අසුභවසෙන පස්‌සති, උපරිමකායම්‌පි තථෙව ඵරති. දුතියපදෙපි එසෙව නයො. යථා දිවා තථා රත්‌තින්‌ති යථා දිවා තිස්‌සො සික්‌ඛා සික්‌ඛති, රත්‌තිම්‌පි තථෙව සික්‌ඛතීති අත්‌ථො. අභිභුය්‍ය දිසා සබ්‌බාති සබ්‌බා දිසා ආරම්‌මණවසෙන අභිභවිත්‌වා. අප්‌පමාණසමාධිනාති අරහත්‌තමග්‌ගසමාධිනා.
Yathāpure tathā pacchāti yathā paṭhamaṃ tīsu sikkhāsu sikkhati, pacchā tatheva sikkhatīti attho. Dutiyapadepi eseva nayo. Yathā adho tathā uddhanti yathā heṭṭhimakāyaṃ asubhavasena passati, uparimakāyampi tatheva pharati. Dutiyapadepi eseva nayo. Yathā divā tathā rattinti yathā divā tisso sikkhā sikkhati, rattimpi tatheva sikkhatīti attho. Abhibhuyya disā sabbāti sabbā disā ārammaṇavasena abhibhavitvā. Appamāṇasamādhināti arahattamaggasamādhinā.
සෙක්‌ඛන්‌ති සික්‌ඛමානං සකරණීයං. පටිපදන්‌ති පටිපන්‌නකං. සංසුද්‌ධචාරියන්‌ති සංසුද්‌ධචරණං පරිසුද්‌ධසීලං. සම්‌බුද්‌ධන්‌ති චතුසච්‌චබුද්‌ධං. ධීරං පටිපදන්‌තගුන්‌ති ඛන්‌ධධීරආයතනධීරවසෙන ධීරං ධිතිසම්‌පන්‌නං පටිපත්‌තියා අන්‌තං ගතං. විඤ්‌ඤාණස්‌සාති චරිමකවිඤ්‌ඤාණස්‌ස. තණ්‌හාක්‌ඛයවිමුත්‌තිනොති තණ්‌හාක්‌ඛයවිමුත්‌තිසඞ්‌ඛාතාය අරහත්‌තඵලවිමුත්‌තියා සමන්‌නාගතස්‌ස. පජ්‌ජොතස්‌සෙව නිබ්‌බානන්‌ති පදීපනිබ්‌බානං විය. විමොක්‌ඛො හොති චෙතසොති චිත්‌තස්‌ස විමුත්‌ති විමුච්‌චනා අප්‌පවත්‌තිභාවො හොති. තණ්‌හාක්‌ඛයවිමුත්‌තිනො හි ඛීණාසවස්‌ස චරිමකවිඤ්‌ඤාණනිරොධෙන පරිනිබ්‌බානං විය චෙතසො විමොක්‌ඛො හොති, න ගතට්‌ඨානං පඤ්‌ඤායති, අපණ්‌ණත්‌තිකභාවූපගමොයෙව හොතීති අත්‌ථො.
Sekkhanti sikkhamānaṃ sakaraṇīyaṃ. Paṭipadanti paṭipannakaṃ. Saṃsuddhacāriyanti saṃsuddhacaraṇaṃ parisuddhasīlaṃ. Sambuddhanti catusaccabuddhaṃ. Dhīraṃ paṭipadantagunti khandhadhīraāyatanadhīravasena dhīraṃ dhitisampannaṃ paṭipattiyā antaṃ gataṃ. Viññāṇassāti carimakaviññāṇassa. Taṇhākkhayavimuttinoti taṇhākkhayavimuttisaṅkhātāya arahattaphalavimuttiyā samannāgatassa. Pajjotasseva nibbānanti padīpanibbānaṃ viya. Vimokkho hoti cetasoti cittassa vimutti vimuccanā appavattibhāvo hoti. Taṇhākkhayavimuttino hi khīṇāsavassa carimakaviññāṇanirodhena parinibbānaṃ viya cetaso vimokkho hoti, na gataṭṭhānaṃ paññāyati, apaṇṇattikabhāvūpagamoyeva hotīti attho.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 10. දුතියසික්‌ඛත්‌තයසුත්‌තං • 10. Dutiyasikkhattayasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 7-10. දුතියසික්‌ඛාසුත්‌තාදිවණ්‌ණනා • 7-10. Dutiyasikkhāsuttādivaṇṇanā
