| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. দুতিযসিনেরুপব্বতরাজসুত্তং
10. Dutiyasinerupabbatarājasuttaṃ
১১২০. ‘‘সেয্যথাপি, ভিক্খৰে, সিনেরুপব্বতরাজাযং পরিক্খযং পরিযাদানং গচ্ছেয্য, ঠপেত্ৰা সত্ত মুগ্গমত্তিযো পাসাণসক্খরা। তং কিং মঞ্ঞথ, ভিক্খৰে, কতমং নু খো বহুতরং – যং ৰা সিনেরুস্স পব্বতরাজস্স পরিক্খীণং পরিযাদিন্নং, যা ৰা সত্ত মুগ্গমত্তিযো পাসাণসক্খরা অৰসিট্ঠা’’তি? ‘‘এতদেৰ, ভন্তে, বহুতরং সিনেরুস্স পব্বতরাজস্স যদিদং পরিক্খীণং পরিযাদিন্নং; অপ্পমত্তিকা সত্ত মুগ্গমত্তিযো পাসাণসক্খরা অৰসিট্ঠা। সঙ্খম্পি ন উপেন্তি, উপনিধম্পি ন উপেন্তি, কলভাগম্পি ন উপেন্তি সিনেরুস্স পব্বতরাজস্স পরিক্খীণং পরিযাদিন্নং উপনিধায সত্ত মুগ্গমত্তিযো পাসাণসক্খরা অৰসিট্ঠা’’তি। ‘‘এৰমেৰ খো, ভিক্খৰে, অরিযসাৰকস্স দিট্ঠিসম্পন্নস্স পুগ্গলস্স অভিসমেতাৰিনো এতদেৰ বহুতরং দুক্খং যদিদং পরিক্খীণং পরিযাদিন্নং; অপ্পমত্তকং অৰসিট্ঠং। সঙ্খম্পি ন উপেতি, উপনিধম্পি ন উপেতি, কলভাগম্পি ন উপেতি, পুরিমং দুক্খক্খন্ধং পরিক্খীণং পরিযাদিন্নং উপনিধায যদিদং সত্তক্খত্তুপরমতা; যো ‘ইদং দুক্খ’ন্তি যথাভূতং পজানাতি…পে॰… ‘অযং দুক্খনিরোধগামিনী পটিপদা’তি যথাভূতং পজানাতি’’।
1120. ‘‘Seyyathāpi, bhikkhave, sinerupabbatarājāyaṃ parikkhayaṃ pariyādānaṃ gaccheyya, ṭhapetvā satta muggamattiyo pāsāṇasakkharā. Taṃ kiṃ maññatha, bhikkhave, katamaṃ nu kho bahutaraṃ – yaṃ vā sinerussa pabbatarājassa parikkhīṇaṃ pariyādinnaṃ, yā vā satta muggamattiyo pāsāṇasakkharā avasiṭṭhā’’ti? ‘‘Etadeva, bhante, bahutaraṃ sinerussa pabbatarājassa yadidaṃ parikkhīṇaṃ pariyādinnaṃ; appamattikā satta muggamattiyo pāsāṇasakkharā avasiṭṭhā. Saṅkhampi na upenti, upanidhampi na upenti, kalabhāgampi na upenti sinerussa pabbatarājassa parikkhīṇaṃ pariyādinnaṃ upanidhāya satta muggamattiyo pāsāṇasakkharā avasiṭṭhā’’ti. ‘‘Evameva kho, bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ; appamattakaṃ avasiṭṭhaṃ. Saṅkhampi na upeti, upanidhampi na upeti, kalabhāgampi na upeti, purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattuparamatā; yo ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti’’.
‘‘তস্মাতিহ, ভিক্খৰে, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। দসমং।
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dasamaṃ.
পপাতৰগ্গো পঞ্চমো।
Papātavaggo pañcamo.
তস্সুদ্দানং –
Tassuddānaṃ –
চিন্তা পপাতো পরিল়াহো, কূটং ৰালন্ধকারো চ।
Cintā papāto pariḷāho, kūṭaṃ vālandhakāro ca;
ছিগ্গল়েন চ দ্ৰে ৰুত্তা, সিনেরু অপরে দুৰেতি॥
Chiggaḷena ca dve vuttā, sineru apare duveti.
