| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. து³தியஸோணஸுத்தங்
8. Dutiyasoṇasuttaṃ
50. ஏவங் மே ஸுதங் – ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² ஸோணோ க³ஹபதிபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஸோணங் க³ஹபதிபுத்தங் ப⁴க³வா ஏதத³வோச –
50. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Atha kho soṇo gahapatiputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho soṇaṃ gahapatiputtaṃ bhagavā etadavoca –
‘‘யே ஹி கேசி, ஸோண, ஸமணா வா ப்³ராஹ்மணா வா ரூபங் நப்பஜானந்தி, ரூபஸமுத³யங் நப்பஜானந்தி, ரூபனிரோத⁴ங் நப்பஜானந்தி, ரூபனிரோத⁴கா³மினிங் படிபத³ங் நப்பஜானந்தி; வேத³னங் நப்பஜானந்தி, வேத³னாஸமுத³யங் நப்பஜானந்தி, வேத³னானிரோத⁴ங் நப்பஜானந்தி, வேத³னானிரோத⁴கா³மினிங் படிபத³ங் நப்பஜானந்தி; ஸஞ்ஞங் நப்பஜானந்தி…பே॰… ஸங்கா²ரே நப்பஜானந்தி, ஸங்கா²ரஸமுத³யங் நப்பஜானந்தி, ஸங்கா²ரனிரோத⁴ங் நப்பஜானந்தி, ஸங்கா²ரனிரோத⁴கா³மினிங் படிபத³ங் நப்பஜானந்தி; விஞ்ஞாணங் நப்பஜானந்தி, விஞ்ஞாணஸமுத³யங் நப்பஜானந்தி, விஞ்ஞாணனிரோத⁴ங் நப்பஜானந்தி, விஞ்ஞாணனிரோத⁴கா³மினிங் படிபத³ங் நப்பஜானந்தி. ந மே தே, ஸோண, ஸமணா வா ப்³ராஹ்மணா வா ஸமணேஸு வா ஸமணஸம்மதா ப்³ராஹ்மணேஸு வா ப்³ராஹ்மணஸம்மதா, ந ச பன தே ஆயஸ்மந்தோ ஸாமஞ்ஞத்த²ங் வா ப்³ரஹ்மஞ்ஞத்த²ங் வா தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி.
‘‘Ye hi keci, soṇa, samaṇā vā brāhmaṇā vā rūpaṃ nappajānanti, rūpasamudayaṃ nappajānanti, rūpanirodhaṃ nappajānanti, rūpanirodhagāminiṃ paṭipadaṃ nappajānanti; vedanaṃ nappajānanti, vedanāsamudayaṃ nappajānanti, vedanānirodhaṃ nappajānanti, vedanānirodhagāminiṃ paṭipadaṃ nappajānanti; saññaṃ nappajānanti…pe… saṅkhāre nappajānanti, saṅkhārasamudayaṃ nappajānanti, saṅkhāranirodhaṃ nappajānanti, saṅkhāranirodhagāminiṃ paṭipadaṃ nappajānanti; viññāṇaṃ nappajānanti, viññāṇasamudayaṃ nappajānanti, viññāṇanirodhaṃ nappajānanti, viññāṇanirodhagāminiṃ paṭipadaṃ nappajānanti. Na me te, soṇa, samaṇā vā brāhmaṇā vā samaṇesu vā samaṇasammatā brāhmaṇesu vā brāhmaṇasammatā, na ca pana te āyasmanto sāmaññatthaṃ vā brahmaññatthaṃ vā diṭṭheva dhamme sayaṃ abhiññā sacchikatvā upasampajja viharanti.
‘‘யே ச கோ² கேசி, ஸோண, ஸமணா வா ப்³ராஹ்மணா வா ரூபங் பஜானந்தி , ரூபஸமுத³யங் பஜானந்தி, ரூபனிரோத⁴ங் பஜானந்தி, ரூபனிரோத⁴கா³மினிங் படிபத³ங் பஜானந்தி; வேத³னங் பஜானந்தி…பே॰… ஸஞ்ஞங் பஜானந்தி… ஸங்கா²ரே பஜானந்தி… விஞ்ஞாணங் பஜானந்தி, விஞ்ஞாணஸமுத³யங் பஜானந்தி, விஞ்ஞாணனிரோத⁴ங் பஜானந்தி, விஞ்ஞாணனிரோத⁴கா³மினிங் படிபத³ங் பஜானந்தி. தே ச கோ² மே, ஸோண, ஸமணா வா ப்³ராஹ்மணா வா ஸமணேஸு சேவ ஸமணஸம்மதா ப்³ராஹ்மணேஸு ச ப்³ராஹ்மணஸம்மதா, தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. அட்ட²மங்.
‘‘Ye ca kho keci, soṇa, samaṇā vā brāhmaṇā vā rūpaṃ pajānanti , rūpasamudayaṃ pajānanti, rūpanirodhaṃ pajānanti, rūpanirodhagāminiṃ paṭipadaṃ pajānanti; vedanaṃ pajānanti…pe… saññaṃ pajānanti… saṅkhāre pajānanti… viññāṇaṃ pajānanti, viññāṇasamudayaṃ pajānanti, viññāṇanirodhaṃ pajānanti, viññāṇanirodhagāminiṃ paṭipadaṃ pajānanti. Te ca kho me, soṇa, samaṇā vā brāhmaṇā vā samaṇesu ceva samaṇasammatā brāhmaṇesu ca brāhmaṇasammatā, te ca panāyasmanto sāmaññatthañca brahmaññatthañca diṭṭheva dhamme sayaṃ abhiññā sacchikatvā upasampajja viharantī’’ti. Aṭṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7-8. ஸோணஸுத்தாதி³வண்ணனா • 7-8. Soṇasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7-8. ஸோணஸுத்தாதி³வண்ணனா • 7-8. Soṇasuttādivaṇṇanā
