| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༤. དུཏིཡསོཝཙསྶཏཱསུཏྟཾ
4. Dutiyasovacassatāsuttaṃ
༣༥. ‘‘ཨིམཾ , བྷིཀྑཝེ, རཏྟིཾ ཨཉྙཏརཱ དེཝཏཱ ཨབྷིཀྐནྟཱཡ རཏྟིཡཱ ཨབྷིཀྐནྟཝཎྞཱ…པེ॰… ‘སཏྟིམེ, བྷནྟེ, དྷམྨཱ བྷིཀྑུནོ ཨཔརིཧཱནཱཡ སཾཝཏྟནྟི། ཀཏམེ སཏྟ? སཏྠུགཱརཝཏཱ, དྷམྨགཱརཝཏཱ, སངྒྷགཱརཝཏཱ, སིཀྑཱགཱརཝཏཱ, སམཱདྷིགཱརཝཏཱ, སོཝཙསྶཏཱ, ཀལྱཱཎམིཏྟཏཱ། ཨིམེ ཁོ, བྷནྟེ, སཏྟ དྷམྨཱ བྷིཀྑུནོ ཨཔརིཧཱནཱཡ སཾཝཏྟནྟཱི’ཏི། ཨིདམཝོཙ, བྷིཀྑཝེ, སཱ དེཝཏཱ། ཨིདཾ ཝཏྭཱ མཾ ཨབྷིཝཱདེཏྭཱ པདཀྑིཎཾ ཀཏྭཱ ཏཏྠེཝནྟརདྷཱཡཱི’’ཏི།
35. ‘‘Imaṃ , bhikkhave, rattiṃ aññatarā devatā abhikkantāya rattiyā abhikkantavaṇṇā…pe… ‘sattime, bhante, dhammā bhikkhuno aparihānāya saṃvattanti. Katame satta? Satthugāravatā, dhammagāravatā, saṅghagāravatā, sikkhāgāravatā, samādhigāravatā, sovacassatā, kalyāṇamittatā. Ime kho, bhante, satta dhammā bhikkhuno aparihānāya saṃvattantī’ti. Idamavoca, bhikkhave, sā devatā. Idaṃ vatvā maṃ abhivādetvā padakkhiṇaṃ katvā tatthevantaradhāyī’’ti.
ཨེཝཾ ཝུཏྟེ ཨཱཡསྨཱ སཱརིཔུཏྟོ བྷགཝནྟཾ ཨེཏདཝོཙ – ‘‘ཨིམསྶ ཁོ ཨཧཾ, བྷནྟེ, བྷགཝཏཱ སཾཁིཏྟེན བྷཱསིཏསྶ ཨེཝཾ ཝིཏྠཱརེན ཨཏྠཾ ཨཱཛཱནཱམི། ཨིདྷ, བྷནྟེ, བྷིཀྑུ ཨཏྟནཱ ཙ སཏྠུགཱརཝོ ཧོཏི, སཏྠུགཱརཝཏཱཡ ཙ ཝཎྞཝཱདཱི། ཡེ ཙཉྙེ བྷིཀྑཱུ ན སཏྠུགཱརཝཱ ཏེ ཙ སཏྠུགཱརཝཏཱཡ སམཱདཔེཏི། ཡེ ཙཉྙེ བྷིཀྑཱུ སཏྠུགཱརཝཱ ཏེསཉྩ ཝཎྞཾ བྷཎཏི བྷཱུཏཾ ཏཙྪཾ ཀཱལེན། ཨཏྟནཱ ཙ དྷམྨགཱརཝོ ཧོཏི…པེ॰… སངྒྷགཱརཝོ ཧོཏི… སིཀྑཱགཱརཝོ ཧོཏི… སམཱདྷིགཱརཝོ ཧོཏི… སུཝཙོ ཧོཏི… ཀལྱཱཎམིཏྟོ ཧོཏི, ཀལྱཱཎམིཏྟཏཱཡ ཙ ཝཎྞཝཱདཱི། ཡེ ཙཉྙེ བྷིཀྑཱུ ན ཀལྱཱཎམིཏྟཱ ཏེ ཙ ཀལྱཱཎམིཏྟཏཱཡ སམཱདཔེཏི ། ཡེ ཙཉྙེ བྷིཀྑཱུ ཀལྱཱཎམིཏྟཱ ཏེསཉྩ ཝཎྞཾ བྷཎཏི བྷཱུཏཾ ཏཙྪཾ ཀཱལེནཱཏི། ཨིམསྶ ཁོ ཨཧཾ, བྷནྟེ, བྷགཝཏཱ སཾཁིཏྟེན བྷཱསིཏསྶ ཨེཝཾ ཝིཏྠཱརེན ཨཏྠཾ ཨཱཛཱནཱམཱི’’ཏི།
Evaṃ vutte āyasmā sāriputto bhagavantaṃ etadavoca – ‘‘imassa kho ahaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmi. Idha, bhante, bhikkhu attanā ca satthugāravo hoti, satthugāravatāya ca vaṇṇavādī. Ye caññe bhikkhū na satthugāravā te ca satthugāravatāya samādapeti. Ye caññe bhikkhū satthugāravā tesañca vaṇṇaṃ bhaṇati bhūtaṃ tacchaṃ kālena. Attanā ca dhammagāravo hoti…pe… saṅghagāravo hoti… sikkhāgāravo hoti… samādhigāravo hoti… suvaco hoti… kalyāṇamitto hoti, kalyāṇamittatāya ca vaṇṇavādī. Ye caññe bhikkhū na kalyāṇamittā te ca kalyāṇamittatāya samādapeti . Ye caññe bhikkhū kalyāṇamittā tesañca vaṇṇaṃ bhaṇati bhūtaṃ tacchaṃ kālenāti. Imassa kho ahaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti.
‘‘སཱདྷུ སཱདྷུ, སཱརིཔུཏྟ! སཱདྷུ ཁོ ཏྭཾ, སཱརིཔུཏྟ, ཨིམསྶ མཡཱ སཾཁིཏྟེན བྷཱསིཏསྶ ཨེཝཾ ཝིཏྠཱརེན ཨཏྠཾ ཨཱཛཱནཱསི། ཨིདྷ, སཱརིཔུཏྟ, བྷིཀྑུ ཨཏྟནཱ ཙ སཏྠུགཱརཝོ ཧོཏི, སཏྠུགཱརཝཏཱཡ ཙ ཝཎྞཝཱདཱི། ཡེ ཙཉྙེ བྷིཀྑཱུ ན སཏྠུགཱརཝཱ ཏེ ཙ སཏྠུགཱརཝཏཱཡ སམཱདཔེཏི ། ཡེ ཙཉྙེ བྷིཀྑཱུ སཏྠུགཱརཝཱ ཏེསཉྩ ཝཎྞཾ བྷཎཏི བྷཱུཏཾ ཏཙྪཾ ཀཱལེན། ཨཏྟནཱ ཙ དྷམྨགཱརཝོ ཧོཏི…པེ॰… སངྒྷགཱརཝོ ཧོཏི… སིཀྑཱགཱརཝོ ཧོཏི… སམཱདྷིགཱརཝོ ཧོཏི… སུཝཙོ ཧོཏི… ཀལྱཱཎམིཏྟོ ཧོཏི, ཀལྱཱཎམིཏྟཏཱཡ ཙ ཝཎྞཝཱདཱི། ཡེ ཙཉྙེ བྷིཀྑཱུ ན ཀལྱཱཎམིཏྟཱ ཏེ ཙ ཀལྱཱཎམིཏྟཏཱཡ སམཱདཔེཏི། ཡེ ཙཉྙེ བྷིཀྑཱུ ཀལྱཱཎམིཏྟཱ ཏེསཉྩ ཝཎྞཾ བྷཎཏི བྷཱུཏཾ ཏཙྪཾ ཀཱལེནཱཏི། ཨིམསྶ ཁོ, སཱརིཔུཏྟ, མཡཱ སཾཁིཏྟེན བྷཱསིཏསྶ ཨེཝཾ ཝིཏྠཱརེན ཨཏྠོ དཊྛབྦོ’’ཏི། ཙཏུཏྠཾ།
‘‘Sādhu sādhu, sāriputta! Sādhu kho tvaṃ, sāriputta, imassa mayā saṃkhittena bhāsitassa evaṃ vitthārena atthaṃ ājānāsi. Idha, sāriputta, bhikkhu attanā ca satthugāravo hoti, satthugāravatāya ca vaṇṇavādī. Ye caññe bhikkhū na satthugāravā te ca satthugāravatāya samādapeti . Ye caññe bhikkhū satthugāravā tesañca vaṇṇaṃ bhaṇati bhūtaṃ tacchaṃ kālena. Attanā ca dhammagāravo hoti…pe… saṅghagāravo hoti… sikkhāgāravo hoti… samādhigāravo hoti… suvaco hoti… kalyāṇamitto hoti, kalyāṇamittatāya ca vaṇṇavādī. Ye caññe bhikkhū na kalyāṇamittā te ca kalyāṇamittatāya samādapeti. Ye caññe bhikkhū kalyāṇamittā tesañca vaṇṇaṃ bhaṇati bhūtaṃ tacchaṃ kālenāti. Imassa kho, sāriputta, mayā saṃkhittena bhāsitassa evaṃ vitthārena attho daṭṭhabbo’’ti. Catutthaṃ.
