| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៦. ទុតិយសុខសុត្តំ
6. Dutiyasukhasuttaṃ
៦៦. ឯកំ សមយំ អាយស្មា សារិបុត្តោ មគធេសុ វិហរតិ នាលកគាមកេ។ អថ ខោ សាមណ្ឌកានិ បរិព្ពាជកោ យេនាយស្មា សារិបុត្តោ តេនុបសង្កមិ; ឧបសង្កមិត្វា អាយស្មតា សារិបុត្តេន សទ្ធិំ សម្មោទិ។ សម្មោទនីយំ កថំ សារណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ សាមណ្ឌកានិ បរិព្ពាជកោ អាយស្មន្តំ សារិបុត្តំ ឯតទវោច –
66. Ekaṃ samayaṃ āyasmā sāriputto magadhesu viharati nālakagāmake. Atha kho sāmaṇḍakāni paribbājako yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho sāmaṇḍakāni paribbājako āyasmantaṃ sāriputtaṃ etadavoca –
‘‘កិំ នុ ខោ, អាវុសោ, សារិបុត្ត, ឥមស្មិំ ធម្មវិនយេ សុខំ, កិំ ទុក្ខ’’ន្តិ? ‘‘អនភិរតិ ខោ, អាវុសោ, ឥមស្មិំ ធម្មវិនយេ ទុក្ខា, អភិរតិ សុខា។ អនភិរតិយា, អាវុសោ, សតិ ឥទំ ទុក្ខំ បាដិកង្ខំ – គច្ឆន្តោបិ សុខំ សាតំ នាធិគច្ឆតិ, ឋិតោបិ… និសិន្នោបិ… សយានោបិ… គាមគតោបិ… អរញ្ញគតោបិ… រុក្ខមូលគតោបិ… សុញ្ញាគារគតោបិ… អព្ភោកាសគតោបិ… ភិក្ខុមជ្ឈគតោបិ សុខំ សាតំ នាធិគច្ឆតិ។ អនភិរតិយា, អាវុសោ, សតិ ឥទំ ទុក្ខំ បាដិកង្ខំ។
‘‘Kiṃ nu kho, āvuso, sāriputta, imasmiṃ dhammavinaye sukhaṃ, kiṃ dukkha’’nti? ‘‘Anabhirati kho, āvuso, imasmiṃ dhammavinaye dukkhā, abhirati sukhā. Anabhiratiyā, āvuso, sati idaṃ dukkhaṃ pāṭikaṅkhaṃ – gacchantopi sukhaṃ sātaṃ nādhigacchati, ṭhitopi… nisinnopi… sayānopi… gāmagatopi… araññagatopi… rukkhamūlagatopi… suññāgāragatopi… abbhokāsagatopi… bhikkhumajjhagatopi sukhaṃ sātaṃ nādhigacchati. Anabhiratiyā, āvuso, sati idaṃ dukkhaṃ pāṭikaṅkhaṃ.
‘‘អភិរតិយា, អាវុសោ, សតិ ឥទំ សុខំ បាដិកង្ខំ – គច្ឆន្តោបិ សុខំ សាតំ អធិគច្ឆតិ, ឋិតោបិ… និសិន្នោបិ… សយានោបិ… គាមគតោបិ… អរញ្ញគតោបិ… រុក្ខមូលគតោបិ… សុញ្ញាគារគតោបិ… អព្ភោកាសគតោបិ… ភិក្ខុមជ្ឈគតោបិ សុខំ សាតំ អធិគច្ឆតិ។ អភិរតិយា, អាវុសោ, សតិ ឥទំ សុខំ បាដិកង្ខ’’ន្តិ។ ឆដ្ឋំ។
‘‘Abhiratiyā, āvuso, sati idaṃ sukhaṃ pāṭikaṅkhaṃ – gacchantopi sukhaṃ sātaṃ adhigacchati, ṭhitopi… nisinnopi… sayānopi… gāmagatopi… araññagatopi… rukkhamūlagatopi… suññāgāragatopi… abbhokāsagatopi… bhikkhumajjhagatopi sukhaṃ sātaṃ adhigacchati. Abhiratiyā, āvuso, sati idaṃ sukhaṃ pāṭikaṅkha’’nti. Chaṭṭhaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៥-៧. បឋមសុខសុត្តាទិវណ្ណនា • 5-7. Paṭhamasukhasuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១-៧. អវិជ្ជាសុត្តាទិវណ្ណនា • 1-7. Avijjāsuttādivaṇṇanā
