| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
6. දුතියසුඛසුත්‌තං
6. Dutiyasukhasuttaṃ
66. එකං සමයං ආයස්‌මා සාරිපුත්‌තො මගධෙසු විහරති නාලකගාමකෙ. අථ ඛො සාමණ්‌ඩකානි පරිබ්‌බාජකො යෙනායස්‌මා සාරිපුත්‌තො තෙනුපසඞ්‌කමි; උපසඞ්‌කමිත්‌වා ආයස්‌මතා සාරිපුත්‌තෙන සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො සාමණ්‌ඩකානි පරිබ්‌බාජකො ආයස්‌මන්‌තං සාරිපුත්‌තං එතදවොච –
66. Ekaṃ samayaṃ āyasmā sāriputto magadhesu viharati nālakagāmake. Atha kho sāmaṇḍakāni paribbājako yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho sāmaṇḍakāni paribbājako āyasmantaṃ sāriputtaṃ etadavoca –
‘‘කිං නු ඛො, ආවුසො, සාරිපුත්‌ත, ඉමස්‌මිං ධම්‌මවිනයෙ සුඛං, කිං දුක්‌ඛ’’න්‌ති? ‘‘අනභිරති ඛො, ආවුසො, ඉමස්‌මිං ධම්‌මවිනයෙ දුක්‌ඛා, අභිරති සුඛා. අනභිරතියා, ආවුසො, සති ඉදං දුක්‌ඛං පාටිකඞ්‌ඛං – ගච්‌ඡන්‌තොපි සුඛං සාතං නාධිගච්‌ඡති, ඨිතොපි… නිසින්‌නොපි… සයානොපි… ගාමගතොපි… අරඤ්‌ඤගතොපි… රුක්‌ඛමූලගතොපි… සුඤ්‌ඤාගාරගතොපි… අබ්‌භොකාසගතොපි… භික්‌ඛුමජ්‌ඣගතොපි සුඛං සාතං නාධිගච්‌ඡති. අනභිරතියා, ආවුසො, සති ඉදං දුක්‌ඛං පාටිකඞ්‌ඛං.
‘‘Kiṃ nu kho, āvuso, sāriputta, imasmiṃ dhammavinaye sukhaṃ, kiṃ dukkha’’nti? ‘‘Anabhirati kho, āvuso, imasmiṃ dhammavinaye dukkhā, abhirati sukhā. Anabhiratiyā, āvuso, sati idaṃ dukkhaṃ pāṭikaṅkhaṃ – gacchantopi sukhaṃ sātaṃ nādhigacchati, ṭhitopi… nisinnopi… sayānopi… gāmagatopi… araññagatopi… rukkhamūlagatopi… suññāgāragatopi… abbhokāsagatopi… bhikkhumajjhagatopi sukhaṃ sātaṃ nādhigacchati. Anabhiratiyā, āvuso, sati idaṃ dukkhaṃ pāṭikaṅkhaṃ.
‘‘අභිරතියා, ආවුසො, සති ඉදං සුඛං පාටිකඞ්‌ඛං – ගච්‌ඡන්‌තොපි සුඛං සාතං අධිගච්‌ඡති, ඨිතොපි… නිසින්‌නොපි… සයානොපි… ගාමගතොපි… අරඤ්‌ඤගතොපි… රුක්‌ඛමූලගතොපි… සුඤ්‌ඤාගාරගතොපි… අබ්‌භොකාසගතොපි… භික්‌ඛුමජ්‌ඣගතොපි සුඛං සාතං අධිගච්‌ඡති. අභිරතියා, ආවුසො, සති ඉදං සුඛං පාටිකඞ්‌ඛ’’න්‌ති. ඡට්‌ඨං.
‘‘Abhiratiyā, āvuso, sati idaṃ sukhaṃ pāṭikaṅkhaṃ – gacchantopi sukhaṃ sātaṃ adhigacchati, ṭhitopi… nisinnopi… sayānopi… gāmagatopi… araññagatopi… rukkhamūlagatopi… suññāgāragatopi… abbhokāsagatopi… bhikkhumajjhagatopi sukhaṃ sātaṃ adhigacchati. Abhiratiyā, āvuso, sati idaṃ sukhaṃ pāṭikaṅkha’’nti. Chaṭṭhaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5-7. පඨමසුඛසුත්‌තාදිවණ්‌ණනා • 5-7. Paṭhamasukhasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-7. අවිජ්‌ජාසුත්‌තාදිවණ්‌ණනා • 1-7. Avijjāsuttādivaṇṇanā
