| Library / Tipiṭaka / তিপিটক • Tipiṭaka / ৰিমানৰত্থু-অট্ঠকথা • Vimānavatthu-aṭṭhakathā |
১৪. দুতিযসুণিসাৰিমানৰণ্ণনা
14. Dutiyasuṇisāvimānavaṇṇanā
অভিক্কন্তেন ৰণ্ণেনাতি দুতিযসুণিসাৰিমানং। এত্থ পন অপুব্বং নত্থি, অট্ঠুপ্পত্তিযং কুম্মাসদানমেৰ ৰিসেসো। তেন ৰুত্তং –
Abhikkantenavaṇṇenāti dutiyasuṇisāvimānaṃ. Ettha pana apubbaṃ natthi, aṭṭhuppattiyaṃ kummāsadānameva viseso. Tena vuttaṃ –
১১৬.
116.
‘‘অভিক্কন্তেন ৰণ্ণেন, যা ত্ৰং তিট্ঠসি দেৰতে।
‘‘Abhikkantena vaṇṇena, yā tvaṃ tiṭṭhasi devate;
ওভাসেন্তী দিসা সব্বা, ওসধী ৰিয তারকা॥
Obhāsentī disā sabbā, osadhī viya tārakā.
১১৭.
117.
‘‘কেন তেতাদিসো ৰণ্ণো, কেন তে ইধ মিজ্ঝতি।
‘‘Kena tetādiso vaṇṇo, kena te idha mijjhati;
উপ্পজ্জন্তি চ তে ভোগা, যে কেচি মনসো পিযা॥
Uppajjanti ca te bhogā, ye keci manaso piyā.
১১৮.
118.
‘‘পুচ্ছামি তং দেৰি মহানুভাৰে, মনুস্সভূতা কিমকাসি পুঞ্ঞং।
‘‘Pucchāmi taṃ devi mahānubhāve, manussabhūtā kimakāsi puññaṃ;
কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি॥
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
১১৯.
119.
‘‘সা দেৰতা অত্তমনা, মোগ্গল্লানেন পুচ্ছিতা।
‘‘Sā devatā attamanā, moggallānena pucchitā;
পঞ্হং পুট্ঠা ৰিযাকাসি, যস্স কম্মস্সিদং ফলং’’॥
Pañhaṃ puṭṭhā viyākāsi, yassa kammassidaṃ phalaṃ’’.
১২০.
120.
‘‘অহং মনুস্সেসু মনুস্সভূতা, সুণিসা অহোসিং সসুরস্স গেহে॥
‘‘Ahaṃ manussesu manussabhūtā, suṇisā ahosiṃ sasurassa gehe.
১২১.
121.
‘‘অদ্দসং ৰিরজং ভিক্খুং, ৰিপ্পসন্নমনাৰিলং।
‘‘Addasaṃ virajaṃ bhikkhuṃ, vippasannamanāvilaṃ;
তস্স অদাসহং ভাগং, পসন্না সেহি পাণিভি।
Tassa adāsahaṃ bhāgaṃ, pasannā sehi pāṇibhi;
কুম্মাসপিণ্ডং দত্ৰান, মোদামি নন্দনে ৰনে॥
Kummāsapiṇḍaṃ datvāna, modāmi nandane vane.
১২২.
122.
‘‘তেন মেতাদিসো ৰণ্ণো, তেন মে ইধ মিজ্ঝতি।
‘‘Tena metādiso vaṇṇo, tena me idha mijjhati;
উপ্পজ্জন্তি চ মে ভোগা, যে কেচি মনসো পিযা॥
Uppajjanti ca me bhogā, ye keci manaso piyā.
১২৩.
123.
‘‘অক্খামি তে ভিক্খু মহানুভাৰ, মনুস্সভূতা যমকাসি পুঞ্ঞং।
‘‘Akkhāmi te bhikkhu mahānubhāva, manussabhūtā yamakāsi puññaṃ;
তেনম্হি এৰং জলিতানুভাৰা, ৰণ্ণো চ মে সব্বদিসা পভাসতী’’তি॥
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
১২১. তত্থ ভাগন্তি কুম্মাসকোট্ঠাসং। তেনাহ ‘‘কুম্মাসপিণ্ডং দত্ৰানা’’তি। কুম্মাসোতি চ যৰকুম্মাসো ৰুত্তো। সেসং ৰুত্তনযমেৰ।
121. Tattha bhāganti kummāsakoṭṭhāsaṃ. Tenāha ‘‘kummāsapiṇḍaṃ datvānā’’ti. Kummāsoti ca yavakummāso vutto. Sesaṃ vuttanayameva.
দুতিযসুণিসাৰিমানৰণ্ণনা নিট্ঠিতা।
Dutiyasuṇisāvimānavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ৰিমানৰত্থুপাল়ি • Vimānavatthupāḷi / ১৪. দুতিযসুণিসাৰিমানৰত্থু • 14. Dutiyasuṇisāvimānavatthu
