| Library / Tipiṭaka / තිපිටක • Tipiṭaka / විමානවත්‌ථුපාළි • Vimānavatthupāḷi |
14. දුතියසුණිසාවිමානවත්‌ථු
14. Dutiyasuṇisāvimānavatthu
116.
116.
‘‘අභික්‌කන්‌තෙන වණ්‌ණෙන, යා ත්‌වං තිට්‌ඨසි දෙවතෙ;
‘‘Abhikkantena vaṇṇena, yā tvaṃ tiṭṭhasi devate;
ඔභාසෙන්‌තී දිසා සබ්‌බා, ඔසධී විය තාරකා.
Obhāsentī disā sabbā, osadhī viya tārakā.
117.
117.
‘‘කෙන තෙතාදිසො වණ්‌ණො, කෙන තෙ ඉධ මිජ්‌ඣති;
‘‘Kena tetādiso vaṇṇo, kena te idha mijjhati;
උප්‌පජ්‌ජන්‌ති ච තෙ භොගා, යෙ කෙචි මනසො පියා.
Uppajjanti ca te bhogā, ye keci manaso piyā.
118.
118.
‘‘පුච්‌ඡාමි තං දෙවි මහානුභාවෙ, මනුස්‌සභූතා කිමකාසි පුඤ්‌ඤං;
‘‘Pucchāmi taṃ devi mahānubhāve, manussabhūtā kimakāsi puññaṃ;
කෙනාසි එවං ජලිතානුභාවා, වණ්‌ණො ච තෙ සබ්‌බදිසා පභාසතී’’ති.
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
119.
119.
සා දෙවතා අත්‌තමනා, මොග්‌ගල්‌ලානෙන පුච්‌ඡිතා;
Sā devatā attamanā, moggallānena pucchitā;
පඤ්‌හං පුට්‌ඨා වියාකාසි, යස්‌ස කම්‌මස්‌සිදං ඵලං.
Pañhaṃ puṭṭhā viyākāsi, yassa kammassidaṃ phalaṃ.
120.
120.
‘‘අහං මනුස්‌සෙසු මනුස්‌සභූතා, සුණිසා අහොසිං සසුරස්‌ස ගෙහෙ.
‘‘Ahaṃ manussesu manussabhūtā, suṇisā ahosiṃ sasurassa gehe.
121.
121.
‘‘අද්‌දසං විරජං භික්‌ඛුං, විප්‌පසන්‌නමනාවිලං;
‘‘Addasaṃ virajaṃ bhikkhuṃ, vippasannamanāvilaṃ;
තස්‌ස අදාසහං භාගං, පසන්‌නා සෙහි පාණිභි;
Tassa adāsahaṃ bhāgaṃ, pasannā sehi pāṇibhi;
කුම්‌මාසපිණ්‌ඩං දත්‌වාන, මොදාමි නන්‌දනෙ වනෙ.
Kummāsapiṇḍaṃ datvāna, modāmi nandane vane.
122.
122.
‘‘තෙන මෙතාදිසො වණ්‌ණො, තෙන මෙ ඉධ මිජ්‌ඣති;
‘‘Tena metādiso vaṇṇo, tena me idha mijjhati;
උප්‌පජ්‌ජන්‌ති ච මෙ භොගා, යෙ කෙචි මනසො පියා.
Uppajjanti ca me bhogā, ye keci manaso piyā.
123.
123.
‘‘අක්‌ඛාමි තෙ භික්‌ඛු මහානුභාව, මනුස්‌සභූතා යමකාසි පුඤ්‌ඤං;
‘‘Akkhāmi te bhikkhu mahānubhāva, manussabhūtā yamakāsi puññaṃ;
තෙනම්‌හි එවං ජලිතානුභාවා, වණ්‌ණො ච මෙ සබ්‌බදිසා පභාසතී’’ති.
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
දුතියසුණිසාවිමානං චුද්‌දසමං.
Dutiyasuṇisāvimānaṃ cuddasamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / විමානවත්‌ථු-අට්‌ඨකථා • Vimānavatthu-aṭṭhakathā / 14. දුතියසුණිසාවිමානවණ්‌ණනා • 14. Dutiyasuṇisāvimānavaṇṇanā
