| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. து³தியஸூரியஸுத்தங்
8. Dutiyasūriyasuttaṃ
1108. ‘‘யாவகீவஞ்ச , பி⁴க்க²வே, சந்தி³மஸூரியா லோகே நுப்பஜ்ஜந்தி, நேவ தாவ மஹதோ ஆலோகஸ்ஸ பாதுபா⁴வோ ஹோதி மஹதோ ஓபா⁴ஸஸ்ஸ. அந்த⁴தமங் ததா³ ஹோதி அந்த⁴காரதிமிஸா . நேவ தாவ ரத்திந்தி³வா 1 பஞ்ஞாயந்தி, ந மாஸத்³த⁴மாஸா பஞ்ஞாயந்தி, ந உதுஸங்வச்ச²ரா பஞ்ஞாயந்தி.
1108. ‘‘Yāvakīvañca , bhikkhave, candimasūriyā loke nuppajjanti, neva tāva mahato ālokassa pātubhāvo hoti mahato obhāsassa. Andhatamaṃ tadā hoti andhakāratimisā . Neva tāva rattindivā 2 paññāyanti, na māsaddhamāsā paññāyanti, na utusaṃvaccharā paññāyanti.
‘‘யதோ ச கோ², பி⁴க்க²வே, சந்தி³மஸூரியா லோகே உப்பஜ்ஜந்தி, அத² மஹதோ ஆலோகஸ்ஸ பாதுபா⁴வோ ஹோதி மஹதோ ஓபா⁴ஸஸ்ஸ. நேவ அந்த⁴காரதமங் ததா³ ஹோதி ந அந்த⁴காரதிமிஸா. அத² ரத்திந்தி³வா பஞ்ஞாயந்தி, மாஸத்³த⁴மாஸா பஞ்ஞாயந்தி, உதுஸங்வச்ச²ரா பஞ்ஞாயந்தி. ஏவமேவ கோ², பி⁴க்க²வே, யாவகீவஞ்ச ததா²க³தோ லோகே நுப்பஜ்ஜதி அரஹங் ஸம்மாஸம்பு³த்³தோ⁴, நேவ தாவ மஹதோ ஆலோகஸ்ஸ பாதுபா⁴வோ ஹோதி மஹதோ ஓபா⁴ஸஸ்ஸ. அந்த⁴தமங் ததா³ ஹோதி அந்த⁴காரதிமிஸா. நேவ தாவ சதுன்னங் அரியஸச்சானங் ஆசிக்க²ணா ஹோதி தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மங்.
‘‘Yato ca kho, bhikkhave, candimasūriyā loke uppajjanti, atha mahato ālokassa pātubhāvo hoti mahato obhāsassa. Neva andhakāratamaṃ tadā hoti na andhakāratimisā. Atha rattindivā paññāyanti, māsaddhamāsā paññāyanti, utusaṃvaccharā paññāyanti. Evameva kho, bhikkhave, yāvakīvañca tathāgato loke nuppajjati arahaṃ sammāsambuddho, neva tāva mahato ālokassa pātubhāvo hoti mahato obhāsassa. Andhatamaṃ tadā hoti andhakāratimisā. Neva tāva catunnaṃ ariyasaccānaṃ ācikkhaṇā hoti desanā paññāpanā paṭṭhapanā vivaraṇā vibhajanā uttānīkammaṃ.
‘‘யதோ ச கோ², பி⁴க்க²வே, ததா²க³தோ லோகே உப்பஜ்ஜதி அரஹங் ஸம்மாஸம்பு³த்³தோ⁴, அத² மஹதோ ஆலோகஸ்ஸ பாதுபா⁴வோ ஹோதி மஹதோ ஓபா⁴ஸஸ்ஸ. நேவ அந்த⁴தமங் ததா³ ஹோதி ந அந்த⁴காரதிமிஸா. அத² கோ² சதுன்னங் அரியஸச்சானங் ஆசிக்க²ணா ஹோதி தே³ஸனா பஞ்ஞாபனா பட்ட²பனா விவரணா விப⁴ஜனா உத்தானீகம்மங். கதமேஸங் சதுன்னங்? து³க்க²ஸ்ஸ அரியஸச்சஸ்ஸ…பே॰… து³க்க²னிரோத⁴கா³மினியா படிபதா³ய அரியஸச்சஸ்ஸ .
‘‘Yato ca kho, bhikkhave, tathāgato loke uppajjati arahaṃ sammāsambuddho, atha mahato ālokassa pātubhāvo hoti mahato obhāsassa. Neva andhatamaṃ tadā hoti na andhakāratimisā. Atha kho catunnaṃ ariyasaccānaṃ ācikkhaṇā hoti desanā paññāpanā paṭṭhapanā vivaraṇā vibhajanā uttānīkammaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa .
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. அட்ட²மங்.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Aṭṭhamaṃ.
Footnotes:
