| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. দুতিযসূরিযসুত্তং
8. Dutiyasūriyasuttaṃ
১১০৮. ‘‘যাৰকীৰঞ্চ , ভিক্খৰে, চন্দিমসূরিযা লোকে নুপ্পজ্জন্তি, নেৰ তাৰ মহতো আলোকস্স পাতুভাৰো হোতি মহতো ওভাসস্স। অন্ধতমং তদা হোতি অন্ধকারতিমিসা । নেৰ তাৰ রত্তিন্দিৰা 1 পঞ্ঞাযন্তি, ন মাসদ্ধমাসা পঞ্ঞাযন্তি, ন উতুসংৰচ্ছরা পঞ্ঞাযন্তি।
1108. ‘‘Yāvakīvañca , bhikkhave, candimasūriyā loke nuppajjanti, neva tāva mahato ālokassa pātubhāvo hoti mahato obhāsassa. Andhatamaṃ tadā hoti andhakāratimisā . Neva tāva rattindivā 2 paññāyanti, na māsaddhamāsā paññāyanti, na utusaṃvaccharā paññāyanti.
‘‘যতো চ খো, ভিক্খৰে, চন্দিমসূরিযা লোকে উপ্পজ্জন্তি, অথ মহতো আলোকস্স পাতুভাৰো হোতি মহতো ওভাসস্স। নেৰ অন্ধকারতমং তদা হোতি ন অন্ধকারতিমিসা। অথ রত্তিন্দিৰা পঞ্ঞাযন্তি, মাসদ্ধমাসা পঞ্ঞাযন্তি, উতুসংৰচ্ছরা পঞ্ঞাযন্তি। এৰমেৰ খো, ভিক্খৰে, যাৰকীৰঞ্চ তথাগতো লোকে নুপ্পজ্জতি অরহং সম্মাসম্বুদ্ধো, নেৰ তাৰ মহতো আলোকস্স পাতুভাৰো হোতি মহতো ওভাসস্স। অন্ধতমং তদা হোতি অন্ধকারতিমিসা। নেৰ তাৰ চতুন্নং অরিযসচ্চানং আচিক্খণা হোতি দেসনা পঞ্ঞাপনা পট্ঠপনা ৰিৰরণা ৰিভজনা উত্তানীকম্মং।
‘‘Yato ca kho, bhikkhave, candimasūriyā loke uppajjanti, atha mahato ālokassa pātubhāvo hoti mahato obhāsassa. Neva andhakāratamaṃ tadā hoti na andhakāratimisā. Atha rattindivā paññāyanti, māsaddhamāsā paññāyanti, utusaṃvaccharā paññāyanti. Evameva kho, bhikkhave, yāvakīvañca tathāgato loke nuppajjati arahaṃ sammāsambuddho, neva tāva mahato ālokassa pātubhāvo hoti mahato obhāsassa. Andhatamaṃ tadā hoti andhakāratimisā. Neva tāva catunnaṃ ariyasaccānaṃ ācikkhaṇā hoti desanā paññāpanā paṭṭhapanā vivaraṇā vibhajanā uttānīkammaṃ.
‘‘যতো চ খো, ভিক্খৰে, তথাগতো লোকে উপ্পজ্জতি অরহং সম্মাসম্বুদ্ধো, অথ মহতো আলোকস্স পাতুভাৰো হোতি মহতো ওভাসস্স। নেৰ অন্ধতমং তদা হোতি ন অন্ধকারতিমিসা। অথ খো চতুন্নং অরিযসচ্চানং আচিক্খণা হোতি দেসনা পঞ্ঞাপনা পট্ঠপনা ৰিৰরণা ৰিভজনা উত্তানীকম্মং। কতমেসং চতুন্নং? দুক্খস্স অরিযসচ্চস্স…পে॰… দুক্খনিরোধগামিনিযা পটিপদায অরিযসচ্চস্স ।
‘‘Yato ca kho, bhikkhave, tathāgato loke uppajjati arahaṃ sammāsambuddho, atha mahato ālokassa pātubhāvo hoti mahato obhāsassa. Neva andhatamaṃ tadā hoti na andhakāratimisā. Atha kho catunnaṃ ariyasaccānaṃ ācikkhaṇā hoti desanā paññāpanā paṭṭhapanā vivaraṇā vibhajanā uttānīkammaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa .
‘‘তস্মাতিহ, ভিক্খৰে, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। অট্ঠমং।
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Aṭṭhamaṃ.
Footnotes:
