| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၈. ဒုတိယသူရိယသုတ္တံ
8. Dutiyasūriyasuttaṃ
၁၁၀၈. ‘‘ယာဝကီဝဉ္စ , ဘိက္ခဝေ, စန္ဒိမသူရိယာ လောကေ နုပ္ပဇ္ဇန္တိ, နေဝ တာဝ မဟတော အာလောကသ္သ ပာတုဘာဝော ဟောတိ မဟတော ဩဘာသသ္သ။ အန္ဓတမံ တဒာ ဟောတိ အန္ဓကာရတိမိသာ ။ နေဝ တာဝ ရတ္တိန္ဒိဝာ 1 ပညာယန္တိ, န မာသဒ္ဓမာသာ ပညာယန္တိ, န ဥတုသံဝစ္ဆရာ ပညာယန္တိ။
1108. ‘‘Yāvakīvañca , bhikkhave, candimasūriyā loke nuppajjanti, neva tāva mahato ālokassa pātubhāvo hoti mahato obhāsassa. Andhatamaṃ tadā hoti andhakāratimisā . Neva tāva rattindivā 2 paññāyanti, na māsaddhamāsā paññāyanti, na utusaṃvaccharā paññāyanti.
‘‘ယတော စ ခော, ဘိက္ခဝေ, စန္ဒိမသူရိယာ လောကေ ဥပ္ပဇ္ဇန္တိ, အထ မဟတော အာလောကသ္သ ပာတုဘာဝော ဟောတိ မဟတော ဩဘာသသ္သ။ နေဝ အန္ဓကာရတမံ တဒာ ဟောတိ န အန္ဓကာရတိမိသာ။ အထ ရတ္တိန္ဒိဝာ ပညာယန္တိ, မာသဒ္ဓမာသာ ပညာယန္တိ, ဥတုသံဝစ္ဆရာ ပညာယန္တိ။ ဧဝမေဝ ခော, ဘိက္ခဝေ, ယာဝကီဝဉ္စ တထာဂတော လောကေ နုပ္ပဇ္ဇတိ အရဟံ သမ္မာသမ္ဗုဒ္ဓော, နေဝ တာဝ မဟတော အာလောကသ္သ ပာတုဘာဝော ဟောတိ မဟတော ဩဘာသသ္သ။ အန္ဓတမံ တဒာ ဟောတိ အန္ဓကာရတိမိသာ။ နေဝ တာဝ စတုန္နံ အရိယသစ္စာနံ အာစိက္ခဏာ ဟောတိ ဒေသနာ ပညာပနာ ပဋ္ဌပနာ ဝိဝရဏာ ဝိဘဇနာ ဥတ္တာနီကမ္မံ။
‘‘Yato ca kho, bhikkhave, candimasūriyā loke uppajjanti, atha mahato ālokassa pātubhāvo hoti mahato obhāsassa. Neva andhakāratamaṃ tadā hoti na andhakāratimisā. Atha rattindivā paññāyanti, māsaddhamāsā paññāyanti, utusaṃvaccharā paññāyanti. Evameva kho, bhikkhave, yāvakīvañca tathāgato loke nuppajjati arahaṃ sammāsambuddho, neva tāva mahato ālokassa pātubhāvo hoti mahato obhāsassa. Andhatamaṃ tadā hoti andhakāratimisā. Neva tāva catunnaṃ ariyasaccānaṃ ācikkhaṇā hoti desanā paññāpanā paṭṭhapanā vivaraṇā vibhajanā uttānīkammaṃ.
‘‘ယတော စ ခော, ဘိက္ခဝေ, တထာဂတော လောကေ ဥပ္ပဇ္ဇတိ အရဟံ သမ္မာသမ္ဗုဒ္ဓော, အထ မဟတော အာလောကသ္သ ပာတုဘာဝော ဟောတိ မဟတော ဩဘာသသ္သ။ နေဝ အန္ဓတမံ တဒာ ဟောတိ န အန္ဓကာရတိမိသာ။ အထ ခော စတုန္နံ အရိယသစ္စာနံ အာစိက္ခဏာ ဟောတိ ဒေသနာ ပညာပနာ ပဋ္ဌပနာ ဝိဝရဏာ ဝိဘဇနာ ဥတ္တာနီကမ္မံ။ ကတမေသံ စတုန္နံ? ဒုက္ခသ္သ အရိယသစ္စသ္သ။ပေ.။ ဒုက္ခနိရောဓဂာမိနိယာ ပဋိပဒာယ အရိယသစ္စသ္သ ။
‘‘Yato ca kho, bhikkhave, tathāgato loke uppajjati arahaṃ sammāsambuddho, atha mahato ālokassa pātubhāvo hoti mahato obhāsassa. Neva andhatamaṃ tadā hoti na andhakāratimisā. Atha kho catunnaṃ ariyasaccānaṃ ācikkhaṇā hoti desanā paññāpanā paṭṭhapanā vivaraṇā vibhajanā uttānīkammaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa .
‘‘တသ္မာတိဟ, ဘိက္ခဝေ, ‘ဣဒံ ဒုက္ခ’န္တိ ယောဂော ကရဏီယော။ပေ.။ ‘အယံ ဒုက္ခနိရောဓဂာမိနီ ပဋိပဒာ’တိ ယောဂော ကရဏီယော’’တိ။ အဋ္ဌမံ။
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Aṭṭhamaṃ.
Footnotes:
