| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༨. དུཏིཡསཱུརིཡསུཏྟཾ
8. Dutiyasūriyasuttaṃ
༡༡༠༨. ‘‘ཡཱཝཀཱིཝཉྩ , བྷིཀྑཝེ, ཙནྡིམསཱུརིཡཱ ལོཀེ ནུཔྤཛྫནྟི, ནེཝ ཏཱཝ མཧཏོ ཨཱལོཀསྶ པཱཏུབྷཱཝོ ཧོཏི མཧཏོ ཨོབྷཱསསྶ། ཨནྡྷཏམཾ ཏདཱ ཧོཏི ཨནྡྷཀཱརཏིམིསཱ ། ནེཝ ཏཱཝ རཏྟིནྡིཝཱ 1 པཉྙཱཡནྟི, ན མཱསདྡྷམཱསཱ པཉྙཱཡནྟི, ན ཨུཏུསཾཝཙྪརཱ པཉྙཱཡནྟི།
1108. ‘‘Yāvakīvañca , bhikkhave, candimasūriyā loke nuppajjanti, neva tāva mahato ālokassa pātubhāvo hoti mahato obhāsassa. Andhatamaṃ tadā hoti andhakāratimisā . Neva tāva rattindivā 2 paññāyanti, na māsaddhamāsā paññāyanti, na utusaṃvaccharā paññāyanti.
‘‘ཡཏོ ཙ ཁོ, བྷིཀྑཝེ, ཙནྡིམསཱུརིཡཱ ལོཀེ ཨུཔྤཛྫནྟི, ཨཐ མཧཏོ ཨཱལོཀསྶ པཱཏུབྷཱཝོ ཧོཏི མཧཏོ ཨོབྷཱསསྶ། ནེཝ ཨནྡྷཀཱརཏམཾ ཏདཱ ཧོཏི ན ཨནྡྷཀཱརཏིམིསཱ། ཨཐ རཏྟིནྡིཝཱ པཉྙཱཡནྟི, མཱསདྡྷམཱསཱ པཉྙཱཡནྟི, ཨུཏུསཾཝཙྪརཱ པཉྙཱཡནྟི། ཨེཝམེཝ ཁོ, བྷིཀྑཝེ, ཡཱཝཀཱིཝཉྩ ཏཐཱགཏོ ལོཀེ ནུཔྤཛྫཏི ཨརཧཾ སམྨཱསམྦུདྡྷོ, ནེཝ ཏཱཝ མཧཏོ ཨཱལོཀསྶ པཱཏུབྷཱཝོ ཧོཏི མཧཏོ ཨོབྷཱསསྶ། ཨནྡྷཏམཾ ཏདཱ ཧོཏི ཨནྡྷཀཱརཏིམིསཱ། ནེཝ ཏཱཝ ཙཏུནྣཾ ཨརིཡསཙྩཱནཾ ཨཱཙིཀྑཎཱ ཧོཏི དེསནཱ པཉྙཱཔནཱ པཊྛཔནཱ ཝིཝརཎཱ ཝིབྷཛནཱ ཨུཏྟཱནཱིཀམྨཾ།
‘‘Yato ca kho, bhikkhave, candimasūriyā loke uppajjanti, atha mahato ālokassa pātubhāvo hoti mahato obhāsassa. Neva andhakāratamaṃ tadā hoti na andhakāratimisā. Atha rattindivā paññāyanti, māsaddhamāsā paññāyanti, utusaṃvaccharā paññāyanti. Evameva kho, bhikkhave, yāvakīvañca tathāgato loke nuppajjati arahaṃ sammāsambuddho, neva tāva mahato ālokassa pātubhāvo hoti mahato obhāsassa. Andhatamaṃ tadā hoti andhakāratimisā. Neva tāva catunnaṃ ariyasaccānaṃ ācikkhaṇā hoti desanā paññāpanā paṭṭhapanā vivaraṇā vibhajanā uttānīkammaṃ.
‘‘ཡཏོ ཙ ཁོ, བྷིཀྑཝེ, ཏཐཱགཏོ ལོཀེ ཨུཔྤཛྫཏི ཨརཧཾ སམྨཱསམྦུདྡྷོ, ཨཐ མཧཏོ ཨཱལོཀསྶ པཱཏུབྷཱཝོ ཧོཏི མཧཏོ ཨོབྷཱསསྶ། ནེཝ ཨནྡྷཏམཾ ཏདཱ ཧོཏི ན ཨནྡྷཀཱརཏིམིསཱ། ཨཐ ཁོ ཙཏུནྣཾ ཨརིཡསཙྩཱནཾ ཨཱཙིཀྑཎཱ ཧོཏི དེསནཱ པཉྙཱཔནཱ པཊྛཔནཱ ཝིཝརཎཱ ཝིབྷཛནཱ ཨུཏྟཱནཱིཀམྨཾ། ཀཏམེསཾ ཙཏུནྣཾ? དུཀྑསྶ ཨརིཡསཙྩསྶ…པེ॰… དུཀྑནིརོདྷགཱམིནིཡཱ པཊིཔདཱཡ ཨརིཡསཙྩསྶ །
‘‘Yato ca kho, bhikkhave, tathāgato loke uppajjati arahaṃ sammāsambuddho, atha mahato ālokassa pātubhāvo hoti mahato obhāsassa. Neva andhatamaṃ tadā hoti na andhakāratimisā. Atha kho catunnaṃ ariyasaccānaṃ ācikkhaṇā hoti desanā paññāpanā paṭṭhapanā vivaraṇā vibhajanā uttānīkammaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa .
‘‘ཏསྨཱཏིཧ, བྷིཀྑཝེ, ‘ཨིདཾ དུཀྑ’ནྟི ཡོགོ ཀརཎཱིཡོ…པེ॰… ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡོགོ ཀརཎཱིཡོ’’ཏི། ཨཊྛམཾ།
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Aṭṭhamaṃ.
Footnotes:
