| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
2. д̣̇уд̇ияасуд̇д̇анд̇анид̣̇д̣̇зсаван̣н̣анаа
2. Dutiyasuttantaniddesavaṇṇanā
187. буна ан̃н̃ам̣ суд̇д̇анд̇ам̣ нигкибид̇ваа инд̣̇рияавид̇хаанам̣ нид̣̇д̣̇исид̇угаамо бан̃жимаани, бхигкавзд̇иаад̣̇игам̣ суд̇д̇анд̇ам̣ д̣̇ассзд̇и. д̇ад̇т̇а яз хи гзжийд̇и анавасзсабарияаад̣̇аанам̣, хи-гааро бад̣̇абууран̣амад̇д̇з нибаад̇о. саман̣аа ваа б̣раахман̣аа ваад̇и логавохааравасзна вуд̇д̇ам̣. самуд̣̇аяанд̇и бажжаяам̣. ад̇т̇ан̇г̇аманд̇и уббаннаанам̣ абхааваг̇аманам̣, ануббаннаанам̣ ануббаад̣̇ам̣ ваа. ассаад̣̇анд̇и аанисам̣сам̣. аад̣̇ийнаванд̇и д̣̇осам̣. ниссаран̣анд̇и ниг̇г̇аманам̣. яат̇аабхууд̇анд̇и яат̇аасабхаавам̣. саман̣зсууд̇и самид̇абаабзсу. саман̣асаммад̇аад̇и на маяаа саман̣аад̇и саммад̇аа. ‘‘саммад̇аа’’д̇и вад̇д̇амаанагаалавасзна вужжамаанз сад̣̇д̣̇алагкан̣авасзна ‘‘мз’’д̇и зд̇т̇а саамиважанамзва ход̇и. б̣раахман̣зсууд̇и б̣аахид̇абаабзсу. сааман̃н̃ад̇т̇анд̇и саман̣абхаавасса ад̇т̇ам̣. б̣рахман̃н̃ад̇т̇анд̇и б̣раахман̣абхаавасса ад̇т̇ам̣. д̣̇ваязнааби арахад̇д̇апаламзва вуд̇д̇ам̣. ат̇а ваа сааман̃н̃ад̇т̇анд̇и хздтаа д̇ийн̣и палаани. б̣рахман̃н̃ад̇т̇анд̇и арахад̇д̇апалам̣. сааман̃н̃аб̣рахман̃н̃анд̇и хи арияамаг̇г̇оязва. д̣̇идтзва д̇хаммзд̇и бажжагкзязва ад̇д̇абхаавз. саяам̣ абхин̃н̃аа сажчигад̇ваад̇и ад̇д̇анааязва ад̇хигзна н̃аан̣зна бажжагкам̣ гад̇ваа. убасамбаж̇ж̇аад̇и баабун̣ид̇ваа, нибпаад̣̇зд̇ваа ваа.
187. Puna aññaṃ suttantaṃ nikkhipitvā indriyavidhānaṃ niddisitukāmo pañcimāni, bhikkhavetiādikaṃ suttantaṃ dasseti. Tattha yehi kecīti anavasesapariyādānaṃ, hi-kāro padapūraṇamatte nipāto. Samaṇā vā brāhmaṇā vāti lokavohāravasena vuttaṃ. Samudayanti paccayaṃ. Atthaṅgamanti uppannānaṃ abhāvagamanaṃ, anuppannānaṃ anuppādaṃ vā. Assādanti ānisaṃsaṃ. Ādīnavanti dosaṃ. Nissaraṇanti niggamanaṃ. Yathābhūtanti yathāsabhāvaṃ. Samaṇesūti samitapāpesu. Samaṇasammatāti na mayā samaṇāti sammatā. ‘‘Sammatā’’ti vattamānakālavasena vuccamāne saddalakkhaṇavasena ‘‘me’’ti ettha sāmivacanameva hoti. Brāhmaṇesūti bāhitapāpesu. Sāmaññatthanti samaṇabhāvassa atthaṃ. Brahmaññatthanti brāhmaṇabhāvassa atthaṃ. Dvayenāpi arahattaphalameva vuttaṃ. Atha vā sāmaññatthanti heṭṭhā tīṇi phalāni. Brahmaññatthanti arahattaphalaṃ. Sāmaññabrahmaññanti hi ariyamaggoyeva. Diṭṭheva dhammeti paccakkheyeva attabhāve. Sayaṃ abhiññā sacchikatvāti attanāyeva adhikena ñāṇena paccakkhaṃ katvā. Upasampajjāti pāpuṇitvā, nipphādetvā vā.
188. суд̇д̇анд̇анид̣̇д̣̇зсз батамам̣ инд̣̇рияасамуд̣̇аяаад̣̇ийнам̣ бабхзд̣̇аг̇ан̣анам̣ бужчид̇ваа буна бабхзд̣̇аг̇ан̣анаа виссаж̇ж̇ид̇аа. д̇ад̇т̇а асийд̇исад̇анд̇и асийд̇иуд̇д̇арам̣ сад̇ам̣. бан̣д̣ид̇зхи ‘‘асийд̇исад̇а’’нд̇и вуд̇д̇зхи аагаарзхийд̇и яож̇анаа.
188. Suttantaniddese paṭhamaṃ indriyasamudayādīnaṃ pabhedagaṇanaṃ pucchitvā puna pabhedagaṇanā vissajjitā. Tattha asītisatanti asītiuttaraṃ sataṃ. Paṇḍitehi ‘‘asītisata’’nti vuttehi ākārehīti yojanā.
буна бабхзд̣̇аг̇ан̣анаабужчаабуб̣б̣ан̇г̇амз г̇ан̣анаанид̣̇д̣̇зсз ад̇химогкад̇т̇ааяаад̇и ад̇химужжанад̇т̇ааяа сад̣̇д̣̇аханад̇т̇ааяа. ааваж̇ж̇анааяа самуд̣̇аяод̇и манод̣̇ваарааваж̇ж̇анажид̇д̇асса самуд̣̇аяо. сад̣̇д̇хинд̣̇рияасса самуд̣̇аяод̇и сад̣̇д̇хинд̣̇рияасса бажжаяо, сад̣̇д̇хам̣ уббаад̣̇зссаамийд̇и буб̣б̣абхааг̇ааваж̇ж̇анам̣ сад̣̇д̇хинд̣̇рияасса убаниссаяабажжаяо, сад̣̇д̇хинд̣̇рияаж̇аванасса ааваж̇ж̇анам̣ батамасса ж̇аванасса ананд̇арабажжаяо, д̣̇уд̇ияаж̇аванаад̣̇ийнам̣ убаниссаяабажжаяо. ад̇химогкавасзнаад̇и чанд̣̇асамбаяуд̇д̇аад̇химогкавасзна. чанд̣̇асса самуд̣̇аяод̇и буб̣б̣абхааг̇ааваж̇ж̇анабажжаяаа уббаннасса ад̇химогкасамбаяуд̇д̇асса язваабанагабхууд̇асса д̇хаммажчанд̣̇асса самуд̣̇аяо. со бана сад̣̇д̇хинд̣̇рияасса сахаж̇аад̇аан̃н̃аман̃н̃аниссаяасамбаяуд̇д̇аад̇т̇иавиг̇ад̇авасзна бажжаяо ход̇и, чанд̣̇аад̇хибад̇игаалз ад̇хибад̇ибажжаяо жа ход̇и, соязва д̣̇уд̇ияасса ананд̇арасамананд̇араананд̇аруубаниссаяаасзвананад̇т̇ивиг̇ад̇авасзна бажжаяо ход̇и. иминаава наязна манасигаарассаби яож̇анаа гаад̇аб̣б̣аа. гзвалан̃хзд̇т̇а манасигаарод̇и сааран̣алагкан̣о язваабанагаманасигааро. ад̇хибад̇ибажжаяад̇аа банасса на ход̇и. самбаяуд̇д̇зсу имзсам̣ д̣̇виннам̣язва г̇ахан̣ам̣ б̣алавабажжаяад̇д̇аад̇и взд̣̇ид̇аб̣б̣ам̣ . сад̣̇д̇хинд̣̇рияасса васзнаад̇и бхааванаабхивуд̣̇д̇хияаа инд̣̇рияабхаавам̣ бад̇д̇асса сад̣̇д̇хинд̣̇рияасса васзна. згад̇д̇убадтаананд̇и згаарамман̣з ажалабхаавзна бхусам̣ таанам̣ убаруубари сад̣̇д̇хинд̣̇рияасса бажжаяо ход̇и. сад̣̇д̇хинд̣̇рияз вуд̇д̇анаязнзва сзсинд̣̇рияааниби взд̣̇ид̇аб̣б̣аани. звамзгзгасса инд̣̇рияасса жад̇д̇ааро жад̇д̇ааро самуд̣̇аяаад̇и бан̃жаннам̣ инд̣̇рияаанам̣ вийсад̇и самуд̣̇аяаа хонд̇и. буна жад̇уннам̣ самуд̣̇аяаанам̣ згзгасмим̣ самуд̣̇аяз бан̃жа бан̃жа инд̣̇рияаани яож̇зд̇ваа вийсад̇и самуд̣̇аяаа вуд̇д̇аа. батамавийсад̇и наанаамаг̇г̇авасзна д̣̇адтаб̣б̣аа, д̣̇уд̇ияавийсад̇и згамаг̇г̇авасзна д̣̇адтаб̣б̣аад̇и вад̣̇анд̇и. звам̣ жад̇д̇аалийса аагаараа хонд̇и. ад̇т̇ан̇г̇амаваароби иминаава наязна взд̣̇ид̇аб̣б̣о. со бана ад̇т̇ан̇г̇амо инд̣̇рияабхааванам̣ анануяуд̇д̇асса аббадилад̣̇д̇хаа бадилаабхад̇т̇ан̇г̇амо, инд̣̇рияабхааванааяа барихийнасса бадилад̣̇д̇хабарихаани ад̇т̇ан̇г̇амо, палаббад̇д̇асса бадиббассад̣̇д̇хиад̇т̇ан̇г̇амо. згад̇д̇аанубадтаананд̇и згад̇д̇з анубадтаанам̣.
Puna pabhedagaṇanāpucchāpubbaṅgame gaṇanāniddese adhimokkhatthāyāti adhimuccanatthāya saddahanatthāya. Āvajjanāya samudayoti manodvārāvajjanacittassa samudayo. Saddhindriyassa samudayoti saddhindriyassa paccayo, saddhaṃ uppādessāmīti pubbabhāgāvajjanaṃ saddhindriyassa upanissayapaccayo, saddhindriyajavanassa āvajjanaṃ paṭhamassa javanassa anantarapaccayo, dutiyajavanādīnaṃ upanissayapaccayo. Adhimokkhavasenāti chandasampayuttaadhimokkhavasena. Chandassa samudayoti pubbabhāgāvajjanapaccayā uppannassa adhimokkhasampayuttassa yevāpanakabhūtassa dhammacchandassa samudayo. So pana saddhindriyassa sahajātaaññamaññanissayasampayuttaatthiavigatavasena paccayo hoti, chandādhipatikāle adhipatipaccayo ca hoti, soyeva dutiyassa anantarasamanantaraanantarūpanissayāsevananatthivigatavasena paccayo hoti. Imināva nayena manasikārassapi yojanā kātabbā. Kevalañhettha manasikāroti sāraṇalakkhaṇo yevāpanakamanasikāro. Adhipatipaccayatā panassa na hoti. Sampayuttesu imesaṃ dvinnaṃyeva gahaṇaṃ balavapaccayattāti veditabbaṃ . Saddhindriyassa vasenāti bhāvanābhivuddhiyā indriyabhāvaṃ pattassa saddhindriyassa vasena. Ekattupaṭṭhānanti ekārammaṇe acalabhāvena bhusaṃ ṭhānaṃ uparūpari saddhindriyassa paccayo hoti. Saddhindriye vuttanayeneva sesindriyānipi veditabbāni. Evamekekassa indriyassa cattāro cattāro samudayāti pañcannaṃ indriyānaṃ vīsati samudayā honti. Puna catunnaṃ samudayānaṃ ekekasmiṃ samudaye pañca pañca indriyāni yojetvā vīsati samudayā vuttā. Paṭhamavīsati nānāmaggavasena daṭṭhabbā, dutiyavīsati ekamaggavasena daṭṭhabbāti vadanti. Evaṃ cattālīsa ākārā honti. Atthaṅgamavāropi imināva nayena veditabbo. So pana atthaṅgamo indriyabhāvanaṃ ananuyuttassa appaṭiladdhā paṭilābhatthaṅgamo, indriyabhāvanāya parihīnassa paṭiladdhaparihāni atthaṅgamo, phalappattassa paṭippassaddhiatthaṅgamo. Ekattaanupaṭṭhānanti ekatte anupaṭṭhānaṃ.
га. ассаад̣̇анид̣̇д̣̇зсаван̣н̣анаа
Ka. assādaniddesavaṇṇanā
189. ассаад̣̇анид̣̇д̣̇зсз ассад̣̇д̇хияасса анубадтаананд̇и ассад̣̇д̇хз буг̇г̇алз бариваж̇ж̇аяад̇о сад̣̇д̇хз буг̇г̇алз сзвад̇о басаад̣̇анийяасуд̇д̇анд̇з бажжавзгкад̇о д̇ад̇т̇а яонисоманасигаарам̣ б̣ахулийгарод̇о жа ассад̣̇д̇хияасса анубадтаанам̣ ход̇и. ассад̣̇д̇хияабарил̣аахасса анубадтаананд̇и зд̇т̇а ассад̣̇д̇хасса сад̣̇д̇хаагат̇ааяа бавад̇д̇амаанааяа д̣̇угкам̣ д̣̇оманассам̣ уббаж̇ж̇ад̇и. аяам̣ ассад̣̇д̇хияабарил̣аахо. ад̇химогкажарияааяа взсаараж̇ж̇анд̇и сад̣̇д̇хаавад̇т̇увасзна ваа бхааванааяа ваа васиббад̇д̇асса сад̣̇д̇хаабавад̇д̇ияаа висаарад̣̇абхааво ход̇и. санд̇о жа вихаараад̇хиг̇амод̇и самат̇асса ваа вибассанааяа ваа бадилаабхо. сукам̣ соманассанд̇и зд̇т̇а жзд̇асигасукабхаавад̣̇ассанад̇т̇ам̣ соманассаважанам̣. сад̣̇д̇хинд̣̇рияасамудтид̇абан̣ийд̇аруубапудтагааяасса гааяигасукамби лаб̣бхад̇иязва. сукасоманассасса бад̇хаанассаад̣̇ад̇д̇аа ‘‘аяам̣ сад̣̇д̇хинд̣̇рияасса ассаад̣̇о’’д̇и висзсзд̇ваа вуд̇д̇ам̣. иминаава наязна сзсинд̣̇рияассаад̣̇ааби яож̇зд̇ваа взд̣̇ид̇аб̣б̣аа.
189. Assādaniddese assaddhiyassa anupaṭṭhānanti assaddhe puggale parivajjayato saddhe puggale sevato pasādanīyasuttante paccavekkhato tattha yonisomanasikāraṃ bahulīkaroto ca assaddhiyassa anupaṭṭhānaṃ hoti. Assaddhiyapariḷāhassa anupaṭṭhānanti ettha assaddhassa saddhākathāya pavattamānāya dukkhaṃ domanassaṃ uppajjati. Ayaṃ assaddhiyapariḷāho. Adhimokkhacariyāya vesārajjanti saddhāvatthuvasena vā bhāvanāya vā vasippattassa saddhāpavattiyā visāradabhāvo hoti. Santo ca vihārādhigamoti samathassa vā vipassanāya vā paṭilābho. Sukhaṃ somanassanti ettha cetasikasukhabhāvadassanatthaṃ somanassavacanaṃ. Saddhindriyasamuṭṭhitapaṇītarūpaphuṭṭhakāyassa kāyikasukhampi labbhatiyeva. Sukhasomanassassa padhānassādattā ‘‘ayaṃ saddhindriyassa assādo’’ti visesetvā vuttaṃ. Imināva nayena sesindriyassādāpi yojetvā veditabbā.
ка. аад̣̇ийнаванид̣̇д̣̇зсаван̣н̣анаа
Kha. ādīnavaniddesavaṇṇanā
190. аад̣̇ийнаванид̣̇д̣̇зсз анижжадтзнаад̇и сад̣̇д̇хинд̣̇рияасса анижжадтзна. со анижжадто сад̣̇д̇хинд̣̇рияасса аад̣̇ийнавод̇и вуд̇д̇ам̣ ход̇и. ид̇арад̣̇ваязби зсзва наяо. имз самуд̣̇аяад̇т̇ан̇г̇амассаад̣̇аад̣̇ийнаваа логияаинд̣̇рияаанамзваад̇и взд̣̇ид̇аб̣б̣аа.
190. Ādīnavaniddese aniccaṭṭhenāti saddhindriyassa aniccaṭṭhena. So aniccaṭṭho saddhindriyassa ādīnavoti vuttaṃ hoti. Itaradvayepi eseva nayo. Ime samudayatthaṅgamassādādīnavā lokiyaindriyānamevāti veditabbā.
г̇а. ниссаран̣анид̣̇д̣̇зсаван̣н̣анаа
Ga. nissaraṇaniddesavaṇṇanā
191. ниссаран̣анид̣̇д̣̇зсз ад̇химогкадтзнаад̇иаад̣̇ийсу згзгасмим̣ инд̣̇рияз бан̃жа бан̃жа гад̇ваа бан̃жаннам̣ инд̣̇рияаанам̣ бан̃жавийсад̇и ниссаран̣аани маг̇г̇апалавасзна нид̣̇д̣̇идтаани. д̇ад̇т̇а д̇ад̇о бан̣ийд̇ад̇арасад̣̇д̇хинд̣̇рияасса бадилаабхаад̇и д̇ад̇о вибассанаагкан̣з бавад̇д̇асад̣̇д̇хинд̣̇рияад̇о маг̇г̇агкан̣з бан̣ийд̇ад̇арасса сад̣̇д̇хинд̣̇рияасса бадилаабхавасзна. буримад̇арасад̣̇д̇хинд̣̇рияаа ниссадам̣ ход̇ийд̇и д̇асмим̣ маг̇г̇агкан̣з сад̣̇д̇хинд̣̇рияам̣ буримад̇арад̇о вибассанаагкан̣з бавад̇д̇асад̣̇д̇хинд̣̇рияад̇о нигканд̇ам̣ ход̇и. иминаава наязна палагкан̣з сад̣̇д̇хинд̣̇рияамби убхаяад̇т̇а сзсинд̣̇рияааниби яож̇зд̇аб̣б̣аани.
191. Nissaraṇaniddese adhimokkhaṭṭhenātiādīsu ekekasmiṃ indriye pañca pañca katvā pañcannaṃ indriyānaṃ pañcavīsati nissaraṇāni maggaphalavasena niddiṭṭhāni. Tattha tato paṇītatarasaddhindriyassa paṭilābhāti tato vipassanākkhaṇe pavattasaddhindriyato maggakkhaṇe paṇītatarassa saddhindriyassa paṭilābhavasena. Purimatarasaddhindriyā nissaṭaṃ hotīti tasmiṃ maggakkhaṇe saddhindriyaṃ purimatarato vipassanākkhaṇe pavattasaddhindriyato nikkhantaṃ hoti. Imināva nayena phalakkhaṇe saddhindriyampi ubhayattha sesindriyānipi yojetabbāni.
192. буб̣б̣абхааг̇з бан̃жахи инд̣̇риязхийд̇и батамаж̇жхаануубажаарз бан̃жахи инд̣̇риязхи батамаж̇жхаанаад̣̇иадтасамаабад̇д̇ивасзна адта ниссаран̣аани, анижжаанубассанаад̣̇иадтаарасамахаавибассанаавасзна адтаараса ниссаран̣аани, сод̇аабад̇д̇имаг̇г̇аад̣̇ивасзна адта логуд̇д̇араниссаран̣аани. звам̣ жхаанасамаабад̇д̇имахаавибассанаамаг̇г̇апалавасзна жад̇уд̇д̇им̣са ниссаран̣аани буримабуримасамад̇иггамад̇о нид̣̇д̣̇идтаани. нзгкаммз бан̃жинд̣̇рияаанийд̇иаад̣̇ийни бана сад̇д̇ад̇им̣са ниссаран̣аани бадибагкабахаанавасзна бадибагкад̇о нид̣̇д̣̇идтаани. д̇ад̇т̇а нзгкаммаад̣̇ийсу сад̇д̇асу сад̇д̇а ниссаран̣аани убажаарабхуумивасзна вуд̇д̇аани, палаани бана бадибагкабахаанаабхаавад̇о на вуд̇д̇аани.
192.Pubbabhāgepañcahi indriyehīti paṭhamajjhānūpacāre pañcahi indriyehi paṭhamajjhānādiaṭṭhasamāpattivasena aṭṭha nissaraṇāni, aniccānupassanādiaṭṭhārasamahāvipassanāvasena aṭṭhārasa nissaraṇāni, sotāpattimaggādivasena aṭṭha lokuttaranissaraṇāni. Evaṃ jhānasamāpattimahāvipassanāmaggaphalavasena catuttiṃsa nissaraṇāni purimapurimasamatikkamato niddiṭṭhāni. Nekkhamme pañcindriyānītiādīni pana sattatiṃsa nissaraṇāni paṭipakkhapahānavasena paṭipakkhato niddiṭṭhāni. Tattha nekkhammādīsu sattasu satta nissaraṇāni upacārabhūmivasena vuttāni, phalāni pana paṭipakkhapahānābhāvato na vuttāni.
193. д̣̇идтзгадтзхийд̇и яаава сод̇аабад̇д̇имаг̇г̇аа д̣̇идтияаа саха згасмим̣ буг̇г̇алз тид̇аад̇и д̣̇идтзгадтаа. д̇зхи д̣̇идтзгадтзхи. ол̣ааригзхийд̇и т̇уулзхи гаамарааг̇аб̣яаабаад̣̇зхи. ан̣усахаг̇ад̇зхийд̇и сукумабхууд̇зхи гаамарааг̇аб̣яаабаад̣̇зхиязва. саб̣б̣агилзсзхийд̇и руубарааг̇аад̣̇ийхи. д̇зсу хи бахийнзсу саб̣б̣агилзсаа бахийнаа хонд̇и, д̇асмаа ‘‘саб̣б̣агилзсзхий’’д̇и вуд̇д̇ам̣. авуд̇д̇ад̇т̇аани банзд̇т̇а бад̣̇аани хздтаа вуд̇д̇ад̇т̇аанзваад̇и. саб̣б̣зсан̃н̃зва кийн̣аасаваанам̣ д̇ад̇т̇а д̇ад̇т̇а бан̃жинд̣̇рияаанийд̇и ‘‘ад̇химогкадтзнаа’’д̇иаад̣̇ийсу буб̣б̣з вуд̇д̇зсу таанзсу д̇асмим̣ д̇асмим̣ таанз бан̃жинд̣̇рияаани б̣уд̣̇д̇хабажжзгаб̣уд̣̇д̇хасаавагаанам̣ кийн̣аасаваанам̣ яат̇ааяог̇ам̣ д̇ад̇о д̇ад̇о ниссадаани хонд̇и. имасмим̣ ваарз батамам̣ вуд̇д̇анаяаа зва яат̇ааяог̇ам̣ кийн̣аасававасзна вуд̇д̇аа.
193.Diṭṭhekaṭṭhehīti yāva sotāpattimaggā diṭṭhiyā saha ekasmiṃ puggale ṭhitāti diṭṭhekaṭṭhā. Tehi diṭṭhekaṭṭhehi. Oḷārikehīti thūlehi kāmarāgabyāpādehi. Aṇusahagatehīti sukhumabhūtehi kāmarāgabyāpādehiyeva. Sabbakilesehīti rūparāgādīhi. Tesu hi pahīnesu sabbakilesā pahīnā honti, tasmā ‘‘sabbakilesehī’’ti vuttaṃ. Avuttatthāni panettha padāni heṭṭhā vuttatthānevāti. Sabbesaññeva khīṇāsavānaṃ tattha tattha pañcindriyānīti ‘‘adhimokkhaṭṭhenā’’tiādīsu pubbe vuttesu ṭhānesu tasmiṃ tasmiṃ ṭhāne pañcindriyāni buddhapaccekabuddhasāvakānaṃ khīṇāsavānaṃ yathāyogaṃ tato tato nissaṭāni honti. Imasmiṃ vāre paṭhamaṃ vuttanayā eva yathāyogaṃ khīṇāsavavasena vuttā.
гат̇ам̣ банзд̇аани ниссаран̣аани асийд̇исад̇ам̣ хонд̇ийд̇и? вужжад̇з – маг̇г̇апалавасзна вуд̇д̇аани бан̃жавийсад̇и, самад̇иггамавасзна вуд̇д̇аани жад̇уд̇д̇им̣са, бадибагкавасзна вуд̇д̇аани сад̇д̇ад̇им̣саад̇и батамаваарз саб̣б̣аани чаннавуд̇и ниссаран̣аани хонд̇и, зд̇ааниязва д̣̇уд̇ияаваарз кийн̣аасаваанам̣ васзна д̣̇ваад̣̇асасу абанийд̇зсу жад̇ураасийд̇и хонд̇и. ид̇и буримаани чаннавуд̇и, имаани жа жад̇ураасийд̇ийд̇и асийд̇исад̇ам̣ хонд̇и. гад̇амаани бана д̣̇ваад̣̇аса кийн̣аасаваанам̣ абанзд̇аб̣б̣аани? самад̇иггамад̇о вуд̇д̇зсу маг̇г̇апалавасзна вуд̇д̇аани адта ниссаран̣аани, бадибагкад̇о вуд̇д̇зсу маг̇г̇авасзна вуд̇д̇аани жад̇д̇аарийд̇и имаани д̣̇ваад̣̇аса абанзд̇аб̣б̣аани. арахад̇д̇апалавасзна вуд̇д̇аани гасмаа абанзд̇аб̣б̣аанийд̇и жз? саб̣б̣абатамам̣ вуд̇д̇аанам̣ бан̃жавийсад̇ияаа ниссаран̣аанам̣ маг̇г̇апалавасзнзва лаб̣бханад̇о. арахад̇д̇апалавасзна ниссаран̣аани вуд̇д̇аанзва хонд̇и . хздтимам̣ хздтимам̣ бана паласамаабад̇д̇им̣ убаримаа убаримаа на самаабаж̇ж̇анд̇иязваад̇и хздтаа д̇ийн̣иби палаани на лаб̣бханд̇иязва. жхаанасамаабад̇д̇ивибассанаанзгкаммаад̣̇ийни жа гирияаавасзна лаб̣бханд̇и. бан̃жаби жзд̇аани инд̣̇рияаани буб̣б̣амзва бадибагкаанам̣ бадиббассад̣̇д̇хад̇д̇аа бадибагкад̇о ниссадаанзва хонд̇ийд̇и.
Kathaṃ panetāni nissaraṇāni asītisataṃ hontīti? Vuccate – maggaphalavasena vuttāni pañcavīsati, samatikkamavasena vuttāni catuttiṃsa, paṭipakkhavasena vuttāni sattatiṃsāti paṭhamavāre sabbāni channavuti nissaraṇāni honti, etāniyeva dutiyavāre khīṇāsavānaṃ vasena dvādasasu apanītesu caturāsīti honti. Iti purimāni channavuti, imāni ca caturāsītīti asītisataṃ honti. Katamāni pana dvādasa khīṇāsavānaṃ apanetabbāni? Samatikkamato vuttesu maggaphalavasena vuttāni aṭṭha nissaraṇāni, paṭipakkhato vuttesu maggavasena vuttāni cattārīti imāni dvādasa apanetabbāni. Arahattaphalavasena vuttāni kasmā apanetabbānīti ce? Sabbapaṭhamaṃ vuttānaṃ pañcavīsatiyā nissaraṇānaṃ maggaphalavaseneva labbhanato. Arahattaphalavasena nissaraṇāni vuttāneva honti . Heṭṭhimaṃ heṭṭhimaṃ pana phalasamāpattiṃ uparimā uparimā na samāpajjantiyevāti heṭṭhā tīṇipi phalāni na labbhantiyeva. Jhānasamāpattivipassanānekkhammādīni ca kiriyāvasena labbhanti. Pañcapi cetāni indriyāni pubbameva paṭipakkhānaṃ paṭippassaddhattā paṭipakkhato nissaṭāneva hontīti.
д̣̇уд̇ияасуд̇д̇анд̇анид̣̇д̣̇зсаван̣н̣анаа нидтид̇аа.
Dutiyasuttantaniddesavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 2. д̣̇уд̇ияасуд̇д̇анд̇анид̣̇д̣̇зсо • 2. Dutiyasuttantaniddeso
