| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၃. ဒုတိယသုတ္တန္တနိဒ္ဒေသော
3. Dutiyasuttantaniddeso
၁၄. ယံ ရူပံ ပဋိစ္စ ဥပ္ပဇ္ဇတိ သုခံ သောမနသ္သံ, အယံ ရူပသ္သ အသ္သာဒောတိ – ပဟာနပ္ပဋိဝေဓော သမုဒယသစ္စံ။ ယံ ရူပံ အနိစ္စံ တံ ဒုက္ခံ ဝိပရိဏာမဓမ္မံ, အယံ ရူပသ္သ အာဒီနဝောတိ – ပရိညာပဋိဝေဓော ဒုက္ခသစ္စံ။ ယော ရူပသ္မိံ ဆန္ဒရာဂဝိနယော ဆန္ဒရာဂပ္ပဟာနံ, ဣဒံ ရူပသ္သ နိသ္သရဏန္တိ – သစ္ဆိကိရိယာပဋိဝေဓော နိရောဓသစ္စံ။ ယာ ဣမေသု တီသု ဌာနေသု ဒိဋ္ဌိ သင္ကပ္ပော ဝာစာ ကမ္မန္တော အာဇီဝော ဝာယာမော သတိ သမာဓိ – ဘာဝနာပဋိဝေဓော မဂ္ဂသစ္စံ။
14. Yaṃ rūpaṃ paṭicca uppajjati sukhaṃ somanassaṃ, ayaṃ rūpassa assādoti – pahānappaṭivedho samudayasaccaṃ. Yaṃ rūpaṃ aniccaṃ taṃ dukkhaṃ vipariṇāmadhammaṃ, ayaṃ rūpassa ādīnavoti – pariññāpaṭivedho dukkhasaccaṃ. Yo rūpasmiṃ chandarāgavinayo chandarāgappahānaṃ, idaṃ rūpassa nissaraṇanti – sacchikiriyāpaṭivedho nirodhasaccaṃ. Yā imesu tīsu ṭhānesu diṭṭhi saṅkappo vācā kammanto ājīvo vāyāmo sati samādhi – bhāvanāpaṭivedho maggasaccaṃ.
ယံ ဝေဒနံ ပဋိစ္စ။ပေ.။ ယံ သညံ ပဋိစ္စ။ ယံ သင္ခာရေ ပဋိစ္စ။ ယံ ဝိညာဏံ ပဋိစ္စ ဥပ္ပဇ္ဇတိ သုခံ သောမနသ္သံ, အယံ ဝိညာဏသ္သ အသ္သာဒောတိ – ပဟာနပ္ပဋိဝေဓော သမုဒယသစ္စံ။ ယံ ဝိညာဏံ အနိစ္စံ တံ ဒုက္ခံ ဝိပရိဏာမဓမ္မံ, အယံ ဝိညာဏသ္သ အာဒီနဝောတိ – ပရိညာပဋိဝေဓော ဒုက္ခသစ္စံ။ ယော ဝိညာဏသ္မိံ ဆန္ဒရာဂဝိနယော ဆန္ဒရာဂပ္ပဟာနံ, ဣဒံ ဝိညာဏသ္သ နိသ္သရဏန္တိ – သစ္ဆိကိရိယာပဋိဝေဓော နိရောဓသစ္စံ။ ယာ ဣမေသု တီသု ဌာနေသု ဒိဋ္ဌိ သင္ကပ္ပော ဝာစာ ကမ္မန္တော အာဇီဝော ဝာယာမော သတိ သမာဓိ – ဘာဝနာပဋိဝေဓော မဂ္ဂသစ္စံ။
Yaṃ vedanaṃ paṭicca…pe… yaṃ saññaṃ paṭicca… yaṃ saṅkhāre paṭicca… yaṃ viññāṇaṃ paṭicca uppajjati sukhaṃ somanassaṃ, ayaṃ viññāṇassa assādoti – pahānappaṭivedho samudayasaccaṃ. Yaṃ viññāṇaṃ aniccaṃ taṃ dukkhaṃ vipariṇāmadhammaṃ, ayaṃ viññāṇassa ādīnavoti – pariññāpaṭivedho dukkhasaccaṃ. Yo viññāṇasmiṃ chandarāgavinayo chandarāgappahānaṃ, idaṃ viññāṇassa nissaraṇanti – sacchikiriyāpaṭivedho nirodhasaccaṃ. Yā imesu tīsu ṭhānesu diṭṭhi saṅkappo vācā kammanto ājīvo vāyāmo sati samādhi – bhāvanāpaṭivedho maggasaccaṃ.
၁၅. သစ္စန္တိ ကတိဟာကာရေဟိ သစ္စံ? ဧသနဋ္ဌေန , ပရိဂ္ဂဟဋ္ဌေန, ပဋိဝေဓဋ္ဌေန။ ကထံ ဧသနဋ္ဌေန သစ္စံ? ဇရာမရဏံ ကိံနိဒာနံ, ကိံသမုဒယံ, ကိံဇာတိကံ, ကိံပဘဝန္တိ – ဧဝံ ဧသနဋ္ဌေန သစ္စံ။ ဇရာမရဏံ ဇာတိနိဒာနံ, ဇာတိသမုဒယံ, ဇာတိဇာတိကံ, ဇာတိပ္ပဘဝန္တိ – ဧဝံ ပရိဂ္ဂဟဋ္ဌေန သစ္စံ။ ဇရာမရဏဉ္စ ပဇာနာတိ, ဇရာမရဏသမုဒယဉ္စ ပဇာနာတိ, ဇရာမရဏနိရောဓဉ္စ ပဇာနာတိ, ဇရာမရဏနိရောဓဂာမိနိံ ပဋိပဒဉ္စ ပဇာနာတိ – ဧဝံ ပဋိဝေဓဋ္ဌေန သစ္စံ။
15.Saccanti katihākārehi saccaṃ? Esanaṭṭhena , pariggahaṭṭhena, paṭivedhaṭṭhena. Kathaṃ esanaṭṭhena saccaṃ? Jarāmaraṇaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Jarāmaraṇaṃ jātinidānaṃ, jātisamudayaṃ, jātijātikaṃ, jātippabhavanti – evaṃ pariggahaṭṭhena saccaṃ. Jarāmaraṇañca pajānāti, jarāmaraṇasamudayañca pajānāti, jarāmaraṇanirodhañca pajānāti, jarāmaraṇanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ဇာတိ ကိံနိဒာနာ, ကိံသမုဒယာ, ကိံဇာတိကာ, ကိံပဘဝာတိ – ဧဝံ ဧသနဋ္ဌေန သစ္စံ။ ဇာတိ ဘဝနိဒာနာ, ဘဝသမုဒယာ, ဘဝဇာတိကာ, ဘဝပ္ပဘဝာတိ – ဧဝံ ပရိဂ္ဂဟဋ္ဌေန သစ္စံ။ ဇာတိဉ္စ ပဇာနာတိ, ဇာတိသမုဒယဉ္စ ပဇာနာတိ, ဇာတိနိရောဓဉ္စ ပဇာနာတိ, ဇာတိနိရောဓဂာမိနိံ ပဋိပဒဉ္စ ပဇာနာတိ – ဧဝံ ပဋိဝေဓဋ္ဌေန သစ္စံ။
Jāti kiṃnidānā, kiṃsamudayā, kiṃjātikā, kiṃpabhavāti – evaṃ esanaṭṭhena saccaṃ. Jāti bhavanidānā, bhavasamudayā, bhavajātikā, bhavappabhavāti – evaṃ pariggahaṭṭhena saccaṃ. Jātiñca pajānāti, jātisamudayañca pajānāti, jātinirodhañca pajānāti, jātinirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ဘဝော ကိံနိဒာနော, ကိံသမုဒယော, ကိံဇာတိကော, ကိံပဘဝောတိ – ဧဝံ ဧသနဋ္ဌေန သစ္စံ ။ ဘဝော ဥပာဒာနနိဒာနော, ဥပာဒာနသမုဒယော, ဥပာဒာနဇာတိကော, ဥပာဒာနပ္ပဘဝောတိ – ဧဝံ ပရိဂ္ဂဟဋ္ဌေန သစ္စံ။ ဘဝံ စ ပဇာနာတိ, ဘဝသမုဒယဉ္စ ပဇာနာတိ, ဘဝနိရောဓဉ္စ ပဇာနာတိ, ဘဝနိရောဓဂာမိနိံ ပဋိပဒဉ္စ ပဇာနာတိ – ဧဝံ ပဋိဝေဓဋ္ဌေန သစ္စံ။
Bhavo kiṃnidāno, kiṃsamudayo, kiṃjātiko, kiṃpabhavoti – evaṃ esanaṭṭhena saccaṃ . Bhavo upādānanidāno, upādānasamudayo, upādānajātiko, upādānappabhavoti – evaṃ pariggahaṭṭhena saccaṃ. Bhavaṃ ca pajānāti, bhavasamudayañca pajānāti, bhavanirodhañca pajānāti, bhavanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ဥပာဒာနံ ကိံနိဒာနံ, ကိံသမုဒယံ, ကိံဇာတိကံ, ကိံပဘဝန္တိ – ဧဝံ ဧသနဋ္ဌေန သစ္စံ။ ဥပာဒာနံ တဏ္ဟာနိဒာနံ, တဏ္ဟာသမုဒယံ, တဏ္ဟာဇာတိကံ, တဏ္ဟာပဘဝန္တိ – ဧဝံ ပရိဂ္ဂဟဋ္ဌေန သစ္စံ။ ဥပာဒာနဉ္စ ပဇာနာတိ, ဥပာဒာနသမုဒယဉ္စ ပဇာနာတိ, ဥပာဒာနနိရောဓဉ္စ ပဇာနာတိ ဥပာဒာနနိရောဓဂာမိနိံ ပဋိပဒဉ္စ ပဇာနာတိ – ဧဝံ ပဋိဝေဓဋ္ဌေန သစ္စံ။
Upādānaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Upādānaṃ taṇhānidānaṃ, taṇhāsamudayaṃ, taṇhājātikaṃ, taṇhāpabhavanti – evaṃ pariggahaṭṭhena saccaṃ. Upādānañca pajānāti, upādānasamudayañca pajānāti, upādānanirodhañca pajānāti upādānanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
တဏ္ဟာ ကိံနိဒာနာ, ကိံသမုဒယာ, ကိံဇာတိကာ, ကိံပဘဝာတိ – ဧဝံ ဧသနဋ္ဌေန သစ္စံ။ တဏ္ဟာ ဝေဒနာနိဒာနာ, ဝေဒနာသမုဒယာ, ဝေဒနာဇာတိကာ, ဝေဒနာပဘဝာတိ – ဧဝံ ပရိဂ္ဂဟဋ္ဌေန သစ္စံ။ တဏ္ဟဉ္စ ပဇာနာတိ, တဏ္ဟာသမုဒယဉ္စ ပဇာနာတိ, တဏ္ဟာနိရောဓဉ္စ ပဇာနာတိ, တဏ္ဟာနိရောဓဂာမိနိံ ပဋိပဒဉ္စ ပဇာနာတိ – ဧဝံ ပဋိဝေဓဋ္ဌေန သစ္စံ။
Taṇhā kiṃnidānā, kiṃsamudayā, kiṃjātikā, kiṃpabhavāti – evaṃ esanaṭṭhena saccaṃ. Taṇhā vedanānidānā, vedanāsamudayā, vedanājātikā, vedanāpabhavāti – evaṃ pariggahaṭṭhena saccaṃ. Taṇhañca pajānāti, taṇhāsamudayañca pajānāti, taṇhānirodhañca pajānāti, taṇhānirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ဝေဒနာ ကိံနိဒာနာ, ကိံသမုဒယာ, ကိံဇာတိကာ, ကိံပဘဝာတိ – ဧဝံ ဧသနဋ္ဌေန သစ္စံ။ ဝေဒနာ ဖသ္သနိဒာနာ, ဖသ္သသမုဒယာ, ဖသ္သဇာတိကာ, ဖသ္သပ္ပဘဝာတိ – ဧဝံ ပရိဂ္ဂဟဋ္ဌေန သစ္စံ။ ဝေဒနဉ္စ ပဇာနာတိ, ဝေဒနာသမုဒယဉ္စ ပဇာနာတိ, ဝေဒနာနိရောဓဉ္စ ပဇာနာတိ, ဝေဒနာနိရောဓဂာမိနိံ ပဋိပဒဉ္စ ပဇာနာတိ – ဧဝံ ပဋိဝေဓဋ္ဌေန သစ္စံ။
Vedanā kiṃnidānā, kiṃsamudayā, kiṃjātikā, kiṃpabhavāti – evaṃ esanaṭṭhena saccaṃ. Vedanā phassanidānā, phassasamudayā, phassajātikā, phassappabhavāti – evaṃ pariggahaṭṭhena saccaṃ. Vedanañca pajānāti, vedanāsamudayañca pajānāti, vedanānirodhañca pajānāti, vedanānirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ဖသ္သော ကိံနိဒာနော, ကိံသမုဒယော, ကိံဇာတိကော, ကိံပဘဝောတိ – ဧဝံ ဧသနဋ္ဌေန သစ္စံ။ ဖသ္သော သဠာယတနနိဒာနော, သဠာယတနသမုဒယော, သဠာယတနဇာတိကော, သဠာယတနပ္ပဘဝောတိ – ဧဝံ ပရိဂ္ဂဟဋ္ဌေန သစ္စံ။ ဖသ္သဉ္စ ပဇာနာတိ, ဖသ္သသမုဒယဉ္စ ပဇာနာတိ, ဖသ္သနိရောဓဉ္စ ပဇာနာတိ, ဖသ္သနိရောဓဂာမိနိံ ပဋိပဒဉ္စ ပဇာနာတိ – ဧဝံ ပဋိဝေဓဋ္ဌေန သစ္စံ။
Phasso kiṃnidāno, kiṃsamudayo, kiṃjātiko, kiṃpabhavoti – evaṃ esanaṭṭhena saccaṃ. Phasso saḷāyatananidāno, saḷāyatanasamudayo, saḷāyatanajātiko, saḷāyatanappabhavoti – evaṃ pariggahaṭṭhena saccaṃ. Phassañca pajānāti, phassasamudayañca pajānāti, phassanirodhañca pajānāti, phassanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
သဠာယတနံ ကိံနိဒာနံ, ကိံသမုဒယံ, ကိံဇာတိကံ, ကိံပဘဝန္တိ – ဧဝံ ဧသနဋ္ဌေန သစ္စံ။ သဠာယတနံ နာမရူပနိဒာနံ, နာမရူပသမုဒယံ, နာမရူပဇာတိကံ, နာမရူပပ္ပဘဝန္တိ – ဧဝံ ပရိဂ္ဂဟဋ္ဌေန သစ္စံ။ သဠာယတနဉ္စ ပဇာနာတိ, သဠာယတနသမုဒယဉ္စ ပဇာနာတိ, သဠာယတနနိရောဓဉ္စ ပဇာနာတိ, သဠာယတနနိရောဓဂာမိနိံ ပဋိပဒဉ္စ ပဇာနာတိ – ဧဝံ ပဋိဝေဓဋ္ဌေန သစ္စံ။
Saḷāyatanaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Saḷāyatanaṃ nāmarūpanidānaṃ, nāmarūpasamudayaṃ, nāmarūpajātikaṃ, nāmarūpappabhavanti – evaṃ pariggahaṭṭhena saccaṃ. Saḷāyatanañca pajānāti, saḷāyatanasamudayañca pajānāti, saḷāyatananirodhañca pajānāti, saḷāyatananirodhagāminiṃ paṭipadañca pajānāti – evaṃ paṭivedhaṭṭhena saccaṃ.
နာမရူပံ ကိံနိဒာနံ, ကိံသမုဒယံ, ကိံဇာတိကံ, ကိံပဘဝန္တိ – ဧဝံ ဧသနဋ္ဌေန သစ္စံ။ နာမရူပံ ဝိညာဏနိဒာနံ, ဝိညာဏသမုဒယံ, ဝိညာဏဇာတိကံ, ဝိညာဏပ္ပဘဝန္တိ – ဧဝံ ပရိဂ္ဂဟဋ္ဌေန သစ္စံ။ နာမရူပဉ္စ ပဇာနာတိ, နာမရူပသမုဒယဉ္စ ပဇာနာတိ, နာမရူပနိရောဓဉ္စ ပဇာနာတိ, နာမရူပနိရောဓဂာမိနိံ ပဋိပဒဉ္စ ပဇာနာတိ – ဧဝံ ပဋိဝေဓဋ္ဌေန သစ္စံ။
Nāmarūpaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Nāmarūpaṃ viññāṇanidānaṃ, viññāṇasamudayaṃ, viññāṇajātikaṃ, viññāṇappabhavanti – evaṃ pariggahaṭṭhena saccaṃ. Nāmarūpañca pajānāti, nāmarūpasamudayañca pajānāti, nāmarūpanirodhañca pajānāti, nāmarūpanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ဝိညာဏံ ကိံနိဒာနံ, ကိံသမုဒယံ, ကိံဇာတိကံ, ကိံပဘဝန္တိ – ဧဝံ ဧသနဋ္ဌေန သစ္စံ။ ဝိညာဏံ သင္ခာရနိဒာနံ, သင္ခာရသမုဒယံ, သင္ခာရဇာတိကံ , သင္ခာရပ္ပဘဝန္တိ – ဧဝံ ပရိဂ္ဂဟဋ္ဌေန သစ္စံ။ ဝိညာဏဉ္စ ပဇာနာတိ, ဝိညာဏသမုဒယဉ္စ ပဇာနာတိ, ဝိညာဏနိရောဓဉ္စ ပဇာနာတိ, ဝိညာဏနိရောဓဂာမိနိံ ပဋိပဒဉ္စ ပဇာနာတိ – ဧဝံ ပဋိဝေဓဋ္ဌေန သစ္စံ။
Viññāṇaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Viññāṇaṃ saṅkhāranidānaṃ, saṅkhārasamudayaṃ, saṅkhārajātikaṃ , saṅkhārappabhavanti – evaṃ pariggahaṭṭhena saccaṃ. Viññāṇañca pajānāti, viññāṇasamudayañca pajānāti, viññāṇanirodhañca pajānāti, viññāṇanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
သင္ခာရာ ကိံနိဒာနာ, ကိံသမုဒယာ, ကိံဇာတိကာ, ကိံပဘဝာတိ – ဧဝံ ဧသနဋ္ဌေန သစ္စံ။ သင္ခာရာ အဝိဇ္ဇာနိဒာနာ, အဝိဇ္ဇာသမုဒယာ, အဝိဇ္ဇာဇာတိကာ, အဝိဇ္ဇာပဘဝာတိ – ဧဝံ ပရိဂ္ဂဟဋ္ဌေန သစ္စံ။ သင္ခာရေ စ ပဇာနာတိ, သင္ခာရသမုဒယဉ္စ ပဇာနာတိ, သင္ခာရနိရောဓဉ္စ ပဇာနာတိ, သင္ခာရနိရောဓဂာမိနိံ ပဋိပဒဉ္စ ပဇာနာတိ – ဧဝံ ပဋိဝေဓဋ္ဌေန သစ္စံ။
Saṅkhārā kiṃnidānā, kiṃsamudayā, kiṃjātikā, kiṃpabhavāti – evaṃ esanaṭṭhena saccaṃ. Saṅkhārā avijjānidānā, avijjāsamudayā, avijjājātikā, avijjāpabhavāti – evaṃ pariggahaṭṭhena saccaṃ. Saṅkhāre ca pajānāti, saṅkhārasamudayañca pajānāti, saṅkhāranirodhañca pajānāti, saṅkhāranirodhagāminiṃ paṭipadañca pajānāti – evaṃ paṭivedhaṭṭhena saccaṃ.
၁၆. ဇရာမရဏံ ဒုက္ခသစ္စံ, ဇာတိ သမုဒယသစ္စံ, ဥဘိန္နမ္ပိ နိသ္သရဏံ နိရောဓသစ္စံ, နိရောဓပ္ပဇာနနာ မဂ္ဂသစ္စံ။ ဇာတိ ဒုက္ခသစ္စံ, ဘဝော သမုဒယသစ္စံ, ဥဘိန္နမ္ပိ နိသ္သရဏံ နိရောဓသစ္စံ, နိရောဓပ္ပဇာနနာ မဂ္ဂသစ္စံ။ ဘဝော ဒုက္ခသစ္စံ, ဥပာဒာနံ သမုဒယသစ္စံ, ဥဘိန္နမ္ပိ နိသ္သရဏံ နိရောဓသစ္စံ, နိရောဓပ္ပဇာနနာ မဂ္ဂသစ္စံ။ ဥပာဒာနံ ဒုက္ခသစ္စံ, တဏ္ဟာ သမုဒယသစ္စံ, ဥဘိန္နမ္ပိ နိသ္သရဏံ နိရောဓသစ္စံ, နိရောဓပ္ပဇာနနာ မဂ္ဂသစ္စံ။ တဏ္ဟာ ဒုက္ခသစ္စံ, ဝေဒနာ သမုဒယသစ္စံ, ဥဘိန္နမ္ပိ နိသ္သရဏံ နိရောဓသစ္စံ, နိရောဓပ္ပဇာနနာ မဂ္ဂသစ္စံ။ ဝေဒနာ ဒုက္ခသစ္စံ, ဖသ္သော သမုဒယသစ္စံ, ဥဘိန္နမ္ပိ နိသ္သရဏံ နိရောဓသစ္စံ, နိရောဓပ္ပဇာနနာ မဂ္ဂသစ္စံ။ ဖသ္သော ဒုက္ခသစ္စံ, သဠာယတနံ သမုဒယသစ္စံ, ဥဘိန္နမ္ပိ နိသ္သရဏံ နိရောဓသစ္စံ, နိရောဓပ္ပဇာနနာ မဂ္ဂသစ္စံ။ သဠာယတနံ ဒုက္ခသစ္စံ, နာမရူပံ သမုဒယသစ္စံ, ဥဘိန္နမ္ပိ နိသ္သရဏံ နိရောဓသစ္စံ, နိရောဓပ္ပဇာနနာ မဂ္ဂသစ္စံ။ နာမရူပံ ဒုက္ခသစ္စံ, ဝိညာဏံ သမုဒယသစ္စံ, ဥဘိန္နမ္ပိ နိသ္သရဏံ နိရောဓသစ္စံ, နိရောဓပ္ပဇာနနာ မဂ္ဂသစ္စံ။ ဝိညာဏံ ဒုက္ခသစ္စံ, သင္ခာရာ သမုဒယသစ္စံ, ဥဘိန္နမ္ပိ နိသ္သရဏံ နိရောဓသစ္စံ, နိရောဓပ္ပဇာနနာ မဂ္ဂသစ္စံ။ သင္ခာရာ ဒုက္ခသစ္စံ, အဝိဇ္ဇာ သမုဒယသစ္စံ, ဥဘိန္နမ္ပိ နိသ္သရဏံ နိရောဓသစ္စံ, နိရောဓပ္ပဇာနနာ မဂ္ဂသစ္စံ။
16. Jarāmaraṇaṃ dukkhasaccaṃ, jāti samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Jāti dukkhasaccaṃ, bhavo samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Bhavo dukkhasaccaṃ, upādānaṃ samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Upādānaṃ dukkhasaccaṃ, taṇhā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Taṇhā dukkhasaccaṃ, vedanā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Vedanā dukkhasaccaṃ, phasso samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Phasso dukkhasaccaṃ, saḷāyatanaṃ samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Saḷāyatanaṃ dukkhasaccaṃ, nāmarūpaṃ samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Nāmarūpaṃ dukkhasaccaṃ, viññāṇaṃ samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Viññāṇaṃ dukkhasaccaṃ, saṅkhārā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Saṅkhārā dukkhasaccaṃ, avijjā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ.
ဇရာမရဏံ သိယာ ဒုက္ခသစ္စံ, သိယာ သမုဒယသစ္စံ, ဥဘိန္နမ္ပိ နိသ္သရဏံ နိရောဓသစ္စံ, နိရောဓပ္ပဇာနနာ မဂ္ဂသစ္စံ။ ဇာတိ သိယာ ဒုက္ခသစ္စံ , သိယာ သမုဒယသစ္စံ။ပေ.။ ဘဝော သိယာ ဒုက္ခသစ္စံ, သိယာ သမုဒယသစ္စံ, ဥဘိန္နမ္ပိ နိသ္သရဏံ နိရောဓသစ္စံ, နိရောဓပ္ပဇာနနာ မဂ္ဂသစ္စန္တိ။
Jarāmaraṇaṃ siyā dukkhasaccaṃ, siyā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Jāti siyā dukkhasaccaṃ , siyā samudayasaccaṃ…pe… bhavo siyā dukkhasaccaṃ, siyā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccanti.
ဘာဏဝာရော။
Bhāṇavāro.
သစ္စကထာ နိဋ္ဌိတာ။
Saccakathā niṭṭhitā.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၃. ဒုတိယသုတ္တန္တနိဒ္ဒေသဝဏ္ဏနာ • 3. Dutiyasuttantaniddesavaṇṇanā
