| Library / Tipiṭaka / තිපිටක • Tipiṭaka / පටිසම්‌භිදාමග්‌ගපාළි • Paṭisambhidāmaggapāḷi |
3. දුතියසුත්‌තන්‌තනිද්‌දෙසො
3. Dutiyasuttantaniddeso
14. යං රූපං පටිච්‌ච උප්‌පජ්‌ජති සුඛං සොමනස්‌සං, අයං රූපස්‌ස අස්‌සාදොති – පහානප්‌පටිවෙධො සමුදයසච්‌චං. යං රූපං අනිච්‌චං තං දුක්‌ඛං විපරිණාමධම්‌මං, අයං රූපස්‌ස ආදීනවොති – පරිඤ්‌ඤාපටිවෙධො දුක්‌ඛසච්‌චං. යො රූපස්‌මිං ඡන්‌දරාගවිනයො ඡන්‌දරාගප්‌පහානං, ඉදං රූපස්‌ස නිස්‌සරණන්‌ති – සච්‌ඡිකිරියාපටිවෙධො නිරොධසච්‌චං. යා ඉමෙසු තීසු ඨානෙසු දිට්‌ඨි සඞ්‌කප්‌පො වාචා කම්‌මන්‌තො ආජීවො වායාමො සති සමාධි – භාවනාපටිවෙධො මග්‌ගසච්‌චං.
14. Yaṃ rūpaṃ paṭicca uppajjati sukhaṃ somanassaṃ, ayaṃ rūpassa assādoti – pahānappaṭivedho samudayasaccaṃ. Yaṃ rūpaṃ aniccaṃ taṃ dukkhaṃ vipariṇāmadhammaṃ, ayaṃ rūpassa ādīnavoti – pariññāpaṭivedho dukkhasaccaṃ. Yo rūpasmiṃ chandarāgavinayo chandarāgappahānaṃ, idaṃ rūpassa nissaraṇanti – sacchikiriyāpaṭivedho nirodhasaccaṃ. Yā imesu tīsu ṭhānesu diṭṭhi saṅkappo vācā kammanto ājīvo vāyāmo sati samādhi – bhāvanāpaṭivedho maggasaccaṃ.
යං වෙදනං පටිච්‌ච…පෙ.… යං සඤ්‌ඤං පටිච්‌ච… යං සඞ්‌ඛාරෙ පටිච්‌ච… යං විඤ්‌ඤාණං පටිච්‌ච උප්‌පජ්‌ජති සුඛං සොමනස්‌සං, අයං විඤ්‌ඤාණස්‌ස අස්‌සාදොති – පහානප්‌පටිවෙධො සමුදයසච්‌චං. යං විඤ්‌ඤාණං අනිච්‌චං තං දුක්‌ඛං විපරිණාමධම්‌මං, අයං විඤ්‌ඤාණස්‌ස ආදීනවොති – පරිඤ්‌ඤාපටිවෙධො දුක්‌ඛසච්‌චං. යො විඤ්‌ඤාණස්‌මිං ඡන්‌දරාගවිනයො ඡන්‌දරාගප්‌පහානං, ඉදං විඤ්‌ඤාණස්‌ස නිස්‌සරණන්‌ති – සච්‌ඡිකිරියාපටිවෙධො නිරොධසච්‌චං. යා ඉමෙසු තීසු ඨානෙසු දිට්‌ඨි සඞ්‌කප්‌පො වාචා කම්‌මන්‌තො ආජීවො වායාමො සති සමාධි – භාවනාපටිවෙධො මග්‌ගසච්‌චං.
Yaṃ vedanaṃ paṭicca…pe… yaṃ saññaṃ paṭicca… yaṃ saṅkhāre paṭicca… yaṃ viññāṇaṃ paṭicca uppajjati sukhaṃ somanassaṃ, ayaṃ viññāṇassa assādoti – pahānappaṭivedho samudayasaccaṃ. Yaṃ viññāṇaṃ aniccaṃ taṃ dukkhaṃ vipariṇāmadhammaṃ, ayaṃ viññāṇassa ādīnavoti – pariññāpaṭivedho dukkhasaccaṃ. Yo viññāṇasmiṃ chandarāgavinayo chandarāgappahānaṃ, idaṃ viññāṇassa nissaraṇanti – sacchikiriyāpaṭivedho nirodhasaccaṃ. Yā imesu tīsu ṭhānesu diṭṭhi saṅkappo vācā kammanto ājīvo vāyāmo sati samādhi – bhāvanāpaṭivedho maggasaccaṃ.
15. සච්‌චන්‌ති කතිහාකාරෙහි සච්‌චං? එසනට්‌ඨෙන , පරිග්‌ගහට්‌ඨෙන, පටිවෙධට්‌ඨෙන. කථං එසනට්‌ඨෙන සච්‌චං? ජරාමරණං කිංනිදානං, කිංසමුදයං, කිංජාතිකං, කිංපභවන්‌ති – එවං එසනට්‌ඨෙන සච්‌චං. ජරාමරණං ජාතිනිදානං, ජාතිසමුදයං, ජාතිජාතිකං, ජාතිප්‌පභවන්‌ති – එවං පරිග්‌ගහට්‌ඨෙන සච්‌චං. ජරාමරණඤ්‌ච පජානාති, ජරාමරණසමුදයඤ්‌ච පජානාති, ජරාමරණනිරොධඤ්‌ච පජානාති, ජරාමරණනිරොධගාමිනිං පටිපදඤ්‌ච පජානාති – එවං පටිවෙධට්‌ඨෙන සච්‌චං.
15.Saccanti katihākārehi saccaṃ? Esanaṭṭhena , pariggahaṭṭhena, paṭivedhaṭṭhena. Kathaṃ esanaṭṭhena saccaṃ? Jarāmaraṇaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Jarāmaraṇaṃ jātinidānaṃ, jātisamudayaṃ, jātijātikaṃ, jātippabhavanti – evaṃ pariggahaṭṭhena saccaṃ. Jarāmaraṇañca pajānāti, jarāmaraṇasamudayañca pajānāti, jarāmaraṇanirodhañca pajānāti, jarāmaraṇanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ජාති කිංනිදානා, කිංසමුදයා, කිංජාතිකා, කිංපභවාති – එවං එසනට්‌ඨෙන සච්‌චං. ජාති භවනිදානා, භවසමුදයා, භවජාතිකා, භවප්‌පභවාති – එවං පරිග්‌ගහට්‌ඨෙන සච්‌චං. ජාතිඤ්‌ච පජානාති, ජාතිසමුදයඤ්‌ච පජානාති, ජාතිනිරොධඤ්‌ච පජානාති, ජාතිනිරොධගාමිනිං පටිපදඤ්‌ච පජානාති – එවං පටිවෙධට්‌ඨෙන සච්‌චං.
Jāti kiṃnidānā, kiṃsamudayā, kiṃjātikā, kiṃpabhavāti – evaṃ esanaṭṭhena saccaṃ. Jāti bhavanidānā, bhavasamudayā, bhavajātikā, bhavappabhavāti – evaṃ pariggahaṭṭhena saccaṃ. Jātiñca pajānāti, jātisamudayañca pajānāti, jātinirodhañca pajānāti, jātinirodhagāminiṃ paṭipadañca pajānāti – evaṃ paṭivedhaṭṭhena saccaṃ.
භවො කිංනිදානො, කිංසමුදයො, කිංජාතිකො, කිංපභවොති – එවං එසනට්‌ඨෙන සච්‌චං . භවො උපාදානනිදානො, උපාදානසමුදයො, උපාදානජාතිකො, උපාදානප්‌පභවොති – එවං පරිග්‌ගහට්‌ඨෙන සච්‌චං. භවං ච පජානාති, භවසමුදයඤ්‌ච පජානාති, භවනිරොධඤ්‌ච පජානාති, භවනිරොධගාමිනිං පටිපදඤ්‌ච පජානාති – එවං පටිවෙධට්‌ඨෙන සච්‌චං.
Bhavo kiṃnidāno, kiṃsamudayo, kiṃjātiko, kiṃpabhavoti – evaṃ esanaṭṭhena saccaṃ . Bhavo upādānanidāno, upādānasamudayo, upādānajātiko, upādānappabhavoti – evaṃ pariggahaṭṭhena saccaṃ. Bhavaṃ ca pajānāti, bhavasamudayañca pajānāti, bhavanirodhañca pajānāti, bhavanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
උපාදානං කිංනිදානං, කිංසමුදයං, කිංජාතිකං, කිංපභවන්‌ති – එවං එසනට්‌ඨෙන සච්‌චං. උපාදානං තණ්‌හානිදානං, තණ්‌හාසමුදයං, තණ්‌හාජාතිකං, තණ්‌හාපභවන්‌ති – එවං පරිග්‌ගහට්‌ඨෙන සච්‌චං. උපාදානඤ්‌ච පජානාති, උපාදානසමුදයඤ්‌ච පජානාති, උපාදානනිරොධඤ්‌ච පජානාති උපාදානනිරොධගාමිනිං පටිපදඤ්‌ච පජානාති – එවං පටිවෙධට්‌ඨෙන සච්‌චං.
Upādānaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Upādānaṃ taṇhānidānaṃ, taṇhāsamudayaṃ, taṇhājātikaṃ, taṇhāpabhavanti – evaṃ pariggahaṭṭhena saccaṃ. Upādānañca pajānāti, upādānasamudayañca pajānāti, upādānanirodhañca pajānāti upādānanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
තණ්‌හා කිංනිදානා, කිංසමුදයා, කිංජාතිකා, කිංපභවාති – එවං එසනට්‌ඨෙන සච්‌චං. තණ්‌හා වෙදනානිදානා, වෙදනාසමුදයා, වෙදනාජාතිකා, වෙදනාපභවාති – එවං පරිග්‌ගහට්‌ඨෙන සච්‌චං. තණ්‌හඤ්‌ච පජානාති, තණ්‌හාසමුදයඤ්‌ච පජානාති, තණ්‌හානිරොධඤ්‌ච පජානාති, තණ්‌හානිරොධගාමිනිං පටිපදඤ්‌ච පජානාති – එවං පටිවෙධට්‌ඨෙන සච්‌චං.
Taṇhā kiṃnidānā, kiṃsamudayā, kiṃjātikā, kiṃpabhavāti – evaṃ esanaṭṭhena saccaṃ. Taṇhā vedanānidānā, vedanāsamudayā, vedanājātikā, vedanāpabhavāti – evaṃ pariggahaṭṭhena saccaṃ. Taṇhañca pajānāti, taṇhāsamudayañca pajānāti, taṇhānirodhañca pajānāti, taṇhānirodhagāminiṃ paṭipadañca pajānāti – evaṃ paṭivedhaṭṭhena saccaṃ.
වෙදනා කිංනිදානා, කිංසමුදයා, කිංජාතිකා, කිංපභවාති – එවං එසනට්‌ඨෙන සච්‌චං. වෙදනා ඵස්‌සනිදානා, ඵස්‌සසමුදයා, ඵස්‌සජාතිකා, ඵස්‌සප්‌පභවාති – එවං පරිග්‌ගහට්‌ඨෙන සච්‌චං. වෙදනඤ්‌ච පජානාති, වෙදනාසමුදයඤ්‌ච පජානාති, වෙදනානිරොධඤ්‌ච පජානාති, වෙදනානිරොධගාමිනිං පටිපදඤ්‌ච පජානාති – එවං පටිවෙධට්‌ඨෙන සච්‌චං.
Vedanā kiṃnidānā, kiṃsamudayā, kiṃjātikā, kiṃpabhavāti – evaṃ esanaṭṭhena saccaṃ. Vedanā phassanidānā, phassasamudayā, phassajātikā, phassappabhavāti – evaṃ pariggahaṭṭhena saccaṃ. Vedanañca pajānāti, vedanāsamudayañca pajānāti, vedanānirodhañca pajānāti, vedanānirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ඵස්‌සො කිංනිදානො, කිංසමුදයො, කිංජාතිකො, කිංපභවොති – එවං එසනට්‌ඨෙන සච්‌චං. ඵස්‌සො සළායතනනිදානො, සළායතනසමුදයො, සළායතනජාතිකො, සළායතනප්‌පභවොති – එවං පරිග්‌ගහට්‌ඨෙන සච්‌චං. ඵස්‌සඤ්‌ච පජානාති, ඵස්‌සසමුදයඤ්‌ච පජානාති, ඵස්‌සනිරොධඤ්‌ච පජානාති, ඵස්‌සනිරොධගාමිනිං පටිපදඤ්‌ච පජානාති – එවං පටිවෙධට්‌ඨෙන සච්‌චං.
Phasso kiṃnidāno, kiṃsamudayo, kiṃjātiko, kiṃpabhavoti – evaṃ esanaṭṭhena saccaṃ. Phasso saḷāyatananidāno, saḷāyatanasamudayo, saḷāyatanajātiko, saḷāyatanappabhavoti – evaṃ pariggahaṭṭhena saccaṃ. Phassañca pajānāti, phassasamudayañca pajānāti, phassanirodhañca pajānāti, phassanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
සළායතනං කිංනිදානං, කිංසමුදයං, කිංජාතිකං, කිංපභවන්‌ති – එවං එසනට්‌ඨෙන සච්‌චං. සළායතනං නාමරූපනිදානං, නාමරූපසමුදයං, නාමරූපජාතිකං, නාමරූපප්‌පභවන්‌ති – එවං පරිග්‌ගහට්‌ඨෙන සච්‌චං. සළායතනඤ්‌ච පජානාති, සළායතනසමුදයඤ්‌ච පජානාති, සළායතනනිරොධඤ්‌ච පජානාති, සළායතනනිරොධගාමිනිං පටිපදඤ්‌ච පජානාති – එවං පටිවෙධට්‌ඨෙන සච්‌චං.
Saḷāyatanaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Saḷāyatanaṃ nāmarūpanidānaṃ, nāmarūpasamudayaṃ, nāmarūpajātikaṃ, nāmarūpappabhavanti – evaṃ pariggahaṭṭhena saccaṃ. Saḷāyatanañca pajānāti, saḷāyatanasamudayañca pajānāti, saḷāyatananirodhañca pajānāti, saḷāyatananirodhagāminiṃ paṭipadañca pajānāti – evaṃ paṭivedhaṭṭhena saccaṃ.
නාමරූපං කිංනිදානං, කිංසමුදයං, කිංජාතිකං, කිංපභවන්‌ති – එවං එසනට්‌ඨෙන සච්‌චං. නාමරූපං විඤ්‌ඤාණනිදානං, විඤ්‌ඤාණසමුදයං, විඤ්‌ඤාණජාතිකං, විඤ්‌ඤාණප්‌පභවන්‌ති – එවං පරිග්‌ගහට්‌ඨෙන සච්‌චං. නාමරූපඤ්‌ච පජානාති, නාමරූපසමුදයඤ්‌ච පජානාති, නාමරූපනිරොධඤ්‌ච පජානාති, නාමරූපනිරොධගාමිනිං පටිපදඤ්‌ච පජානාති – එවං පටිවෙධට්‌ඨෙන සච්‌චං.
Nāmarūpaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Nāmarūpaṃ viññāṇanidānaṃ, viññāṇasamudayaṃ, viññāṇajātikaṃ, viññāṇappabhavanti – evaṃ pariggahaṭṭhena saccaṃ. Nāmarūpañca pajānāti, nāmarūpasamudayañca pajānāti, nāmarūpanirodhañca pajānāti, nāmarūpanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
විඤ්‌ඤාණං කිංනිදානං, කිංසමුදයං, කිංජාතිකං, කිංපභවන්‌ති – එවං එසනට්‌ඨෙන සච්‌චං. විඤ්‌ඤාණං සඞ්‌ඛාරනිදානං, සඞ්‌ඛාරසමුදයං, සඞ්‌ඛාරජාතිකං , සඞ්‌ඛාරප්‌පභවන්‌ති – එවං පරිග්‌ගහට්‌ඨෙන සච්‌චං. විඤ්‌ඤාණඤ්‌ච පජානාති, විඤ්‌ඤාණසමුදයඤ්‌ච පජානාති, විඤ්‌ඤාණනිරොධඤ්‌ච පජානාති, විඤ්‌ඤාණනිරොධගාමිනිං පටිපදඤ්‌ච පජානාති – එවං පටිවෙධට්‌ඨෙන සච්‌චං.
Viññāṇaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Viññāṇaṃ saṅkhāranidānaṃ, saṅkhārasamudayaṃ, saṅkhārajātikaṃ , saṅkhārappabhavanti – evaṃ pariggahaṭṭhena saccaṃ. Viññāṇañca pajānāti, viññāṇasamudayañca pajānāti, viññāṇanirodhañca pajānāti, viññāṇanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
සඞ්‌ඛාරා කිංනිදානා, කිංසමුදයා, කිංජාතිකා, කිංපභවාති – එවං එසනට්‌ඨෙන සච්‌චං. සඞ්‌ඛාරා අවිජ්‌ජානිදානා, අවිජ්‌ජාසමුදයා, අවිජ්‌ජාජාතිකා, අවිජ්‌ජාපභවාති – එවං පරිග්‌ගහට්‌ඨෙන සච්‌චං. සඞ්‌ඛාරෙ ච පජානාති, සඞ්‌ඛාරසමුදයඤ්‌ච පජානාති, සඞ්‌ඛාරනිරොධඤ්‌ච පජානාති, සඞ්‌ඛාරනිරොධගාමිනිං පටිපදඤ්‌ච පජානාති – එවං පටිවෙධට්‌ඨෙන සච්‌චං.
Saṅkhārā kiṃnidānā, kiṃsamudayā, kiṃjātikā, kiṃpabhavāti – evaṃ esanaṭṭhena saccaṃ. Saṅkhārā avijjānidānā, avijjāsamudayā, avijjājātikā, avijjāpabhavāti – evaṃ pariggahaṭṭhena saccaṃ. Saṅkhāre ca pajānāti, saṅkhārasamudayañca pajānāti, saṅkhāranirodhañca pajānāti, saṅkhāranirodhagāminiṃ paṭipadañca pajānāti – evaṃ paṭivedhaṭṭhena saccaṃ.
16. ජරාමරණං දුක්‌ඛසච්‌චං, ජාති සමුදයසච්‌චං, උභින්‌නම්‌පි නිස්‌සරණං නිරොධසච්‌චං, නිරොධප්‌පජානනා මග්‌ගසච්‌චං. ජාති දුක්‌ඛසච්‌චං, භවො සමුදයසච්‌චං, උභින්‌නම්‌පි නිස්‌සරණං නිරොධසච්‌චං, නිරොධප්‌පජානනා මග්‌ගසච්‌චං. භවො දුක්‌ඛසච්‌චං, උපාදානං සමුදයසච්‌චං, උභින්‌නම්‌පි නිස්‌සරණං නිරොධසච්‌චං, නිරොධප්‌පජානනා මග්‌ගසච්‌චං. උපාදානං දුක්‌ඛසච්‌චං, තණ්‌හා සමුදයසච්‌චං, උභින්‌නම්‌පි නිස්‌සරණං නිරොධසච්‌චං, නිරොධප්‌පජානනා මග්‌ගසච්‌චං. තණ්‌හා දුක්‌ඛසච්‌චං, වෙදනා සමුදයසච්‌චං, උභින්‌නම්‌පි නිස්‌සරණං නිරොධසච්‌චං, නිරොධප්‌පජානනා මග්‌ගසච්‌චං. වෙදනා දුක්‌ඛසච්‌චං, ඵස්‌සො සමුදයසච්‌චං, උභින්‌නම්‌පි නිස්‌සරණං නිරොධසච්‌චං, නිරොධප්‌පජානනා මග්‌ගසච්‌චං. ඵස්‌සො දුක්‌ඛසච්‌චං, සළායතනං සමුදයසච්‌චං, උභින්‌නම්‌පි නිස්‌සරණං නිරොධසච්‌චං, නිරොධප්‌පජානනා මග්‌ගසච්‌චං. සළායතනං දුක්‌ඛසච්‌චං, නාමරූපං සමුදයසච්‌චං, උභින්‌නම්‌පි නිස්‌සරණං නිරොධසච්‌චං, නිරොධප්‌පජානනා මග්‌ගසච්‌චං. නාමරූපං දුක්‌ඛසච්‌චං, විඤ්‌ඤාණං සමුදයසච්‌චං, උභින්‌නම්‌පි නිස්‌සරණං නිරොධසච්‌චං, නිරොධප්‌පජානනා මග්‌ගසච්‌චං. විඤ්‌ඤාණං දුක්‌ඛසච්‌චං, සඞ්‌ඛාරා සමුදයසච්‌චං, උභින්‌නම්‌පි නිස්‌සරණං නිරොධසච්‌චං, නිරොධප්‌පජානනා මග්‌ගසච්‌චං. සඞ්‌ඛාරා දුක්‌ඛසච්‌චං, අවිජ්‌ජා සමුදයසච්‌චං, උභින්‌නම්‌පි නිස්‌සරණං නිරොධසච්‌චං, නිරොධප්‌පජානනා මග්‌ගසච්‌චං.
16. Jarāmaraṇaṃ dukkhasaccaṃ, jāti samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Jāti dukkhasaccaṃ, bhavo samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Bhavo dukkhasaccaṃ, upādānaṃ samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Upādānaṃ dukkhasaccaṃ, taṇhā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Taṇhā dukkhasaccaṃ, vedanā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Vedanā dukkhasaccaṃ, phasso samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Phasso dukkhasaccaṃ, saḷāyatanaṃ samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Saḷāyatanaṃ dukkhasaccaṃ, nāmarūpaṃ samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Nāmarūpaṃ dukkhasaccaṃ, viññāṇaṃ samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Viññāṇaṃ dukkhasaccaṃ, saṅkhārā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Saṅkhārā dukkhasaccaṃ, avijjā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ.
ජරාමරණං සියා දුක්‌ඛසච්‌චං, සියා සමුදයසච්‌චං, උභින්‌නම්‌පි නිස්‌සරණං නිරොධසච්‌චං, නිරොධප්‌පජානනා මග්‌ගසච්‌චං. ජාති සියා දුක්‌ඛසච්‌චං , සියා සමුදයසච්‌චං…පෙ.… භවො සියා දුක්‌ඛසච්‌චං, සියා සමුදයසච්‌චං, උභින්‌නම්‌පි නිස්‌සරණං නිරොධසච්‌චං, නිරොධප්‌පජානනා මග්‌ගසච්‌චන්‌ති.
Jarāmaraṇaṃ siyā dukkhasaccaṃ, siyā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Jāti siyā dukkhasaccaṃ , siyā samudayasaccaṃ…pe… bhavo siyā dukkhasaccaṃ, siyā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccanti.
භාණවාරො.
Bhāṇavāro.
සච්‌චකථා නිට්‌ඨිතා.
Saccakathā niṭṭhitā.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / පටිසම්‌භිදාමග්‌ග-අට්‌ඨකථා • Paṭisambhidāmagga-aṭṭhakathā / 3. දුතියසුත්‌තන්‌තනිද්‌දෙසවණ්‌ණනා • 3. Dutiyasuttantaniddesavaṇṇanā
