| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༢. དུཏིཡསུཏྟནྟནིདྡེསོ
2. Dutiyasuttantaniddeso
༡༨༧. སཱཝཏྠིནིདཱནཾ། ‘‘པཉྩིམཱནི, བྷིཀྑཝེ, ཨིནྡྲིཡཱནི། ཀཏམཱནི པཉྩ? སདྡྷིནྡྲིཡཾ, ཝཱིརིཡིནྡྲིཡཾ, སཏིནྡྲིཡཾ, སམཱདྷིནྡྲིཡཾ , པཉྙིནྡྲིཡཾ། ཡེ ཧི ཀེཙི, བྷིཀྑཝེ, སམཎཱ ཝཱ བྲཱཧྨཎཱ ཝཱ ཨིམེསཾ པཉྩནྣཾ ཨིནྡྲིཡཱནཾ སམུདཡཉྩ ཨཏྠངྒམཉྩ ཨསྶཱདཉྩ ཨཱདཱིནཝཉྩ ནིསྶརཎཉྩ ཡཐཱབྷཱུཏཾ ནཔྤཛཱནནྟི, ན མེ ཏེ, བྷིཀྑཝེ, སམཎཱ ཝཱ བྲཱཧྨཎཱ ཝཱ སམཎེསུ 1 ཝཱ སམཎསམྨཏཱ, བྲཱཧྨཎེསུ ཝཱ བྲཱཧྨཎསམྨཏཱ; ན ཙ པནེཏེ ཨཱཡསྨནྟཱ 2 སཱམཉྙཏྠཾ ཝཱ བྲཧྨཉྙཏྠཾ ཝཱ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརནྟི། ཡེ ཙ ཁོ ཀེཙི 3 བྷིཀྑཝེ སམཎཱ ཝཱ བྲཱཧྨཎཱ ཝཱ ཨིམེསཾ པཉྩནྣཾ ཨིནྡྲིཡཱནཾ སམུདཡཉྩ ཨཏྠངྒམཉྩ ཨསྶཱདཉྩ ཨཱདཱིནཝཉྩ ནིསྶརཎཉྩ ཡཐཱབྷཱུཏཾ པཛཱནནྟི, ཏེ ཁོ མེ, བྷིཀྑཝེ, སམཎཱ ཝཱ བྲཱཧྨཎཱ ཝཱ སམཎེསུ ཝཱ སམཎསམྨཏཱ, བྲཱཧྨཎེསུ ཝཱ བྲཱཧྨཎསམྨཏཱ; ཏེ ཙ པནཱཡསྨནྟཱ སཱམཉྙཏྠཉྩ བྲཧྨཉྙཏྠཉྩ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརནྟཱི’’ཏི།
187. Sāvatthinidānaṃ. ‘‘Pañcimāni, bhikkhave, indriyāni. Katamāni pañca? Saddhindriyaṃ, vīriyindriyaṃ, satindriyaṃ, samādhindriyaṃ , paññindriyaṃ. Ye hi keci, bhikkhave, samaṇā vā brāhmaṇā vā imesaṃ pañcannaṃ indriyānaṃ samudayañca atthaṅgamañca assādañca ādīnavañca nissaraṇañca yathābhūtaṃ nappajānanti, na me te, bhikkhave, samaṇā vā brāhmaṇā vā samaṇesu 4 vā samaṇasammatā, brāhmaṇesu vā brāhmaṇasammatā; na ca panete āyasmantā 5 sāmaññatthaṃ vā brahmaññatthaṃ vā diṭṭheva dhamme sayaṃ abhiññā sacchikatvā upasampajja viharanti. Ye ca kho keci 6 bhikkhave samaṇā vā brāhmaṇā vā imesaṃ pañcannaṃ indriyānaṃ samudayañca atthaṅgamañca assādañca ādīnavañca nissaraṇañca yathābhūtaṃ pajānanti, te kho me, bhikkhave, samaṇā vā brāhmaṇā vā samaṇesu vā samaṇasammatā, brāhmaṇesu vā brāhmaṇasammatā; te ca panāyasmantā sāmaññatthañca brahmaññatthañca diṭṭheva dhamme sayaṃ abhiññā sacchikatvā upasampajja viharantī’’ti.
༡༨༨. ཀཏིཧཱཀཱརེཧི པཉྩནྣཾ ཨིནྡྲིཡཱནཾ སམུདཡོ ཧོཏི; ཀཏིཧཱཀཱརེཧི པཉྩནྣཾ ཨིནྡྲིཡཱནཾ སམུདཡཾ པཛཱནཱཏི? ཀཏིཧཱཀཱརེཧི པཉྩནྣཾ ཨིནྡྲིཡཱནཾ ཨཏྠངྒམོ ཧོཏི; ཀཏིཧཱཀཱརེཧི པཉྩནྣཾ ཨིནྡྲིཡཱནཾ ཨཏྠངྒམཾ པཛཱནཱཏི? ཀཏིཧཱཀཱརེཧི པཉྩནྣཾ ཨིནྡྲིཡཱནཾ ཨསྶཱདོ ཧོཏི, ཀཏིཧཱཀཱརེཧི པཉྩནྣཾ ཨིནྡྲིཡཱནཾ ཨསྶཱདཾ པཛཱནཱཏི? ཀཏིཧཱཀཱརེཧི པཉྩནྣཾ ཨིནྡྲིཡཱནཾ ཨཱདཱིནཝོ ཧོཏི; ཀཏིཧཱཀཱརེཧི པཉྩནྣཾ ཨིནྡྲིཡཱནཾ ཨཱདཱིནཝཾ པཛཱནཱཏི? ཀཏིཧཱཀཱརེཧི པཉྩནྣཾ ཨིནྡྲིཡཱནཾ ནིསྶརཎཾ ཧོཏི; ཀཏིཧཱཀཱརེཧི པཉྩནྣཾ ཨིནྡྲིཡཱནཾ ནིསྶརཎཾ པཛཱནཱཏི?
188. Katihākārehi pañcannaṃ indriyānaṃ samudayo hoti; katihākārehi pañcannaṃ indriyānaṃ samudayaṃ pajānāti? Katihākārehi pañcannaṃ indriyānaṃ atthaṅgamo hoti; katihākārehi pañcannaṃ indriyānaṃ atthaṅgamaṃ pajānāti? Katihākārehi pañcannaṃ indriyānaṃ assādo hoti, katihākārehi pañcannaṃ indriyānaṃ assādaṃ pajānāti? Katihākārehi pañcannaṃ indriyānaṃ ādīnavo hoti; katihākārehi pañcannaṃ indriyānaṃ ādīnavaṃ pajānāti? Katihākārehi pañcannaṃ indriyānaṃ nissaraṇaṃ hoti; katihākārehi pañcannaṃ indriyānaṃ nissaraṇaṃ pajānāti?
ཙཏྟཱརཱིསཱཡ ཨཱཀཱརེཧི པཉྩནྣཾ ཨིནྡྲིཡཱནཾ སམུདཡོ ཧོཏི; ཙཏྟཱརཱིསཱཡ ཨཱཀཱརེཧི པཉྩནྣཾ ཨིནྡྲིཡཱནཾ སམུདཡཾ པཛཱནཱཏི། ཙཏྟཱརཱིསཱཡ ཨཱཀཱརེཧི པཉྩནྣཾ ཨིནྡྲིཡཱནཾ ཨཏྠངྒམོ ཧོཏི; ཙཏྟཱརཱིསཱཡ ཨཱཀཱརེཧི པཉྩནྣཾ ཨིནྡྲིཡཱནཾ ཨཏྠངྒམཾ པཛཱནཱཏི། པཉྩཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཨསྶཱདོ ཧོཏི; པཉྩཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཨསྶཱདཾ པཛཱནཱཏི། པཉྩཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཨཱདཱིནཝོ ཧོཏི; པཉྩཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཨཱདཱིནཝཾ པཛཱནཱཏི། ཨསཱིཏིསཏཾ ཨཱཀཱརེཧི 7 པཉྩནྣཾ ཨིནྡྲིཡཱནཾ ནིསྶརཎཾ ཧོཏི; ཨསཱིཏིསཏཾ ཨཱཀཱརེཧི པཉྩནྣཾ ཨིནྡྲིཡཱནཾ ནིསྶརཎཾ པཛཱནཱཏི།
Cattārīsāya ākārehi pañcannaṃ indriyānaṃ samudayo hoti; cattārīsāya ākārehi pañcannaṃ indriyānaṃ samudayaṃ pajānāti. Cattārīsāya ākārehi pañcannaṃ indriyānaṃ atthaṅgamo hoti; cattārīsāya ākārehi pañcannaṃ indriyānaṃ atthaṅgamaṃ pajānāti. Pañcavīsatiyā ākārehi pañcannaṃ indriyānaṃ assādo hoti; pañcavīsatiyā ākārehi pañcannaṃ indriyānaṃ assādaṃ pajānāti. Pañcavīsatiyā ākārehi pañcannaṃ indriyānaṃ ādīnavo hoti; pañcavīsatiyā ākārehi pañcannaṃ indriyānaṃ ādīnavaṃ pajānāti. Asītisataṃ ākārehi 8 pañcannaṃ indriyānaṃ nissaraṇaṃ hoti; asītisataṃ ākārehi pañcannaṃ indriyānaṃ nissaraṇaṃ pajānāti.
ཀཏམེཧི ཙཏྟཱརཱིསཱཡ ཨཱཀཱརེཧི པཉྩནྣཾ ཨིནྡྲིཡཱནཾ སམུདཡོ ཧོཏི; ཀཏམེཧི ཙཏྟཱརཱིསཱཡ ཨཱཀཱརེཧི པཉྩནྣཾ ཨིནྡྲིཡཱནཾ སམུདཡཾ པཛཱནཱཏི? ཨདྷིམོཀྑཏྠཱཡ ཨཱཝཛྫནཱཡ སམུདཡོ སདྡྷིནྡྲིཡསྶ སམུདཡོ ཧོཏི, ཨདྷིམོཀྑཝསེན ཚནྡསྶ སམུདཡོ སདྡྷིནྡྲིཡསྶ སམུདཡོ ཧོཏི, ཨདྷིམོཀྑཝསེན མནསིཀཱརསྶ སམུདཡོ སདྡྷིནྡྲིཡསྶ སམུདཡོ ཧོཏི, སདྡྷིནྡྲིཡསྶ ཝསེན ཨེཀཏྟུཔཊྛཱནཾ སདྡྷིནྡྲིཡསྶ སམུདཡོ ཧོཏི; པགྒཧཏྠཱཡ ཨཱཝཛྫནཱཡ སམུདཡོ ཝཱིརིཡིནྡྲིཡསྶ སམུདཡོ ཧོཏི, པགྒཧཝསེན ཚནྡསྶ སམུདཡོ ཝཱིརིཡིནྡྲིཡསྶ སམུདཡོ ཧོཏི, པགྒཧཝསེན མནསིཀཱརསྶ སམུདཡོ ཝཱིརིཡིནྡྲིཡསྶ སམུདཡོ ཧོཏི, ཝཱིརིཡིནྡྲིཡསྶ ཝསེན ཨེཀཏྟུཔཊྛཱནཾ ཝཱིརིཡིནྡྲིཡསྶ སམུདཡོ ཧོཏི; ཨུཔཊྛཱནཏྠཱཡ ཨཱཝཛྫནཱཡ སམུདཡོ སཏིནྡྲིཡསྶ སམུདཡོ ཧོཏི, ཨུཔཊྛཱནཝསེན ཚནྡསྶ སམུདཡོ སཏིནྡྲིཡསྶ སམུདཡོ ཧོཏི, ཨུཔཊྛཱནཝསེན མནསིཀཱརསྶ སམུདཡོ སཏིནྡྲིཡསྶ སམུདཡོ ཧོཏི, སཏིནྡྲིཡསྶ ཝསེན ཨེཀཏྟུཔཊྛཱནཾ སཏིནྡྲིཡསྶ སམུདཡོ ཧོཏི; ཨཝིཀྑེཔཏྠཱཡ ཨཱཝཛྫནཱཡ སམུདཡོ སམཱདྷིནྡྲིཡསྶ སམུདཡོ ཧོཏི, ཨཝིཀྑེཔཝསེན ཚནྡསྶ སམུདཡོ སམཱདྷིནྡྲིཡསྶ སམུདཡོ ཧོཏི, ཨཝིཀྑེཔཝསེན མནསིཀཱརསྶ སམུདཡོ སམཱདྷིནྡྲིཡསྶ སམུདཡོ ཧོཏི, སམཱདྷིནྡྲིཡསྶ ཝསེན ཨེཀཏྟུཔཊྛཱནཾ སམཱདྷིནྡྲིཡསྶ སམུདཡོ ཧོཏི; དསྶནཏྠཱཡ ཨཱཝཛྫནཱཡ སམུདཡོ པཉྙིནྡྲིཡསྶ སམུདཡོ ཧོཏི, དསྶནཝསེན ཚནྡསྶ སམུདཡོ པཉྙིནྡྲིཡསྶ སམུདཡོ ཧོཏི, དསྶནཝསེན མནསིཀཱརསྶ སམུདཡོ པཉྙིནྡྲིཡསྶ སམུདཡོ ཧོཏི, པཉྙིནྡྲིཡསྶ ཝསེན ཨེཀཏྟུཔཊྛཱནཾ པཉྙིནྡྲིཡསྶ སམུདཡོ ཧོཏི། ཨདྷིམོཀྑཏྠཱཡ ཨཱཝཛྫནཱཡ སམུདཡོ སདྡྷིནྡྲིཡསྶ སམུདཡོ ཧོཏི, པགྒཧཏྠཱཡ ཨཱཝཛྫནཱཡ སམུདཡོ ཝཱིརིཡིནྡྲིཡསྶ སམུདཡོ ཧོཏི, ཨུཔཊྛཱནཏྠཱཡ ཨཱཝཛྫནཱཡ སམུདཡོ སཏིནྡྲིཡསྶ སམུདཡོ ཧོཏི, ཨཝིཀྑེཔཏྠཱཡ ཨཱཝཛྫནཱཡ སམུདཡོ སམཱདྷིནྡྲིཡསྶ སམུདཡོ ཧོཏི, དསྶནཏྠཱཡ ཨཱཝཛྫནཱཡ སམུདཡོ པཉྙིནྡྲིཡསྶ སམུདཡོ ཧོཏི། ཨདྷིམོཀྑཝསེན ཚནྡསྶ སམུདཡོ སདྡྷིནྡྲིཡསྶ སམུདཡོ ཧོཏི, པགྒཧཝསེན ཚནྡསྶ སམུདཡོ ཝཱིརིཡིནྡྲིཡསྶ སམུདཡོ ཧོཏི, ཨུཔཊྛཱནཝསེན ཚནྡསྶ སམུདཡོ སཏིནྡྲིཡསྶ སམུདཡོ ཧོཏི, ཨཝིཀྑེཔཝསེན ཚནྡསྶ སམུདཡོ སམཱདྷིནྡྲིཡསྶ སམུདཡོ ཧོཏི, དསྶནཝསེན ཚནྡསྶ སམུདཡོ པཉྙིནྡྲིཡསྶ སམུདཡོ ཧོཏི། ཨདྷིམོཀྑཝསེན མནསིཀཱརསྶ སམུདཡོ སདྡྷིནྡྲིཡསྶ སམུདཡོ ཧོཏི, པགྒཧཝསེན མནསིཀཱརསྶ སམུདཡོ ཝཱིརིཡིནྡྲིཡསྶ སམུདཡོ ཧོཏི, ཨུཔཊྛཱནཝསེན མནསིཀཱརསྶ སམུདཡོ སཏིནྡྲིཡསྶ སམུདཡོ ཧོཏི, ཨཝིཀྑེཔཝསེན མནསིཀཱརསྶ སམུདཡོ སམཱདྷིནྡྲིཡསྶ སམུདཡོ ཧོཏི, དསྶནཝསེན མནསིཀཱརསྶ སམུདཡོ པཉྙིནྡྲིཡསྶ སམུདཡོ ཧོཏི། སདྡྷིནྡྲིཡསྶ ཝསེན ཨེཀཏྟུཔཊྛཱནཾ སདྡྷིནྡྲིཡསྶ སམུདཡོ ཧོཏི ཝཱིརིཡིནྡྲིཡསྶ ཝསེན ཨེཀཏྟུཔཊྛཱནཾ ཝཱིརིཡིནྡྲིཡསྶ སམུདཡོ ཧོཏི, སཏིནྡྲིཡསྶ ཝསེན ཨེཀཏྟུཔཊྛཱནཾ སཏིནྡྲིཡསྶ སམུདཡོ ཧོཏི, སམཱདྷིནྡྲིཡསྶ ཝསེན ཨེཀཏྟུཔཊྛཱནཾ སམཱདྷིནྡྲིཡསྶ སམུདཡོ ཧོཏི , པཉྙིནྡྲིཡསྶ ཝསེན ཨེཀཏྟུཔཊྛཱནཾ པཉྙིནྡྲིཡསྶ སམུདཡོ ཧོཏི།
Katamehi cattārīsāya ākārehi pañcannaṃ indriyānaṃ samudayo hoti; katamehi cattārīsāya ākārehi pañcannaṃ indriyānaṃ samudayaṃ pajānāti? Adhimokkhatthāya āvajjanāya samudayo saddhindriyassa samudayo hoti, adhimokkhavasena chandassa samudayo saddhindriyassa samudayo hoti, adhimokkhavasena manasikārassa samudayo saddhindriyassa samudayo hoti, saddhindriyassa vasena ekattupaṭṭhānaṃ saddhindriyassa samudayo hoti; paggahatthāya āvajjanāya samudayo vīriyindriyassa samudayo hoti, paggahavasena chandassa samudayo vīriyindriyassa samudayo hoti, paggahavasena manasikārassa samudayo vīriyindriyassa samudayo hoti, vīriyindriyassa vasena ekattupaṭṭhānaṃ vīriyindriyassa samudayo hoti; upaṭṭhānatthāya āvajjanāya samudayo satindriyassa samudayo hoti, upaṭṭhānavasena chandassa samudayo satindriyassa samudayo hoti, upaṭṭhānavasena manasikārassa samudayo satindriyassa samudayo hoti, satindriyassa vasena ekattupaṭṭhānaṃ satindriyassa samudayo hoti; avikkhepatthāya āvajjanāya samudayo samādhindriyassa samudayo hoti, avikkhepavasena chandassa samudayo samādhindriyassa samudayo hoti, avikkhepavasena manasikārassa samudayo samādhindriyassa samudayo hoti, samādhindriyassa vasena ekattupaṭṭhānaṃ samādhindriyassa samudayo hoti; dassanatthāya āvajjanāya samudayo paññindriyassa samudayo hoti, dassanavasena chandassa samudayo paññindriyassa samudayo hoti, dassanavasena manasikārassa samudayo paññindriyassa samudayo hoti, paññindriyassa vasena ekattupaṭṭhānaṃ paññindriyassa samudayo hoti. Adhimokkhatthāya āvajjanāya samudayo saddhindriyassa samudayo hoti, paggahatthāya āvajjanāya samudayo vīriyindriyassa samudayo hoti, upaṭṭhānatthāya āvajjanāya samudayo satindriyassa samudayo hoti, avikkhepatthāya āvajjanāya samudayo samādhindriyassa samudayo hoti, dassanatthāya āvajjanāya samudayo paññindriyassa samudayo hoti. Adhimokkhavasena chandassa samudayo saddhindriyassa samudayo hoti, paggahavasena chandassa samudayo vīriyindriyassa samudayo hoti, upaṭṭhānavasena chandassa samudayo satindriyassa samudayo hoti, avikkhepavasena chandassa samudayo samādhindriyassa samudayo hoti, dassanavasena chandassa samudayo paññindriyassa samudayo hoti. Adhimokkhavasena manasikārassa samudayo saddhindriyassa samudayo hoti, paggahavasena manasikārassa samudayo vīriyindriyassa samudayo hoti, upaṭṭhānavasena manasikārassa samudayo satindriyassa samudayo hoti, avikkhepavasena manasikārassa samudayo samādhindriyassa samudayo hoti, dassanavasena manasikārassa samudayo paññindriyassa samudayo hoti. Saddhindriyassa vasena ekattupaṭṭhānaṃ saddhindriyassa samudayo hoti vīriyindriyassa vasena ekattupaṭṭhānaṃ vīriyindriyassa samudayo hoti, satindriyassa vasena ekattupaṭṭhānaṃ satindriyassa samudayo hoti, samādhindriyassa vasena ekattupaṭṭhānaṃ samādhindriyassa samudayo hoti , paññindriyassa vasena ekattupaṭṭhānaṃ paññindriyassa samudayo hoti.
ཨིམེཧི ཙཏྟཱརཱིསཱཡ ཨཱཀཱརེཧི པཉྩནྣཾ ཨིནྡྲིཡཱནཾ སམུདཡོ ཧོཏི, ཨིམེཧི ཙཏྟཱརཱིསཱཡ ཨཱཀཱརེཧི པཉྩནྣཾ ཨིནྡྲིཡཱནཾ སམུདཡཾ པཛཱནཱཏི།
Imehi cattārīsāya ākārehi pañcannaṃ indriyānaṃ samudayo hoti, imehi cattārīsāya ākārehi pañcannaṃ indriyānaṃ samudayaṃ pajānāti.
ཀཏམེཧི ཙཏྟཱརཱིསཱཡ ཨཱཀཱརེཧི པཉྩནྣཾ ཨིནྡྲིཡཱནཾ ཨཏྠངྒམོ ཧོཏི; ཀཏམེཧི ཙཏྟཱརཱིསཱཡ ཨཱཀཱརེཧི པཉྩནྣཾ ཨིནྡྲིཡཱནཾ ཨཏྠངྒམཾ པཛཱནཱཏི? ཨདྷིམོཀྑཏྠཱཡ ཨཱཝཛྫནཱཡ ཨཏྠངྒམོ སདྡྷིནྡྲིཡསྶ ཨཏྠངྒམོ ཧོཏི, ཨདྷིམོཀྑཝསེན ཚནྡསྶ ཨཏྠངྒམོ སདྡྷིནྡྲིཡསྶ ཨཏྠངྒམོ ཧོཏི, ཨདྷིམོཀྑཝསེན མནསིཀཱརསྶ ཨཏྠངྒམོ སདྡྷིནྡྲིཡསྶ ཨཏྠངྒམོ ཧོཏི, སདྡྷིནྡྲིཡསྶ ཝསེན ཨེཀཏྟཨནུཔཊྛཱནཾ 9 སདྡྷིནྡྲིཡསྶ ཝསེན ཨཏྠངྒམོ ཧོཏི; པགྒཧཏྠཱཡ ཨཱཝཛྫནཱཡ ཨཏྠངྒམོ ཝཱིརིཡིནྡྲིཡསྶ ཨཏྠངྒམོ ཧོཏི, པགྒཧཝསེན ཚནྡསྶ ཨཏྠངྒམོ ཝཱིརིཡིནྡྲིཡསྶ ཨཏྠངྒམོ ཧོཏི, པགྒཧཝསེན མནསིཀཱརསྶ ཨཏྠངྒམོ ཝཱིརིཡིནྡྲིཡསྶ ཨཏྠངྒམོ ཧོཏི, ཝཱིརིཡིནྡྲིཡསྶ ཝསེན ཨེཀཏྟཨནུཔཊྛཱནཾ ཝཱིརིཡིནྡྲིཡསྶ ཨཏྠངྒམོ ཧོཏི; ཨུཔཊྛཱནཏྠཱཡ ཨཱཝཛྫནཱཡ ཨཏྠངྒམོ སཏིནྡྲིཡསྶ ཨཏྠངྒམོ ཧོཏི, ཨུཔཊྛཱནཝསེན ཚནྡསྶ ཨཏྠངྒམོ སཏིནྡྲིཡསྶ ཨཏྠངྒམོ ཧོཏི, ཨུཔཊྛཱནཝསེན མནསིཀཱརསྶ ཨཏྠངྒམོ སཏིནྡྲིཡསྶ ཨཏྠངྒམོ ཧོཏི, སཏིནྡྲིཡསྶ ཝསེན ཨེཀཏྟཨནུཔཊྛཱནཾ སཏིནྡྲིཡསྶ ཨཏྠངྒམོ ཧོཏི; ཨཝིཀྑེཔཏྠཱཡ ཨཱཝཛྫནཱཡ ཨཏྠངྒམོ སམཱདྷིནྡྲིཡསྶ ཨཏྠངྒམོ ཧོཏི, ཨཝིཀྑེཔཝསེན ཚནྡསྶ ཨཏྠངྒམོ སམཱདྷིནྡྲིཡསྶ ཨཏྠངྒམོ ཧོཏི, ཨཝིཀྑེཔཝསེན མནསིཀཱརསྶ ཨཏྠངྒམོ སམཱདྷིནྡྲིཡསྶ ཨཏྠངྒམོ ཧོཏི, སམཱདྷིནྡྲིཡསྶ ཝསེན ཨེཀཏྟཨནུཔཊྛཱནཾ སམཱདྷིནྡྲིཡསྶ ཨཏྠངྒམོ ཧོཏི; དསྶནཏྠཱཡ ཨཱཝཛྫནཱཡ ཨཏྠངྒམོ པཉྙིནྡྲིཡསྶ ཨཏྠངྒམོ ཧོཏི, དསྶནཝསེན ཚནྡསྶ ཨཏྠངྒམོ པཉྙིནྡྲིཡསྶ ཨཏྠངྒམོ ཧོཏི, དསྶནཝསེན མནསིཀཱརསྶ ཨཏྠངྒམོ པཉྙིནྡྲིཡསྶ ཨཏྠངྒམོ ཧོཏི, པཉྙིནྡྲིཡསྶ ཝསེན ཨེཀཏྟཨནུཔཊྛཱནཾ པཉྙིནྡྲིཡསྶ ཨཏྠངྒམོ ཧོཏི།
Katamehi cattārīsāya ākārehi pañcannaṃ indriyānaṃ atthaṅgamo hoti; katamehi cattārīsāya ākārehi pañcannaṃ indriyānaṃ atthaṅgamaṃ pajānāti? Adhimokkhatthāya āvajjanāya atthaṅgamo saddhindriyassa atthaṅgamo hoti, adhimokkhavasena chandassa atthaṅgamo saddhindriyassa atthaṅgamo hoti, adhimokkhavasena manasikārassa atthaṅgamo saddhindriyassa atthaṅgamo hoti, saddhindriyassa vasena ekattaanupaṭṭhānaṃ 10 saddhindriyassa vasena atthaṅgamo hoti; paggahatthāya āvajjanāya atthaṅgamo vīriyindriyassa atthaṅgamo hoti, paggahavasena chandassa atthaṅgamo vīriyindriyassa atthaṅgamo hoti, paggahavasena manasikārassa atthaṅgamo vīriyindriyassa atthaṅgamo hoti, vīriyindriyassa vasena ekattaanupaṭṭhānaṃ vīriyindriyassa atthaṅgamo hoti; upaṭṭhānatthāya āvajjanāya atthaṅgamo satindriyassa atthaṅgamo hoti, upaṭṭhānavasena chandassa atthaṅgamo satindriyassa atthaṅgamo hoti, upaṭṭhānavasena manasikārassa atthaṅgamo satindriyassa atthaṅgamo hoti, satindriyassa vasena ekattaanupaṭṭhānaṃ satindriyassa atthaṅgamo hoti; avikkhepatthāya āvajjanāya atthaṅgamo samādhindriyassa atthaṅgamo hoti, avikkhepavasena chandassa atthaṅgamo samādhindriyassa atthaṅgamo hoti, avikkhepavasena manasikārassa atthaṅgamo samādhindriyassa atthaṅgamo hoti, samādhindriyassa vasena ekattaanupaṭṭhānaṃ samādhindriyassa atthaṅgamo hoti; dassanatthāya āvajjanāya atthaṅgamo paññindriyassa atthaṅgamo hoti, dassanavasena chandassa atthaṅgamo paññindriyassa atthaṅgamo hoti, dassanavasena manasikārassa atthaṅgamo paññindriyassa atthaṅgamo hoti, paññindriyassa vasena ekattaanupaṭṭhānaṃ paññindriyassa atthaṅgamo hoti.
ཨདྷིམོཀྑཏྠཱཡ ཨཱཝཛྫནཱཡ ཨཏྠངྒམོ སདྡྷིནྡྲིཡསྶ ཨཏྠངྒམོ ཧོཏི, པགྒཧཏྠཱཡ ཨཱཝཛྫནཱཡ ཨཏྠངྒམོ ཝཱིརིཡིནྡྲིཡསྶ ཨཏྠངྒམོ ཧོཏི, ཨུཔཊྛཱནཏྠཱཡ ཨཱཝཛྫནཱཡ ཨཏྠངྒམོ སཏིནྡྲིཡསྶ ཨཏྠངྒམོ ཧོཏི, ཨཝིཀྑེཔཏྠཱཡ ཨཱཝཛྫནཱཡ ཨཏྠངྒམོ སམཱདྷིནྡྲིཡསྶ ཨཏྠངྒམོ ཧོཏི, དསྶནཏྠཱཡ ཨཱཝཛྫནཱཡ ཨཏྠངྒམོ པཉྙིནྡྲིཡསྶ ཨཏྠངྒམོ ཧོཏི། ཨདྷིམོཀྑཝསེན ཚནྡསྶ ཨཏྠངྒམོ སདྡྷིནྡྲིཡསྶ ཨཏྠངྒམོ ཧོཏི, པགྒཧཝསེན ཚནྡསྶ ཨཏྠངྒམོ ཝཱིརིཡིནྡྲིཡསྶ ཨཏྠངྒམོ ཧོཏི, ཨུཔཊྛཱནཝསེན ཚནྡསྶ ཨཏྠངྒམོ སཏིནྡྲིཡསྶ ཨཏྠངྒམོ ཧོཏི, ཨཝིཀྑེཔཝསེན ཚནྡསྶ ཨཏྠངྒམོ སམཱདྷིནྡྲིཡསྶ ཨཏྠངྒམོ ཧོཏི, དསྶནཝསེན ཚནྡསྶ ཨཏྠངྒམོ པཉྙིནྡྲིཡསྶ ཨཏྠངྒམོ ཧོཏི། ཨདྷིམོཀྑཝསེན མནསིཀཱརསྶ ཨཏྠངྒམོ སདྡྷིནྡྲིཡསྶ ཨཏྠངྒམོ ཧོཏི, པགྒཧཝསེན མནསིཀཱརསྶ ཨཏྠངྒམོ ཝཱིརིཡིནྡྲིཡསྶ ཨཏྠངྒམོ ཧོཏི, ཨུཔཊྛཱནཝསེན མནསིཀཱརསྶ ཨཏྠངྒམོ སཏིནྡྲིཡསྶ ཨཏྠངྒམོ ཧོཏི, ཨཝིཀྑེཔཝསེན མནསིཀཱརསྶ ཨཏྠངྒམོ སམཱདྷིནྡྲིཡསྶ ཨཏྠངྒམོ ཧོཏི, དསྶནཝསེན མནསིཀཱརསྶ ཨཏྠངྒམོ པཉྙིནྡྲིཡསྶ ཨཏྠངྒམོ ཧོཏི། སདྡྷིནྡྲིཡསྶ ཝསེན ཨེཀཏྟཨནུཔཊྛཱནཾ སདྡྷིནྡྲིཡསྶ ཨཏྠངྒམོ ཧོཏི, ཝཱིརིཡིནྡྲིཡསྶ ཝསེན ཨེཀཏྟཨནུཔཊྛཱནཾ ཝཱིརིཡིནྡྲིཡསྶ ཨཏྠངྒམོ ཧོཏི, སཏིནྡྲིཡསྶ ཝསེན ཨེཀཏྟཨནུཔཊྛཱནཾ སཏིནྡྲིཡསྶ ཨཏྠངྒམོ ཧོཏི, སམཱདྷིནྡྲིཡསྶ ཝསེན ཨེཀཏྟཨནུཔཊྛཱནཾ སམཱདྷིནྡྲིཡསྶ ཨཏྠངྒམོ ཧོཏི, པཉྙིནྡྲིཡསྶ ཝསེན ཨེཀཏྟཨནུཔཊྛཱནཾ པཉྙིནྡྲིཡསྶ ཨཏྠངྒམོ ཧོཏི།
Adhimokkhatthāya āvajjanāya atthaṅgamo saddhindriyassa atthaṅgamo hoti, paggahatthāya āvajjanāya atthaṅgamo vīriyindriyassa atthaṅgamo hoti, upaṭṭhānatthāya āvajjanāya atthaṅgamo satindriyassa atthaṅgamo hoti, avikkhepatthāya āvajjanāya atthaṅgamo samādhindriyassa atthaṅgamo hoti, dassanatthāya āvajjanāya atthaṅgamo paññindriyassa atthaṅgamo hoti. Adhimokkhavasena chandassa atthaṅgamo saddhindriyassa atthaṅgamo hoti, paggahavasena chandassa atthaṅgamo vīriyindriyassa atthaṅgamo hoti, upaṭṭhānavasena chandassa atthaṅgamo satindriyassa atthaṅgamo hoti, avikkhepavasena chandassa atthaṅgamo samādhindriyassa atthaṅgamo hoti, dassanavasena chandassa atthaṅgamo paññindriyassa atthaṅgamo hoti. Adhimokkhavasena manasikārassa atthaṅgamo saddhindriyassa atthaṅgamo hoti, paggahavasena manasikārassa atthaṅgamo vīriyindriyassa atthaṅgamo hoti, upaṭṭhānavasena manasikārassa atthaṅgamo satindriyassa atthaṅgamo hoti, avikkhepavasena manasikārassa atthaṅgamo samādhindriyassa atthaṅgamo hoti, dassanavasena manasikārassa atthaṅgamo paññindriyassa atthaṅgamo hoti. Saddhindriyassa vasena ekattaanupaṭṭhānaṃ saddhindriyassa atthaṅgamo hoti, vīriyindriyassa vasena ekattaanupaṭṭhānaṃ vīriyindriyassa atthaṅgamo hoti, satindriyassa vasena ekattaanupaṭṭhānaṃ satindriyassa atthaṅgamo hoti, samādhindriyassa vasena ekattaanupaṭṭhānaṃ samādhindriyassa atthaṅgamo hoti, paññindriyassa vasena ekattaanupaṭṭhānaṃ paññindriyassa atthaṅgamo hoti.
ཨིམེཧི ཙཏྟཱརཱིསཱཡ ཨཱཀཱརེཧི པཉྩནྣཾ ཨིནྡྲིཡཱནཾ ཨཏྠངྒམོ ཧོཏི; ཨིམེཧི ཙཏྟཱརཱིསཱཡ ཨཱཀཱརེཧི པཉྩནྣཾ ཨིནྡྲིཡཱནཾ ཨཏྠངྒམཾ པཛཱནཱཏི།
Imehi cattārīsāya ākārehi pañcannaṃ indriyānaṃ atthaṅgamo hoti; imehi cattārīsāya ākārehi pañcannaṃ indriyānaṃ atthaṅgamaṃ pajānāti.
ཀ. ཨསྶཱདནིདྡེསོ
Ka. assādaniddeso
༡༨༩. ཀཏམེཧི པཉྩཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཨསྶཱདོ ཧོཏི; ཀཏམེཧི པཉྩཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཨསྶཱདཾ པཛཱནཱཏི? ཨསྶདྡྷིཡསྶ ཨནུཔཊྛཱནཾ སདྡྷིནྡྲིཡསྶ ཨསྶཱདོ ཧོཏི, ཨསྶདྡྷིཡཔརིལཱ༹ཧསྶ ཨནུཔཊྛཱནཾ སདྡྷིནྡྲིཡསྶ ཨསྶཱདོ ཧོཏི, ཨདྷིམོཀྑཙརིཡཱཡ ཝེསཱརཛྫཾ སདྡྷིནྡྲིཡསྶ ཨསྶཱདོ ཧོཏི, སནྟོ ཙ ཝིཧཱརཱདྷིགམོ སདྡྷིནྡྲིཡསྶ ཨསྶཱདོ ཧོཏི, ཡཾ སདྡྷིནྡྲིཡཾ པཊིཙྩ ཨུཔྤཛྫཏི སུཁཾ སོམནསྶཾ ཨཡཾ སདྡྷིནྡྲིཡསྶ ཨསྶཱདོ།
189. Katamehi pañcavīsatiyā ākārehi pañcannaṃ indriyānaṃ assādo hoti; katamehi pañcavīsatiyā ākārehi pañcannaṃ indriyānaṃ assādaṃ pajānāti? Assaddhiyassa anupaṭṭhānaṃ saddhindriyassa assādo hoti, assaddhiyapariḷāhassa anupaṭṭhānaṃ saddhindriyassa assādo hoti, adhimokkhacariyāya vesārajjaṃ saddhindriyassa assādo hoti, santo ca vihārādhigamo saddhindriyassa assādo hoti, yaṃ saddhindriyaṃ paṭicca uppajjati sukhaṃ somanassaṃ ayaṃ saddhindriyassa assādo.
ཀོསཛྫསྶ ཨནུཔཊྛཱནཾ ཝཱིརིཡིནྡྲིཡསྶ ཨསྶཱདོ ཧོཏི, ཀོསཛྫཔརིལཱ༹ཧསྶ ཨནུཔཊྛཱནཾ ཝཱིརིཡིནྡྲིཡསྶ ཨསྶཱདོ ཧོཏི, པགྒཧཙརིཡཱཡ ཝེསཱརཛྫཾ ཝཱིརིཡིནྡྲིཡསྶ ཨསྶཱདོ ཧོཏི, སནྟོ ཙ ཝིཧཱརཱདྷིགམོ ཝཱིརིཡིནྡྲིཡསྶ ཨསྶཱདོ ཧོཏི, ཡཾ ཝཱིརིཡིནྡྲིཡཾ པཊིཙྩ ཨུཔྤཛྫཏི སུཁཾ སོམནསྶཾ ཨཡཾ ཝཱིརིཡིནྡྲིཡསྶ ཨསྶཱདོ།
Kosajjassa anupaṭṭhānaṃ vīriyindriyassa assādo hoti, kosajjapariḷāhassa anupaṭṭhānaṃ vīriyindriyassa assādo hoti, paggahacariyāya vesārajjaṃ vīriyindriyassa assādo hoti, santo ca vihārādhigamo vīriyindriyassa assādo hoti, yaṃ vīriyindriyaṃ paṭicca uppajjati sukhaṃ somanassaṃ ayaṃ vīriyindriyassa assādo.
པམཱདསྶ ཨནུཔཊྛཱནཾ སཏིནྡྲིཡསྶ ཨསྶཱདོ ཧོཏི, པམཱདཔརིལཱ༹ཧསྶ ཨནུཔཊྛཱནཾ སཏིནྡྲིཡསྶ ཨསྶཱདོ ཧོཏི, ཨུཔཊྛཱནཙརིཡཱཡ ཝེསཱརཛྫཾ སཏིནྡྲིཡསྶ ཨསྶཱདོ ཧོཏི, སནྟོ ཙ ཝིཧཱརཱདྷིགམོ སཏིནྡྲིཡསྶ ཨསྶཱདོ ཧོཏི, ཡཾ སཏིནྡྲིཡཾ པཊིཙྩ ཨུཔྤཛྫཏི སུཁཾ སོམནསྶཾ ཨཡཾ སཏིནྡྲིཡསྶ ཨསྶཱདོ།
Pamādassa anupaṭṭhānaṃ satindriyassa assādo hoti, pamādapariḷāhassa anupaṭṭhānaṃ satindriyassa assādo hoti, upaṭṭhānacariyāya vesārajjaṃ satindriyassa assādo hoti, santo ca vihārādhigamo satindriyassa assādo hoti, yaṃ satindriyaṃ paṭicca uppajjati sukhaṃ somanassaṃ ayaṃ satindriyassa assādo.
ཨུདྡྷཙྩསྶ ཨནུཔཊྛཱནཾ སམཱདྷིནྡྲིཡསྶ ཨསྶཱདོ ཧོཏི, ཨུདྡྷཙྩཔརིལཱ༹ཧསྶ ཨནུཔཊྛཱནཾ སམཱདྷིནྡྲིཡསྶ ཨསྶཱདོ ཧོཏི, ཨཝིཀྑེཔཙརིཡཱཡ ཝེསཱརཛྫཾ སམཱདྷིནྡྲིཡསྶ ཨསྶཱདོ ཧོཏི, སནྟོ ཙ ཝིཧཱརཱདྷིགམོ སམཱདྷིནྡྲིཡསྶ ཨསྶཱདོ ཧོཏི, ཡཾ སམཱདྷིནྡྲིཡཾ པཊིཙྩ ཨུཔྤཛྫཏི སུཁཾ སོམནསྶཾ ཨཡཾ སམཱདྷིནྡྲིཡསྶ ཨསྶཱདོ།
Uddhaccassa anupaṭṭhānaṃ samādhindriyassa assādo hoti, uddhaccapariḷāhassa anupaṭṭhānaṃ samādhindriyassa assādo hoti, avikkhepacariyāya vesārajjaṃ samādhindriyassa assādo hoti, santo ca vihārādhigamo samādhindriyassa assādo hoti, yaṃ samādhindriyaṃ paṭicca uppajjati sukhaṃ somanassaṃ ayaṃ samādhindriyassa assādo.
ཨཝིཛྫཱཡ ཨནུཔཊྛཱནཾ པཉྙིནྡྲིཡསྶ ཨསྶཱདོ ཧོཏི, ཨཝིཛྫཱཔརིལཱ༹ཧསྶ ཨནུཔཊྛཱནཾ པཉྙིནྡྲིཡསྶ ཨསྶཱདོ ཧོཏི, དསྶནཙརིཡཱཡ ཝེསཱརཛྫཾ པཉྙིནྡྲིཡསྶ ཨསྶཱདོ ཧོཏི , སནྟོ ཙ ཝིཧཱརཱདྷིགམོ པཉྙིནྡྲིཡསྶ ཨསྶཱདོ ཧོཏི, ཡཾ པཉྙིནྡྲིཡཾ པཊིཙྩ ཨུཔྤཛྫཏི སུཁཾ སོམནསྶཾ ཨཡཾ པཉྙིནྡྲིཡསྶ ཨསྶཱདོ།
Avijjāya anupaṭṭhānaṃ paññindriyassa assādo hoti, avijjāpariḷāhassa anupaṭṭhānaṃ paññindriyassa assādo hoti, dassanacariyāya vesārajjaṃ paññindriyassa assādo hoti , santo ca vihārādhigamo paññindriyassa assādo hoti, yaṃ paññindriyaṃ paṭicca uppajjati sukhaṃ somanassaṃ ayaṃ paññindriyassa assādo.
ཨིམེཧི པཉྩཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཨསྶཱདོ ཧོཏི; ཨིམེཧི པཉྩཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཨསྶཱདཾ པཛཱནཱཏི།
Imehi pañcavīsatiyā ākārehi pañcannaṃ indriyānaṃ assādo hoti; imehi pañcavīsatiyā ākārehi pañcannaṃ indriyānaṃ assādaṃ pajānāti.
ཁ. ཨཱདཱིནཝནིདྡེསོ
Kha. ādīnavaniddeso
༡༩༠. ཀཏམེཧི པཉྩཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཨཱདཱིནཝོ ཧོཏི; ཀཏམེཧི པཉྩཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཨཱདཱིནཝཾ པཛཱནཱཏི? ཨསྶདྡྷིཡསྶ ཨུཔཊྛཱནཾ སདྡྷིནྡྲིཡསྶ ཨཱདཱིནཝོ ཧོཏི, ཨསྶདྡྷིཡཔརིལཱ༹ཧསྶ ཨུཔཊྛཱནཾ སདྡྷིནྡྲིཡསྶ ཨཱདཱིནཝོ ཧོཏི, ཨནིཙྩཊྛེན སདྡྷིནྡྲིཡསྶ ཨཱདཱིནཝོ ཧོཏི, དུཀྑཊྛེན སདྡྷིནྡྲིཡསྶ ཨཱདཱིནཝོ ཧོཏི, ཨནཏྟཊྛེན སདྡྷིནྡྲིཡསྶ ཨཱདཱིནཝོ ཧོཏི།
190. Katamehi pañcavīsatiyā ākārehi pañcannaṃ indriyānaṃ ādīnavo hoti; katamehi pañcavīsatiyā ākārehi pañcannaṃ indriyānaṃ ādīnavaṃ pajānāti? Assaddhiyassa upaṭṭhānaṃ saddhindriyassa ādīnavo hoti, assaddhiyapariḷāhassa upaṭṭhānaṃ saddhindriyassa ādīnavo hoti, aniccaṭṭhena saddhindriyassa ādīnavo hoti, dukkhaṭṭhena saddhindriyassa ādīnavo hoti, anattaṭṭhena saddhindriyassa ādīnavo hoti.
ཀོསཛྫསྶ ཨུཔཊྛཱནཾ ཝཱིརིཡིནྡྲིཡསྶ ཨཱདཱིནཝོ ཧོཏི, ཀོསཛྫཔརིལཱ༹ཧསྶ ཨུཔཊྛཱནཾ ཝཱིརིཡིནྡྲིཡསྶ ཨཱདཱིནཝོ ཧོཏི, ཨནིཙྩཊྛེན ཝཱིརིཡིནྡྲིཡསྶ ཨཱདཱིནཝོ ཧོཏི, དུཀྑཊྛེན…པེ॰… ཨནཏྟཊྛེན ཝཱིརིཡིནྡྲིཡསྶ ཨཱདཱིནཝོ ཧོཏི།
Kosajjassa upaṭṭhānaṃ vīriyindriyassa ādīnavo hoti, kosajjapariḷāhassa upaṭṭhānaṃ vīriyindriyassa ādīnavo hoti, aniccaṭṭhena vīriyindriyassa ādīnavo hoti, dukkhaṭṭhena…pe… anattaṭṭhena vīriyindriyassa ādīnavo hoti.
པམཱདསྶ ཨུཔཊྛཱནཾ སཏིནྡྲིཡསྶ ཨཱདཱིནཝོ ཧོཏི, པམཱདཔརིལཱ༹ཧསྶ ཨུཔཊྛཱནཾ སཏིནྡྲིཡསྶ ཨཱདཱིནཝོ ཧོཏི, ཨནིཙྩཊྛེན སཏིནྡྲིཡསྶ ཨཱདཱིནཝོ ཧོཏི, དུཀྑཊྛེན…པེ॰… ཨནཏྟཊྛེན སཏིནྡྲིཡསྶ ཨཱདཱིནཝོ ཧོཏི།
Pamādassa upaṭṭhānaṃ satindriyassa ādīnavo hoti, pamādapariḷāhassa upaṭṭhānaṃ satindriyassa ādīnavo hoti, aniccaṭṭhena satindriyassa ādīnavo hoti, dukkhaṭṭhena…pe… anattaṭṭhena satindriyassa ādīnavo hoti.
ཨུདྡྷཙྩསྶ ཨུཔཊྛཱནཾ སམཱདྷིནྡྲིཡསྶ ཨཱདཱིནཝོ ཧོཏི, ཨུདྡྷཙྩཔརིལཱ༹ཧསྶ ཨུཔཊྛཱནཾ སམཱདྷིནྡྲིཡསྶ ཨཱདཱིནཝོ ཧོཏི, ཨནིཙྩཊྛེན སམཱདྷིནྡྲིཡསྶ ཨཱདཱིནཝོ ཧོཏི, དུཀྑཊྛེན…པེ॰… ཨནཏྟཊྛེན སམཱདྷིནྡྲིཡསྶ ཨཱདཱིནཝོ ཧོཏི།
Uddhaccassa upaṭṭhānaṃ samādhindriyassa ādīnavo hoti, uddhaccapariḷāhassa upaṭṭhānaṃ samādhindriyassa ādīnavo hoti, aniccaṭṭhena samādhindriyassa ādīnavo hoti, dukkhaṭṭhena…pe… anattaṭṭhena samādhindriyassa ādīnavo hoti.
ཨཝིཛྫཱཡ ཨུཔཊྛཱནཾ པཉྙིནྡྲིཡསྶ ཨཱདཱིནཝོ ཧོཏི, ཨཝིཛྫཱཔརིལཱ༹ཧསྶ ཨུཔཊྛཱནཾ པཉྙིནྡྲིཡསྶ ཨཱདཱིནཝོ ཧོཏི, ཨནིཙྩཊྛེན པཉྙིནྡྲིཡསྶ ཨཱདཱིནཝོ ཧོཏི, དུཀྑཊྛེན པཉྙིནྡྲིཡསྶ ཨཱདཱིནཝོ ཧོཏི, ཨནཏྟཊྛེན པཉྙིནྡྲིཡསྶ ཨཱདཱིནཝོ ཧོཏི།
Avijjāya upaṭṭhānaṃ paññindriyassa ādīnavo hoti, avijjāpariḷāhassa upaṭṭhānaṃ paññindriyassa ādīnavo hoti, aniccaṭṭhena paññindriyassa ādīnavo hoti, dukkhaṭṭhena paññindriyassa ādīnavo hoti, anattaṭṭhena paññindriyassa ādīnavo hoti.
ཨིམེཧི པཉྩཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཨཱདཱིནཝོ ཧོཏི; ཨིམེཧི པཉྩཝཱིསཏིཡཱ ཨཱཀཱརེཧི པཉྩནྣཾ ཨིནྡྲིཡཱནཾ ཨཱདཱིནཝཾ པཛཱནཱཏི།
Imehi pañcavīsatiyā ākārehi pañcannaṃ indriyānaṃ ādīnavo hoti; imehi pañcavīsatiyā ākārehi pañcannaṃ indriyānaṃ ādīnavaṃ pajānāti.
ག. ནིསྶརཎནིདྡེསོ
Ga. nissaraṇaniddeso
༡༩༡. ཀཏམེཧི ཨསཱིཏིསཏཾ ཨཱཀཱརེཧི པཉྩནྣཾ ཨིནྡྲིཡཱནཾ ནིསྶརཎཾ ཧོཏི; ཀཏམེཧི ཨསཱིཏིསཏཾ ཨཱཀཱརེཧི པཉྩནྣཾ ཨིནྡྲིཡཱནཾ ནིསྶརཎཾ པཛཱནཱཏི? ཨདྷིམོཀྑཊྛེན སདྡྷིནྡྲིཡཾ ཨསྶདྡྷིཡཱ ནིསྶཊཾ ཧོཏི, ཨསྶདྡྷིཡཔརིལཱ༹ཧཱ ནིསྶཊཾ ཧོཏི, ཏདནུཝཏྟཀཀིལེསེཧི ཙ ཁནྡྷེཧི ཙ ནིསྶཊཾ ཧོཏི, བཧིདྡྷཱ ཙ སབྦནིམིཏྟེཧི ནིསྶཊཾ ཧོཏི, ཏཏོ པཎཱིཏཏརསདྡྷིནྡྲིཡསྶ པཊིལཱབྷཱ པུརིམཏརསདྡྷིནྡྲིཡཱ ནིསྶཊཾ ཧོཏི; པགྒཧཊྛེན ཝཱིརིཡིནྡྲིཡཾ ཀོསཛྫཱ ནིསྶཊཾ ཧོཏི, ཀོསཛྫཔརིལཱ༹ཧཱ ནིསྶཊཾ ཧོཏི, ཏདནུཝཏྟཀཀིལེསེཧི ཙ ཁནྡྷེཧི ཙ ནིསྶཊཾ ཧོཏི, བཧིདྡྷཱ ཙ སབྦནིམིཏྟེཧི ནིསྶཊཾ ཧོཏི, ཏཏོ པཎཱིཏཏརཝཱིརིཡིནྡྲིཡསྶ པཊིལཱབྷཱ པུརིམཏརཝཱིརིཡིནྡྲིཡཱ ནིསྶཊཾ ཧོཏི; ཨུཔཊྛཱནཊྛེན སཏིནྡྲིཡཾ པམཱདཱ ནིསྶཊཾ ཧོཏི, པམཱདཔརིལཱ༹ཧཱ ནིསྶཊཾ ཧོཏི , ཏདནུཝཏྟཀཀིལེསེཧི ཙ ཁནྡྷེཧི ཙ ནིསྶཊཾ ཧོཏི, བཧིདྡྷཱ ཙ སབྦནིམིཏྟེཧི ནིསྶཊཾ ཧོཏི, ཏཏོ པཎཱིཏཏརསཏིནྡྲིཡསྶ པཊིལཱབྷཱ པུརིམཏརསཏིནྡྲིཡཱ ནིསྶཊཾ ཧོཏི; ཨཝིཀྑེཔཊྛེན སམཱདྷིནྡྲིཡཾ ཨུདྡྷཙྩཱ ནིསྶཊཾ ཧོཏི, ཨུདྡྷཙྩཔརིལཱ༹ཧཱ ནིསྶཊཾ ཧོཏི, ཏདནུཝཏྟཀཀིལེསེཧི ཙ ཁནྡྷེཧི ཙ ནིསྶཊཾ ཧོཏི, བཧིདྡྷཱ ཙ སབྦནིམིཏྟེཧི ནིསྶཊཾ ཧོཏི, ཏཏོ པཎཱིཏཏརསམཱདྷིནྡྲིཡསྶ པཊིལཱབྷཱ པུརིམཏརསམཱདྷིནྡྲིཡཱ ནིསྶཊཾ ཧོཏི; དསྶནཊྛེན པཉྙིནྡྲིཡཾ ཨཝིཛྫཱཡ ནིསྶཊཾ ཧོཏི, ཨཝིཛྫཱཔརིལཱ༹ཧཱ ནིསྶཊཾ ཧོཏི, ཏདནུཝཏྟཀཀིལེསེཧི ཙ ཁནྡྷེཧི ཙ ནིསྶཊཾ ཧོཏི, བཧིདྡྷཱ ཙ སབྦནིམིཏྟེཧི ནིསྶཊཾ ཧོཏི, ཏཏོ པཎཱིཏཏརཔཉྙིནྡྲིཡསྶ པཊིལཱབྷཱ པུརིམཏརཔཉྙིནྡྲིཡཱ ནིསྶཊཾ ཧོཏི།
191. Katamehi asītisataṃ ākārehi pañcannaṃ indriyānaṃ nissaraṇaṃ hoti; katamehi asītisataṃ ākārehi pañcannaṃ indriyānaṃ nissaraṇaṃ pajānāti? Adhimokkhaṭṭhena saddhindriyaṃ assaddhiyā nissaṭaṃ hoti, assaddhiyapariḷāhā nissaṭaṃ hoti, tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītatarasaddhindriyassa paṭilābhā purimatarasaddhindriyā nissaṭaṃ hoti; paggahaṭṭhena vīriyindriyaṃ kosajjā nissaṭaṃ hoti, kosajjapariḷāhā nissaṭaṃ hoti, tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītataravīriyindriyassa paṭilābhā purimataravīriyindriyā nissaṭaṃ hoti; upaṭṭhānaṭṭhena satindriyaṃ pamādā nissaṭaṃ hoti, pamādapariḷāhā nissaṭaṃ hoti , tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītatarasatindriyassa paṭilābhā purimatarasatindriyā nissaṭaṃ hoti; avikkhepaṭṭhena samādhindriyaṃ uddhaccā nissaṭaṃ hoti, uddhaccapariḷāhā nissaṭaṃ hoti, tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītatarasamādhindriyassa paṭilābhā purimatarasamādhindriyā nissaṭaṃ hoti; dassanaṭṭhena paññindriyaṃ avijjāya nissaṭaṃ hoti, avijjāpariḷāhā nissaṭaṃ hoti, tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītatarapaññindriyassa paṭilābhā purimatarapaññindriyā nissaṭaṃ hoti.
༡༩༢. པུབྦབྷཱགེ པཉྩཧི ཨིནྡྲིཡེཧི པཋམཛ྄ཛྷཱནཝསེན པཉྩིནྡྲིཡཱནི ནིསྶཊཱནི ཧོནྟི, པཋམེ ཛྷཱནེ པཉྩཧིནྡྲིཡེཧི དུཏིཡཛ྄ཛྷཱནཝསེན པཉྩིནྡྲིཡཱནི ནིསྶཊཱནི ཧོནྟི, དུཏིཡེ ཛྷཱནེ པཉྩཧིནྡྲིཡེཧི ཏཏིཡཛ྄ཛྷཱནཝསེན པཉྩིནྡྲིཡཱནི ནིསྶཊཱནི ཧོནྟི, ཏཏིཡེ ཛྷཱནེ པཉྩཧིནྡྲིཡེཧི ཙཏུཏྠཛ྄ཛྷཱནཝསེན པཉྩིནྡྲིཡཱནི ནིསྶཊཱནི ཧོནྟི, ཙཏུཏྠེ ཛྷཱནེ པཉྩཧིནྡྲིཡེཧི ཨཱཀཱསཱནཉྩཱཡཏནསམཱཔཏྟིཝསེན པཉྩིནྡྲིཡཱནི ནིསྶཊཱནི ཧོནྟི , ཨཱཀཱསཱནཉྩཱཡཏནསམཱཔཏྟིཡཱ པཉྩཧིནྡྲིཡེཧི ཝིཉྙཱཎཉྩཱཡཏནསམཱཔཏྟིཝསེན པཉྩིནྡྲིཡཱནི ནིསྶཊཱནི ཧོནྟི, ཝིཉྙཱཎཉྩཱཡཏནསམཱཔཏྟིཡཱ པཉྩཧིནྡྲིཡེཧི ཨཱཀིཉྩཉྙཱཡཏནསམཱཔཏྟིཝསེན པཉྩིནྡྲིཡཱནི ནིསྶཊཱནི ཧོནྟི, ཨཱཀིཉྩཉྙཱཡཏནསམཱཔཏྟིཡཱ པཉྩཧིནྡྲིཡེཧི ནེཝསཉྙཱནཱསཉྙཱཡཏནསམཱཔཏྟིཝསེན པཉྩིནྡྲིཡཱནི ནིསྶཊཱནི ཧོནྟི, ནེཝསཉྙཱནཱསཉྙཱཡཏནསམཱཔཏྟིཡཱ པཉྩཧིནྡྲིཡེཧི ཨནིཙྩཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི།
192. Pubbabhāge pañcahi indriyehi paṭhamajjhānavasena pañcindriyāni nissaṭāni honti, paṭhame jhāne pañcahindriyehi dutiyajjhānavasena pañcindriyāni nissaṭāni honti, dutiye jhāne pañcahindriyehi tatiyajjhānavasena pañcindriyāni nissaṭāni honti, tatiye jhāne pañcahindriyehi catutthajjhānavasena pañcindriyāni nissaṭāni honti, catutthe jhāne pañcahindriyehi ākāsānañcāyatanasamāpattivasena pañcindriyāni nissaṭāni honti , ākāsānañcāyatanasamāpattiyā pañcahindriyehi viññāṇañcāyatanasamāpattivasena pañcindriyāni nissaṭāni honti, viññāṇañcāyatanasamāpattiyā pañcahindriyehi ākiñcaññāyatanasamāpattivasena pañcindriyāni nissaṭāni honti, ākiñcaññāyatanasamāpattiyā pañcahindriyehi nevasaññānāsaññāyatanasamāpattivasena pañcindriyāni nissaṭāni honti, nevasaññānāsaññāyatanasamāpattiyā pañcahindriyehi aniccānupassanāvasena pañcindriyāni nissaṭāni honti.
ཨནིཙྩཱནུཔསྶནཱ པཉྩཧིནྡྲིཡེཧི དུཀྑཱནུཔསྶནཱཝསེ པཉྩིནྡྲིཡཱནི ནིསྶཊཱནི ཧོནྟི, དུཀྑཱནུཔསྶནཱ པཉྩཧིནྡྲིཡེཧི ཨནཏྟཱནུཔསྶནཱཝསེ པཉྩིནྡྲིཡཱནི ནིསྶཊཱནི ཧོནྟི, ཨནཏྟཱནུཔསྶནཱ པཉྩཧིནྡྲིཡེཧི ནིབྦིདཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི, ནིབྦིདཱནུཔསྶནཱཡ པཉྩཧིནྡྲིཡེཧི ཝིརཱགཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི, ཝིརཱགཱནུཔསྶནཱཡ པཉྩཧིནྡྲིཡེཧི ནིརོདྷཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི, ནིརོདྷཱནུཔསྶནཱཡ པཉྩཧིནྡྲིཡེཧི པཊིནིསྶགྒཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི, པཊིནིསྶགྒཱནུཔསྶནཱཡ པཉྩཧིནྡྲིཡེཧི ཁཡཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི, ཁཡཱནུཔསྶནཱཡ པཉྩཧིནྡྲིཡེཧི ཝཡཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི, ཝཡཱནུཔསྶནཱཡ པཉྩཧིནྡྲིཡེཧི ཝིཔརིཎཱམཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི, ཝིཔརིཎཱམཱནུཔསྶནཱཡ པཉྩཧིནྡྲིཡེཧི ཨནིམིཏྟཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི, ཨནིམིཏྟཱནུཔསྶནཱཡ པཉྩཧིནྡྲིཡེཧི ཨཔྤཎིཧིཏཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི, ཨཔྤཎིཧིཏཱནུཔསྶནཱཡ པཉྩཧིནྡྲིཡེཧི སུཉྙཏཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི སུཉྙཏཱནུཔསྶནཱཡ པཉྩཧིནྡྲིཡེཧི ཨདྷིཔཉྙཱདྷམྨཝིཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི། ཨདྷིཔཉྙཱདྷམྨཝིཔསྶནཱཡ པཉྩཧིནྡྲིཡེཧི ཡཐཱབྷཱུཏཉཱཎདསྶནཝསེན པཉྩིནྡྲིཡཱནི ནིསྶཊཱནི ཧོནྟི, ཡཐཱབྷཱུཏཉཱཎདསྶནེ པཉྩཧིནྡྲིཡེཧི ཨཱདཱིནཝཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི, ཨཱདཱིནཝཱནུཔསྶནཱཡ པཉྩཧིནྡྲིཡེཧི པཊིསངྑཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི, པཊིསངྑཱནུཔསྶནཱཡ པཉྩཧིནྡྲིཡེཧི ཝིཝཊྚནཱནུཔསྶནཱཝསེན པཉྩིནྡྲིཡཱནི ནིསྶཊཱནི ཧོནྟི། ཝིཝཊྚནཱནུཔསྶནཱཡ པཉྩཧིནྡྲིཡེཧི སོཏཱཔཏྟིམགྒཝསེན པཉྩིནྡྲིཡཱནི ནིསྶཊཱནི ཧོནྟི།
Aniccānupassanā pañcahindriyehi dukkhānupassanāvase pañcindriyāni nissaṭāni honti, dukkhānupassanā pañcahindriyehi anattānupassanāvase pañcindriyāni nissaṭāni honti, anattānupassanā pañcahindriyehi nibbidānupassanāvasena pañcindriyāni nissaṭāni honti, nibbidānupassanāya pañcahindriyehi virāgānupassanāvasena pañcindriyāni nissaṭāni honti, virāgānupassanāya pañcahindriyehi nirodhānupassanāvasena pañcindriyāni nissaṭāni honti, nirodhānupassanāya pañcahindriyehi paṭinissaggānupassanāvasena pañcindriyāni nissaṭāni honti, paṭinissaggānupassanāya pañcahindriyehi khayānupassanāvasena pañcindriyāni nissaṭāni honti, khayānupassanāya pañcahindriyehi vayānupassanāvasena pañcindriyāni nissaṭāni honti, vayānupassanāya pañcahindriyehi vipariṇāmānupassanāvasena pañcindriyāni nissaṭāni honti, vipariṇāmānupassanāya pañcahindriyehi animittānupassanāvasena pañcindriyāni nissaṭāni honti, animittānupassanāya pañcahindriyehi appaṇihitānupassanāvasena pañcindriyāni nissaṭāni honti, appaṇihitānupassanāya pañcahindriyehi suññatānupassanāvasena pañcindriyāni nissaṭāni honti suññatānupassanāya pañcahindriyehi adhipaññādhammavipassanāvasena pañcindriyāni nissaṭāni honti. Adhipaññādhammavipassanāya pañcahindriyehi yathābhūtañāṇadassanavasena pañcindriyāni nissaṭāni honti, yathābhūtañāṇadassane pañcahindriyehi ādīnavānupassanāvasena pañcindriyāni nissaṭāni honti, ādīnavānupassanāya pañcahindriyehi paṭisaṅkhānupassanāvasena pañcindriyāni nissaṭāni honti, paṭisaṅkhānupassanāya pañcahindriyehi vivaṭṭanānupassanāvasena pañcindriyāni nissaṭāni honti. Vivaṭṭanānupassanāya pañcahindriyehi sotāpattimaggavasena pañcindriyāni nissaṭāni honti.
སོཏཱཔཏྟིམགྒེ པཉྩཧིནྡྲིཡེཧི སོཏཱཔཏྟིཕལསམཱཔཏྟིཝསེན པཉྩིནྡྲིཡཱནི ནིསྶཊཱནི ཧོནྟི, སོཏཱཔཏྟིཕལསམཱཔཏྟིཡཱ པཉྩཧིནྡྲིཡེཧི སཀདཱགཱམིམགྒཝསེན པཉྩིནྡྲིཡཱནི ནིསྶཊཱནི ཧོནྟི, སཀདཱགཱམིམགྒེ པཉྩཧིནྡྲིཡེཧི སཀདཱགཱམིཕལསམཱཔཏྟིཝསེན པཉྩིནྡྲིཡཱནི ནིསྶཊཱནི ཧོནྟི, སཀདཱགཱམིཕལསམཱཔཏྟིཡཱ པཉྩཧིནྡྲིཡེཧི ཨནཱགཱམིམགྒཝསེན པཉྩིནྡྲིཡཱནི ནིསྶཊཱནི ཧོནྟི, ཨནཱགཱམིམགྒེ པཉྩཧིནྡྲིཡེཧི ཨནཱགཱམིཕལསམཱཔཏྟིཝསེན པཉྩིནྡྲིཡཱནི ནིསྶཊཱནི ཧོནྟི, ཨནཱགཱམིཕལསམཱཔཏྟིཡཱ པཉྩཧིནྡྲིཡེཧི ཨརཧཏྟམགྒཝསེན པཉྩིནྡྲིཡཱནི ནིསྶཊཱནི ཧོནྟི, ཨརཧཏྟམགྒེ པཉྩཧིནྡྲིཡེཧི ཨརཧཏྟཕལསམཱཔཏྟིཝསེན པཉྩིནྡྲིཡཱནི ནིསྶཊཱནི ཧོནྟི།
Sotāpattimagge pañcahindriyehi sotāpattiphalasamāpattivasena pañcindriyāni nissaṭāni honti, sotāpattiphalasamāpattiyā pañcahindriyehi sakadāgāmimaggavasena pañcindriyāni nissaṭāni honti, sakadāgāmimagge pañcahindriyehi sakadāgāmiphalasamāpattivasena pañcindriyāni nissaṭāni honti, sakadāgāmiphalasamāpattiyā pañcahindriyehi anāgāmimaggavasena pañcindriyāni nissaṭāni honti, anāgāmimagge pañcahindriyehi anāgāmiphalasamāpattivasena pañcindriyāni nissaṭāni honti, anāgāmiphalasamāpattiyā pañcahindriyehi arahattamaggavasena pañcindriyāni nissaṭāni honti, arahattamagge pañcahindriyehi arahattaphalasamāpattivasena pañcindriyāni nissaṭāni honti.
ནེཀྑམྨེ པཉྩིནྡྲིཡཱནི ཀཱམཙྪནྡཏོ ནིསྶཊཱནི ཧོནྟི, ཨབྱཱཔཱདེ པཉྩིནྡྲིཡཱནི བྱཱཔཱདཏོ ནིསྶཊཱནི ཧོནྟི, ཨཱལོཀསཉྙཱཡ པཉྩིནྡྲིཡཱནི ཐིནམིདྡྷཏོ ནིསྶཊཱནི ཧོནྟི, ཨཝིཀྑེཔེ པཉྩིནྡྲིཡཱནི ཨུདྡྷཙྩཏོ ནིསྶཊཱནི ཧོནྟི, དྷམྨཝཝཏྠཱནེ པཉྩིནྡྲིཡཱནི ཝིཙིཀིཙྪཱཡ ནིསྶཊཱནི ཧོནྟི, ཉཱཎེ པཉྩིནྡྲིཡཱནི ཨཝིཛྫཱཡ ནིསྶཊཱནི ཧོནྟི, པཱམོཛྫེ པཉྩིནྡྲིཡཱནི ཨརཏིཡཱ ནིསྶཊཱནི ཧོནྟི།
Nekkhamme pañcindriyāni kāmacchandato nissaṭāni honti, abyāpāde pañcindriyāni byāpādato nissaṭāni honti, ālokasaññāya pañcindriyāni thinamiddhato nissaṭāni honti, avikkhepe pañcindriyāni uddhaccato nissaṭāni honti, dhammavavatthāne pañcindriyāni vicikicchāya nissaṭāni honti, ñāṇe pañcindriyāni avijjāya nissaṭāni honti, pāmojje pañcindriyāni aratiyā nissaṭāni honti.
༡༩༣. པཋམེ ཛྷཱནེ པཉྩིནྡྲིཡཱནི ནཱིཝརཎེཧི ནིསྶཊཱནི ཧོནྟི, དུཏིཡེ ཛྷཱནེ པཉྩིནྡྲིཡཱནི ཝིཏཀྐཝིཙཱརེཧི ནིསྶཊཱནི ཧོནྟི, ཏཏིཡེ ཛྷཱནེ པཉྩིནྡྲིཡཱནི པཱིཏིཡཱ ནིསྶཊཱནི ཧོནྟི, ཙཏུཏྠེ ཛྷཱནེ པཉྩིནྡྲིཡཱནི སུཁདུཀྑེཧི ནིསྶཊཱནི ཧོནྟི, ཨཱཀཱསཱནཉྩཱཡཏནསམཱཔཏྟིཡཱ པཉྩིནྡྲིཡཱནི རཱུཔསཉྙཱཡ པཊིགྷསཉྙཱཡ ནཱནཏྟསཉྙཱཡ ནིསྶཊཱནི ཧོནྟི, ཝིཉྙཱཎཉྩཱཡཏནསམཱཔཏྟིཡཱ པཉྩིནྡྲིཡཱནི ཨཱཀཱསཱནཉྩཱཡཏནསཉྙཱཡ ནིསྶཊཱནི ཧོནྟི, ཨཱཀིཉྩཉྙཱཡཏནསམཱཔཏྟིཡཱ པཉྩིནྡྲིཡཱནི ཝིཉྙཱཎཉྩཱཡཏནསཉྙཱཡ ནིསྶཊཱནི ཧོནྟི, ནེཝསཉྙཱནཱསཉྙཱཡཏནསམཱཔཏྟིཡཱ པཉྩིནྡྲིཡཱནི ཨཱཀིཉྩཉྙཱཡཏནསཉྙཱཡ ནིསྶཊཱནི ཧོནྟི།
193. Paṭhame jhāne pañcindriyāni nīvaraṇehi nissaṭāni honti, dutiye jhāne pañcindriyāni vitakkavicārehi nissaṭāni honti, tatiye jhāne pañcindriyāni pītiyā nissaṭāni honti, catutthe jhāne pañcindriyāni sukhadukkhehi nissaṭāni honti, ākāsānañcāyatanasamāpattiyā pañcindriyāni rūpasaññāya paṭighasaññāya nānattasaññāya nissaṭāni honti, viññāṇañcāyatanasamāpattiyā pañcindriyāni ākāsānañcāyatanasaññāya nissaṭāni honti, ākiñcaññāyatanasamāpattiyā pañcindriyāni viññāṇañcāyatanasaññāya nissaṭāni honti, nevasaññānāsaññāyatanasamāpattiyā pañcindriyāni ākiñcaññāyatanasaññāya nissaṭāni honti.
ཨནིཙྩཱནུཔསྶནཱ པཉྩིནྡྲིཡཱནི ནིཙྩསཉྙཱཡ ནིསྶཊཱནི ཧོནྟི, དུཀྑཱནུཔསྶནཱ པཉྩིནྡྲིཡཱནི སུཁསཉྙཱཡ ནིསྶཊཱནི ཧོནྟི, ཨནཏྟཱནུཔསྶནཱ པཉྩིནྡྲིཡཱནི ཨཏྟསཉྙཱཡ ནིསྶཊཱནི ཧོནྟི, ནིབྦིདཱནུཔསྶནཱཡ པཉྩིནྡྲིཡཱནི ནནྡིཡཱ ནིསྶཊཱནི ཧོནྟི, ཝིརཱགཱནུཔསྶནཱཡ པཉྩིནྡྲིཡཱནི རཱགཏོ ནིསྶཊཱནི ཧོནྟི, ནིརོདྷཱནུཔསྶནཱཡ པཉྩིནྡྲིཡཱནི སམུདཡཏོ ནིསྶཊཱནི ཧོནྟི, པཊིནིསྶགྒཱནུཔསྶནཱཡ པཉྩིནྡྲིཡཱནི ཨཱདཱནཏོ ནིསྶཊཱནི ཧོནྟི, ཁཡཱནུཔསྶནཱཡ པཉྩིནྡྲིཡཱནི གྷནསཉྙཱཡ ནིསྶཊཱནི ཧོནྟི , ཝཡཱནུཔསྶནཱཡ པཉྩིནྡྲིཡཱནི ཨཱཡཱུཧནཏོ ནིསྶཊཱནི ཧོནྟི, ཝིཔརིཎཱམཱནུཔསྶནཱཡ པཉྩིནྡྲིཡཱནི དྷུཝསཉྙཱཡ ནིསྶཊཱནི ཧོནྟི, ཨནིམིཏྟཱནུཔསྶནཱཡ པཉྩིནྡྲིཡཱནི ནིམིཏྟཏོ ནིསྶཊཱནི ཧོནྟི, ཨཔྤཎིཧིཏཱནུཔསྶནཱཡ པཉྩིནྡྲིཡཱནི པཎིདྷིཡཱ ནིསྶཊཱནི ཧོནྟི, སུཉྙཏཱནུཔསྶནཱཡ པཉྩིནྡྲིཡཱནི ཨབྷིནིཝེསཏོ ནིསྶཊཱནི ཧོནྟི། ཨདྷིཔཉྙཱདྷམྨཝིཔསྶནཱཡ པཉྩིནྡྲིཡཱནི སཱརཱདཱནཱབྷིནིཝེསཏོ ནིསྶཊཱནི ཧོནྟི, ཡཐཱབྷཱུཏཉཱཎདསྶནེ པཉྩིནྡྲིཡཱནི སམྨོཧཱབྷིནིཝེསཏོ ནིསྶཊཱནི ཧོནྟི, ཨཱདཱིནཝཱནུཔསྶནཱཡ པཉྩིནྡྲིཡཱནི ཨཱལཡཱབྷིནིཝེསཏོ ནིསྶཊཱནི ཧོནྟི, པཊིསངྑཱནུཔསྶནཱཡ པཉྩིནྡྲིཡཱནི ཨཔྤཊིསངྑཱཡ ནིསྶཊཱནི ཧོནྟི, ཝིཝཊྚནཱནུཔསྶནཱཡ པཉྩིནྡྲིཡཱནི སཉྙོགཱབྷིནིཝེསཏོ ནིསྶཊཱནི ཧོནྟི།
Aniccānupassanā pañcindriyāni niccasaññāya nissaṭāni honti, dukkhānupassanā pañcindriyāni sukhasaññāya nissaṭāni honti, anattānupassanā pañcindriyāni attasaññāya nissaṭāni honti, nibbidānupassanāya pañcindriyāni nandiyā nissaṭāni honti, virāgānupassanāya pañcindriyāni rāgato nissaṭāni honti, nirodhānupassanāya pañcindriyāni samudayato nissaṭāni honti, paṭinissaggānupassanāya pañcindriyāni ādānato nissaṭāni honti, khayānupassanāya pañcindriyāni ghanasaññāya nissaṭāni honti , vayānupassanāya pañcindriyāni āyūhanato nissaṭāni honti, vipariṇāmānupassanāya pañcindriyāni dhuvasaññāya nissaṭāni honti, animittānupassanāya pañcindriyāni nimittato nissaṭāni honti, appaṇihitānupassanāya pañcindriyāni paṇidhiyā nissaṭāni honti, suññatānupassanāya pañcindriyāni abhinivesato nissaṭāni honti. Adhipaññādhammavipassanāya pañcindriyāni sārādānābhinivesato nissaṭāni honti, yathābhūtañāṇadassane pañcindriyāni sammohābhinivesato nissaṭāni honti, ādīnavānupassanāya pañcindriyāni ālayābhinivesato nissaṭāni honti, paṭisaṅkhānupassanāya pañcindriyāni appaṭisaṅkhāya nissaṭāni honti, vivaṭṭanānupassanāya pañcindriyāni saññogābhinivesato nissaṭāni honti.
སོཏཱཔཏྟིམགྒེ པཉྩིནྡྲིཡཱནི དིཊྛེཀཊྛེཧི ཀིལེསེཧི ནིསྶཊཱནི ཧོནྟི, སཀདཱགཱམིམགྒེ པཉྩིནྡྲིཡཱནི ཨོལཱ༹རིཀེཧི ཀིལེསེཧི ནིསྶཊཱནི ཧོནྟི, ཨནཱགཱམིམགྒེ པཉྩིནྡྲིཡཱནི ཨནུསཧགཏེཧི ཀིལེསེཧི ནིསྶཊཱནི ཧོནྟི, ཨརཧཏྟམགྒེ པཉྩིནྡྲིཡཱནི སབྦཀིལེསེཧི ནིསྶཊཱནི ཧོནྟི, སབྦེསཉྙེཝ ཁཱིཎཱསཝཱནཾ ཏཏྠ ཏཏྠ པཉྩིནྡྲིཡཱནི ནིསྶཊཱནི ཙེཝ ཧོནྟི སུནིསྶཊཱནི ཙ པཊིཔྤསྶདྡྷཱནི ཙ སུཔྤཊིཔྤསྶདྡྷཱནི ཙ།
Sotāpattimagge pañcindriyāni diṭṭhekaṭṭhehi kilesehi nissaṭāni honti, sakadāgāmimagge pañcindriyāni oḷārikehi kilesehi nissaṭāni honti, anāgāmimagge pañcindriyāni anusahagatehi kilesehi nissaṭāni honti, arahattamagge pañcindriyāni sabbakilesehi nissaṭāni honti, sabbesaññeva khīṇāsavānaṃ tattha tattha pañcindriyāni nissaṭāni ceva honti sunissaṭāni ca paṭippassaddhāni ca suppaṭippassaddhāni ca.
ཨིམེཧི ཨསཱིཏིསཏཾ ཨཱཀཱརེཧི པཉྩནྣཾ ཨིནྡྲིཡཱནཾ ནིསྶརཎཾ ཧོཏི; ཨིམེཧི ཨསཱིཏིསཏཾ ཨཱཀཱརེཧི པཉྩནྣཾ ཨིནྡྲིཡཱནཾ ནིསྶརཎཾ པཛཱནཱཏི།
Imehi asītisataṃ ākārehi pañcannaṃ indriyānaṃ nissaraṇaṃ hoti; imehi asītisataṃ ākārehi pañcannaṃ indriyānaṃ nissaraṇaṃ pajānāti.
སུཏྟནྟནིདྡེསོ དུཏིཡོ།
Suttantaniddeso dutiyo.
པཋམབྷཱཎཝཱརོ།
Paṭhamabhāṇavāro.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༢. དུཏིཡསུཏྟནྟནིདྡེསཝཎྞནཱ • 2. Dutiyasuttantaniddesavaṇṇanā
