| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༣. དུཏིཡསུཏྟནྟནིདྡེསོ
3. Dutiyasuttantaniddeso
༡༤. ཡཾ རཱུཔཾ པཊིཙྩ ཨུཔྤཛྫཏི སུཁཾ སོམནསྶཾ, ཨཡཾ རཱུཔསྶ ཨསྶཱདོཏི – པཧཱནཔྤཊིཝེདྷོ སམུདཡསཙྩཾ། ཡཾ རཱུཔཾ ཨནིཙྩཾ ཏཾ དུཀྑཾ ཝིཔརིཎཱམདྷམྨཾ, ཨཡཾ རཱུཔསྶ ཨཱདཱིནཝོཏི – པརིཉྙཱཔཊིཝེདྷོ དུཀྑསཙྩཾ། ཡོ རཱུཔསྨིཾ ཚནྡརཱགཝིནཡོ ཚནྡརཱགཔྤཧཱནཾ, ཨིདཾ རཱུཔསྶ ནིསྶརཎནྟི – སཙྪིཀིརིཡཱཔཊིཝེདྷོ ནིརོདྷསཙྩཾ། ཡཱ ཨིམེསུ ཏཱིསུ ཋཱནེསུ དིཊྛི སངྐཔྤོ ཝཱཙཱ ཀམྨནྟོ ཨཱཛཱིཝོ ཝཱཡཱམོ སཏི སམཱདྷི – བྷཱཝནཱཔཊིཝེདྷོ མགྒསཙྩཾ།
14. Yaṃ rūpaṃ paṭicca uppajjati sukhaṃ somanassaṃ, ayaṃ rūpassa assādoti – pahānappaṭivedho samudayasaccaṃ. Yaṃ rūpaṃ aniccaṃ taṃ dukkhaṃ vipariṇāmadhammaṃ, ayaṃ rūpassa ādīnavoti – pariññāpaṭivedho dukkhasaccaṃ. Yo rūpasmiṃ chandarāgavinayo chandarāgappahānaṃ, idaṃ rūpassa nissaraṇanti – sacchikiriyāpaṭivedho nirodhasaccaṃ. Yā imesu tīsu ṭhānesu diṭṭhi saṅkappo vācā kammanto ājīvo vāyāmo sati samādhi – bhāvanāpaṭivedho maggasaccaṃ.
ཡཾ ཝེདནཾ པཊིཙྩ…པེ॰… ཡཾ སཉྙཾ པཊིཙྩ… ཡཾ སངྑཱརེ པཊིཙྩ… ཡཾ ཝིཉྙཱཎཾ པཊིཙྩ ཨུཔྤཛྫཏི སུཁཾ སོམནསྶཾ, ཨཡཾ ཝིཉྙཱཎསྶ ཨསྶཱདོཏི – པཧཱནཔྤཊིཝེདྷོ སམུདཡསཙྩཾ། ཡཾ ཝིཉྙཱཎཾ ཨནིཙྩཾ ཏཾ དུཀྑཾ ཝིཔརིཎཱམདྷམྨཾ, ཨཡཾ ཝིཉྙཱཎསྶ ཨཱདཱིནཝོཏི – པརིཉྙཱཔཊིཝེདྷོ དུཀྑསཙྩཾ། ཡོ ཝིཉྙཱཎསྨིཾ ཚནྡརཱགཝིནཡོ ཚནྡརཱགཔྤཧཱནཾ, ཨིདཾ ཝིཉྙཱཎསྶ ནིསྶརཎནྟི – སཙྪིཀིརིཡཱཔཊིཝེདྷོ ནིརོདྷསཙྩཾ། ཡཱ ཨིམེསུ ཏཱིསུ ཋཱནེསུ དིཊྛི སངྐཔྤོ ཝཱཙཱ ཀམྨནྟོ ཨཱཛཱིཝོ ཝཱཡཱམོ སཏི སམཱདྷི – བྷཱཝནཱཔཊིཝེདྷོ མགྒསཙྩཾ།
Yaṃ vedanaṃ paṭicca…pe… yaṃ saññaṃ paṭicca… yaṃ saṅkhāre paṭicca… yaṃ viññāṇaṃ paṭicca uppajjati sukhaṃ somanassaṃ, ayaṃ viññāṇassa assādoti – pahānappaṭivedho samudayasaccaṃ. Yaṃ viññāṇaṃ aniccaṃ taṃ dukkhaṃ vipariṇāmadhammaṃ, ayaṃ viññāṇassa ādīnavoti – pariññāpaṭivedho dukkhasaccaṃ. Yo viññāṇasmiṃ chandarāgavinayo chandarāgappahānaṃ, idaṃ viññāṇassa nissaraṇanti – sacchikiriyāpaṭivedho nirodhasaccaṃ. Yā imesu tīsu ṭhānesu diṭṭhi saṅkappo vācā kammanto ājīvo vāyāmo sati samādhi – bhāvanāpaṭivedho maggasaccaṃ.
༡༥. སཙྩནྟི ཀཏིཧཱཀཱརེཧི སཙྩཾ? ཨེསནཊྛེན , པརིགྒཧཊྛེན, པཊིཝེདྷཊྛེན། ཀཐཾ ཨེསནཊྛེན སཙྩཾ? ཛརཱམརཎཾ ཀིཾནིདཱནཾ, ཀིཾསམུདཡཾ, ཀིཾཛཱཏིཀཾ, ཀིཾཔབྷཝནྟི – ཨེཝཾ ཨེསནཊྛེན སཙྩཾ། ཛརཱམརཎཾ ཛཱཏིནིདཱནཾ, ཛཱཏིསམུདཡཾ, ཛཱཏིཛཱཏིཀཾ, ཛཱཏིཔྤབྷཝནྟི – ཨེཝཾ པརིགྒཧཊྛེན སཙྩཾ། ཛརཱམརཎཉྩ པཛཱནཱཏི, ཛརཱམརཎསམུདཡཉྩ པཛཱནཱཏི, ཛརཱམརཎནིརོདྷཉྩ པཛཱནཱཏི, ཛརཱམརཎནིརོདྷགཱམིནིཾ པཊིཔདཉྩ པཛཱནཱཏི – ཨེཝཾ པཊིཝེདྷཊྛེན སཙྩཾ།
15.Saccanti katihākārehi saccaṃ? Esanaṭṭhena , pariggahaṭṭhena, paṭivedhaṭṭhena. Kathaṃ esanaṭṭhena saccaṃ? Jarāmaraṇaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Jarāmaraṇaṃ jātinidānaṃ, jātisamudayaṃ, jātijātikaṃ, jātippabhavanti – evaṃ pariggahaṭṭhena saccaṃ. Jarāmaraṇañca pajānāti, jarāmaraṇasamudayañca pajānāti, jarāmaraṇanirodhañca pajānāti, jarāmaraṇanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ཛཱཏི ཀིཾནིདཱནཱ, ཀིཾསམུདཡཱ, ཀིཾཛཱཏིཀཱ, ཀིཾཔབྷཝཱཏི – ཨེཝཾ ཨེསནཊྛེན སཙྩཾ། ཛཱཏི བྷཝནིདཱནཱ, བྷཝསམུདཡཱ, བྷཝཛཱཏིཀཱ, བྷཝཔྤབྷཝཱཏི – ཨེཝཾ པརིགྒཧཊྛེན སཙྩཾ། ཛཱཏིཉྩ པཛཱནཱཏི, ཛཱཏིསམུདཡཉྩ པཛཱནཱཏི, ཛཱཏིནིརོདྷཉྩ པཛཱནཱཏི, ཛཱཏིནིརོདྷགཱམིནིཾ པཊིཔདཉྩ པཛཱནཱཏི – ཨེཝཾ པཊིཝེདྷཊྛེན སཙྩཾ།
Jāti kiṃnidānā, kiṃsamudayā, kiṃjātikā, kiṃpabhavāti – evaṃ esanaṭṭhena saccaṃ. Jāti bhavanidānā, bhavasamudayā, bhavajātikā, bhavappabhavāti – evaṃ pariggahaṭṭhena saccaṃ. Jātiñca pajānāti, jātisamudayañca pajānāti, jātinirodhañca pajānāti, jātinirodhagāminiṃ paṭipadañca pajānāti – evaṃ paṭivedhaṭṭhena saccaṃ.
བྷཝོ ཀིཾནིདཱནོ, ཀིཾསམུདཡོ, ཀིཾཛཱཏིཀོ, ཀིཾཔབྷཝོཏི – ཨེཝཾ ཨེསནཊྛེན སཙྩཾ ། བྷཝོ ཨུཔཱདཱནནིདཱནོ, ཨུཔཱདཱནསམུདཡོ, ཨུཔཱདཱནཛཱཏིཀོ, ཨུཔཱདཱནཔྤབྷཝོཏི – ཨེཝཾ པརིགྒཧཊྛེན སཙྩཾ། བྷཝཾ ཙ པཛཱནཱཏི, བྷཝསམུདཡཉྩ པཛཱནཱཏི, བྷཝནིརོདྷཉྩ པཛཱནཱཏི, བྷཝནིརོདྷགཱམིནིཾ པཊིཔདཉྩ པཛཱནཱཏི – ཨེཝཾ པཊིཝེདྷཊྛེན སཙྩཾ།
Bhavo kiṃnidāno, kiṃsamudayo, kiṃjātiko, kiṃpabhavoti – evaṃ esanaṭṭhena saccaṃ . Bhavo upādānanidāno, upādānasamudayo, upādānajātiko, upādānappabhavoti – evaṃ pariggahaṭṭhena saccaṃ. Bhavaṃ ca pajānāti, bhavasamudayañca pajānāti, bhavanirodhañca pajānāti, bhavanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ཨུཔཱདཱནཾ ཀིཾནིདཱནཾ, ཀིཾསམུདཡཾ, ཀིཾཛཱཏིཀཾ, ཀིཾཔབྷཝནྟི – ཨེཝཾ ཨེསནཊྛེན སཙྩཾ། ཨུཔཱདཱནཾ ཏཎྷཱནིདཱནཾ, ཏཎྷཱསམུདཡཾ, ཏཎྷཱཛཱཏིཀཾ, ཏཎྷཱཔབྷཝནྟི – ཨེཝཾ པརིགྒཧཊྛེན སཙྩཾ། ཨུཔཱདཱནཉྩ པཛཱནཱཏི, ཨུཔཱདཱནསམུདཡཉྩ པཛཱནཱཏི, ཨུཔཱདཱནནིརོདྷཉྩ པཛཱནཱཏི ཨུཔཱདཱནནིརོདྷགཱམིནིཾ པཊིཔདཉྩ པཛཱནཱཏི – ཨེཝཾ པཊིཝེདྷཊྛེན སཙྩཾ།
Upādānaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Upādānaṃ taṇhānidānaṃ, taṇhāsamudayaṃ, taṇhājātikaṃ, taṇhāpabhavanti – evaṃ pariggahaṭṭhena saccaṃ. Upādānañca pajānāti, upādānasamudayañca pajānāti, upādānanirodhañca pajānāti upādānanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ཏཎྷཱ ཀིཾནིདཱནཱ, ཀིཾསམུདཡཱ, ཀིཾཛཱཏིཀཱ, ཀིཾཔབྷཝཱཏི – ཨེཝཾ ཨེསནཊྛེན སཙྩཾ། ཏཎྷཱ ཝེདནཱནིདཱནཱ, ཝེདནཱསམུདཡཱ, ཝེདནཱཛཱཏིཀཱ, ཝེདནཱཔབྷཝཱཏི – ཨེཝཾ པརིགྒཧཊྛེན སཙྩཾ། ཏཎྷཉྩ པཛཱནཱཏི, ཏཎྷཱསམུདཡཉྩ པཛཱནཱཏི, ཏཎྷཱནིརོདྷཉྩ པཛཱནཱཏི, ཏཎྷཱནིརོདྷགཱམིནིཾ པཊིཔདཉྩ པཛཱནཱཏི – ཨེཝཾ པཊིཝེདྷཊྛེན སཙྩཾ།
Taṇhā kiṃnidānā, kiṃsamudayā, kiṃjātikā, kiṃpabhavāti – evaṃ esanaṭṭhena saccaṃ. Taṇhā vedanānidānā, vedanāsamudayā, vedanājātikā, vedanāpabhavāti – evaṃ pariggahaṭṭhena saccaṃ. Taṇhañca pajānāti, taṇhāsamudayañca pajānāti, taṇhānirodhañca pajānāti, taṇhānirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ཝེདནཱ ཀིཾནིདཱནཱ, ཀིཾསམུདཡཱ, ཀིཾཛཱཏིཀཱ, ཀིཾཔབྷཝཱཏི – ཨེཝཾ ཨེསནཊྛེན སཙྩཾ། ཝེདནཱ ཕསྶནིདཱནཱ, ཕསྶསམུདཡཱ, ཕསྶཛཱཏིཀཱ, ཕསྶཔྤབྷཝཱཏི – ཨེཝཾ པརིགྒཧཊྛེན སཙྩཾ། ཝེདནཉྩ པཛཱནཱཏི, ཝེདནཱསམུདཡཉྩ པཛཱནཱཏི, ཝེདནཱནིརོདྷཉྩ པཛཱནཱཏི, ཝེདནཱནིརོདྷགཱམིནིཾ པཊིཔདཉྩ པཛཱནཱཏི – ཨེཝཾ པཊིཝེདྷཊྛེན སཙྩཾ།
Vedanā kiṃnidānā, kiṃsamudayā, kiṃjātikā, kiṃpabhavāti – evaṃ esanaṭṭhena saccaṃ. Vedanā phassanidānā, phassasamudayā, phassajātikā, phassappabhavāti – evaṃ pariggahaṭṭhena saccaṃ. Vedanañca pajānāti, vedanāsamudayañca pajānāti, vedanānirodhañca pajānāti, vedanānirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ཕསྶོ ཀིཾནིདཱནོ, ཀིཾསམུདཡོ, ཀིཾཛཱཏིཀོ, ཀིཾཔབྷཝོཏི – ཨེཝཾ ཨེསནཊྛེན སཙྩཾ། ཕསྶོ སལཱ༹ཡཏནནིདཱནོ, སལཱ༹ཡཏནསམུདཡོ, སལཱ༹ཡཏནཛཱཏིཀོ, སལཱ༹ཡཏནཔྤབྷཝོཏི – ཨེཝཾ པརིགྒཧཊྛེན སཙྩཾ། ཕསྶཉྩ པཛཱནཱཏི, ཕསྶསམུདཡཉྩ པཛཱནཱཏི, ཕསྶནིརོདྷཉྩ པཛཱནཱཏི, ཕསྶནིརོདྷགཱམིནིཾ པཊིཔདཉྩ པཛཱནཱཏི – ཨེཝཾ པཊིཝེདྷཊྛེན སཙྩཾ།
Phasso kiṃnidāno, kiṃsamudayo, kiṃjātiko, kiṃpabhavoti – evaṃ esanaṭṭhena saccaṃ. Phasso saḷāyatananidāno, saḷāyatanasamudayo, saḷāyatanajātiko, saḷāyatanappabhavoti – evaṃ pariggahaṭṭhena saccaṃ. Phassañca pajānāti, phassasamudayañca pajānāti, phassanirodhañca pajānāti, phassanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
སལཱ༹ཡཏནཾ ཀིཾནིདཱནཾ, ཀིཾསམུདཡཾ, ཀིཾཛཱཏིཀཾ, ཀིཾཔབྷཝནྟི – ཨེཝཾ ཨེསནཊྛེན སཙྩཾ། སལཱ༹ཡཏནཾ ནཱམརཱུཔནིདཱནཾ, ནཱམརཱུཔསམུདཡཾ, ནཱམརཱུཔཛཱཏིཀཾ, ནཱམརཱུཔཔྤབྷཝནྟི – ཨེཝཾ པརིགྒཧཊྛེན སཙྩཾ། སལཱ༹ཡཏནཉྩ པཛཱནཱཏི, སལཱ༹ཡཏནསམུདཡཉྩ པཛཱནཱཏི, སལཱ༹ཡཏནནིརོདྷཉྩ པཛཱནཱཏི, སལཱ༹ཡཏནནིརོདྷགཱམིནིཾ པཊིཔདཉྩ པཛཱནཱཏི – ཨེཝཾ པཊིཝེདྷཊྛེན སཙྩཾ།
Saḷāyatanaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Saḷāyatanaṃ nāmarūpanidānaṃ, nāmarūpasamudayaṃ, nāmarūpajātikaṃ, nāmarūpappabhavanti – evaṃ pariggahaṭṭhena saccaṃ. Saḷāyatanañca pajānāti, saḷāyatanasamudayañca pajānāti, saḷāyatananirodhañca pajānāti, saḷāyatananirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ནཱམརཱུཔཾ ཀིཾནིདཱནཾ, ཀིཾསམུདཡཾ, ཀིཾཛཱཏིཀཾ, ཀིཾཔབྷཝནྟི – ཨེཝཾ ཨེསནཊྛེན སཙྩཾ། ནཱམརཱུཔཾ ཝིཉྙཱཎནིདཱནཾ, ཝིཉྙཱཎསམུདཡཾ, ཝིཉྙཱཎཛཱཏིཀཾ, ཝིཉྙཱཎཔྤབྷཝནྟི – ཨེཝཾ པརིགྒཧཊྛེན སཙྩཾ། ནཱམརཱུཔཉྩ པཛཱནཱཏི, ནཱམརཱུཔསམུདཡཉྩ པཛཱནཱཏི, ནཱམརཱུཔནིརོདྷཉྩ པཛཱནཱཏི, ནཱམརཱུཔནིརོདྷགཱམིནིཾ པཊིཔདཉྩ པཛཱནཱཏི – ཨེཝཾ པཊིཝེདྷཊྛེན སཙྩཾ།
Nāmarūpaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Nāmarūpaṃ viññāṇanidānaṃ, viññāṇasamudayaṃ, viññāṇajātikaṃ, viññāṇappabhavanti – evaṃ pariggahaṭṭhena saccaṃ. Nāmarūpañca pajānāti, nāmarūpasamudayañca pajānāti, nāmarūpanirodhañca pajānāti, nāmarūpanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
ཝིཉྙཱཎཾ ཀིཾནིདཱནཾ, ཀིཾསམུདཡཾ, ཀིཾཛཱཏིཀཾ, ཀིཾཔབྷཝནྟི – ཨེཝཾ ཨེསནཊྛེན སཙྩཾ། ཝིཉྙཱཎཾ སངྑཱརནིདཱནཾ, སངྑཱརསམུདཡཾ, སངྑཱརཛཱཏིཀཾ , སངྑཱརཔྤབྷཝནྟི – ཨེཝཾ པརིགྒཧཊྛེན སཙྩཾ། ཝིཉྙཱཎཉྩ པཛཱནཱཏི, ཝིཉྙཱཎསམུདཡཉྩ པཛཱནཱཏི, ཝིཉྙཱཎནིརོདྷཉྩ པཛཱནཱཏི, ཝིཉྙཱཎནིརོདྷགཱམིནིཾ པཊིཔདཉྩ པཛཱནཱཏི – ཨེཝཾ པཊིཝེདྷཊྛེན སཙྩཾ།
Viññāṇaṃ kiṃnidānaṃ, kiṃsamudayaṃ, kiṃjātikaṃ, kiṃpabhavanti – evaṃ esanaṭṭhena saccaṃ. Viññāṇaṃ saṅkhāranidānaṃ, saṅkhārasamudayaṃ, saṅkhārajātikaṃ , saṅkhārappabhavanti – evaṃ pariggahaṭṭhena saccaṃ. Viññāṇañca pajānāti, viññāṇasamudayañca pajānāti, viññāṇanirodhañca pajānāti, viññāṇanirodhagāminiṃ paṭipadañca pajānāti – evaṃ paṭivedhaṭṭhena saccaṃ.
སངྑཱརཱ ཀིཾནིདཱནཱ, ཀིཾསམུདཡཱ, ཀིཾཛཱཏིཀཱ, ཀིཾཔབྷཝཱཏི – ཨེཝཾ ཨེསནཊྛེན སཙྩཾ། སངྑཱརཱ ཨཝིཛྫཱནིདཱནཱ, ཨཝིཛྫཱསམུདཡཱ, ཨཝིཛྫཱཛཱཏིཀཱ, ཨཝིཛྫཱཔབྷཝཱཏི – ཨེཝཾ པརིགྒཧཊྛེན སཙྩཾ། སངྑཱརེ ཙ པཛཱནཱཏི, སངྑཱརསམུདཡཉྩ པཛཱནཱཏི, སངྑཱརནིརོདྷཉྩ པཛཱནཱཏི, སངྑཱརནིརོདྷགཱམིནིཾ པཊིཔདཉྩ པཛཱནཱཏི – ཨེཝཾ པཊིཝེདྷཊྛེན སཙྩཾ།
Saṅkhārā kiṃnidānā, kiṃsamudayā, kiṃjātikā, kiṃpabhavāti – evaṃ esanaṭṭhena saccaṃ. Saṅkhārā avijjānidānā, avijjāsamudayā, avijjājātikā, avijjāpabhavāti – evaṃ pariggahaṭṭhena saccaṃ. Saṅkhāre ca pajānāti, saṅkhārasamudayañca pajānāti, saṅkhāranirodhañca pajānāti, saṅkhāranirodhagāminiṃ paṭipadañca pajānāti – evaṃ paṭivedhaṭṭhena saccaṃ.
༡༦. ཛརཱམརཎཾ དུཀྑསཙྩཾ, ཛཱཏི སམུདཡསཙྩཾ, ཨུབྷིནྣམྤི ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ མགྒསཙྩཾ། ཛཱཏི དུཀྑསཙྩཾ, བྷཝོ སམུདཡསཙྩཾ, ཨུབྷིནྣམྤི ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ མགྒསཙྩཾ། བྷཝོ དུཀྑསཙྩཾ, ཨུཔཱདཱནཾ སམུདཡསཙྩཾ, ཨུབྷིནྣམྤི ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ མགྒསཙྩཾ། ཨུཔཱདཱནཾ དུཀྑསཙྩཾ, ཏཎྷཱ སམུདཡསཙྩཾ, ཨུབྷིནྣམྤི ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ མགྒསཙྩཾ། ཏཎྷཱ དུཀྑསཙྩཾ, ཝེདནཱ སམུདཡསཙྩཾ, ཨུབྷིནྣམྤི ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ མགྒསཙྩཾ། ཝེདནཱ དུཀྑསཙྩཾ, ཕསྶོ སམུདཡསཙྩཾ, ཨུབྷིནྣམྤི ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ མགྒསཙྩཾ། ཕསྶོ དུཀྑསཙྩཾ, སལཱ༹ཡཏནཾ སམུདཡསཙྩཾ, ཨུབྷིནྣམྤི ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ མགྒསཙྩཾ། སལཱ༹ཡཏནཾ དུཀྑསཙྩཾ, ནཱམརཱུཔཾ སམུདཡསཙྩཾ, ཨུབྷིནྣམྤི ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ མགྒསཙྩཾ། ནཱམརཱུཔཾ དུཀྑསཙྩཾ, ཝིཉྙཱཎཾ སམུདཡསཙྩཾ, ཨུབྷིནྣམྤི ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ མགྒསཙྩཾ། ཝིཉྙཱཎཾ དུཀྑསཙྩཾ, སངྑཱརཱ སམུདཡསཙྩཾ, ཨུབྷིནྣམྤི ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ མགྒསཙྩཾ། སངྑཱརཱ དུཀྑསཙྩཾ, ཨཝིཛྫཱ སམུདཡསཙྩཾ, ཨུབྷིནྣམྤི ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ མགྒསཙྩཾ།
16. Jarāmaraṇaṃ dukkhasaccaṃ, jāti samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Jāti dukkhasaccaṃ, bhavo samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Bhavo dukkhasaccaṃ, upādānaṃ samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Upādānaṃ dukkhasaccaṃ, taṇhā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Taṇhā dukkhasaccaṃ, vedanā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Vedanā dukkhasaccaṃ, phasso samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Phasso dukkhasaccaṃ, saḷāyatanaṃ samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Saḷāyatanaṃ dukkhasaccaṃ, nāmarūpaṃ samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Nāmarūpaṃ dukkhasaccaṃ, viññāṇaṃ samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Viññāṇaṃ dukkhasaccaṃ, saṅkhārā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Saṅkhārā dukkhasaccaṃ, avijjā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ.
ཛརཱམརཎཾ སིཡཱ དུཀྑསཙྩཾ, སིཡཱ སམུདཡསཙྩཾ, ཨུབྷིནྣམྤི ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ མགྒསཙྩཾ། ཛཱཏི སིཡཱ དུཀྑསཙྩཾ , སིཡཱ སམུདཡསཙྩཾ…པེ॰… བྷཝོ སིཡཱ དུཀྑསཙྩཾ, སིཡཱ སམུདཡསཙྩཾ, ཨུབྷིནྣམྤི ནིསྶརཎཾ ནིརོདྷསཙྩཾ, ནིརོདྷཔྤཛཱནནཱ མགྒསཙྩནྟི།
Jarāmaraṇaṃ siyā dukkhasaccaṃ, siyā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccaṃ. Jāti siyā dukkhasaccaṃ , siyā samudayasaccaṃ…pe… bhavo siyā dukkhasaccaṃ, siyā samudayasaccaṃ, ubhinnampi nissaraṇaṃ nirodhasaccaṃ, nirodhappajānanā maggasaccanti.
བྷཱཎཝཱརོ།
Bhāṇavāro.
སཙྩཀཐཱ ནིཊྛིཏཱ།
Saccakathā niṭṭhitā.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༣. དུཏིཡསུཏྟནྟནིདྡེསཝཎྞནཱ • 3. Dutiyasuttantaniddesavaṇṇanā
