| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৮. দুতিযতথাগতঅচ্ছরিযসুত্তং
8. Dutiyatathāgataacchariyasuttaṃ
১২৮. ‘‘তথাগতস্স, ভিক্খৰে, অরহতো সম্মাসম্বুদ্ধস্স পাতুভাৰা চত্তারো অচ্ছরিযা অব্ভুতা ধম্মা পাতুভৰন্তি। কতমে চত্তারো? আলযারামা 1, ভিক্খৰে, পজা আলযরতা আলযসম্মুদিতা; সা তথাগতেন অনালযে ধম্মে দেসিযমানে সুস্সূসতি সোতং ওদহতি অঞ্ঞা চিত্তং উপট্ঠপেতি । তথাগতস্স, ভিক্খৰে, অরহতো সম্মাসম্বুদ্ধস্স পাতুভাৰা অযং পঠমো অচ্ছরিযো অব্ভুতো ধম্মো পাতুভৰতি।
128. ‘‘Tathāgatassa, bhikkhave, arahato sammāsambuddhassa pātubhāvā cattāro acchariyā abbhutā dhammā pātubhavanti. Katame cattāro? Ālayārāmā 2, bhikkhave, pajā ālayaratā ālayasammuditā; sā tathāgatena anālaye dhamme desiyamāne sussūsati sotaṃ odahati aññā cittaṃ upaṭṭhapeti . Tathāgatassa, bhikkhave, arahato sammāsambuddhassa pātubhāvā ayaṃ paṭhamo acchariyo abbhuto dhammo pātubhavati.
‘‘মানারামা , ভিক্খৰে, পজা মানরতা মানসম্মুদিতা। সা তথাগতেন মানৰিনযে ধম্মে দেসিযমানে সুস্সূসতি সোতং ওদহতি অঞ্ঞা চিত্তং উপট্ঠপেতি। তথাগতস্স, ভিক্খৰে, অরহতো সম্মাসম্বুদ্ধস্স পাতুভাৰা অযং দুতিযো অচ্ছরিযো অব্ভুতো ধম্মো পাতুভৰতি।
‘‘Mānārāmā , bhikkhave, pajā mānaratā mānasammuditā. Sā tathāgatena mānavinaye dhamme desiyamāne sussūsati sotaṃ odahati aññā cittaṃ upaṭṭhapeti. Tathāgatassa, bhikkhave, arahato sammāsambuddhassa pātubhāvā ayaṃ dutiyo acchariyo abbhuto dhammo pātubhavati.
‘‘অনুপসমারামা, ভিক্খৰে, পজা অনুপসমরতা অনুপসমসম্মুদিতা। সা তথাগতেন ওপসমিকে ধম্মে দেসিযমানে সুস্সূসতি সোতং ওদহতি অঞ্ঞা চিত্তং উপট্ঠপেতি। তথাগতস্স , ভিক্খৰে, অরহতো সম্মাসম্বুদ্ধস্স পাতুভাৰা অযং ততিযো অচ্ছরিযো অব্ভুতো ধম্মো পাতুভৰতি।
‘‘Anupasamārāmā, bhikkhave, pajā anupasamaratā anupasamasammuditā. Sā tathāgatena opasamike dhamme desiyamāne sussūsati sotaṃ odahati aññā cittaṃ upaṭṭhapeti. Tathāgatassa , bhikkhave, arahato sammāsambuddhassa pātubhāvā ayaṃ tatiyo acchariyo abbhuto dhammo pātubhavati.
‘‘অৰিজ্জাগতা, ভিক্খৰে, পজা অণ্ডভূতা পরিযোনদ্ধা। সা তথাগতেন অৰিজ্জাৰিনযে ধম্মে দেসিযমানে সুস্সূসতি সোতং ওদহতি অঞ্ঞা চিত্তং উপট্ঠপেতি। তথাগতস্স, ভিক্খৰে, অরহতো সম্মাসম্বুদ্ধস্স পাতুভাৰা অযং চতুত্থো অচ্ছরিযো অব্ভুতো ধম্মো পাতুভৰতি। তথাগতস্স, ভিক্খৰে, অরহতো সম্মাসম্বুদ্ধস্স পাতুভাৰা ইমে চত্তারো অচ্ছরিযা অব্ভুতা ধম্মা পাতুভৰন্তী’’তি। অট্ঠমং।
‘‘Avijjāgatā, bhikkhave, pajā aṇḍabhūtā pariyonaddhā. Sā tathāgatena avijjāvinaye dhamme desiyamāne sussūsati sotaṃ odahati aññā cittaṃ upaṭṭhapeti. Tathāgatassa, bhikkhave, arahato sammāsambuddhassa pātubhāvā ayaṃ catuttho acchariyo abbhuto dhammo pātubhavati. Tathāgatassa, bhikkhave, arahato sammāsambuddhassa pātubhāvā ime cattāro acchariyā abbhutā dhammā pātubhavantī’’ti. Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮. দুতিযতথাগতঅচ্ছরিযসুত্তৰণ্ণনা • 8. Dutiyatathāgataacchariyasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৮. দুতিযতথাগতঅচ্ছরিযসুত্তৰণ্ণনা • 8. Dutiyatathāgataacchariyasuttavaṇṇanā
