| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
8. දුතියතථාගතඅච්‌ඡරියසුත්‌තං
8. Dutiyatathāgataacchariyasuttaṃ
128. ‘‘තථාගතස්‌ස, භික්‌ඛවෙ, අරහතො සම්‌මාසම්‌බුද්‌ධස්‌ස පාතුභාවා චත්‌තාරො අච්‌ඡරියා අබ්‌භුතා ධම්‌මා පාතුභවන්‌ති. කතමෙ චත්‌තාරො? ආලයාරාමා 1, භික්‌ඛවෙ, පජා ආලයරතා ආලයසම්‌මුදිතා; සා තථාගතෙන අනාලයෙ ධම්‌මෙ දෙසියමානෙ සුස්‌සූසති සොතං ඔදහති අඤ්‌ඤා චිත්‌තං උපට්‌ඨපෙති . තථාගතස්‌ස, භික්‌ඛවෙ, අරහතො සම්‌මාසම්‌බුද්‌ධස්‌ස පාතුභාවා අයං පඨමො අච්‌ඡරියො අබ්‌භුතො ධම්‌මො පාතුභවති.
128. ‘‘Tathāgatassa, bhikkhave, arahato sammāsambuddhassa pātubhāvā cattāro acchariyā abbhutā dhammā pātubhavanti. Katame cattāro? Ālayārāmā 2, bhikkhave, pajā ālayaratā ālayasammuditā; sā tathāgatena anālaye dhamme desiyamāne sussūsati sotaṃ odahati aññā cittaṃ upaṭṭhapeti . Tathāgatassa, bhikkhave, arahato sammāsambuddhassa pātubhāvā ayaṃ paṭhamo acchariyo abbhuto dhammo pātubhavati.
‘‘මානාරාමා , භික්‌ඛවෙ, පජා මානරතා මානසම්‌මුදිතා. සා තථාගතෙන මානවිනයෙ ධම්‌මෙ දෙසියමානෙ සුස්‌සූසති සොතං ඔදහති අඤ්‌ඤා චිත්‌තං උපට්‌ඨපෙති. තථාගතස්‌ස, භික්‌ඛවෙ, අරහතො සම්‌මාසම්‌බුද්‌ධස්‌ස පාතුභාවා අයං දුතියො අච්‌ඡරියො අබ්‌භුතො ධම්‌මො පාතුභවති.
‘‘Mānārāmā , bhikkhave, pajā mānaratā mānasammuditā. Sā tathāgatena mānavinaye dhamme desiyamāne sussūsati sotaṃ odahati aññā cittaṃ upaṭṭhapeti. Tathāgatassa, bhikkhave, arahato sammāsambuddhassa pātubhāvā ayaṃ dutiyo acchariyo abbhuto dhammo pātubhavati.
‘‘අනුපසමාරාමා, භික්‌ඛවෙ, පජා අනුපසමරතා අනුපසමසම්‌මුදිතා. සා තථාගතෙන ඔපසමිකෙ ධම්‌මෙ දෙසියමානෙ සුස්‌සූසති සොතං ඔදහති අඤ්‌ඤා චිත්‌තං උපට්‌ඨපෙති. තථාගතස්‌ස , භික්‌ඛවෙ, අරහතො සම්‌මාසම්‌බුද්‌ධස්‌ස පාතුභාවා අයං තතියො අච්‌ඡරියො අබ්‌භුතො ධම්‌මො පාතුභවති.
‘‘Anupasamārāmā, bhikkhave, pajā anupasamaratā anupasamasammuditā. Sā tathāgatena opasamike dhamme desiyamāne sussūsati sotaṃ odahati aññā cittaṃ upaṭṭhapeti. Tathāgatassa , bhikkhave, arahato sammāsambuddhassa pātubhāvā ayaṃ tatiyo acchariyo abbhuto dhammo pātubhavati.
‘‘අවිජ්‌ජාගතා, භික්‌ඛවෙ, පජා අණ්‌ඩභූතා පරියොනද්‌ධා. සා තථාගතෙන අවිජ්‌ජාවිනයෙ ධම්‌මෙ දෙසියමානෙ සුස්‌සූසති සොතං ඔදහති අඤ්‌ඤා චිත්‌තං උපට්‌ඨපෙති. තථාගතස්‌ස, භික්‌ඛවෙ, අරහතො සම්‌මාසම්‌බුද්‌ධස්‌ස පාතුභාවා අයං චතුත්‌ථො අච්‌ඡරියො අබ්‌භුතො ධම්‌මො පාතුභවති. තථාගතස්‌ස, භික්‌ඛවෙ, අරහතො සම්‌මාසම්‌බුද්‌ධස්‌ස පාතුභාවා ඉමෙ චත්‌තාරො අච්‌ඡරියා අබ්‌භුතා ධම්‌මා පාතුභවන්‌තී’’ති. අට්‌ඨමං.
‘‘Avijjāgatā, bhikkhave, pajā aṇḍabhūtā pariyonaddhā. Sā tathāgatena avijjāvinaye dhamme desiyamāne sussūsati sotaṃ odahati aññā cittaṃ upaṭṭhapeti. Tathāgatassa, bhikkhave, arahato sammāsambuddhassa pātubhāvā ayaṃ catuttho acchariyo abbhuto dhammo pātubhavati. Tathāgatassa, bhikkhave, arahato sammāsambuddhassa pātubhāvā ime cattāro acchariyā abbhutā dhammā pātubhavantī’’ti. Aṭṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 8. දුතියතථාගතඅච්‌ඡරියසුත්‌තවණ්‌ණනා • 8. Dutiyatathāgataacchariyasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 8. දුතියතථාගතඅච්‌ඡරියසුත්‌තවණ්‌ණනා • 8. Dutiyatathāgataacchariyasuttavaṇṇanā
