| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๘. ทุติยตถาคตอจฺฉริยสุตฺตวณฺณนา
8. Dutiyatathāgataacchariyasuttavaṇṇanā
๑๒๘. อฎฺฐเม ตณฺหาทิฎฺฐีหิ อลฺลียิตพฺพเฎฺฐน อาลโยติ ปญฺจ กามคุณา, สกลเมว วา วฎฺฎํฯ อารมนฺติ เอตฺถาติ อาราโม, อาลโย อาราโม เอติสฺสาติ อาลยารามาฯ อาลเย รตาติ อาลยรตา ฯ อาลเย สมฺมุทิตาติ อาลยสมฺมุทิตาฯ อนาลเย ธเมฺมติ อาลยปฎิปเกฺข วิวฎฺฎูปนิสฺสิเต อริยธเมฺมฯ สุสฺสูสตีติ โสตุกาโม โหติฯ โสตํ โอทหตีติ โสตํ ฐเปติฯ อญฺญา จิตฺตํ อุปฎฺฐเปตีติ อาชานนตฺถาย จิตฺตํ ปจฺจุปฎฺฐเปติฯ มาโนติ มญฺญนา, มญฺญิตพฺพเฎฺฐน วา สกลํ วฎฺฎเมวฯ มานวินเย ธเมฺมติ มานวินยธเมฺมฯ อุปสมปฎิปโกฺข อนุปสโม, อนุปสนฺตเฎฺฐน วา วฎฺฎเมว อนุปสโม นามฯ โอปสมิเกติ อุปสมกเร วิวฎฺฎูปนิสฺสิเตฯ อวิชฺชาย คตา สมนฺนาคตาติ อวิชฺชาคตาฯ อวิชฺชณฺฑโกเสน ปริโยนทฺธตฺตา อณฺฑํ วิย ภูตาติ อณฺฑภูตาฯ สมนฺตโต โอนทฺธาติ ปริโยนทฺธาฯ อวิชฺชาวินเยติ อวิชฺชาวินโย วุจฺจติ อรหตฺตํ, ตํนิสฺสิเต ธเมฺม เทสิยมาเนติ อโตฺถฯ อิติ อิมสฺมิํ สุเตฺต จตูสุ ฐาเนสุ วฎฺฎํ, จตูสุ วิวฎฺฎํ กถิตํฯ
128. Aṭṭhame taṇhādiṭṭhīhi allīyitabbaṭṭhena ālayoti pañca kāmaguṇā, sakalameva vā vaṭṭaṃ. Āramanti etthāti ārāmo, ālayo ārāmo etissāti ālayārāmā. Ālaye ratāti ālayaratā. Ālaye sammuditāti ālayasammuditā. Anālaye dhammeti ālayapaṭipakkhe vivaṭṭūpanissite ariyadhamme. Sussūsatīti sotukāmo hoti. Sotaṃ odahatīti sotaṃ ṭhapeti. Aññā cittaṃ upaṭṭhapetīti ājānanatthāya cittaṃ paccupaṭṭhapeti. Mānoti maññanā, maññitabbaṭṭhena vā sakalaṃ vaṭṭameva. Mānavinaye dhammeti mānavinayadhamme. Upasamapaṭipakkho anupasamo, anupasantaṭṭhena vā vaṭṭameva anupasamo nāma. Opasamiketi upasamakare vivaṭṭūpanissite. Avijjāya gatā samannāgatāti avijjāgatā. Avijjaṇḍakosena pariyonaddhattā aṇḍaṃ viya bhūtāti aṇḍabhūtā. Samantato onaddhāti pariyonaddhā. Avijjāvinayeti avijjāvinayo vuccati arahattaṃ, taṃnissite dhamme desiyamāneti attho. Iti imasmiṃ sutte catūsu ṭhānesu vaṭṭaṃ, catūsu vivaṭṭaṃ kathitaṃ.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๘. ทุติยตถาคตอจฺฉริยสุตฺตํ • 8. Dutiyatathāgataacchariyasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๘. ทุติยตถาคตอจฺฉริยสุตฺตวณฺณนา • 8. Dutiyatathāgataacchariyasuttavaṇṇanā
