| Library / Tipiṭaka / तिपिटक • Tipiṭaka / वजिरबुद्धि-टीका • Vajirabuddhi-ṭīkā |
२-३-४. दुतियततियचतुत्थसिक्खापदवण्णना
2-3-4. Dutiyatatiyacatutthasikkhāpadavaṇṇanā
८४२-६. दुतियततियचतुत्थानि उत्तानानि। सब्बत्थ ‘‘सल्लपतीति यं किञ्चि तिरच्छानकथं कथेती’’ति पोराणगण्ठिपदे वुत्तं।
842-6. Dutiyatatiyacatutthāni uttānāni. Sabbattha ‘‘sallapatīti yaṃ kiñci tiracchānakathaṃ kathetī’’ti porāṇagaṇṭhipade vuttaṃ.
८५२. चतुत्थे पनायं विसेसो – ‘‘एकेनेका’’ति पठमं वुत्तत्ता दुतियिकं वा भिक्खुनीनं उय्योजेय्य, पाचित्तियं न सम्भवतीति चे? सम्भवति। कस्मा? सन्तिट्ठनादित्तयमत्तापेक्खत्ता, तस्स वचनस्सापि वा अञ्ञायपि रहोपेक्खनस्सादसम्भवे सति उभिन्नं एकत्थसम्भवतो च साधितमेतं। ‘‘हत्थपासं विजहित्वा सन्तिट्ठति वा सल्लपति वा’’ति एत्तकमेव वुत्तं। कस्मा ‘‘निकण्णिकं वा जप्पेती’’ति न वुत्तं? हत्थपासातिक्कमे असम्भवतो। तस्स ततियस्स पदस्स पच्छिन्नत्ता सम्भवन्तम्पि ‘‘दुतियिकं वा उय्योजेती’’ति न वुत्तं, तस्मा अत्थतो हत्थपासं विजहित्वा सन्तिट्ठति वा सल्लपति वा दुतियिकं वा उय्योजेति, आपत्ति दुक्कटस्साति वुत्तं होति। एस नयो यक्खेन वातिआदीसुपि। तत्थ ‘‘हत्थपासे’’ति वा ‘‘हत्थपासं विजहित्वा’’ति वा न वुत्तं उभयत्थ दुक्कटत्ता। अनापत्तिवारेपि असम्भवतो ‘‘निकण्णिकं वा जप्पेती’’ति न वुत्तन्ति चे? सम्भवति सति करणीये निकण्णिकं वा जप्पेतीति सम्भवतो। अथ कस्मा एवं न वुत्तन्ति चे? अनवज्जकथायं निकण्णिकजप्पने पयोजनाभावा, धम्मकथायम्पि उदायिं आरब्भ पटिसिद्धत्ता च।
852. Catutthe panāyaṃ viseso – ‘‘ekenekā’’ti paṭhamaṃ vuttattā dutiyikaṃ vā bhikkhunīnaṃ uyyojeyya, pācittiyaṃ na sambhavatīti ce? Sambhavati. Kasmā? Santiṭṭhanādittayamattāpekkhattā, tassa vacanassāpi vā aññāyapi rahopekkhanassādasambhave sati ubhinnaṃ ekatthasambhavato ca sādhitametaṃ. ‘‘Hatthapāsaṃ vijahitvā santiṭṭhati vā sallapati vā’’ti ettakameva vuttaṃ. Kasmā ‘‘nikaṇṇikaṃ vā jappetī’’ti na vuttaṃ? Hatthapāsātikkame asambhavato. Tassa tatiyassa padassa pacchinnattā sambhavantampi ‘‘dutiyikaṃ vā uyyojetī’’ti na vuttaṃ, tasmā atthato hatthapāsaṃ vijahitvā santiṭṭhati vā sallapati vā dutiyikaṃ vā uyyojeti, āpatti dukkaṭassāti vuttaṃ hoti. Esa nayo yakkhena vātiādīsupi. Tattha ‘‘hatthapāse’’ti vā ‘‘hatthapāsaṃ vijahitvā’’ti vā na vuttaṃ ubhayattha dukkaṭattā. Anāpattivārepi asambhavato ‘‘nikaṇṇikaṃ vā jappetī’’ti na vuttanti ce? Sambhavati sati karaṇīye nikaṇṇikaṃ vā jappetīti sambhavato. Atha kasmā evaṃ na vuttanti ce? Anavajjakathāyaṃ nikaṇṇikajappane payojanābhāvā, dhammakathāyampi udāyiṃ ārabbha paṭisiddhattā ca.
दुतियततियचतुत्थसिक्खापदवण्णना निट्ठिता।
Dutiyatatiyacatutthasikkhāpadavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / भिक्खुनीविभङ्ग • Bhikkhunīvibhaṅga
२. दुतियसिक्खापदं • 2. Dutiyasikkhāpadaṃ
३. ततियसिक्खापदं • 3. Tatiyasikkhāpadaṃ
४. चतुत्थसिक्खापदं • 4. Catutthasikkhāpadaṃ
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / भिक्खुनीविभङ्ग-अट्ठकथा • Bhikkhunīvibhaṅga-aṭṭhakathā
२. दुतियसिक्खापदवण्णना • 2. Dutiyasikkhāpadavaṇṇanā
३. ततियसिक्खापदवण्णना • 3. Tatiyasikkhāpadavaṇṇanā
४. चतुत्थसिक्खापदवण्णना • 4. Catutthasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / २. अन्धकारवग्गवण्णना • 2. Andhakāravaggavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / १. पठमादिसिक्खापदवण्णना • 1. Paṭhamādisikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi
२. दुतियसिक्खापदं • 2. Dutiyasikkhāpadaṃ
३. ततियसिक्खापदं • 3. Tatiyasikkhāpadaṃ
