| Library / Tipiṭaka / ติปิฎก • Tipiṭaka / กงฺขาวิตรณี-อภินว-ฎีกา • Kaṅkhāvitaraṇī-abhinava-ṭīkā |
๙. ทุติยอุจฺจารฉฑฺฑนสิกฺขาปทวณฺณนา
9. Dutiyauccārachaḍḍanasikkhāpadavaṇṇanā
ภิกฺขุนิยาปีติ ปิ-สเทฺทน ภิกฺขุํ สมุจฺจิโนติฯ อนิกฺขิตฺตพีเชสุ (ปาจิ. อฎฺฐ. ๘๓๐) ปน เขเตฺตสุ โกณาทีสุ วา อสญฺชาตโรปิเมสุ เขตฺตมริยาทาทีสุ วา ฉเฑฺฑตุํ วฎฺฎติฯ มนุสฺสานํ กจวรฉฑฺฑนฎฺฐาเนปิ วฎฺฎติเยวฯ ฉฑฺฑิตเขเตฺตติ มนุเสฺสสุ สสฺสํ อุทฺธริตฺวา คเตสุ ฉฑฺฑิตเขตฺตํ นาม โหติ, ตตฺถ วฎฺฎติฯ ยตฺถ ปน ‘‘ลายิตมฺปิ ปุพฺพณฺณาทิ ปุน อุฎฺฐหิสฺสตี’’ติ รกฺขนฺติ, ตตฺถ ยถาวตฺถุกเมวฯ สามิเก อปโลเกตฺวาติ เอตฺถ เขตฺตปาลกา, อารามาทิโคปกา จ สามิกาวฯ อิมินา จ สงฺฆสนฺตเก ภิกฺขุสฺส ฉเฑฺฑตุํ วฎฺฎติ สงฺฆปริยาปนฺนตฺตา, น ภิกฺขุนีนํฯ ภิกฺขุนีนํ ปน อตฺตโน สนฺตเก ภิกฺขุสนฺตเก วุตฺตนเยเนว วฎฺฎตีติ ทเสฺสติ, เอวํ สเนฺตปิ สารุปฺปวเสน กาตพฺพํฯ
Bhikkhuniyāpīti pi-saddena bhikkhuṃ samuccinoti. Anikkhittabījesu (pāci. aṭṭha. 830) pana khettesu koṇādīsu vā asañjātaropimesu khettamariyādādīsu vā chaḍḍetuṃ vaṭṭati. Manussānaṃ kacavarachaḍḍanaṭṭhānepi vaṭṭatiyeva. Chaḍḍitakhetteti manussesu sassaṃ uddharitvā gatesu chaḍḍitakhettaṃ nāma hoti, tattha vaṭṭati. Yattha pana ‘‘lāyitampi pubbaṇṇādi puna uṭṭhahissatī’’ti rakkhanti, tattha yathāvatthukameva. Sāmike apaloketvāti ettha khettapālakā, ārāmādigopakā ca sāmikāva. Iminā ca saṅghasantake bhikkhussa chaḍḍetuṃ vaṭṭati saṅghapariyāpannattā, na bhikkhunīnaṃ. Bhikkhunīnaṃ pana attano santake bhikkhusantake vuttanayeneva vaṭṭatīti dasseti, evaṃ santepi sāruppavasena kātabbaṃ.
ทุติยอุจฺจารฉฑฺฑนสิกฺขาปทวณฺณนา นิฎฺฐิตาฯ
Dutiyauccārachaḍḍanasikkhāpadavaṇṇanā niṭṭhitā.
