| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၉. ဒုတိယဥစ္စာရဆဍ္ဍနသိက္ခာပဒဝဏ္ဏနာ
9. Dutiyauccārachaḍḍanasikkhāpadavaṇṇanā
ဘိက္ခုနိယာပီတိ ပိ-သဒ္ဒေန ဘိက္ခုံ သမုစ္စိနောတိ။ အနိက္ခိတ္တဗီဇေသု (ပာစိ. အဋ္ဌ. ၈၃၀) ပန ခေတ္တေသု ကောဏာဒီသု ဝာ အသဉ္ဇာတရောပိမေသု ခေတ္တမရိယာဒာဒီသု ဝာ ဆဍ္ဍေတုံ ဝဋ္ဋတိ။ မနုသ္သာနံ ကစဝရဆဍ္ဍနဋ္ဌာနေပိ ဝဋ္ဋတိယေဝ။ ဆဍ္ဍိတခေတ္တေတိ မနုသ္သေသု သသ္သံ ဥဒ္ဓရိတ္ဝာ ဂတေသု ဆဍ္ဍိတခေတ္တံ နာမ ဟောတိ, တတ္ထ ဝဋ္ဋတိ။ ယတ္ထ ပန ‘‘လာယိတမ္ပိ ပုဗ္ဗဏ္ဏာဒိ ပုန ဥဋ္ဌဟိသ္သတီ’’တိ ရက္ခန္တိ, တတ္ထ ယထာဝတ္ထုကမေဝ။ သာမိကေ အပလောကေတ္ဝာတိ ဧတ္ထ ခေတ္တပာလကာ, အာရာမာဒိဂောပကာ စ သာမိကာဝ။ ဣမိနာ စ သင္ဃသန္တကေ ဘိက္ခုသ္သ ဆဍ္ဍေတုံ ဝဋ္ဋတိ သင္ဃပရိယာပန္နတ္တာ, န ဘိက္ခုနီနံ။ ဘိက္ခုနီနံ ပန အတ္တနော သန္တကေ ဘိက္ခုသန္တကေ ဝုတ္တနယေနေဝ ဝဋ္ဋတီတိ ဒသ္သေတိ, ဧဝံ သန္တေပိ သာရုပ္ပဝသေန ကာတဗ္ဗံ။
Bhikkhuniyāpīti pi-saddena bhikkhuṃ samuccinoti. Anikkhittabījesu (pāci. aṭṭha. 830) pana khettesu koṇādīsu vā asañjātaropimesu khettamariyādādīsu vā chaḍḍetuṃ vaṭṭati. Manussānaṃ kacavarachaḍḍanaṭṭhānepi vaṭṭatiyeva. Chaḍḍitakhetteti manussesu sassaṃ uddharitvā gatesu chaḍḍitakhettaṃ nāma hoti, tattha vaṭṭati. Yattha pana ‘‘lāyitampi pubbaṇṇādi puna uṭṭhahissatī’’ti rakkhanti, tattha yathāvatthukameva. Sāmike apaloketvāti ettha khettapālakā, ārāmādigopakā ca sāmikāva. Iminā ca saṅghasantake bhikkhussa chaḍḍetuṃ vaṭṭati saṅghapariyāpannattā, na bhikkhunīnaṃ. Bhikkhunīnaṃ pana attano santake bhikkhusantake vuttanayeneva vaṭṭatīti dasseti, evaṃ santepi sāruppavasena kātabbaṃ.
ဒုတိယဥစ္စာရဆဍ္ဍနသိက္ခာပဒဝဏ္ဏနာ နိဋ္ဌိတာ။
Dutiyauccārachaḍḍanasikkhāpadavaṇṇanā niṭṭhitā.
