| Library / Tipiṭaka / ਤਿਪਿਟਕ • Tipiṭaka / ਮਹਾવਿਭਙ੍ਗ • Mahāvibhaṅga |
੯. ਦੁਤਿਯਉਪਕ੍ਖਟਸਿਕ੍ਖਾਪਦਂ
9. Dutiyaupakkhaṭasikkhāpadaṃ
੫੩੨. ਤੇਨ ਸਮਯੇਨ ਬੁਦ੍ਧੋ ਭਗવਾ ਸਾવਤ੍ਥਿਯਂ વਿਹਰਤਿ ਜੇਤવਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ। ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪੁਰਿਸੋ ਅਞ੍ਞਤਰਂ ਪੁਰਿਸਂ ਏਤਦવੋਚ – ‘‘ਅਯ੍ਯਂ ਉਪਨਨ੍ਦਂ ਚੀવਰੇਨ ਅਚ੍ਛਾਦੇਸ੍ਸਾਮੀ’’ਤਿ। ਸੋਪਿ ਏવਮਾਹ – ‘‘ਅਹਮ੍ਪਿ ਅਯ੍ਯਂ ਉਪਨਨ੍ਦਂ ਚੀવਰੇਨ ਅਚ੍ਛਾਦੇਸ੍ਸਾਮੀ’’ਤਿ। ਅਸ੍ਸੋਸਿ ਖੋ ਅਞ੍ਞਤਰੋ ਪਿਣ੍ਡਚਾਰਿਕੋ ਭਿਕ੍ਖੁ ਤੇਸਂ ਪੁਰਿਸਾਨਂ ਇਮਂ ਕਥਾਸਲ੍ਲਾਪਂ। ਅਥ ਖੋ ਸੋ ਭਿਕ੍ਖੁ ਯੇਨਾਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਏਤਦવੋਚ – ‘‘ਮਹਾਪੁਞ੍ਞੋਸਿ ਤ੍વਂ, ਆવੁਸੋ ਉਪਨਨ੍ਦ। ਅਮੁਕਸ੍ਮਿਂ ਓਕਾਸੇ ਅਞ੍ਞਤਰੋ ਪੁਰਿਸੋ ਅਞ੍ਞਤਰਂ ਪੁਰਿਸਂ ਏਤਦવੋਚ – ‘ਅਯ੍ਯਂ ਉਪਨਨ੍ਦਂ ਚੀવਰੇਨ ਅਚ੍ਛਾਦੇਸ੍ਸਾਮੀ’ਤਿ। ਸੋਪਿ ਏવਮਾਹ – ‘ਅਹਮ੍ਪਿ ਅਯ੍ਯਂ ਉਪਨਨ੍ਦਂ ਚੀવਰੇਨ ਅਚ੍ਛਾਦੇਸ੍ਸਾਮੀ’’’ਤਿ। ‘‘ਅਤ੍ਥਾવੁਸੋ, ਮਂ ਤੇ ਉਪਟ੍ਠਾਕਾ’’ਤਿ।
532. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro puriso aññataraṃ purisaṃ etadavoca – ‘‘ayyaṃ upanandaṃ cīvarena acchādessāmī’’ti. Sopi evamāha – ‘‘ahampi ayyaṃ upanandaṃ cīvarena acchādessāmī’’ti. Assosi kho aññataro piṇḍacāriko bhikkhu tesaṃ purisānaṃ imaṃ kathāsallāpaṃ. Atha kho so bhikkhu yenāyasmā upanando sakyaputto tenupasaṅkami; upasaṅkamitvā āyasmantaṃ upanandaṃ sakyaputtaṃ etadavoca – ‘‘mahāpuññosi tvaṃ, āvuso upananda. Amukasmiṃ okāse aññataro puriso aññataraṃ purisaṃ etadavoca – ‘ayyaṃ upanandaṃ cīvarena acchādessāmī’ti. Sopi evamāha – ‘ahampi ayyaṃ upanandaṃ cīvarena acchādessāmī’’’ti. ‘‘Atthāvuso, maṃ te upaṭṭhākā’’ti.
ਅਥ ਖੋ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਯੇਨ ਤੇ ਪੁਰਿਸਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਤੇ ਪੁਰਿਸੇ ਏਤਦવੋਚ – ‘‘ਸਚ੍ਚਂ ਕਿਰ ਮਂ ਤੁਮ੍ਹੇ, ਆવੁਸੋ, ਚੀવਰੇਹਿ ਅਚ੍ਛਾਦੇਤੁਕਾਮਾਤ੍ਥਾ’’ਤਿ? ‘‘ਅਪਿ ਨਯ੍ਯ, ਏવਂ ਹੋਤਿ – ‘ਅਯ੍ਯਂ ਉਪਨਨ੍ਦਂ ਚੀવਰੇਹਿ ਅਚ੍ਛਾਦੇਸ੍ਸਾਮਾ’’’ਤਿ। ‘‘ਸਚੇ ਖੋ ਮਂ ਤੁਮ੍ਹੇ , ਆવੁਸੋ, ਚੀવਰੇਹਿ ਅਚ੍ਛਾਦੇਤੁਕਾਮਾਤ੍ਥ, ਏવਰੂਪੇਨ ਚੀવਰੇਨ ਅਚ੍ਛਾਦੇਥ, ਕ੍ਯਾਹਂ ਤੇਹਿ ਅਚ੍ਛਨ੍ਨੋਪਿ ਕਰਿਸ੍ਸਾਮਿ, ਯਾਨਾਹਂ ਨ ਪਰਿਭੁਞ੍ਜਿਸ੍ਸਾਮੀ’’ਤਿ । ਅਥ ਖੋ ਤੇ ਪੁਰਿਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਮਹਿਚ੍ਛਾ ਇਮੇ ਸਮਣਾ ਸਕ੍ਯਪੁਤ੍ਤਿਯਾ ਅਸਨ੍ਤੁਟ੍ਠਾ। ਨਯਿਮੇ ਸੁਕਰਾ ਚੀવਰੇਹਿ ਅਚ੍ਛਾਦੇਤੁਂ। ਕਥਞ੍ਹਿ ਨਾਮ ਅਯ੍ਯੋ ਉਪਨਨ੍ਦੋ ਅਮ੍ਹੇਹਿ ਪੁਬ੍ਬੇ ਅਪ੍ਪવਾਰਿਤੋ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜਿਸ੍ਸਤੀ’’ਤਿ!
Atha kho āyasmā upanando sakyaputto yena te purisā tenupasaṅkami; upasaṅkamitvā te purise etadavoca – ‘‘saccaṃ kira maṃ tumhe, āvuso, cīvarehi acchādetukāmātthā’’ti? ‘‘Api nayya, evaṃ hoti – ‘ayyaṃ upanandaṃ cīvarehi acchādessāmā’’’ti. ‘‘Sace kho maṃ tumhe , āvuso, cīvarehi acchādetukāmāttha, evarūpena cīvarena acchādetha, kyāhaṃ tehi acchannopi karissāmi, yānāhaṃ na paribhuñjissāmī’’ti . Atha kho te purisā ujjhāyanti khiyyanti vipācenti – ‘‘mahicchā ime samaṇā sakyaputtiyā asantuṭṭhā. Nayime sukarā cīvarehi acchādetuṃ. Kathañhi nāma ayyo upanando amhehi pubbe appavārito upasaṅkamitvā cīvare vikappaṃ āpajjissatī’’ti!
ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਪੁਰਿਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ વਿਪਾਚੇਨ੍ਤਾਨਂ। ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ॰… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਪੁਬ੍ਬੇ ਅਪ੍ਪવਾਰਿਤੋ ਗਹਪਤਿਕੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜਿਸ੍ਸਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਅਨੇਕਪਰਿਯਾਯੇਨ વਿਗਰਹਿਤ੍વਾ ਭਗવਤੋ ਏਤਮਤ੍ਥਂ ਆਰੋਚੇਸੁਂ…ਪੇ॰… ‘‘ਸਚ੍ਚਂ ਕਿਰ ਤ੍વਂ, ਉਪਨਨ੍ਦ, ਪੁਬ੍ਬੇ ਅਪ੍ਪવਾਰਿਤੋ ਗਹਪਤਿਕੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜਸੀ’’ਤਿ? ‘‘ਸਚ੍ਚਂ, ਭਗવਾ’’ਤਿ। ‘‘ਞਾਤਕਾ ਤੇ, ਉਪਨਨ੍ਦ, ਅਞ੍ਞਾਤਕਾ’’ਤਿ? ‘‘ਅਞ੍ਞਾਤਕਾ, ਭਗવਾ’’ਤਿ। ‘‘ਅਞ੍ਞਾਤਕੋ, ਮੋਘਪੁਰਿਸ, ਅਞ੍ਞਾਤਕਾਨਂ ਨ ਜਾਨਾਤਿ ਪਤਿਰੂਪਂ વਾ ਅਪ੍ਪਤਿਰੂਪਂ વਾ ਸਨ੍ਤਂ વਾ ਅਸਨ੍ਤਂ વਾ। ਤਤ੍ਥ ਨਾਮ ਤ੍વਂ, ਮੋਘਪੁਰਿਸ, ਪੁਬ੍ਬੇ ਅਪ੍ਪવਾਰਿਤੋ ਅਞ੍ਞਾਤਕੇ ਗਹਪਤਿਕੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜਿਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ વਾ ਪਸਾਦਾਯ…ਪੇ॰… ਏવਞ੍ਚ ਪਨ, ਭਿਕ੍ਖવੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –
Assosuṃ kho bhikkhū tesaṃ purisānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto pubbe appavārito gahapatike upasaṅkamitvā cīvare vikappaṃ āpajjissatī’’ti! Atha kho te bhikkhū āyasmantaṃ upanandaṃ sakyaputtaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, upananda, pubbe appavārito gahapatike upasaṅkamitvā cīvare vikappaṃ āpajjasī’’ti? ‘‘Saccaṃ, bhagavā’’ti. ‘‘Ñātakā te, upananda, aññātakā’’ti? ‘‘Aññātakā, bhagavā’’ti. ‘‘Aññātako, moghapurisa, aññātakānaṃ na jānāti patirūpaṃ vā appatirūpaṃ vā santaṃ vā asantaṃ vā. Tattha nāma tvaṃ, moghapurisa, pubbe appavārito aññātake gahapatike upasaṅkamitvā cīvare vikappaṃ āpajjissasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
੫੩੩. ‘‘ਭਿਕ੍ਖੁਂ ਪਨੇવ ਉਦ੍ਦਿਸ੍ਸ ਉਭਿਨ੍ਨਂ ਅਞ੍ਞਾਤਕਾਨਂ ਗਹਪਤੀਨਂ વਾ ਗਹਪਤਾਨੀਨਂ વਾ ਪਚ੍ਚੇਕਚੀવਰਚੇਤਾਪਨ੍ਨਾਨਿ ਉਪਕ੍ਖਟਾਨਿ ਹੋਨ੍ਤਿ – ‘ਇਮੇਹਿ ਮਯਂ ਪਚ੍ਚੇਕਚੀવਰਚੇਤਾਪਨ੍ਨੇਹਿ ਪਚ੍ਚੇਕਚੀવਰਾਨਿ ਚੇਤਾਪੇਤ੍વਾ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀવਰੇਹਿ ਅਚ੍ਛਾਦੇਸ੍ਸਾਮਾ’ਤਿ ; ਤਤ੍ਰ ਚੇ ਸੋ ਭਿਕ੍ਖੁ ਪੁਬ੍ਬੇ ਅਪ੍ਪવਾਰਿਤੋ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜੇਯ੍ਯ – ‘ਸਾਧੁ વਤ ਮਂ ਆਯਸ੍ਮਨ੍ਤੋ ਇਮੇਹਿ ਪਚ੍ਚੇਕਚੀવਰਚੇਤਾਪਨ੍ਨੇਹਿ ਏવਰੂਪਂ વਾ ਏવਰੂਪਂ વਾ ਚੀવਰਂ ਚੇਤਾਪੇਤ੍વਾ ਅਚ੍ਛਾਦੇਥ, ਉਭੋવ ਸਨ੍ਤਾ ਏਕੇਨਾ’ਤਿ, ਕਲ੍ਯਾਣਕਮ੍ਯਤਂ ਉਪਾਦਾਯ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ।
533.‘‘Bhikkhuṃ paneva uddissa ubhinnaṃ aññātakānaṃ gahapatīnaṃ vā gahapatānīnaṃ vā paccekacīvaracetāpannāni upakkhaṭāni honti – ‘imehi mayaṃ paccekacīvaracetāpannehi paccekacīvarāni cetāpetvā itthannāmaṃ bhikkhuṃ cīvarehi acchādessāmā’ti ; tatra ce so bhikkhu pubbe appavārito upasaṅkamitvā cīvare vikappaṃ āpajjeyya – ‘sādhu vata maṃ āyasmanto imehi paccekacīvaracetāpannehi evarūpaṃ vā evarūpaṃ vā cīvaraṃ cetāpetvā acchādetha, ubhova santā ekenā’ti, kalyāṇakamyataṃ upādāya, nissaggiyaṃ pācittiya’’nti.
੫੩੪. ਭਿਕ੍ਖੁਂ ਪਨੇવ ਉਦ੍ਦਿਸ੍ਸਾਤਿ ਭਿਕ੍ਖੁਸ੍ਸਤ੍ਥਾਯ, ਭਿਕ੍ਖੁਂ ਆਰਮ੍ਮਣਂ ਕਰਿਤ੍વਾ, ਭਿਕ੍ਖੁਂ ਅਚ੍ਛਾਦੇਤੁਕਾਮਾ।
534.Bhikkhuṃpaneva uddissāti bhikkhussatthāya, bhikkhuṃ ārammaṇaṃ karitvā, bhikkhuṃ acchādetukāmā.
ਉਭਿਨ੍ਨਨ੍ਤਿ ਦ੍વਿਨ੍ਨਂ।
Ubhinnanti dvinnaṃ.
ਅਞ੍ਞਾਤਕਾ ਨਾਮ ਮਾਤਿਤੋ વਾ ਪਿਤਿਤੋ વਾ ਯਾવ ਸਤ੍ਤਮਾ ਪਿਤਾਮਹਯੁਗਾ ਅਸਮ੍ਬਦ੍ਧਾ।
Aññātakā nāma mātito vā pitito vā yāva sattamā pitāmahayugā asambaddhā.
ਗਹਪਤੀ ਨਾਮ ਯੇ ਕੇਚਿ ਅਗਾਰ ਅਜ੍ਝਾવਸਨ੍ਤਿ।
Gahapatī nāma ye keci agāra ajjhāvasanti.
ਗਹਪਤਾਨਿਯੋ ਨਾਮ ਯਾ ਕਾਚਿ ਅਗਾਰਂ ਅਜ੍ਝਾવਸਨ੍ਤਿ।
Gahapatāniyo nāma yā kāci agāraṃ ajjhāvasanti.
ਚੀવਰਚੇਤਾਪਨ੍ਨਾਨਿ ਨਾਮ ਹਿਰਞ੍ਞਾ વਾ ਸੁવਣ੍ਣਾ વਾ ਮੁਤ੍ਤਾ વਾ ਮਣੀ વਾ ਪવਾਲ਼ਾ વਾ ਫਲਿਕਾ વਾ ਪਟਕਾ વਾ ਸੁਤ੍ਤਾ વਾ ਕਪ੍ਪਾਸਾ વਾ।
Cīvaracetāpannāni nāma hiraññā vā suvaṇṇā vā muttā vā maṇī vā pavāḷā vā phalikā vā paṭakā vā suttā vā kappāsā vā.
ਇਮੇਹਿ ਪਚ੍ਚੇਕਚੀવਰਚੇਤਾਪਨ੍ਨੇਹਿਤਿ ਪਚ੍ਚੁਪਟ੍ਠਿਤੇਹਿ।
Imehi paccekacīvaracetāpannehiti paccupaṭṭhitehi.
ਚੇਤਾਪੇਤ੍વਾਤਿ ਪਰਿવਤ੍ਤੇਤ੍વਾ।
Cetāpetvāti parivattetvā.
ਅਚ੍ਛਾਦੇਸ੍ਸਾਮਾਤਿ ਦਸ੍ਸਾਮ।
Acchādessāmāti dassāma.
ਤਤ੍ਰ ਚੇ ਸੋ ਭਿਕ੍ਖੂਤਿ ਯਂ ਭਿਕ੍ਖੁਂ ਉਦ੍ਦਿਸ੍ਸ ਚੀવਰਚੇਤਾਪਨ੍ਨਾਨਿ ਉਪਕ੍ਖਟਾਨਿ ਹੋਨ੍ਤਿ ਸੋ ਭਿਕ੍ਖੁ।
Tatra ce so bhikkhūti yaṃ bhikkhuṃ uddissa cīvaracetāpannāni upakkhaṭāni honti so bhikkhu.
ਪੁਬ੍ਬੇ ਅਪ੍ਪવਾਰਿਤੋਤਿ ਪੁਬ੍ਬੇ ਅવੁਤ੍ਤੋ ਹੋਤਿ – ‘‘ਕੀਦਿਸੇਨ ਤੇ, ਭਨ੍ਤੇ, ਚੀવਰੇਨ ਅਤ੍ਥੋ, ਕੀਦਿਸਂ ਤੇ ਚੀવਰਂ ਚੇਤਾਪੇਮਾ’’ਤਿ।
Pubbe appavāritoti pubbe avutto hoti – ‘‘kīdisena te, bhante, cīvarena attho, kīdisaṃ te cīvaraṃ cetāpemā’’ti.
ਉਪਸਙ੍ਕਮਿਤ੍વਾਤਿ ਘਰਂ ਗਨ੍ਤ੍વਾ ਯਤ੍ਥ ਕਤ੍ਥਚਿ ਉਪਸਙ੍ਕਮਿਤ੍વਾ।
Upasaṅkamitvāti gharaṃ gantvā yattha katthaci upasaṅkamitvā.
ਚੀવਰੇ વਿਕਪ੍ਪਂ ਆਪਜ੍ਜੇਯ੍ਯਾਤਿ ਆਯਤਂ વਾ ਹੋਤੁ વਿਤ੍ਥਤਂ વਾ ਅਪ੍ਪਿਤਂ વਾ ਸਣ੍ਹਂ વਾ।
Cīvare vikappaṃ āpajjeyyāti āyataṃ vā hotu vitthataṃ vā appitaṃ vā saṇhaṃ vā.
ਇਮੇਹਿ ਪਚ੍ਚੇਕਚੀવਰਚੇਤਾਪਨ੍ਨੇਹੀਤਿ ਪਚ੍ਚੁਪਟ੍ਠਿਤੇਹਿ।
Imehi paccekacīvaracetāpannehīti paccupaṭṭhitehi.
ਏવਰੂਪਂ વਾ ਏવਰੂਪਂ વਾਤਿ ਆਯਤਂ વਾ વਿਤ੍ਥਤਂ વਾ ਅਪ੍ਪਿਤਂ વਾ ਸਣ੍ਹਂ વਾ।
Evarūpaṃ vā evarūpaṃ vāti āyataṃ vā vitthataṃ vā appitaṃ vā saṇhaṃ vā.
ਚੇਤਾਪੇਤ੍વਾਤਿ ਪਰਿવਤ੍ਤੇਤ੍વਾ।
Cetāpetvāti parivattetvā.
ਅਚ੍ਛਾਦੇਥਾਤਿ ਦਜ੍ਜੇਥ।
Acchādethāti dajjetha.
ਉਭੋવ ਸਨ੍ਤਾ ਏਕੇਨਾਤਿ ਦ੍વੇਪਿ ਜਨਾ ਏਕੇਨ।
Ubhova santā ekenāti dvepi janā ekena.
ਕਲ੍ਯਾਣਕਮ੍ਯਤਂ ਉਪਾਦਾਯਾਤਿ ਸਾਧਤ੍ਥਿਕੋ ਮਹਗ੍ਘਤ੍ਥਿਕੋ।
Kalyāṇakamyataṃ upādāyāti sādhatthiko mahagghatthiko.
ਤਸ੍ਸ વਚਨੇਨ ਆਯਤਂ વਾ વਿਤ੍ਥਤਂ વਾ ਅਪ੍ਪਿਤਂ વਾ ਸਣ੍ਹਂ વਾ ਚੇਤਾਪੇਨ੍ਤਿ, ਪਯੋਗੇ ਦੁਕ੍ਕਟਂ। ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ। ਨਿਸ੍ਸਜ੍ਜਿਤਬ੍ਬਂ ਸਙ੍ਘਸ੍ਸ વਾ ਗਣਸ੍ਸ વਾ ਪੁਗ੍ਗਲਸ੍ਸ વਾ। ਏવਞ੍ਚ ਪਨ, ਭਿਕ੍ਖવੇ, ਨਿਸ੍ਸਜ੍ਜਿਤਬ੍ਬਂ…ਪੇ॰… ਇਦਂ ਮੇ, ਭਨ੍ਤੇ, ਚੀવਰਂ ਪੁਬ੍ਬੇ ਅਪ੍ਪવਾਰਿਤੋ ਅਞ੍ਞਾਤਕੇ ਗਹਪਤਿਕੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਨ੍ਨਂ ਨਿਸ੍ਸਗ੍ਗਿਯਂ। ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀਤਿ…ਪੇ॰… ਦਦੇਯ੍ਯਾਤਿ…ਪੇ॰… ਦਦੇਯ੍ਯੁਨ੍ਤਿ…ਪੇ॰… ਆਯਸ੍ਮਤੋ ਦਮ੍ਮੀਤਿ।
Tassa vacanena āyataṃ vā vitthataṃ vā appitaṃ vā saṇhaṃ vā cetāpenti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, cīvaraṃ pubbe appavārito aññātake gahapatike upasaṅkamitvā cīvare vikappaṃ āpannaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
੫੩੫. ਅਞ੍ਞਾਤਕੇ ਅਞ੍ਞਾਤਕਸਞ੍ਞੀ ਪੁਬ੍ਬੇ ਅਪ੍ਪવਾਰਿਤੋ ਗਹਪਤਿਕੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਞ੍ਞਾਤਕੇ વੇਮਤਿਕੋ ਪੁਬ੍ਬੇ ਅਪ੍ਪવਾਰਿਤੋ ਗਹਪਤਿਕੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਞ੍ਞਾਤਕੇ ਞਾਤਕਸਞ੍ਞੀ ਪੁਬ੍ਬੇ ਅਪ੍ਪવਾਰਿਤੋ ਗਹਪਤਿਕੇ ਉਪਸਙ੍ਕਮਿਤ੍વਾ ਚੀવਰੇ વਿਕਪ੍ਪਂ ਆਪਜ੍ਜਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
535. Aññātake aññātakasaññī pubbe appavārito gahapatike upasaṅkamitvā cīvare vikappaṃ āpajjati, nissaggiyaṃ pācittiyaṃ. Aññātake vematiko pubbe appavārito gahapatike upasaṅkamitvā cīvare vikappaṃ āpajjati, nissaggiyaṃ pācittiyaṃ. Aññātake ñātakasaññī pubbe appavārito gahapatike upasaṅkamitvā cīvare vikappaṃ āpajjati, nissaggiyaṃ pācittiyaṃ.
ਞਾਤਕੇ ਅਞ੍ਞਾਤਕਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ। ਞਾਤਕੇ વੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ। ਞਾਤਕੇ ਞਾਤਕਸਞ੍ਞੀ, ਅਨਾਪਤ੍ਤਿ।
Ñātake aññātakasaññī, āpatti dukkaṭassa. Ñātake vematiko, āpatti dukkaṭassa. Ñātake ñātakasaññī, anāpatti.
੫੩੬. ਅਨਾਪਤ੍ਤਿ – ਞਾਤਕਾਨਂ, ਪવਾਰਿਤਾਨਂ, ਅਞ੍ਞਸ੍ਸਤ੍ਥਾਯ, ਅਤ੍ਤਨੋ ਧਨੇਨ, ਮਹਗ੍ਘਂ ਚੇਤਾਪੇਤੁਕਾਮਾਨਂ ਅਪ੍ਪਗ੍ਘਂ ਚੇਤਾਪੇਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ।
536. Anāpatti – ñātakānaṃ, pavāritānaṃ, aññassatthāya, attano dhanena, mahagghaṃ cetāpetukāmānaṃ appagghaṃ cetāpeti, ummattakassa, ādikammikassāti.
ਦੁਤਿਯਉਪਕ੍ਖਟਸਿਕ੍ਖਾਪਦਂ ਨਿਟ੍ਠਿਤਂ ਨવਮਂ।
Dutiyaupakkhaṭasikkhāpadaṃ niṭṭhitaṃ navamaṃ.
Related texts:
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਮਹਾવਿਭਙ੍ਗ-ਅਟ੍ਠਕਥਾ • Mahāvibhaṅga-aṭṭhakathā / ੯. ਦੁਤਿਯਉਪਕ੍ਖਟਸਿਕ੍ਖਾਪਦવਣ੍ਣਨਾ • 9. Dutiyaupakkhaṭasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ੮. ਪਠਮਉਪਕ੍ਖਟਸਿਕ੍ਖਾਪਦવਣ੍ਣਨਾ • 8. Paṭhamaupakkhaṭasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ੯. ਦੁਤਿਯਉਪਕ੍ਖਟਸਿਕ੍ਖਾਪਦવਣ੍ਣਨਾ • 9. Dutiyaupakkhaṭasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ੯. ਦੁਤਿਯਉਪਕ੍ਖਟਸਿਕ੍ਖਾਪਦવਣ੍ਣਨਾ • 9. Dutiyaupakkhaṭasikkhāpadavaṇṇanā
