| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. দুতিযউরুৰেলসুত্তং
2. Dutiyauruvelasuttaṃ
২২. ‘‘একমিদাহং , ভিক্খৰে, সমযং উরুৰেলাযং ৰিহরামি নজ্জা নেরঞ্জরায তীরে অজপালনিগ্রোধে পঠমাভিসম্বুদ্ধো। অথ খো, ভিক্খৰে, সম্বহুলা ব্রাহ্মণা জিণ্ণা ৰুদ্ধা মহল্লকা অদ্ধগতা ৰযোঅনুপ্পত্তা যেনাহং তেনুপসঙ্কমিংসু; উপসঙ্কমিত্ৰা মযা সদ্ধিং সম্মোদিংসু। সম্মোদনীযং কথং সারণীযং ৰীতিসারেত্ৰা একমন্তং নিসীদিংসু। একমন্তং নিসিন্না খো, ভিক্খৰে, তে ব্রাহ্মণা মং এতদৰোচুং – ‘সুতং নেতং 1, ভো গোতম – ন সমণো গোতমো ব্রাহ্মণে জিণ্ণে ৰুদ্ধে মহল্লকে অদ্ধগতে ৰযোঅনুপ্পত্তে অভিৰাদেতি ৰা পচ্চুট্ঠেতি ৰা আসনেন ৰা নিমন্তেতীতি। তযিদং, ভো গোতম, তথেৰ। ন হি ভৰং গোতমো ব্রাহ্মণে জিণ্ণে ৰুদ্ধে মহল্লকে অদ্ধগতে ৰযোঅনুপ্পত্তে অভিৰাদেতি ৰা পচ্চুট্ঠেতি ৰা আসনেন ৰা নিমন্তেতি। তযিদং, ভো গোতম, ন সম্পন্নমেৰা’’’তি।
22. ‘‘Ekamidāhaṃ , bhikkhave, samayaṃ uruvelāyaṃ viharāmi najjā nerañjarāya tīre ajapālanigrodhe paṭhamābhisambuddho. Atha kho, bhikkhave, sambahulā brāhmaṇā jiṇṇā vuddhā mahallakā addhagatā vayoanuppattā yenāhaṃ tenupasaṅkamiṃsu; upasaṅkamitvā mayā saddhiṃ sammodiṃsu. Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃsu. Ekamantaṃ nisinnā kho, bhikkhave, te brāhmaṇā maṃ etadavocuṃ – ‘sutaṃ netaṃ 2, bho gotama – na samaṇo gotamo brāhmaṇe jiṇṇe vuddhe mahallake addhagate vayoanuppatte abhivādeti vā paccuṭṭheti vā āsanena vā nimantetīti. Tayidaṃ, bho gotama, tatheva. Na hi bhavaṃ gotamo brāhmaṇe jiṇṇe vuddhe mahallake addhagate vayoanuppatte abhivādeti vā paccuṭṭheti vā āsanena vā nimanteti. Tayidaṃ, bho gotama, na sampannamevā’’’ti.
‘‘তস্স ময্হং, ভিক্খৰে, এতদহোসি – ‘নযিমে 3 আযস্মন্তো জানন্তি থেরং ৰা থেরকরণে ৰা ধম্মে’তি। ৰুদ্ধো চেপি, ভিক্খৰে, হোতি আসীতিকো ৰা নাৰুতিকো ৰা ৰস্সসতিকো ৰা জাতিযা। সো চ হোতি অকালৰাদী অভূতৰাদী অনত্থৰাদী অধম্মৰাদী অৰিনযৰাদী, অনিধানৰতিং ৰাচং ভাসিতা অকালেন অনপদেসং অপরিযন্তৰতিং অনত্থসংহিতং। অথ খো সো ‘বালো থেরো’ত্ৰেৰ 4 সঙ্খং গচ্ছতি।
‘‘Tassa mayhaṃ, bhikkhave, etadahosi – ‘nayime 5 āyasmanto jānanti theraṃ vā therakaraṇe vā dhamme’ti. Vuddho cepi, bhikkhave, hoti āsītiko vā nāvutiko vā vassasatiko vā jātiyā. So ca hoti akālavādī abhūtavādī anatthavādī adhammavādī avinayavādī, anidhānavatiṃ vācaṃ bhāsitā akālena anapadesaṃ apariyantavatiṃ anatthasaṃhitaṃ. Atha kho so ‘bālo thero’tveva 6 saṅkhaṃ gacchati.
‘‘দহরো চেপি, ভিক্খৰে, হোতি যুৰা সুসুকাল়কেসো ভদ্রেন যোব্বনেন সমন্নাগতো পঠমেন ৰযসা । সো চ হোতি কালৰাদী ভূতৰাদী অত্থৰাদী ধম্মৰাদী ৰিনযৰাদী নিধানৰতিং ৰাচং ভাসিতা কালেন সাপদেসং পরিযন্তৰতিং অত্থসংহিতং। অথ খো সো ‘পণ্ডিতো থেরো’ত্ৰেৰ সঙ্খং গচ্ছতি।
‘‘Daharo cepi, bhikkhave, hoti yuvā susukāḷakeso bhadrena yobbanena samannāgato paṭhamena vayasā . So ca hoti kālavādī bhūtavādī atthavādī dhammavādī vinayavādī nidhānavatiṃ vācaṃ bhāsitā kālena sāpadesaṃ pariyantavatiṃ atthasaṃhitaṃ. Atha kho so ‘paṇḍito thero’tveva saṅkhaṃ gacchati.
‘‘চত্তারোমে , ভিক্খৰে, থেরকরণা ধম্মা। কতমে চত্তারো? ইধ, ভিক্খৰে, ভিক্খু সীলৰা হোতি, পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু, বহুস্সুতো হোতি সুতধরো সুতসন্নিচযো, যে তে ধম্মা আদিকল্যাণা মজ্ঝেকল্যাণা পরিযোসানকল্যাণা সাত্থং সব্যঞ্জনং 7 কেৰলপরিপুণ্ণং 8 পরিসুদ্ধং ব্রহ্মচরিযং অভিৰদন্তি, তথারূপাস্স ধম্মা বহুস্সুতা হোন্তি ধাতা 9 ৰচসা পরিচিতা মনসানুপেক্খিতা, দিট্ঠিযা সুপ্পটিৰিদ্ধা, চতুন্নং ঝানানং আভিচেতসিকানং দিট্ঠধম্মসুখৰিহারানং নিকামলাভী হোতি অকিচ্ছলাভী অকসিরলাভী, আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি। ইমে খো, ভিক্খৰে, চত্তারো থেরকরণা ধম্মা’’তি।
‘‘Cattārome , bhikkhave, therakaraṇā dhammā. Katame cattāro? Idha, bhikkhave, bhikkhu sīlavā hoti, pātimokkhasaṃvarasaṃvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu, bahussuto hoti sutadharo sutasannicayo, ye te dhammā ādikalyāṇā majjhekalyāṇā pariyosānakalyāṇā sātthaṃ sabyañjanaṃ 10 kevalaparipuṇṇaṃ 11 parisuddhaṃ brahmacariyaṃ abhivadanti, tathārūpāssa dhammā bahussutā honti dhātā 12 vacasā paricitā manasānupekkhitā, diṭṭhiyā suppaṭividdhā, catunnaṃ jhānānaṃ ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī akasiralābhī, āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Ime kho, bhikkhave, cattāro therakaraṇā dhammā’’ti.
‘‘যো উদ্ধতেন চিত্তেন, সম্ফঞ্চ বহু ভাসতি।
‘‘Yo uddhatena cittena, samphañca bahu bhāsati;
অসমাহিতসঙ্কপ্পো, অসদ্ধম্মরতো মগো।
Asamāhitasaṅkappo, asaddhammarato mago;
আরা সো থাৰরেয্যম্হা, পাপদিট্ঠি অনাদরো॥
Ārā so thāvareyyamhā, pāpadiṭṭhi anādaro.
‘‘যো চ সীলেন সম্পন্নো, সুতৰা পটিভানৰা।
‘‘Yo ca sīlena sampanno, sutavā paṭibhānavā;
‘‘পারগূ সব্বধম্মানং, অখিলো পটিভানৰা।
‘‘Pāragū sabbadhammānaṃ, akhilo paṭibhānavā;
পহীনজাতিমরণো, ব্রহ্মচরিযস্স কেৰলী॥
Pahīnajātimaraṇo, brahmacariyassa kevalī.
‘‘তমহং ৰদামি থেরোতি, যস্স নো সন্তি আসৰা।
‘‘Tamahaṃ vadāmi theroti, yassa no santi āsavā;
আসৰানং খযা ভিক্খু, সো থেরোতি পৰুচ্চতী’’তি॥ দুতিযং।
Āsavānaṃ khayā bhikkhu, so theroti pavuccatī’’ti. dutiyaṃ;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. দুতিযউরুৰেলসুত্তৰণ্ণনা • 2. Dutiyauruvelasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২.দুতিযউরুৰেলসুত্তৰণ্ণনা • 2.Dutiyauruvelasuttavaṇṇanā
