| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. து³தியஉருவேலஸுத்தவண்ணனா
2. Dutiyauruvelasuttavaṇṇanā
22. து³தியே ஸம்ப³ஹுலாதி ப³ஹுகா. ப்³ராஹ்மணாதி ஹுஹுக்கஜாதிகேன ப்³ராஹ்மணேன ஸத்³தி⁴ங் ஆக³தா ப்³ராஹ்மணா. ஜிண்ணாதி ஜராஜிண்ணா. வுட்³டா⁴தி வயோவுத்³தா⁴. மஹல்லகாதி ஜாதிமஹல்லகா. அத்³த⁴க³தாதி தயோ வயே அத்³தே⁴ அதிக்கந்தா. ஸுதமேதந்தி அம்ஹேஹி ஸுதங் ஏதங். தயித³ங் போ⁴, கோ³தம, ததே²வாதி போ⁴, கோ³தம, ஏதங் அம்ஹேஹி ஸுதகாரணங் ததா² ஏவ. தயித³ங் போ⁴, கோ³தம, ந ஸம்பன்னமேவாதி தங் ஏதங் அபி⁴வாத³னாதி³அகரணங் அனநுச்ச²விகமேவ.
22. Dutiye sambahulāti bahukā. Brāhmaṇāti huhukkajātikena brāhmaṇena saddhiṃ āgatā brāhmaṇā. Jiṇṇāti jarājiṇṇā. Vuḍḍhāti vayovuddhā. Mahallakāti jātimahallakā. Addhagatāti tayo vaye addhe atikkantā. Sutametanti amhehi sutaṃ etaṃ. Tayidaṃ bho, gotama, tathevāti bho, gotama, etaṃ amhehi sutakāraṇaṃ tathā eva. Tayidaṃ bho, gotama, na sampannamevāti taṃ etaṃ abhivādanādiakaraṇaṃ ananucchavikameva.
அகாலவாதீ³திஆதீ³ஸு அகாலே வத³தீதி அகாலவாதீ³. அஸபா⁴வங் வத³தீதி அபூ⁴தவாதீ³. அனத்த²ங் வத³தி, நோ அத்த²ந்தி அனத்த²வாதீ³. அத⁴ம்மங் வத³தி, நோ த⁴ம்மந்தி அத⁴ம்மவாதீ³. அவினயங் வத³தி , நோ வினயந்தி அவினயவாதீ³. அனிதா⁴னவதிங் வாசங் பா⁴ஸிதாதி ந ஹத³யே நிதே⁴தப்³ப³யுத்தகங் வாசங் பா⁴ஸிதா. அகாலேனாதி கதே²துங் அயுத்தகாலேன. அனபதே³ஸந்தி அபதே³ஸரஹிதங், ஸாபதே³ஸங் ஸகாரணங் கத்வா ந கதே²தி. அபரியந்தவதிந்தி பரியந்தரஹிதங், ந பரிச்சே²த³ங் த³ஸ்ஸெத்வா கதே²தி. அனத்த²ஸங்ஹிதந்தி ந லோகியலோகுத்தரஅத்த²னிஸ்ஸிதங் கத்வா கதே²தி. பா³லோ தே²ரொத்வேவ ஸங்க²ங் க³ச்ச²தீதி அந்த⁴பா³லோ தே²ரோதி ஸங்க²ங் க³ச்ச²தி.
Akālavādītiādīsu akāle vadatīti akālavādī. Asabhāvaṃ vadatīti abhūtavādī. Anatthaṃ vadati, no atthanti anatthavādī. Adhammaṃ vadati, no dhammanti adhammavādī. Avinayaṃ vadati , no vinayanti avinayavādī. Anidhānavatiṃ vācaṃ bhāsitāti na hadaye nidhetabbayuttakaṃ vācaṃ bhāsitā. Akālenāti kathetuṃ ayuttakālena. Anapadesanti apadesarahitaṃ, sāpadesaṃ sakāraṇaṃ katvā na katheti. Apariyantavatinti pariyantarahitaṃ, na paricchedaṃ dassetvā katheti. Anatthasaṃhitanti na lokiyalokuttaraatthanissitaṃ katvā katheti. Bālo therotveva saṅkhaṃ gacchatīti andhabālo theroti saṅkhaṃ gacchati.
காலவாதீ³திஆதீ³னி வுத்தபடிபக்க²வஸேன வேதி³தப்³பா³னி. பண்டி³தோ தே²ரொத்வேவ ஸங்க²ங் க³ச்ச²தீதி பண்டி³ச்சேன ஸமன்னாக³தத்தா பண்டி³தோ, தி²ரபா⁴வப்பத்தியா தே²ரோதி ஸங்க²ங் க³ச்ச²தி.
Kālavādītiādīni vuttapaṭipakkhavasena veditabbāni. Paṇḍito therotveva saṅkhaṃ gacchatīti paṇḍiccena samannāgatattā paṇḍito, thirabhāvappattiyā theroti saṅkhaṃ gacchati.
ப³ஹுஸ்ஸுதோ ஹோதீதி ப³ஹுங் அஸ்ஸ ஸுதங் ஹோதி, நவங்க³ங் ஸத்து²ஸாஸனங் பாளிஅனுஸந்தி⁴புப்³பா³பரவஸேன உக்³க³ஹிதங் ஹோதீதி அத்தோ². ஸுதத⁴ரோதி ஸுதஸ்ஸ ஆதா⁴ரபூ⁴தோ. யஸ்ஸ ஹி இதோ க³ஹிதங் இதோ பலாயதி, சி²த்³த³க⁴டே உத³கங் விய ந திட்ட²தி, பரிஸமஜ்ஜே² ஏகஸுத்தங் வா ஜாதகங் வா கதே²துங் வா வாசேதுங் வா ந ஸக்கோதி, அயங் ந ஸுதத⁴ரோ நாம. யஸ்ஸ பன உக்³க³ஹிதங் பு³த்³த⁴வசனங் உக்³க³ஹிதகாலஸதி³ஸமேவ ஹோதி, த³ஸபி வீஸதிபி வஸ்ஸானி ஸஜ்ஜா²யங் அகரொந்தஸ்ஸ நேவ நஸ்ஸதி, அயங் ஸுதத⁴ரோ நாம. ஸுதஸன்னிசயோதி ஸுதஸ்ஸ ஸன்னிசயபூ⁴தோ. யஸ்ஸ ஹி ஸுதங் ஹத³யமஞ்ஜூஸாய ஸன்னிசிதங் ஸிலாய லேகா² விய ஸுவண்ணபத்தே பக்கி²த்தஸீஹவஸா விய ச திட்ட²தி, அயங் ஸுதஸன்னிசயோ நாம. தா⁴தாதி தா⁴தா பகு³ணா. ஏகச்சஸ்ஸ ஹி உக்³க³ஹிதபு³த்³த⁴வசனங் தா⁴தங் பகு³ணங் நிச்சலிகங் ந ஹோதி, ‘‘அஸுகங் ஸுத்தங் வா ஜாதகங் வா கதே²ஹீ’’தி வுத்தே ‘‘ஸஜ்ஜா²யித்வா ஸங்ஸந்தி³த்வா ஸமனுக்³கா³ஹித்வா ஜானிஸ்ஸாமீ’’தி வத³தி. ஏகச்சஸ்ஸ தா⁴தங் பகு³ணங் ப⁴வங்க³ஸோதஸதி³ஸங் ஹோதி, ‘‘அஸுகங் ஸுத்தங் வா ஜாதகங் வா கதே²ஹீ’’தி வுத்தே உத்³த⁴ரித்வா தமேவ கதே²தி. தங் ஸந்தா⁴ய வுத்தங் ‘‘தா⁴தா’’தி. வசஸா பரிசிதாதி ஸுத்தத³ஸக-வக்³க³த³ஸகபண்ணாஸத³ஸகவஸேன வாசாய ஸஜ்ஜா²யிதா. மனஸானுபெக்கி²தாதி சித்தேன அனுபெக்கி²தா. யஸ்ஸ வாசாய ஸஜ்ஜா²யிதங் பு³த்³த⁴வசனங் மனஸா சிந்தெந்தஸ்ஸ தத்த² தத்த² பாகடங் ஹோதி, மஹாதீ³பங் ஜாலெத்வா டி²தஸ்ஸ ரூபக³தங் விய பஞ்ஞாயதி, தங் ஸந்தா⁴யேதங் வுத்தங். தி³ட்டி²யா ஸுப்படிவித்³தா⁴தி அத்த²தோ ச காரணதோ ச பஞ்ஞாய ஸுப்படிவித்³தா⁴.
Bahussuto hotīti bahuṃ assa sutaṃ hoti, navaṅgaṃ satthusāsanaṃ pāḷianusandhipubbāparavasena uggahitaṃ hotīti attho. Sutadharoti sutassa ādhārabhūto. Yassa hi ito gahitaṃ ito palāyati, chiddaghaṭe udakaṃ viya na tiṭṭhati, parisamajjhe ekasuttaṃ vā jātakaṃ vā kathetuṃ vā vācetuṃ vā na sakkoti, ayaṃ na sutadharo nāma. Yassa pana uggahitaṃ buddhavacanaṃ uggahitakālasadisameva hoti, dasapi vīsatipi vassāni sajjhāyaṃ akarontassa neva nassati, ayaṃ sutadharo nāma. Sutasannicayoti sutassa sannicayabhūto. Yassa hi sutaṃ hadayamañjūsāya sannicitaṃ silāya lekhā viya suvaṇṇapatte pakkhittasīhavasā viya ca tiṭṭhati, ayaṃ sutasannicayo nāma. Dhātāti dhātā paguṇā. Ekaccassa hi uggahitabuddhavacanaṃ dhātaṃ paguṇaṃ niccalikaṃ na hoti, ‘‘asukaṃ suttaṃ vā jātakaṃ vā kathehī’’ti vutte ‘‘sajjhāyitvā saṃsanditvā samanuggāhitvā jānissāmī’’ti vadati. Ekaccassa dhātaṃ paguṇaṃ bhavaṅgasotasadisaṃ hoti, ‘‘asukaṃ suttaṃ vā jātakaṃ vā kathehī’’ti vutte uddharitvā tameva katheti. Taṃ sandhāya vuttaṃ ‘‘dhātā’’ti. Vacasāparicitāti suttadasaka-vaggadasakapaṇṇāsadasakavasena vācāya sajjhāyitā. Manasānupekkhitāti cittena anupekkhitā. Yassa vācāya sajjhāyitaṃ buddhavacanaṃ manasā cintentassa tattha tattha pākaṭaṃ hoti, mahādīpaṃ jāletvā ṭhitassa rūpagataṃ viya paññāyati, taṃ sandhāyetaṃ vuttaṃ. Diṭṭhiyā suppaṭividdhāti atthato ca kāraṇato ca paññāya suppaṭividdhā.
ஆபி⁴சேதஸிகானந்தி அபி⁴சேதோதி அபி⁴க்கந்தங் விஸுத்³த⁴ங் சித்தங் வுச்சதி, அதி⁴சித்தங் வா, அபி⁴சேதஸி ஜாதானி ஆபி⁴சேதஸிகானி, அபி⁴சேதோஸன்னிஸ்ஸிதானீதி வா ஆபி⁴சேதஸிகானி. தி³ட்ட²த⁴ம்மஸுக²விஹாரானந்தி தி³ட்ட²த⁴ம்மே ஸுக²விஹாரானங். தி³ட்ட²த⁴ம்மோதி பச்சக்கோ² அத்தபா⁴வோ வுச்சதி, தத்த² ஸுக²விஹாரபூ⁴தானந்தி அத்தோ². ரூபாவசரஜ்ஜா²னானமேதங் அதி⁴வசனங். தானி ஹி அப்பெத்வா நிஸின்னா ஜா²யினோ இமஸ்மிங்யேவ அத்தபா⁴வே அஸங்கிலிட்ட²னெக்க²ம்மஸுக²ங் விந்த³ந்தி, தஸ்மா ‘‘தி³ட்ட²த⁴ம்மஸுக²விஹாரானீ’’தி வுச்சதி. நிகாமலாபீ⁴தி நிகாமேன லாபீ⁴, அத்தனோ இச்சா²வஸேன லாபீ⁴, இச்சி²திச்சி²தக்க²ணே ஸமாபஜ்ஜிதுங் ஸமத்தோ²தி வுத்தங் ஹோதி. அகிச்ச²லாபீ⁴தி ஸுகே²னேவ பச்சனீகத⁴ம்மே விக்க²ம்பெ⁴த்வா ஸமாபஜ்ஜிதுங் ஸமத்தோ²தி வுத்தங் ஹோதி. அகஸிரலாபீ⁴தி அகஸிரானங் லாபீ⁴ விபுலானங், யதா²பரிச்சே²தே³ன வுட்டா²துங் ஸமத்தோ²தி வுத்தங் ஹோதி. ஏகச்சோ ஹி லாபீ⁴யேவ ஹோதி, ந பன இச்சி²திச்சி²தக்க²ணே ஸக்கோதி ஸமாபஜ்ஜிதுங். ஏகச்சோ ஸக்கோதி ததா²ஸமாபஜ்ஜிதுங், பாரிபந்தி²கே ச பன கிச்சே²ன விக்க²ம்பே⁴தி. ஏகச்சோ ததா² ச ஸமாபஜ்ஜதி, பாரிபந்தி²கே ச அகிச்சே²னேவ விக்க²ம்பே⁴தி, ந ஸக்கோதி நாளிகயந்தங் விய யதா²பரிச்சே²தே³யேவ வுட்டா²துங். யஸ்ஸ பன அயங் திவிதா⁴பி ஸம்பதா³ அத்தி², ஸோ ‘‘அகிச்ச²லாபீ⁴ அகஸிரலாபீ⁴’’தி வுச்சதி. ஆஸவானங் க²யாதிஆதீ³னி வுத்தத்தா²னேவ. ஏவமித⁴ ஸீலம்பி பா³ஹுஸச்சம்பி கீ²ணாஸவஸ்ஸேவ ஸீலங் பா³ஹுஸச்சஞ்ச, ஜா²னானிபி கீ²ணாஸவஸ்ஸேவ வளஞ்ஜனகஜ்ஜா²னானி கதி²தானி. ‘‘ஆஸவானங் க²யா’’திஆதீ³ஹி பன அரஹத்தங் கதி²தங். ப²லேன செத்த² மக்³க³கிச்சங் பகாஸிதந்தி வேதி³தப்³ப³ங்.
Ābhicetasikānanti abhicetoti abhikkantaṃ visuddhaṃ cittaṃ vuccati, adhicittaṃ vā, abhicetasi jātāni ābhicetasikāni, abhicetosannissitānīti vā ābhicetasikāni. Diṭṭhadhammasukhavihārānanti diṭṭhadhamme sukhavihārānaṃ. Diṭṭhadhammoti paccakkho attabhāvo vuccati, tattha sukhavihārabhūtānanti attho. Rūpāvacarajjhānānametaṃ adhivacanaṃ. Tāni hi appetvā nisinnā jhāyino imasmiṃyeva attabhāve asaṃkiliṭṭhanekkhammasukhaṃ vindanti, tasmā ‘‘diṭṭhadhammasukhavihārānī’’ti vuccati. Nikāmalābhīti nikāmena lābhī, attano icchāvasena lābhī, icchiticchitakkhaṇe samāpajjituṃ samatthoti vuttaṃ hoti. Akicchalābhīti sukheneva paccanīkadhamme vikkhambhetvā samāpajjituṃ samatthoti vuttaṃ hoti. Akasiralābhīti akasirānaṃ lābhī vipulānaṃ, yathāparicchedena vuṭṭhātuṃ samatthoti vuttaṃ hoti. Ekacco hi lābhīyeva hoti, na pana icchiticchitakkhaṇe sakkoti samāpajjituṃ. Ekacco sakkoti tathāsamāpajjituṃ, pāripanthike ca pana kicchena vikkhambheti. Ekacco tathā ca samāpajjati, pāripanthike ca akiccheneva vikkhambheti, na sakkoti nāḷikayantaṃ viya yathāparicchedeyeva vuṭṭhātuṃ. Yassa pana ayaṃ tividhāpi sampadā atthi, so ‘‘akicchalābhī akasiralābhī’’ti vuccati. Āsavānaṃ khayātiādīni vuttatthāneva. Evamidha sīlampi bāhusaccampi khīṇāsavasseva sīlaṃ bāhusaccañca, jhānānipi khīṇāsavasseva vaḷañjanakajjhānāni kathitāni. ‘‘Āsavānaṃ khayā’’tiādīhi pana arahattaṃ kathitaṃ. Phalena cettha maggakiccaṃ pakāsitanti veditabbaṃ.
உத்³த⁴தேனாதி உத்³த⁴ச்சஸஹக³தேன. ஸம்ப²ந்தி பலாபகத²ங். அஸமாஹிதஸங்கப்போதி அட்ட²பிதஸங்கப்போ. மகோ³தி மக³ஸதி³ஸோ. ஆராதி தூ³ரே. தா²வரெய்யம்ஹாதி தா²வரபா⁴வதோ. பாபதி³ட்டீ²தி லாமகதி³ட்டி². அனாத³ரோதி ஆத³ரரஹிதோ. ஸுதவாதி ஸுதேன உபக³தோ. படிபா⁴னவாதி து³விதே⁴ன படிபா⁴னேன ஸமன்னாக³தோ. பஞ்ஞாயத்த²ங் விபஸ்ஸதீதி ஸஹவிபஸ்ஸனாய மக்³க³பஞ்ஞாய சதுன்னங் ஸச்சானங் அத்த²ங் வினிவிஜ்ஜி²த்வா பஸ்ஸதி. பாரகூ³ ஸப்³ப³த⁴ம்மானந்தி ஸப்³பே³ஸங் க²ந்தா⁴தி³த⁴ம்மானங் பாரங் க³தோ, அபி⁴ஞ்ஞாபாரகூ³, பரிஞ்ஞாபாரகூ³, பஹானபாரகூ³, பா⁴வனாபாரகூ³, ஸச்சி²கிரியாபாரகூ³, ஸமாபத்திபாரகூ³தி ஏவங் ச²ப்³பி³தே⁴ன பாரக³மனேன ஸப்³ப³த⁴ம்மானங் பாரங் பரியோஸானங் க³தோ. அகி²லோதி ராக³கி²லாதி³விரஹிதோ. படிபா⁴னவாதி து³விதே⁴னேவ படிபா⁴னேன ஸமன்னாக³தோ. ப்³ரஹ்மசரியஸ்ஸ கேவலீதி ஸகலப்³ரஹ்மசரியோ. ஸேஸமெத்த² உத்தானமேவாதி.
Uddhatenāti uddhaccasahagatena. Samphanti palāpakathaṃ. Asamāhitasaṅkappoti aṭṭhapitasaṅkappo. Magoti magasadiso. Ārāti dūre. Thāvareyyamhāti thāvarabhāvato. Pāpadiṭṭhīti lāmakadiṭṭhi. Anādaroti ādararahito. Sutavāti sutena upagato. Paṭibhānavāti duvidhena paṭibhānena samannāgato. Paññāyatthaṃ vipassatīti sahavipassanāya maggapaññāya catunnaṃ saccānaṃ atthaṃ vinivijjhitvā passati. Pāragū sabbadhammānanti sabbesaṃ khandhādidhammānaṃ pāraṃ gato, abhiññāpāragū, pariññāpāragū, pahānapāragū, bhāvanāpāragū, sacchikiriyāpāragū, samāpattipāragūti evaṃ chabbidhena pāragamanena sabbadhammānaṃ pāraṃ pariyosānaṃ gato. Akhiloti rāgakhilādivirahito. Paṭibhānavāti duvidheneva paṭibhānena samannāgato. Brahmacariyassa kevalīti sakalabrahmacariyo. Sesamettha uttānamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. து³தியஉருவேலஸுத்தங் • 2. Dutiyauruvelasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2.து³தியஉருவேலஸுத்தவண்ணனா • 2.Dutiyauruvelasuttavaṇṇanā
