| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2.து³தியஉருவேலஸுத்தவண்ணனா
2.Dutiyauruvelasuttavaṇṇanā
22. து³தியே ஹுஹுங்கஜாதிகேனாதி ஸோ கிர தி³ட்ட²மங்க³லிகோ மானவஸேன கோத⁴வஸேன ச ‘‘ஹுஹு’’ந்தி கரொந்தோ விசரதி, தஸ்மா ஹுஹுங்கஜாதிகோதி வுச்சதி. ‘‘ஹுஹுக்கஜாதிகோ’’திபி பட²ந்தி, தேன ஸத்³தி⁴ங் ஆக³தாதி அத்தோ². ஜராஜிண்ணாதி ஜராய க²ண்ட³த³ந்தபலிதகேஸாதி³பா⁴வங் ஆபாதி³தா. வயோவுத்³தா⁴தி அங்க³பச்சங்கா³னங் வுத்³தி⁴மரியாத³ப்பத்தா. ஜாதிமஹல்லகாதி உபபத்தியா மஹல்லகபா⁴வேன ஸமன்னாக³தா. மஹத்தங் லந்தி க³ண்ஹந்தீதி மஹல்லகா, ஜாதியா மஹல்லகா, ந விப⁴வாதி³னாதி ஜாதிமஹல்லகா. வயோஅனுப்பத்தாதி பச்சி²மவயங் ஸம்பத்தா, பச்சி²மவயோ நாம வஸ்ஸஸதஸ்ஸ பச்சி²மோ ததியோ பா⁴கோ³. ஜிண்ணாதி வா போராணா, சிரகாலப்பவத்தகுலன்வயாதி வுத்தங் ஹோதி. வுத்³தா⁴தி ஸீலாசாராதி³கு³ணவுத்³தி⁴யுத்தா. மஹல்லகாதி விப⁴வமஹந்ததாய ஸமன்னாக³தா. மஹத்³த⁴னாதி மஹாபோ⁴கா³. அத்³த⁴க³தாதி மக்³க³ப்படிபன்னா ப்³ராஹ்மணானங் வதசரியாதி³மரியாத³ங் அவீதிக்கம்ம சரமானா. வயோஅனுப்பத்தாதி ஜாதிவுத்³த⁴பா⁴வங் அந்திமவயங் அனுப்பத்தா. ஸுதங் நேதந்தி எத்த² ஸுதங் நோ ஏதந்தி பத³ச்சே²தோ³. நோதி ச கரணத்தே² ஸாமிவசனங். தேனாஹ ‘‘அம்ஹேஹி ஸுத’’ந்தி.
22. Dutiye huhuṅkajātikenāti so kira diṭṭhamaṅgaliko mānavasena kodhavasena ca ‘‘huhu’’nti karonto vicarati, tasmā huhuṅkajātikoti vuccati. ‘‘Huhukkajātiko’’tipi paṭhanti, tena saddhiṃ āgatāti attho. Jarājiṇṇāti jarāya khaṇḍadantapalitakesādibhāvaṃ āpāditā. Vayovuddhāti aṅgapaccaṅgānaṃ vuddhimariyādappattā. Jātimahallakāti upapattiyā mahallakabhāvena samannāgatā. Mahattaṃ lanti gaṇhantīti mahallakā, jātiyā mahallakā, na vibhavādināti jātimahallakā. Vayoanuppattāti pacchimavayaṃ sampattā, pacchimavayo nāma vassasatassa pacchimo tatiyo bhāgo. Jiṇṇāti vā porāṇā, cirakālappavattakulanvayāti vuttaṃ hoti. Vuddhāti sīlācārādiguṇavuddhiyuttā. Mahallakāti vibhavamahantatāya samannāgatā. Mahaddhanāti mahābhogā. Addhagatāti maggappaṭipannā brāhmaṇānaṃ vatacariyādimariyādaṃ avītikkamma caramānā. Vayoanuppattāti jātivuddhabhāvaṃ antimavayaṃ anuppattā. Sutaṃ netanti ettha sutaṃ no etanti padacchedo. Noti ca karaṇatthe sāmivacanaṃ. Tenāha ‘‘amhehi suta’’nti.
அகாலேதி அயுத்தகாலே. அஸபா⁴வங் வத³தீதி யங் நத்தி², தங் வத³தி. அனத்த²ங் வத³தீதி அகாரணனிஸ்ஸிதங் வத³தி. அகாரணனிஸ்ஸிதந்தி ச நிப்ப²லந்தி அத்தோ². ப²லஞ்ஹி காரணனிஸ்ஸிதங். அகாரணனிஸ்ஸிததா ச தத³வினாபா⁴வதோ அகாரணே நிஸ்ஸிதங், நிப்ப²லங் ஸம்ப²ந்தி வுத்தங் ஹோதி. அவினயங் வத³தீதி ந ஸங்வரவினயப்படிஸங்யுத்தங் வத³தி, அத்தனோ ஸுணந்தஸ்ஸ ச ந ஸங்வரவினயாவஹங் வத³தீதி வுத்தங் ஹோதி. ந ஹத³யே நிதே⁴தப்³ப³யுத்தகந்தி அஹிதஸங்ஹிதத்தா சித்தங் அனுப்பவேஸெத்வா நிதே⁴துங் அயுத்தங். கதே²துங் அயுத்தகாலேனாதி த⁴ம்மங் கதெ²ந்தேன யோ அத்தோ² யஸ்மிங் காலே வத்தப்³போ³, ததோ புப்³பே³ பச்சா² ச தஸ்ஸ அகாலோ, தஸ்மிங் அயுத்தகாலே வத்தா. அபதே³ஸரஹிதந்தி ஸுத்தாபதே³ஸரஹிதங். ஸாபதே³ஸங் ஸகாரணங் கத்வா ந கதே²தீதி ‘‘ப⁴க³வதா அஸுகே ஸுத்தே ஏவங் வுத்த’’ந்தி ஏவங் ஸாபதே³ஸங் காரணஸஹிதங் கத்வா ந கதே²தி.
Akāleti ayuttakāle. Asabhāvaṃ vadatīti yaṃ natthi, taṃ vadati. Anatthaṃ vadatīti akāraṇanissitaṃ vadati. Akāraṇanissitanti ca nipphalanti attho. Phalañhi kāraṇanissitaṃ. Akāraṇanissitatā ca tadavinābhāvato akāraṇe nissitaṃ, nipphalaṃ samphanti vuttaṃ hoti. Avinayaṃ vadatīti na saṃvaravinayappaṭisaṃyuttaṃ vadati, attano suṇantassa ca na saṃvaravinayāvahaṃ vadatīti vuttaṃ hoti. Na hadaye nidhetabbayuttakanti ahitasaṃhitattā cittaṃ anuppavesetvā nidhetuṃ ayuttaṃ. Kathetuṃ ayuttakālenāti dhammaṃ kathentena yo attho yasmiṃ kāle vattabbo, tato pubbe pacchā ca tassa akālo, tasmiṃ ayuttakāle vattā. Apadesarahitanti suttāpadesarahitaṃ. Sāpadesaṃ sakāraṇaṃ katvā na kathetīti ‘‘bhagavatā asuke sutte evaṃ vutta’’nti evaṃ sāpadesaṃ kāraṇasahitaṃ katvā na katheti.
பரியந்தரஹிதந்தி பரிச்சே²த³ரஹிதங், ஸுத்தங் வா ஜாதகங் வா நிக்கி²பித்வா தஸ்ஸ அனுயோக³ங் உபமங் வா வத்து²ங் வா ஆஹரித்வா யங் ஸுத்தங் ஜாதகங் வா நிக்கி²பிதங், தஸ்ஸ ஸரீரபூ⁴தங் கத²ங் அனாமஸித்வா பா³ஹிரகத²ங்யேவ கதே²தி, நிக்கி²த்தங் நிக்கி²த்தமத்தமேவ ஹோதி, ‘‘ஸுத்தங் நு கோ² கதே²தி ஜாதகங் நு கோ², நாஸ்ஸ அந்தங் வா கோடிங் வா பஸ்ஸாமா’’தி வத்தப்³ப³தங் ஆபஜ்ஜதி. யதா² வடருக்க²ஸாகா²னங் க³தக³தட்டா²னே பாரோஹா ஓதரந்தி, ஓதிண்ணோ-திண்ணட்டா²னே விருள்ஹிங் ஆபஜ்ஜித்வா புன வட்³ட⁴ந்தியேவ, ஏவங் அட்³ட⁴யோஜனம்பி யோஜனம்பி க³ச்ச²தியேவ. க³ச்ச²ந்தே க³ச்ச²ந்தே பன மூலருக்கோ² வினஸ்ஸதி, அனுஜாதபாரோஹமூலானியேவ திட்ட²ந்தி, ஏவங் அயம்பி நிக்³ரோத⁴த⁴ம்மகதி²கோ நாம ஹோதி. நிக்கி²த்தங் நிக்கி²த்தமேவ கத்வா பஸ்ஸேனேவ பரிஹரந்தோ க³ச்ச²தி. யோ பன ப³ஹும்பி ப⁴ணந்தோ ‘‘ஏதத³த்த²மித³ங் வுத்த’’ந்தி நிக்கி²த்தஸுத்ததோ அஞ்ஞம்பி அனுயோகூ³பமாவத்து²வஸேன தது³பயோகீ³னங் ஆஹரித்வா ஆஹரித்வா ஜானாபேதுங் ஸக்கோதி, ததா²ரூபஸ்ஸ த⁴ம்மகதி²கஸ்ஸ ப³ஹும்பி கதே²துங் வட்டதி. ந லோகியலோகுத்தரஅத்த²னிஸ்ஸிதந்தி அத்தனோ பரேஸஞ்ச ந லோகியலோகுத்தரஹிதாவஹங்.
Pariyantarahitanti paricchedarahitaṃ, suttaṃ vā jātakaṃ vā nikkhipitvā tassa anuyogaṃ upamaṃ vā vatthuṃ vā āharitvā yaṃ suttaṃ jātakaṃ vā nikkhipitaṃ, tassa sarīrabhūtaṃ kathaṃ anāmasitvā bāhirakathaṃyeva katheti, nikkhittaṃ nikkhittamattameva hoti, ‘‘suttaṃ nu kho katheti jātakaṃ nu kho, nāssa antaṃ vā koṭiṃ vā passāmā’’ti vattabbataṃ āpajjati. Yathā vaṭarukkhasākhānaṃ gatagataṭṭhāne pārohā otaranti, otiṇṇo-tiṇṇaṭṭhāne viruḷhiṃ āpajjitvā puna vaḍḍhantiyeva, evaṃ aḍḍhayojanampi yojanampi gacchatiyeva. Gacchante gacchante pana mūlarukkho vinassati, anujātapārohamūlāniyeva tiṭṭhanti, evaṃ ayampi nigrodhadhammakathiko nāma hoti. Nikkhittaṃ nikkhittameva katvā passeneva pariharanto gacchati. Yo pana bahumpi bhaṇanto ‘‘etadatthamidaṃ vutta’’nti nikkhittasuttato aññampi anuyogūpamāvatthuvasena tadupayogīnaṃ āharitvā āharitvā jānāpetuṃ sakkoti, tathārūpassa dhammakathikassa bahumpi kathetuṃ vaṭṭati. Na lokiyalokuttaraatthanissitanti attano paresañca na lokiyalokuttarahitāvahaṃ.
பகட்டா²னங் உக்கட்டா²னங் ஸீலாதி³அத்தா²னங் போ³த⁴னதோ ஸபா⁴வனிருத்திவஸேன ச பு³த்³தா⁴தீ³ஹி பா⁴ஸிதத்தா பகட்டா²னங் வசனப்பப³ந்தா⁴னங் ஆளீதி பாளி, பரியத்தித⁴ம்மோ. புரிமஸ்ஸ அத்த²ஸ்ஸ பச்சி²மேன அத்தே²ன அனுஸந்தா⁴னங் அனுஸந்தி⁴, அத்த²முகே²ன பன பாளிப்பதே³ஸானம்பி அனுஸந்தி⁴ ஹோதியேவ. ஸ்வாயங் அனுஸந்தி⁴ புச்சா²னுஸந்தி⁴அஜ்ஜா²ஸயானுஸந்தி⁴யதா²னுஸந்தி⁴ஆதி³வஸேன சதுப்³பி³தோ⁴, தங்தங்தே³ஸனானங் பன புப்³பா³பரபாளிவஸேன அனுஸந்தி⁴வஸேன புப்³பா³பரவஸேனாதி பச்சேகங் யோஜேதப்³ப³ங். உக்³க³ஹிதந்தி ப்³யஞ்ஜனஸோ அத்த²ஸோ ச உத்³த⁴ங் உத்³த⁴ங் க³ஹிதங், பரியாபுணனவஸேன சேவ பரிபுச்சா²வஸேன ச ஹத³யேன க³ஹிதந்தி அத்தோ². வட்டது³க்க²னிஸ்ஸரணத்தி²கேஹி ஸோதப்³ப³தோ ஸுதங், பரியத்தித⁴ம்மோ. தங் தா⁴ரேதீதி ஸுதத⁴ரோ. யோ ஹி ஸுதத⁴ரோ, ஸுதங் தஸ்மிங் பதிட்டி²தங் ஹோதி ஸுப்பதிட்டி²தங் அரோகி³கங், தஸ்மா வுத்தங் ‘‘ஸுதஸ்ஸ ஆதா⁴ரபூ⁴தோ’’தி. தேனாஹ ‘‘யஸ்ஸ ஹீ’’திஆதி³. ஏகங் பத³ங் ஏகக்க²ரம்பி அவினட்ட²ங் ஹுத்வா ஸன்னிசீயதீதி ஸன்னிசயோ, ஸுதங் ஸன்னிசயோ ஏதஸ்மிந்தி ஸுதஸன்னிசயோ. அஜ்ஜோ²ஸாயாதி அனுப்பவிஸித்வா. திட்ட²தீதி ந ஸம்முஸ்ஸதி.
Pakaṭṭhānaṃ ukkaṭṭhānaṃ sīlādiatthānaṃ bodhanato sabhāvaniruttivasena ca buddhādīhi bhāsitattā pakaṭṭhānaṃ vacanappabandhānaṃ āḷīti pāḷi, pariyattidhammo. Purimassa atthassa pacchimena atthena anusandhānaṃ anusandhi, atthamukhena pana pāḷippadesānampi anusandhi hotiyeva. Svāyaṃ anusandhi pucchānusandhiajjhāsayānusandhiyathānusandhiādivasena catubbidho, taṃtaṃdesanānaṃ pana pubbāparapāḷivasena anusandhivasena pubbāparavasenāti paccekaṃ yojetabbaṃ. Uggahitanti byañjanaso atthaso ca uddhaṃ uddhaṃ gahitaṃ, pariyāpuṇanavasena ceva paripucchāvasena ca hadayena gahitanti attho. Vaṭṭadukkhanissaraṇatthikehi sotabbato sutaṃ, pariyattidhammo. Taṃ dhāretīti sutadharo. Yo hi sutadharo, sutaṃ tasmiṃ patiṭṭhitaṃ hoti suppatiṭṭhitaṃ arogikaṃ, tasmā vuttaṃ ‘‘sutassa ādhārabhūto’’ti. Tenāha ‘‘yassa hī’’tiādi. Ekaṃ padaṃ ekakkharampi avinaṭṭhaṃ hutvā sannicīyatīti sannicayo, sutaṃ sannicayo etasminti sutasannicayo. Ajjhosāyāti anuppavisitvā. Tiṭṭhatīti na sammussati.
பகு³ணாதி வாசுக்³க³தா. நிச்சலிகந்தி அவிபரிவத்தங். ஸங்ஸந்தி³த்வாதி அஞ்ஞேஹி ஸங்ஸந்தி³த்வா. ஸமனுக்³கா³ஹித்வாதி பரிபுச்சா²வஸேன அத்த²ங் ஓகா³ஹித்வா. பப³ந்த⁴ஸ்ஸ விச்சே²தா³பா⁴வதோ க³ங்கா³ஸோதஸதி³ஸங். ‘‘ப⁴வங்க³ஸோதஸதி³ஸ’’ந்தி வா பாடோ², அகித்திமங் ஸுக²ப்பவத்தீதி அத்தோ². ஸுத்தேகதே³ஸஸ்ஸ ஸுத்தமத்தஸ்ஸ ச வசஸா பரிசயோ இத⁴ நாதி⁴ப்பேதோ, வக்³கா³தி³வஸேன பன அதி⁴ப்பேதோதி ஆஹ ‘‘ஸுத்தத³ஸக…பே॰… ஸஜ்ஜா²யிதா’’தி, ‘‘த³ஸஸுத்தானி க³தானி, த³ஸவக்³கா³னி க³தானீ’’திஆதி³னா ஸல்லக்கெ²த்வா வாசாய ஸஜ்ஜா²யிதாதி அத்தோ². மனஸா அனு அனு பெக்கி²தா பா⁴க³ஸோ நிஜ்ஜா²யிதா சிந்திதா மனஸானுபெக்கி²தா. ரூபக³தங் விய பஞ்ஞாயதீதி ரூபக³தங் விய சக்கு²ஸ்ஸ விபூ⁴தங் ஹுத்வா பஞ்ஞாயதி. ஸுப்படிவித்³தா⁴தி நிஜ்ஜடங் நிக்³கு³ம்ப³ங் கத்வா ஸுட்டு² யாதா²வதோ படிவித்³தா⁴.
Paguṇāti vācuggatā. Niccalikanti aviparivattaṃ. Saṃsanditvāti aññehi saṃsanditvā. Samanuggāhitvāti paripucchāvasena atthaṃ ogāhitvā. Pabandhassa vicchedābhāvato gaṅgāsotasadisaṃ. ‘‘Bhavaṅgasotasadisa’’nti vā pāṭho, akittimaṃ sukhappavattīti attho. Suttekadesassa suttamattassa ca vacasā paricayo idha nādhippeto, vaggādivasena pana adhippetoti āha ‘‘suttadasaka…pe… sajjhāyitā’’ti, ‘‘dasasuttāni gatāni, dasavaggāni gatānī’’tiādinā sallakkhetvā vācāya sajjhāyitāti attho. Manasā anu anu pekkhitā bhāgaso nijjhāyitā cintitā manasānupekkhitā. Rūpagataṃ viya paññāyatīti rūpagataṃ viya cakkhussa vibhūtaṃ hutvā paññāyati. Suppaṭividdhāti nijjaṭaṃ niggumbaṃ katvā suṭṭhu yāthāvato paṭividdhā.
அதி⁴கங் சேதோதி அபி⁴சேதோ, உபசாரஜ்ஜா²னசித்தங். தஸ்ஸ பன அதி⁴கதா பாகதிககாமாவசரசித்தேஹி ஸுந்த³ரதாய, ஸா படிபக்க²தோ ஸுத்³தி⁴யாதி ஆஹ ‘‘அபி⁴க்கந்தங் விஸுத்³த⁴ங் சித்த’’ந்தி. அதி⁴சித்தந்தி ஸமாதி⁴மாஹ. ஸோபி உபசாரஸமாதி⁴ த³ட்ட²ப்³போ³. விவேகஜங் பீதிஸுக²ங், ஸமாதி⁴ஜங் பீதிஸுக²ங், அபீதிஜங் காயஸுக²ங், ஸதிபாரிஸுத்³தி⁴ஜங் ஞாணஸுக²ந்தி சதுப்³பி³த⁴ம்பி ஜா²னஸுக²ங் படிபக்க²தோ நிக்க²ந்ததங் உபாதா³ய நெக்க²ம்மஸுக²ந்தி வுச்சதீதி ஆஹ ‘‘நெக்க²ம்மஸுக²ங் விந்த³தீ’’தி. இச்சி²திச்சி²தக்க²ணே ஸமாபஜ்ஜிதுங் ஸமத்தோ²தி இமினா தேஸு ஜா²னேஸு ஸமாபஜ்ஜனவஸீபா⁴வமாஹ. நிகாமலாபீ⁴தி பன வசனதோ ஆவஜ்ஜனாதி⁴ட்டா²னபச்சவெக்க²ணவஸியோபி வுத்தா ஏவாதி வேதி³தப்³பா³. ஸுகே²னேவ பச்சனீகத⁴ம்மே விக்க²ம்பெ⁴த்வாதி ஏதேன தேஸங் ஜா²னானங் ஸுக²ப்படிபத³தங் கி²ப்பாபி⁴ஞ்ஞதஞ்ச த³ஸ்ஸேதி.
Adhikaṃ cetoti abhiceto, upacārajjhānacittaṃ. Tassa pana adhikatā pākatikakāmāvacaracittehi sundaratāya, sā paṭipakkhato suddhiyāti āha ‘‘abhikkantaṃ visuddhaṃ citta’’nti. Adhicittanti samādhimāha. Sopi upacārasamādhi daṭṭhabbo. Vivekajaṃ pītisukhaṃ, samādhijaṃ pītisukhaṃ, apītijaṃ kāyasukhaṃ, satipārisuddhijaṃ ñāṇasukhanti catubbidhampi jhānasukhaṃ paṭipakkhato nikkhantataṃ upādāya nekkhammasukhanti vuccatīti āha ‘‘nekkhammasukhaṃ vindatī’’ti. Icchiticchitakkhaṇe samāpajjituṃ samatthoti iminā tesu jhānesu samāpajjanavasībhāvamāha. Nikāmalābhīti pana vacanato āvajjanādhiṭṭhānapaccavekkhaṇavasiyopi vuttā evāti veditabbā. Sukheneva paccanīkadhamme vikkhambhetvāti etena tesaṃ jhānānaṃ sukhappaṭipadataṃ khippābhiññatañca dasseti.
விபுலானந்தி வேபுல்லங் பாபிதானங் ஜா²னானங். விபுலதா நாம ஸுபா⁴விதபா⁴வேன சிரதரப்பவத்தியா, ஸா ச பரிச்சே²தா³னுரூபாவ இச்சி²தப்³பா³தி ‘‘விபுலான’’ந்தி வத்வா ‘‘யதா²பரிச்சே²தே³ன வுட்டா²துங் ஸமத்தோ²தி வுத்தங் ஹோதீ’’தி ஆஹ. பரிச்சே²த³காலஞ்ஹி அப்பத்வாவ வுட்ட²ஹந்தோ அகஸிரலாபீ⁴ ந ஹோதி யாவதி³ச்சி²தங் பவத்தேதுங் அஸமத்த²த்தா. இதா³னி யதா²வுத்தே ஸமாபஜ்ஜனாதி³வஸீபா⁴வே ப்³யதிரேகவஸேன விபா⁴வேதுங் ‘‘ஏகச்சோ ஹீ’’திஆதி³ வுத்தங். தத்த² லாபீ⁴யேவ ஹோதீதி இத³ங் படிலத்³த⁴மத்தஸ்ஸ ஜா²னஸ்ஸ வஸேன வுத்தங். ததா²தி இச்சி²திச்சி²தக்க²ணே. பாரிபந்தி²கேதி வஸீபா⁴வஸ்ஸ பச்சனீகத⁴ம்மே. ஜா²னாதி⁴க³மஸ்ஸ பன பச்சனீகத⁴ம்மா பகே³வ விக்க²ம்பி⁴தா, அஞ்ஞதா² ஜா²னாதி⁴க³மோ ஏவ ந ஸியா. கிச்சே²ன விக்க²ம்பே⁴தீதி கிச்சே²ன விஸோதே⁴தி. காமாதீ³னவபச்சவெக்க²ணாதீ³ஹி காமச்ச²ந்தா³தீ³னங் விய அஞ்ஞேஸம்பி ஸமாதி⁴பாரிபந்தி²கானங் தூ³ரஸமுஸ்ஸாரணங் இத⁴ விக்க²ம்ப⁴னங் விஸோத⁴னஞ்சாதி வேதி³தப்³ப³ங். நாளிகயந்தந்தி காலமானநாளிகயந்தமாஹ.
Vipulānanti vepullaṃ pāpitānaṃ jhānānaṃ. Vipulatā nāma subhāvitabhāvena ciratarappavattiyā, sā ca paricchedānurūpāva icchitabbāti ‘‘vipulāna’’nti vatvā ‘‘yathāparicchedena vuṭṭhātuṃ samatthoti vuttaṃ hotī’’ti āha. Paricchedakālañhi appatvāva vuṭṭhahanto akasiralābhī na hoti yāvadicchitaṃ pavattetuṃ asamatthattā. Idāni yathāvutte samāpajjanādivasībhāve byatirekavasena vibhāvetuṃ ‘‘ekacco hī’’tiādi vuttaṃ. Tattha lābhīyeva hotīti idaṃ paṭiladdhamattassa jhānassa vasena vuttaṃ. Tathāti icchiticchitakkhaṇe. Pāripanthiketi vasībhāvassa paccanīkadhamme. Jhānādhigamassa pana paccanīkadhammā pageva vikkhambhitā, aññathā jhānādhigamo eva na siyā. Kicchena vikkhambhetīti kicchena visodheti. Kāmādīnavapaccavekkhaṇādīhi kāmacchandādīnaṃ viya aññesampi samādhipāripanthikānaṃ dūrasamussāraṇaṃ idha vikkhambhanaṃ visodhanañcāti veditabbaṃ. Nāḷikayantanti kālamānanāḷikayantamāha.
அட்ட²பிதஸங்கப்போதி ந ஸம்மாபணிஹிதஸங்கப்போ. அபி⁴ஞ்ஞாபாரகூ³தி ஸப்³பே³ஸங் லோகியலோகுத்தரத⁴ம்மானங் அபி⁴ஞ்ஞாய பாரங் க³தோ, ஸப்³ப³த⁴ம்மே அபி⁴விஸிட்டா²ய அக்³க³மக்³க³பஞ்ஞாய ஜானித்வா டி²தோதி அத்தோ². பரிஞ்ஞாபாரகூ³தி பஞ்சன்னங் க²ந்தா⁴னங் பரிஞ்ஞாய பாரங் க³தோ, பஞ்சக்க²ந்தே⁴ பரிஜானித்வா டி²தோதி அத்தோ². பா⁴வனாபாரகூ³தி சதுன்னங் மக்³கா³னங் பா⁴வனாய பாரங் க³தோ, சத்தாரோ மக்³கே³ பா⁴வெத்வா டி²தோதி அத்தோ². பஹானபாரகூ³தி ஸப்³ப³கிலேஸானங் பஹானேன பாரங் க³தோ, ஸப்³ப³கிலேஸே பஜஹித்வா டி²தோதி அத்தோ² . ஸச்சி²கிரியாபாரகூ³தி நிரோத⁴ஸச்சி²கிரியாய பாரங் க³தோ, நிரோத⁴ங் ஸச்சி²கத்வா டி²தோதி அத்தோ². ஸமாபத்திபாரகூ³தி ஸப்³ப³ஸமாபத்தீனங் ஸமாபஜ்ஜனேன பாரங் க³தோ, ஸப்³பா³ ஸமாபத்தியோ ஸமாபஜ்ஜித்வா டி²தோதி அத்தோ². ப்³ரஹ்மசரியஸ்ஸ கேவலீதி யங் ப்³ரஹ்மசரியஸ்ஸ கேவலங் ஸகலபா⁴வோ, தேன ஸமன்னாக³தோ, ஸகலசதுமக்³க³ப்³ரஹ்மசரியவாஸோதி அத்தோ². தேனாஹ ‘‘ஸகலப்³ரஹ்மசரியோ’’தி, பரிபுண்ணமக்³க³ப்³ரஹ்மசரியோதி அத்தோ². ஸேஸங் ஸுவிஞ்ஞெய்யமேவ.
Aṭṭhapitasaṅkappoti na sammāpaṇihitasaṅkappo. Abhiññāpāragūti sabbesaṃ lokiyalokuttaradhammānaṃ abhiññāya pāraṃ gato, sabbadhamme abhivisiṭṭhāya aggamaggapaññāya jānitvā ṭhitoti attho. Pariññāpāragūti pañcannaṃ khandhānaṃ pariññāya pāraṃ gato, pañcakkhandhe parijānitvā ṭhitoti attho. Bhāvanāpāragūti catunnaṃ maggānaṃ bhāvanāya pāraṃ gato, cattāro magge bhāvetvā ṭhitoti attho. Pahānapāragūti sabbakilesānaṃ pahānena pāraṃ gato, sabbakilese pajahitvā ṭhitoti attho . Sacchikiriyāpāragūti nirodhasacchikiriyāya pāraṃ gato, nirodhaṃ sacchikatvā ṭhitoti attho. Samāpattipāragūti sabbasamāpattīnaṃ samāpajjanena pāraṃ gato, sabbā samāpattiyo samāpajjitvā ṭhitoti attho. Brahmacariyassa kevalīti yaṃ brahmacariyassa kevalaṃ sakalabhāvo, tena samannāgato, sakalacatumaggabrahmacariyavāsoti attho. Tenāha ‘‘sakalabrahmacariyo’’ti, paripuṇṇamaggabrahmacariyoti attho. Sesaṃ suviññeyyameva.
து³தியஉருவேலஸுத்தவண்ணனா நிட்டி²தா.
Dutiyauruvelasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. து³தியஉருவேலஸுத்தங் • 2. Dutiyauruvelasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. து³தியஉருவேலஸுத்தவண்ணனா • 2. Dutiyauruvelasuttavaṇṇanā
