| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੨. ਦੁਤਿਯਉਰੁવੇਲਸੁਤ੍ਤવਣ੍ਣਨਾ
2. Dutiyauruvelasuttavaṇṇanā
੨੨. ਦੁਤਿਯੇ ਸਮ੍ਬਹੁਲਾਤਿ ਬਹੁਕਾ। ਬ੍ਰਾਹ੍ਮਣਾਤਿ ਹੁਹੁਕ੍ਕਜਾਤਿਕੇਨ ਬ੍ਰਾਹ੍ਮਣੇਨ ਸਦ੍ਧਿਂ ਆਗਤਾ ਬ੍ਰਾਹ੍ਮਣਾ। ਜਿਣ੍ਣਾਤਿ ਜਰਾਜਿਣ੍ਣਾ। વੁਡ੍ਢਾਤਿ વਯੋવੁਦ੍ਧਾ। ਮਹਲ੍ਲਕਾਤਿ ਜਾਤਿਮਹਲ੍ਲਕਾ। ਅਦ੍ਧਗਤਾਤਿ ਤਯੋ વਯੇ ਅਦ੍ਧੇ ਅਤਿਕ੍ਕਨ੍ਤਾ। ਸੁਤਮੇਤਨ੍ਤਿ ਅਮ੍ਹੇਹਿ ਸੁਤਂ ਏਤਂ। ਤਯਿਦਂ ਭੋ, ਗੋਤਮ, ਤਥੇવਾਤਿ ਭੋ, ਗੋਤਮ, ਏਤਂ ਅਮ੍ਹੇਹਿ ਸੁਤਕਾਰਣਂ ਤਥਾ ਏવ। ਤਯਿਦਂ ਭੋ, ਗੋਤਮ, ਨ ਸਮ੍ਪਨ੍ਨਮੇવਾਤਿ ਤਂ ਏਤਂ ਅਭਿવਾਦਨਾਦਿਅਕਰਣਂ ਅਨਨੁਚ੍ਛવਿਕਮੇવ।
22. Dutiye sambahulāti bahukā. Brāhmaṇāti huhukkajātikena brāhmaṇena saddhiṃ āgatā brāhmaṇā. Jiṇṇāti jarājiṇṇā. Vuḍḍhāti vayovuddhā. Mahallakāti jātimahallakā. Addhagatāti tayo vaye addhe atikkantā. Sutametanti amhehi sutaṃ etaṃ. Tayidaṃ bho, gotama, tathevāti bho, gotama, etaṃ amhehi sutakāraṇaṃ tathā eva. Tayidaṃ bho, gotama, na sampannamevāti taṃ etaṃ abhivādanādiakaraṇaṃ ananucchavikameva.
ਅਕਾਲવਾਦੀਤਿਆਦੀਸੁ ਅਕਾਲੇ વਦਤੀਤਿ ਅਕਾਲવਾਦੀ। ਅਸਭਾવਂ વਦਤੀਤਿ ਅਭੂਤવਾਦੀ। ਅਨਤ੍ਥਂ વਦਤਿ, ਨੋ ਅਤ੍ਥਨ੍ਤਿ ਅਨਤ੍ਥવਾਦੀ। ਅਧਮ੍ਮਂ વਦਤਿ, ਨੋ ਧਮ੍ਮਨ੍ਤਿ ਅਧਮ੍ਮવਾਦੀ। ਅવਿਨਯਂ વਦਤਿ , ਨੋ વਿਨਯਨ੍ਤਿ ਅવਿਨਯવਾਦੀ। ਅਨਿਧਾਨવਤਿਂ વਾਚਂ ਭਾਸਿਤਾਤਿ ਨ ਹਦਯੇ ਨਿਧੇਤਬ੍ਬਯੁਤ੍ਤਕਂ વਾਚਂ ਭਾਸਿਤਾ। ਅਕਾਲੇਨਾਤਿ ਕਥੇਤੁਂ ਅਯੁਤ੍ਤਕਾਲੇਨ। ਅਨਪਦੇਸਨ੍ਤਿ ਅਪਦੇਸਰਹਿਤਂ, ਸਾਪਦੇਸਂ ਸਕਾਰਣਂ ਕਤ੍વਾ ਨ ਕਥੇਤਿ। ਅਪਰਿਯਨ੍ਤવਤਿਨ੍ਤਿ ਪਰਿਯਨ੍ਤਰਹਿਤਂ, ਨ ਪਰਿਚ੍ਛੇਦਂ ਦਸ੍ਸੇਤ੍વਾ ਕਥੇਤਿ। ਅਨਤ੍ਥਸਂਹਿਤਨ੍ਤਿ ਨ ਲੋਕਿਯਲੋਕੁਤ੍ਤਰਅਤ੍ਥਨਿਸ੍ਸਿਤਂ ਕਤ੍વਾ ਕਥੇਤਿ। ਬਾਲੋ ਥੇਰੋਤ੍વੇવ ਸਙ੍ਖਂ ਗਚ੍ਛਤੀਤਿ ਅਨ੍ਧਬਾਲੋ ਥੇਰੋਤਿ ਸਙ੍ਖਂ ਗਚ੍ਛਤਿ।
Akālavādītiādīsu akāle vadatīti akālavādī. Asabhāvaṃ vadatīti abhūtavādī. Anatthaṃ vadati, no atthanti anatthavādī. Adhammaṃ vadati, no dhammanti adhammavādī. Avinayaṃ vadati , no vinayanti avinayavādī. Anidhānavatiṃ vācaṃ bhāsitāti na hadaye nidhetabbayuttakaṃ vācaṃ bhāsitā. Akālenāti kathetuṃ ayuttakālena. Anapadesanti apadesarahitaṃ, sāpadesaṃ sakāraṇaṃ katvā na katheti. Apariyantavatinti pariyantarahitaṃ, na paricchedaṃ dassetvā katheti. Anatthasaṃhitanti na lokiyalokuttaraatthanissitaṃ katvā katheti. Bālo therotveva saṅkhaṃ gacchatīti andhabālo theroti saṅkhaṃ gacchati.
ਕਾਲવਾਦੀਤਿਆਦੀਨਿ વੁਤ੍ਤਪਟਿਪਕ੍ਖવਸੇਨ વੇਦਿਤਬ੍ਬਾਨਿ। ਪਣ੍ਡਿਤੋ ਥੇਰੋਤ੍વੇવ ਸਙ੍ਖਂ ਗਚ੍ਛਤੀਤਿ ਪਣ੍ਡਿਚ੍ਚੇਨ ਸਮਨ੍ਨਾਗਤਤ੍ਤਾ ਪਣ੍ਡਿਤੋ, ਥਿਰਭਾવਪ੍ਪਤ੍ਤਿਯਾ ਥੇਰੋਤਿ ਸਙ੍ਖਂ ਗਚ੍ਛਤਿ।
Kālavādītiādīni vuttapaṭipakkhavasena veditabbāni. Paṇḍito therotveva saṅkhaṃ gacchatīti paṇḍiccena samannāgatattā paṇḍito, thirabhāvappattiyā theroti saṅkhaṃ gacchati.
ਬਹੁਸ੍ਸੁਤੋ ਹੋਤੀਤਿ ਬਹੁਂ ਅਸ੍ਸ ਸੁਤਂ ਹੋਤਿ, ਨવਙ੍ਗਂ ਸਤ੍ਥੁਸਾਸਨਂ ਪਾਲ਼ਿਅਨੁਸਨ੍ਧਿਪੁਬ੍ਬਾਪਰવਸੇਨ ਉਗ੍ਗਹਿਤਂ ਹੋਤੀਤਿ ਅਤ੍ਥੋ। ਸੁਤਧਰੋਤਿ ਸੁਤਸ੍ਸ ਆਧਾਰਭੂਤੋ। ਯਸ੍ਸ ਹਿ ਇਤੋ ਗਹਿਤਂ ਇਤੋ ਪਲਾਯਤਿ, ਛਿਦ੍ਦਘਟੇ ਉਦਕਂ વਿਯ ਨ ਤਿਟ੍ਠਤਿ, ਪਰਿਸਮਜ੍ਝੇ ਏਕਸੁਤ੍ਤਂ વਾ ਜਾਤਕਂ વਾ ਕਥੇਤੁਂ વਾ વਾਚੇਤੁਂ વਾ ਨ ਸਕ੍ਕੋਤਿ, ਅਯਂ ਨ ਸੁਤਧਰੋ ਨਾਮ। ਯਸ੍ਸ ਪਨ ਉਗ੍ਗਹਿਤਂ ਬੁਦ੍ਧવਚਨਂ ਉਗ੍ਗਹਿਤਕਾਲਸਦਿਸਮੇવ ਹੋਤਿ, ਦਸਪਿ વੀਸਤਿਪਿ વਸ੍ਸਾਨਿ ਸਜ੍ਝਾਯਂ ਅਕਰੋਨ੍ਤਸ੍ਸ ਨੇવ ਨਸ੍ਸਤਿ, ਅਯਂ ਸੁਤਧਰੋ ਨਾਮ। ਸੁਤਸਨ੍ਨਿਚਯੋਤਿ ਸੁਤਸ੍ਸ ਸਨ੍ਨਿਚਯਭੂਤੋ। ਯਸ੍ਸ ਹਿ ਸੁਤਂ ਹਦਯਮਞ੍ਜੂਸਾਯ ਸਨ੍ਨਿਚਿਤਂ ਸਿਲਾਯ ਲੇਖਾ વਿਯ ਸੁવਣ੍ਣਪਤ੍ਤੇ ਪਕ੍ਖਿਤ੍ਤਸੀਹવਸਾ વਿਯ ਚ ਤਿਟ੍ਠਤਿ, ਅਯਂ ਸੁਤਸਨ੍ਨਿਚਯੋ ਨਾਮ। ਧਾਤਾਤਿ ਧਾਤਾ ਪਗੁਣਾ। ਏਕਚ੍ਚਸ੍ਸ ਹਿ ਉਗ੍ਗਹਿਤਬੁਦ੍ਧવਚਨਂ ਧਾਤਂ ਪਗੁਣਂ ਨਿਚ੍ਚਲਿਕਂ ਨ ਹੋਤਿ, ‘‘ਅਸੁਕਂ ਸੁਤ੍ਤਂ વਾ ਜਾਤਕਂ વਾ ਕਥੇਹੀ’’ਤਿ વੁਤ੍ਤੇ ‘‘ਸਜ੍ਝਾਯਿਤ੍વਾ ਸਂਸਨ੍ਦਿਤ੍વਾ ਸਮਨੁਗ੍ਗਾਹਿਤ੍વਾ ਜਾਨਿਸ੍ਸਾਮੀ’’ਤਿ વਦਤਿ। ਏਕਚ੍ਚਸ੍ਸ ਧਾਤਂ ਪਗੁਣਂ ਭવਙ੍ਗਸੋਤਸਦਿਸਂ ਹੋਤਿ, ‘‘ਅਸੁਕਂ ਸੁਤ੍ਤਂ વਾ ਜਾਤਕਂ વਾ ਕਥੇਹੀ’’ਤਿ વੁਤ੍ਤੇ ਉਦ੍ਧਰਿਤ੍વਾ ਤਮੇવ ਕਥੇਤਿ। ਤਂ ਸਨ੍ਧਾਯ વੁਤ੍ਤਂ ‘‘ਧਾਤਾ’’ਤਿ। વਚਸਾ ਪਰਿਚਿਤਾਤਿ ਸੁਤ੍ਤਦਸਕ-વਗ੍ਗਦਸਕਪਣ੍ਣਾਸਦਸਕવਸੇਨ વਾਚਾਯ ਸਜ੍ਝਾਯਿਤਾ। ਮਨਸਾਨੁਪੇਕ੍ਖਿਤਾਤਿ ਚਿਤ੍ਤੇਨ ਅਨੁਪੇਕ੍ਖਿਤਾ। ਯਸ੍ਸ વਾਚਾਯ ਸਜ੍ਝਾਯਿਤਂ ਬੁਦ੍ਧવਚਨਂ ਮਨਸਾ ਚਿਨ੍ਤੇਨ੍ਤਸ੍ਸ ਤਤ੍ਥ ਤਤ੍ਥ ਪਾਕਟਂ ਹੋਤਿ, ਮਹਾਦੀਪਂ ਜਾਲੇਤ੍વਾ ਠਿਤਸ੍ਸ ਰੂਪਗਤਂ વਿਯ ਪਞ੍ਞਾਯਤਿ, ਤਂ ਸਨ੍ਧਾਯੇਤਂ વੁਤ੍ਤਂ। ਦਿਟ੍ਠਿਯਾ ਸੁਪ੍ਪਟਿવਿਦ੍ਧਾਤਿ ਅਤ੍ਥਤੋ ਚ ਕਾਰਣਤੋ ਚ ਪਞ੍ਞਾਯ ਸੁਪ੍ਪਟਿવਿਦ੍ਧਾ।
Bahussuto hotīti bahuṃ assa sutaṃ hoti, navaṅgaṃ satthusāsanaṃ pāḷianusandhipubbāparavasena uggahitaṃ hotīti attho. Sutadharoti sutassa ādhārabhūto. Yassa hi ito gahitaṃ ito palāyati, chiddaghaṭe udakaṃ viya na tiṭṭhati, parisamajjhe ekasuttaṃ vā jātakaṃ vā kathetuṃ vā vācetuṃ vā na sakkoti, ayaṃ na sutadharo nāma. Yassa pana uggahitaṃ buddhavacanaṃ uggahitakālasadisameva hoti, dasapi vīsatipi vassāni sajjhāyaṃ akarontassa neva nassati, ayaṃ sutadharo nāma. Sutasannicayoti sutassa sannicayabhūto. Yassa hi sutaṃ hadayamañjūsāya sannicitaṃ silāya lekhā viya suvaṇṇapatte pakkhittasīhavasā viya ca tiṭṭhati, ayaṃ sutasannicayo nāma. Dhātāti dhātā paguṇā. Ekaccassa hi uggahitabuddhavacanaṃ dhātaṃ paguṇaṃ niccalikaṃ na hoti, ‘‘asukaṃ suttaṃ vā jātakaṃ vā kathehī’’ti vutte ‘‘sajjhāyitvā saṃsanditvā samanuggāhitvā jānissāmī’’ti vadati. Ekaccassa dhātaṃ paguṇaṃ bhavaṅgasotasadisaṃ hoti, ‘‘asukaṃ suttaṃ vā jātakaṃ vā kathehī’’ti vutte uddharitvā tameva katheti. Taṃ sandhāya vuttaṃ ‘‘dhātā’’ti. Vacasāparicitāti suttadasaka-vaggadasakapaṇṇāsadasakavasena vācāya sajjhāyitā. Manasānupekkhitāti cittena anupekkhitā. Yassa vācāya sajjhāyitaṃ buddhavacanaṃ manasā cintentassa tattha tattha pākaṭaṃ hoti, mahādīpaṃ jāletvā ṭhitassa rūpagataṃ viya paññāyati, taṃ sandhāyetaṃ vuttaṃ. Diṭṭhiyā suppaṭividdhāti atthato ca kāraṇato ca paññāya suppaṭividdhā.
ਆਭਿਚੇਤਸਿਕਾਨਨ੍ਤਿ ਅਭਿਚੇਤੋਤਿ ਅਭਿਕ੍ਕਨ੍ਤਂ વਿਸੁਦ੍ਧਂ ਚਿਤ੍ਤਂ વੁਚ੍ਚਤਿ, ਅਧਿਚਿਤ੍ਤਂ વਾ, ਅਭਿਚੇਤਸਿ ਜਾਤਾਨਿ ਆਭਿਚੇਤਸਿਕਾਨਿ, ਅਭਿਚੇਤੋਸਨ੍ਨਿਸ੍ਸਿਤਾਨੀਤਿ વਾ ਆਭਿਚੇਤਸਿਕਾਨਿ। ਦਿਟ੍ਠਧਮ੍ਮਸੁਖવਿਹਾਰਾਨਨ੍ਤਿ ਦਿਟ੍ਠਧਮ੍ਮੇ ਸੁਖવਿਹਾਰਾਨਂ। ਦਿਟ੍ਠਧਮ੍ਮੋਤਿ ਪਚ੍ਚਕ੍ਖੋ ਅਤ੍ਤਭਾવੋ વੁਚ੍ਚਤਿ, ਤਤ੍ਥ ਸੁਖવਿਹਾਰਭੂਤਾਨਨ੍ਤਿ ਅਤ੍ਥੋ। ਰੂਪਾવਚਰਜ੍ਝਾਨਾਨਮੇਤਂ ਅਧਿવਚਨਂ। ਤਾਨਿ ਹਿ ਅਪ੍ਪੇਤ੍વਾ ਨਿਸਿਨ੍ਨਾ ਝਾਯਿਨੋ ਇਮਸ੍ਮਿਂਯੇવ ਅਤ੍ਤਭਾવੇ ਅਸਂਕਿਲਿਟ੍ਠਨੇਕ੍ਖਮ੍ਮਸੁਖਂ વਿਨ੍ਦਨ੍ਤਿ, ਤਸ੍ਮਾ ‘‘ਦਿਟ੍ਠਧਮ੍ਮਸੁਖવਿਹਾਰਾਨੀ’’ਤਿ વੁਚ੍ਚਤਿ। ਨਿਕਾਮਲਾਭੀਤਿ ਨਿਕਾਮੇਨ ਲਾਭੀ, ਅਤ੍ਤਨੋ ਇਚ੍ਛਾવਸੇਨ ਲਾਭੀ, ਇਚ੍ਛਿਤਿਚ੍ਛਿਤਕ੍ਖਣੇ ਸਮਾਪਜ੍ਜਿਤੁਂ ਸਮਤ੍ਥੋਤਿ વੁਤ੍ਤਂ ਹੋਤਿ। ਅਕਿਚ੍ਛਲਾਭੀਤਿ ਸੁਖੇਨੇવ ਪਚ੍ਚਨੀਕਧਮ੍ਮੇ વਿਕ੍ਖਮ੍ਭੇਤ੍વਾ ਸਮਾਪਜ੍ਜਿਤੁਂ ਸਮਤ੍ਥੋਤਿ વੁਤ੍ਤਂ ਹੋਤਿ। ਅਕਸਿਰਲਾਭੀਤਿ ਅਕਸਿਰਾਨਂ ਲਾਭੀ વਿਪੁਲਾਨਂ, ਯਥਾਪਰਿਚ੍ਛੇਦੇਨ વੁਟ੍ਠਾਤੁਂ ਸਮਤ੍ਥੋਤਿ વੁਤ੍ਤਂ ਹੋਤਿ। ਏਕਚ੍ਚੋ ਹਿ ਲਾਭੀਯੇવ ਹੋਤਿ, ਨ ਪਨ ਇਚ੍ਛਿਤਿਚ੍ਛਿਤਕ੍ਖਣੇ ਸਕ੍ਕੋਤਿ ਸਮਾਪਜ੍ਜਿਤੁਂ। ਏਕਚ੍ਚੋ ਸਕ੍ਕੋਤਿ ਤਥਾਸਮਾਪਜ੍ਜਿਤੁਂ, ਪਾਰਿਪਨ੍ਥਿਕੇ ਚ ਪਨ ਕਿਚ੍ਛੇਨ વਿਕ੍ਖਮ੍ਭੇਤਿ। ਏਕਚ੍ਚੋ ਤਥਾ ਚ ਸਮਾਪਜ੍ਜਤਿ, ਪਾਰਿਪਨ੍ਥਿਕੇ ਚ ਅਕਿਚ੍ਛੇਨੇવ વਿਕ੍ਖਮ੍ਭੇਤਿ, ਨ ਸਕ੍ਕੋਤਿ ਨਾਲ਼ਿਕਯਨ੍ਤਂ વਿਯ ਯਥਾਪਰਿਚ੍ਛੇਦੇਯੇવ વੁਟ੍ਠਾਤੁਂ। ਯਸ੍ਸ ਪਨ ਅਯਂ ਤਿવਿਧਾਪਿ ਸਮ੍ਪਦਾ ਅਤ੍ਥਿ, ਸੋ ‘‘ਅਕਿਚ੍ਛਲਾਭੀ ਅਕਸਿਰਲਾਭੀ’’ਤਿ વੁਚ੍ਚਤਿ। ਆਸવਾਨਂ ਖਯਾਤਿਆਦੀਨਿ વੁਤ੍ਤਤ੍ਥਾਨੇવ। ਏવਮਿਧ ਸੀਲਮ੍ਪਿ ਬਾਹੁਸਚ੍ਚਮ੍ਪਿ ਖੀਣਾਸવਸ੍ਸੇવ ਸੀਲਂ ਬਾਹੁਸਚ੍ਚਞ੍ਚ, ਝਾਨਾਨਿਪਿ ਖੀਣਾਸવਸ੍ਸੇવ વਲ਼ਞ੍ਜਨਕਜ੍ਝਾਨਾਨਿ ਕਥਿਤਾਨਿ। ‘‘ਆਸવਾਨਂ ਖਯਾ’’ਤਿਆਦੀਹਿ ਪਨ ਅਰਹਤ੍ਤਂ ਕਥਿਤਂ। ਫਲੇਨ ਚੇਤ੍ਥ ਮਗ੍ਗਕਿਚ੍ਚਂ ਪਕਾਸਿਤਨ੍ਤਿ વੇਦਿਤਬ੍ਬਂ।
Ābhicetasikānanti abhicetoti abhikkantaṃ visuddhaṃ cittaṃ vuccati, adhicittaṃ vā, abhicetasi jātāni ābhicetasikāni, abhicetosannissitānīti vā ābhicetasikāni. Diṭṭhadhammasukhavihārānanti diṭṭhadhamme sukhavihārānaṃ. Diṭṭhadhammoti paccakkho attabhāvo vuccati, tattha sukhavihārabhūtānanti attho. Rūpāvacarajjhānānametaṃ adhivacanaṃ. Tāni hi appetvā nisinnā jhāyino imasmiṃyeva attabhāve asaṃkiliṭṭhanekkhammasukhaṃ vindanti, tasmā ‘‘diṭṭhadhammasukhavihārānī’’ti vuccati. Nikāmalābhīti nikāmena lābhī, attano icchāvasena lābhī, icchiticchitakkhaṇe samāpajjituṃ samatthoti vuttaṃ hoti. Akicchalābhīti sukheneva paccanīkadhamme vikkhambhetvā samāpajjituṃ samatthoti vuttaṃ hoti. Akasiralābhīti akasirānaṃ lābhī vipulānaṃ, yathāparicchedena vuṭṭhātuṃ samatthoti vuttaṃ hoti. Ekacco hi lābhīyeva hoti, na pana icchiticchitakkhaṇe sakkoti samāpajjituṃ. Ekacco sakkoti tathāsamāpajjituṃ, pāripanthike ca pana kicchena vikkhambheti. Ekacco tathā ca samāpajjati, pāripanthike ca akiccheneva vikkhambheti, na sakkoti nāḷikayantaṃ viya yathāparicchedeyeva vuṭṭhātuṃ. Yassa pana ayaṃ tividhāpi sampadā atthi, so ‘‘akicchalābhī akasiralābhī’’ti vuccati. Āsavānaṃ khayātiādīni vuttatthāneva. Evamidha sīlampi bāhusaccampi khīṇāsavasseva sīlaṃ bāhusaccañca, jhānānipi khīṇāsavasseva vaḷañjanakajjhānāni kathitāni. ‘‘Āsavānaṃ khayā’’tiādīhi pana arahattaṃ kathitaṃ. Phalena cettha maggakiccaṃ pakāsitanti veditabbaṃ.
ਉਦ੍ਧਤੇਨਾਤਿ ਉਦ੍ਧਚ੍ਚਸਹਗਤੇਨ। ਸਮ੍ਫਨ੍ਤਿ ਪਲਾਪਕਥਂ। ਅਸਮਾਹਿਤਸਙ੍ਕਪ੍ਪੋਤਿ ਅਟ੍ਠਪਿਤਸਙ੍ਕਪ੍ਪੋ। ਮਗੋਤਿ ਮਗਸਦਿਸੋ। ਆਰਾਤਿ ਦੂਰੇ। ਥਾવਰੇਯ੍ਯਮ੍ਹਾਤਿ ਥਾવਰਭਾવਤੋ। ਪਾਪਦਿਟ੍ਠੀਤਿ ਲਾਮਕਦਿਟ੍ਠਿ। ਅਨਾਦਰੋਤਿ ਆਦਰਰਹਿਤੋ। ਸੁਤવਾਤਿ ਸੁਤੇਨ ਉਪਗਤੋ। ਪਟਿਭਾਨવਾਤਿ ਦੁવਿਧੇਨ ਪਟਿਭਾਨੇਨ ਸਮਨ੍ਨਾਗਤੋ। ਪਞ੍ਞਾਯਤ੍ਥਂ વਿਪਸ੍ਸਤੀਤਿ ਸਹવਿਪਸ੍ਸਨਾਯ ਮਗ੍ਗਪਞ੍ਞਾਯ ਚਤੁਨ੍ਨਂ ਸਚ੍ਚਾਨਂ ਅਤ੍ਥਂ વਿਨਿવਿਜ੍ਝਿਤ੍વਾ ਪਸ੍ਸਤਿ। ਪਾਰਗੂ ਸਬ੍ਬਧਮ੍ਮਾਨਨ੍ਤਿ ਸਬ੍ਬੇਸਂ ਖਨ੍ਧਾਦਿਧਮ੍ਮਾਨਂ ਪਾਰਂ ਗਤੋ, ਅਭਿਞ੍ਞਾਪਾਰਗੂ, ਪਰਿਞ੍ਞਾਪਾਰਗੂ, ਪਹਾਨਪਾਰਗੂ, ਭਾવਨਾਪਾਰਗੂ, ਸਚ੍ਛਿਕਿਰਿਯਾਪਾਰਗੂ, ਸਮਾਪਤ੍ਤਿਪਾਰਗੂਤਿ ਏવਂ ਛਬ੍ਬਿਧੇਨ ਪਾਰਗਮਨੇਨ ਸਬ੍ਬਧਮ੍ਮਾਨਂ ਪਾਰਂ ਪਰਿਯੋਸਾਨਂ ਗਤੋ। ਅਖਿਲੋਤਿ ਰਾਗਖਿਲਾਦਿવਿਰਹਿਤੋ। ਪਟਿਭਾਨવਾਤਿ ਦੁવਿਧੇਨੇવ ਪਟਿਭਾਨੇਨ ਸਮਨ੍ਨਾਗਤੋ। ਬ੍ਰਹ੍ਮਚਰਿਯਸ੍ਸ ਕੇવਲੀਤਿ ਸਕਲਬ੍ਰਹ੍ਮਚਰਿਯੋ। ਸੇਸਮੇਤ੍ਥ ਉਤ੍ਤਾਨਮੇવਾਤਿ।
Uddhatenāti uddhaccasahagatena. Samphanti palāpakathaṃ. Asamāhitasaṅkappoti aṭṭhapitasaṅkappo. Magoti magasadiso. Ārāti dūre. Thāvareyyamhāti thāvarabhāvato. Pāpadiṭṭhīti lāmakadiṭṭhi. Anādaroti ādararahito. Sutavāti sutena upagato. Paṭibhānavāti duvidhena paṭibhānena samannāgato. Paññāyatthaṃ vipassatīti sahavipassanāya maggapaññāya catunnaṃ saccānaṃ atthaṃ vinivijjhitvā passati. Pāragū sabbadhammānanti sabbesaṃ khandhādidhammānaṃ pāraṃ gato, abhiññāpāragū, pariññāpāragū, pahānapāragū, bhāvanāpāragū, sacchikiriyāpāragū, samāpattipāragūti evaṃ chabbidhena pāragamanena sabbadhammānaṃ pāraṃ pariyosānaṃ gato. Akhiloti rāgakhilādivirahito. Paṭibhānavāti duvidheneva paṭibhānena samannāgato. Brahmacariyassa kevalīti sakalabrahmacariyo. Sesamettha uttānamevāti.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੨. ਦੁਤਿਯਉਰੁવੇਲਸੁਤ੍ਤਂ • 2. Dutiyauruvelasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੨.ਦੁਤਿਯਉਰੁવੇਲਸੁਤ੍ਤવਣ੍ਣਨਾ • 2.Dutiyauruvelasuttavaṇṇanā
