| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
5. දුතියවෙදනානානත්‌තසුත්‌තං
5. Dutiyavedanānānattasuttaṃ
89. සාවත්‌ථියං විහරති…පෙ.… ‘‘ධාතුනානත්‌තං, භික්‌ඛවෙ, පටිච්‌ච උප්‌පජ්‌ජති ඵස්‌සනානත්‌තං, ඵස්‌සනානත්‌තං පටිච්‌ච උප්‌පජ්‌ජති වෙදනානානත්‌තං, නො වෙදනානානත්‌තං පටිච්‌ච උප්‌පජ්‌ජති ඵස්‌සනානත්‌තං, නො ඵස්‌සනානත්‌තං පටිච්‌ච උප්‌පජ්‌ජති ධාතුනානත්‌තං. කතමඤ්‌ච, භික්‌ඛවෙ, ධාතුනානත්‌තං? චක්‌ඛුධාතු…පෙ.… මනොධාතු – ඉදං වුච්‌චති, භික්‌ඛවෙ, ධාතුනානත්‌තං’’.
89. Sāvatthiyaṃ viharati…pe… ‘‘dhātunānattaṃ, bhikkhave, paṭicca uppajjati phassanānattaṃ, phassanānattaṃ paṭicca uppajjati vedanānānattaṃ, no vedanānānattaṃ paṭicca uppajjati phassanānattaṃ, no phassanānattaṃ paṭicca uppajjati dhātunānattaṃ. Katamañca, bhikkhave, dhātunānattaṃ? Cakkhudhātu…pe… manodhātu – idaṃ vuccati, bhikkhave, dhātunānattaṃ’’.
‘‘කථඤ්‌ච, භික්‌ඛවෙ, ධාතුනානත්‌තං පටිච්‌ච උප්‌පජ්‌ජති ඵස්‌සනානත්‌තං, ඵස්‌සනානත්‌තං පටිච්‌ච උප්‌පජ්‌ජති වෙදනානානත්‌තං, නො වෙදනානානත්‌තං පටිච්‌ච උප්‌පජ්‌ජති ඵස්‌සනානත්‌තං, නො ඵස්‌සනානත්‌තං පටිච්‌ච උප්‌පජ්‌ජති ධාතුනානත්‌තං? චක්‌ඛුධාතුං, භික්‌ඛවෙ, පටිච්‌ච උප්‌පජ්‌ජති චක්‌ඛුසම්‌ඵස්‌සො, චක්‌ඛුසම්‌ඵස්‌සං පටිච්‌ච උප්‌පජ්‌ජති චක්‌ඛුසම්‌ඵස්‌සජා වෙදනා, නො චක්‌ඛුසම්‌ඵස්‌සජං වෙදනං පටිච්‌ච උප්‌පජ්‌ජති චක්‌ඛුසම්‌ඵස්‌සො, නො චක්‌ඛුසම්‌ඵස්‌සං පටිච්‌ච උප්‌පජ්‌ජති චක්‌ඛුධාතු…පෙ.… මනොධාතුං පටිච්‌ච උප්‌පජ්‌ජති මනොසම්‌ඵස්‌සො, මනොසම්‌ඵස්‌සං පටිච්‌ච උප්‌පජ්‌ජති මනොසම්‌ඵස්‌සජා වෙදනා, නො මනොසම්‌ඵස්‌සජං වෙදනං පටිච්‌ච උප්‌පජ්‌ජති මනොසම්‌ඵස්‌සො, නො මනොසම්‌ඵස්‌සං පටිච්‌ච උප්‌පජ්‌ජති මනොධාතු. එවං ඛො, භික්‌ඛවෙ, ධාතුනානත්‌තං පටිච්‌ච උප්‌පජ්‌ජති ඵස්‌සනානත්‌තං, ඵස්‌සනානත්‌තං පටිච්‌ච උප්‌පජ්‌ජති වෙදනානානත්‌තං, නො වෙදනානානත්‌තං පටිච්‌ච උප්‌පජ්‌ජති ඵස්‌සනානත්‌තං, නො ඵස්‌සනානත්‌තං පටිච්‌ච උප්‌පජ්‌ජති ධාතුනානත්‌ත’’න්‌ති. පඤ්‌චමං.
‘‘Kathañca, bhikkhave, dhātunānattaṃ paṭicca uppajjati phassanānattaṃ, phassanānattaṃ paṭicca uppajjati vedanānānattaṃ, no vedanānānattaṃ paṭicca uppajjati phassanānattaṃ, no phassanānattaṃ paṭicca uppajjati dhātunānattaṃ? Cakkhudhātuṃ, bhikkhave, paṭicca uppajjati cakkhusamphasso, cakkhusamphassaṃ paṭicca uppajjati cakkhusamphassajā vedanā, no cakkhusamphassajaṃ vedanaṃ paṭicca uppajjati cakkhusamphasso, no cakkhusamphassaṃ paṭicca uppajjati cakkhudhātu…pe… manodhātuṃ paṭicca uppajjati manosamphasso, manosamphassaṃ paṭicca uppajjati manosamphassajā vedanā, no manosamphassajaṃ vedanaṃ paṭicca uppajjati manosamphasso, no manosamphassaṃ paṭicca uppajjati manodhātu. Evaṃ kho, bhikkhave, dhātunānattaṃ paṭicca uppajjati phassanānattaṃ, phassanānattaṃ paṭicca uppajjati vedanānānattaṃ, no vedanānānattaṃ paṭicca uppajjati phassanānattaṃ, no phassanānattaṃ paṭicca uppajjati dhātunānatta’’nti. Pañcamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. දුතියවෙදනානානත්‌තසුත්‌තවණ්‌ණනා • 5. Dutiyavedanānānattasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5. දුතියවෙදනානානත්‌තසුත්‌තවණ්‌ණනා • 5. Dutiyavedanānānattasuttavaṇṇanā
