| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৪. দুতিযৰেদনাসুত্তং
4. Dutiyavedanāsuttaṃ
৫৩. ৰুত্তঞ্হেতং ভগৰতা, ৰুত্তমরহতাতি মে সুতং –
53. Vuttañhetaṃ bhagavatā, vuttamarahatāti me sutaṃ –
‘‘তিস্সো ইমা , ভিক্খৰে, ৰেদনা। কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা। সুখা, ভিক্খৰে, ৰেদনা দুক্খতো দট্ঠব্বা; দুক্খা ৰেদনা সল্লতো দট্ঠব্বা; অদুক্খমসুখা ৰেদনা অনিচ্চতো দট্ঠব্বা। যতো খো, ভিক্খৰে, ভিক্খুনো সুখা ৰেদনা দুক্খতো দিট্ঠা হোতি, দুক্খা ৰেদনা সল্লতো দিট্ঠা হোতি, অদুক্খমসুখা ৰেদনা অনিচ্চতো দিট্ঠা হোতি; অযং ৰুচ্চতি, ভিক্খৰে, ‘ভিক্খু অরিযো সম্মদ্দসো অচ্ছেচ্ছি 1, তণ্হং, ৰিৰত্তযি 2 সংযোজনং, সম্মা মানাভিসমযা অন্তমকাসি দুক্খস্সা’’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Tisso imā , bhikkhave, vedanā. Katamā tisso? Sukhā vedanā, dukkhā vedanā, adukkhamasukhā vedanā. Sukhā, bhikkhave, vedanā dukkhato daṭṭhabbā; dukkhā vedanā sallato daṭṭhabbā; adukkhamasukhā vedanā aniccato daṭṭhabbā. Yato kho, bhikkhave, bhikkhuno sukhā vedanā dukkhato diṭṭhā hoti, dukkhā vedanā sallato diṭṭhā hoti, adukkhamasukhā vedanā aniccato diṭṭhā hoti; ayaṃ vuccati, bhikkhave, ‘bhikkhu ariyo sammaddaso acchecchi 3, taṇhaṃ, vivattayi 4 saṃyojanaṃ, sammā mānābhisamayā antamakāsi dukkhassā’’’ti. Etamatthaṃ bhagavā avoca. Tatthetaṃ iti vuccati –
‘‘যো সুখং দুক্খতো অদ্দ 5, দুক্খমদ্দক্খি সল্লতো।
‘‘Yo sukhaṃ dukkhato adda 6, dukkhamaddakkhi sallato;
অদুক্খমসুখং সন্তং, অদক্খি নং অনিচ্চতো॥
Adukkhamasukhaṃ santaṃ, adakkhi naṃ aniccato.
‘‘স ৰে সম্মদ্দসো ভিক্খু, যতো তত্থ ৰিমুচ্চতি।
‘‘Sa ve sammaddaso bhikkhu, yato tattha vimuccati;
অভিঞ্ঞাৰোসিতো সন্তো, স ৰে যোগাতিগো মুনী’’তি॥
Abhiññāvosito santo, sa ve yogātigo munī’’ti.
অযম্পি অত্থো ৰুত্তো ভগৰতা, ইতি মে সুতন্তি। চতুত্থং।
Ayampi attho vutto bhagavatā, iti me sutanti. Catutthaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৪. দুতিযৰেদনাসুত্তৰণ্ণনা • 4. Dutiyavedanāsuttavaṇṇanā
