| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
4. දුතියවෙදනාසුත්‌තං
4. Dutiyavedanāsuttaṃ
53. වුත්‌තඤ්‌හෙතං භගවතා, වුත්‌තමරහතාති මෙ සුතං –
53. Vuttañhetaṃ bhagavatā, vuttamarahatāti me sutaṃ –
‘‘තිස්‌සො ඉමා , භික්‌ඛවෙ, වෙදනා. කතමා තිස්‌සො? සුඛා වෙදනා, දුක්‌ඛා වෙදනා, අදුක්‌ඛමසුඛා වෙදනා. සුඛා, භික්‌ඛවෙ, වෙදනා දුක්‌ඛතො දට්‌ඨබ්‌බා; දුක්‌ඛා වෙදනා සල්‌ලතො දට්‌ඨබ්‌බා; අදුක්‌ඛමසුඛා වෙදනා අනිච්‌චතො දට්‌ඨබ්‌බා. යතො ඛො, භික්‌ඛවෙ, භික්‌ඛුනො සුඛා වෙදනා දුක්‌ඛතො දිට්‌ඨා හොති, දුක්‌ඛා වෙදනා සල්‌ලතො දිට්‌ඨා හොති, අදුක්‌ඛමසුඛා වෙදනා අනිච්‌චතො දිට්‌ඨා හොති; අයං වුච්‌චති, භික්‌ඛවෙ, ‘භික්‌ඛු අරියො සම්‌මද්‌දසො අච්‌ඡෙච්‌ඡි 1, තණ්‌හං, විවත්‌තයි 2 සංයොජනං, සම්‌මා මානාභිසමයා අන්‌තමකාසි දුක්‌ඛස්‌සා’’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Tisso imā , bhikkhave, vedanā. Katamā tisso? Sukhā vedanā, dukkhā vedanā, adukkhamasukhā vedanā. Sukhā, bhikkhave, vedanā dukkhato daṭṭhabbā; dukkhā vedanā sallato daṭṭhabbā; adukkhamasukhā vedanā aniccato daṭṭhabbā. Yato kho, bhikkhave, bhikkhuno sukhā vedanā dukkhato diṭṭhā hoti, dukkhā vedanā sallato diṭṭhā hoti, adukkhamasukhā vedanā aniccato diṭṭhā hoti; ayaṃ vuccati, bhikkhave, ‘bhikkhu ariyo sammaddaso acchecchi 3, taṇhaṃ, vivattayi 4 saṃyojanaṃ, sammā mānābhisamayā antamakāsi dukkhassā’’’ti. Etamatthaṃ bhagavā avoca. Tatthetaṃ iti vuccati –
‘‘යො සුඛං දුක්‌ඛතො අද්‌ද 5, දුක්‌ඛමද්‌දක්‌ඛි සල්‌ලතො;
‘‘Yo sukhaṃ dukkhato adda 6, dukkhamaddakkhi sallato;
අදුක්‌ඛමසුඛං සන්‌තං, අදක්‌ඛි නං අනිච්‌චතො.
Adukkhamasukhaṃ santaṃ, adakkhi naṃ aniccato.
‘‘ස වෙ සම්‌මද්‌දසො භික්‌ඛු, යතො තත්‌ථ විමුච්‌චති;
‘‘Sa ve sammaddaso bhikkhu, yato tattha vimuccati;
අභිඤ්‌ඤාවොසිතො සන්‌තො, ස වෙ යොගාතිගො මුනී’’ති.
Abhiññāvosito santo, sa ve yogātigo munī’’ti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. චතුත්‌ථං.
Ayampi attho vutto bhagavatā, iti me sutanti. Catutthaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 4. දුතියවෙදනාසුත්‌තවණ්‌ණනා • 4. Dutiyavedanāsuttavaṇṇanā
