| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. දුතියවිභඞ්‌ගසුත්‌තං
7. Dutiyavibhaṅgasuttaṃ
507. ‘‘පඤ්‌චිමානි, භික්‌ඛවෙ, ඉන්‌ද්‍රියානි. කතමානි පඤ්‌ච? සුඛින්‌ද්‍රියං, දුක්‌ඛින්‌ද්‍රියං, සොමනස්‌සින්‌ද්‍රියං, දොමනස්‌සින්‌ද්‍රියං, උපෙක්‌ඛින්‌ද්‍රියං.
507. ‘‘Pañcimāni, bhikkhave, indriyāni. Katamāni pañca? Sukhindriyaṃ, dukkhindriyaṃ, somanassindriyaṃ, domanassindriyaṃ, upekkhindriyaṃ.
‘‘කතමඤ්‌ච , භික්‌ඛවෙ, සුඛින්‌ද්‍රියං? යං ඛො, භික්‌ඛවෙ, කායිකං සුඛං, කායිකං සාතං, කායසම්‌ඵස්‌සජං සුඛං සාතං වෙදයිතං – ඉදං වුච්‌චති, භික්‌ඛවෙ, සුඛින්‌ද්‍රියං.
‘‘Katamañca , bhikkhave, sukhindriyaṃ? Yaṃ kho, bhikkhave, kāyikaṃ sukhaṃ, kāyikaṃ sātaṃ, kāyasamphassajaṃ sukhaṃ sātaṃ vedayitaṃ – idaṃ vuccati, bhikkhave, sukhindriyaṃ.
‘‘කතමඤ්‌ච, භික්‌ඛවෙ, දුක්‌ඛින්‌ද්‍රියං? යං ඛො, භික්‌ඛවෙ, කායිකං දුක්‌ඛං , කායිකං අසාතං, කායසම්‌ඵස්‌සජං දුක්‌ඛං අසාතං වෙදයිතං – ඉදං වුච්‌චති, භික්‌ඛවෙ, දුක්‌ඛින්‌ද්‍රියං.
‘‘Katamañca, bhikkhave, dukkhindriyaṃ? Yaṃ kho, bhikkhave, kāyikaṃ dukkhaṃ , kāyikaṃ asātaṃ, kāyasamphassajaṃ dukkhaṃ asātaṃ vedayitaṃ – idaṃ vuccati, bhikkhave, dukkhindriyaṃ.
‘‘කතමඤ්‌ච, භික්‌ඛවෙ, සොමනස්‌සින්‌ද්‍රියං? යං ඛො, භික්‌ඛවෙ, චෙතසිකං සුඛං, චෙතසිකං සාතං, මනොසම්‌ඵස්‌සජං සුඛං සාතං වෙදයිතං – ඉදං වුච්‌චති, භික්‌ඛවෙ, සොමනස්‌සින්‌ද්‍රියං.
‘‘Katamañca, bhikkhave, somanassindriyaṃ? Yaṃ kho, bhikkhave, cetasikaṃ sukhaṃ, cetasikaṃ sātaṃ, manosamphassajaṃ sukhaṃ sātaṃ vedayitaṃ – idaṃ vuccati, bhikkhave, somanassindriyaṃ.
‘‘කතමඤ්‌ච , භික්‌ඛවෙ, දොමනස්‌සින්‌ද්‍රියං? යං ඛො, භික්‌ඛවෙ, චෙතසිකං දුක්‌ඛං, චෙතසිකං අසාතං, මනොසම්‌ඵස්‌සජං දුක්‌ඛං අසාතං වෙදයිතං – ඉදං වුච්‌චති, භික්‌ඛවෙ, දොමනස්‌සින්‌ද්‍රියං.
‘‘Katamañca , bhikkhave, domanassindriyaṃ? Yaṃ kho, bhikkhave, cetasikaṃ dukkhaṃ, cetasikaṃ asātaṃ, manosamphassajaṃ dukkhaṃ asātaṃ vedayitaṃ – idaṃ vuccati, bhikkhave, domanassindriyaṃ.
‘‘කතමඤ්‌ච, භික්‌ඛවෙ, උපෙක්‌ඛින්‌ද්‍රියං? යං ඛො, භික්‌ඛවෙ, කායිකං වා චෙතසිකං වා නෙවසාතං නාසාතං වෙදයිතං – ඉදං වුච්‌චති, භික්‌ඛවෙ, උපෙක්‌ඛින්‌ද්‍රියං.
‘‘Katamañca, bhikkhave, upekkhindriyaṃ? Yaṃ kho, bhikkhave, kāyikaṃ vā cetasikaṃ vā nevasātaṃ nāsātaṃ vedayitaṃ – idaṃ vuccati, bhikkhave, upekkhindriyaṃ.
‘‘තත්‍ර, භික්‌ඛවෙ, යඤ්‌ච සුඛින්‌ද්‍රියං යඤ්‌ච සොමනස්‌සින්‌ද්‍රියං, සුඛා සා වෙදනා දට්‌ඨබ්‌බා. තත්‍ර, භික්‌ඛවෙ, යඤ්‌ච දුක්‌ඛින්‌ද්‍රියං යඤ්‌ච දොමනස්‌සින්‌ද්‍රියං, දුක්‌ඛා සා වෙදනා දට්‌ඨබ්‌බා. තත්‍ර, භික්‌ඛවෙ, යදිදං උපෙක්‌ඛින්‌ද්‍රියං, අදුක්‌ඛමසුඛා සා වෙදනා දට්‌ඨබ්‌බා. ඉමානි ඛො, භික්‌ඛවෙ, පඤ්‌චින්‌ද්‍රියානී’’ති. සත්‌තමං.
‘‘Tatra, bhikkhave, yañca sukhindriyaṃ yañca somanassindriyaṃ, sukhā sā vedanā daṭṭhabbā. Tatra, bhikkhave, yañca dukkhindriyaṃ yañca domanassindriyaṃ, dukkhā sā vedanā daṭṭhabbā. Tatra, bhikkhave, yadidaṃ upekkhindriyaṃ, adukkhamasukhā sā vedanā daṭṭhabbā. Imāni kho, bhikkhave, pañcindriyānī’’ti. Sattamaṃ.
