| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. து³தியவிஹாரஸுத்தங்
2. Dutiyavihārasuttaṃ
12. ஸாவத்தி²னிதா³னங். ‘‘இச்சா²மஹங், பி⁴க்க²வே, தேமாஸங் படிஸல்லியிதுங். நம்ஹி கேனசி உபஸங்கமிதப்³போ³, அஞ்ஞத்ர ஏகேன பிண்ட³பாதனீஹாரகேனா’’தி . ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ படிஸ்ஸுத்வா நாஸ்ஸுத⁴ கோசி ப⁴க³வந்தங் உபஸங்கமதி, அஞ்ஞத்ர ஏகேன பிண்ட³பாதனீஹாரகேன.
12. Sāvatthinidānaṃ. ‘‘Icchāmahaṃ, bhikkhave, temāsaṃ paṭisalliyituṃ. Namhi kenaci upasaṅkamitabbo, aññatra ekena piṇḍapātanīhārakenā’’ti . ‘‘Evaṃ, bhante’’ti kho te bhikkhū bhagavato paṭissutvā nāssudha koci bhagavantaṃ upasaṅkamati, aññatra ekena piṇḍapātanīhārakena.
அத² கோ² ப⁴க³வா தஸ்ஸ தேமாஸஸ்ஸ அச்சயேன படிஸல்லானா வுட்டி²தோ பி⁴க்கூ² ஆமந்தேஸி – ‘‘யேன ஸ்வாஹங், பி⁴க்க²வே, விஹாரேன பட²மாபி⁴ஸம்பு³த்³தோ⁴ விஹராமி, தஸ்ஸ பதே³ஸேன விஹாஸிங். ஸோ ஏவங் பஜானாமி – ‘மிச்சா²தி³ட்டி²பச்சயாபி வேத³யிதங்; மிச்சா²தி³ட்டி²வூபஸமபச்சயாபி வேத³யிதங்; ஸம்மாதி³ட்டி²பச்சயாபி வேத³யிதங்; ஸம்மாதி³ட்டி²வூபஸமபச்சயாபி வேத³யிதங்…பே॰… மிச்சா²ஸமாதி⁴பச்சயாபி வேத³யிதங்; மிச்சா²ஸமாதி⁴வூபஸமபச்சயாபி வேத³யிதங், ஸம்மாஸமாதி⁴பச்சயாபி வேத³யிதங்; ஸம்மாஸமாதி⁴வூபஸமபச்சயாபி வேத³யிதங்; ச²ந்த³பச்சயாபி வேத³யிதங்; ச²ந்த³வூபஸமபச்சயாபி வேத³யிதங்; விதக்கபச்சயாபி வேத³யிதங்; விதக்கவூபஸமபச்சயாபி வேத³யிதங்; ஸஞ்ஞாபச்சயாபி வேத³யிதங்; ஸஞ்ஞாவூபஸமபச்சயாபி வேத³யிதங்; ச²ந்தோ³ ச அவூபஸந்தோ ஹோதி, விதக்கோ ச அவூபஸந்தோ ஹோதி, ஸஞ்ஞா ச அவூபஸந்தா ஹோதி, தப்பச்சயாபி வேத³யிதங்; ச²ந்தோ³ ச வூபஸந்தோ ஹோதி , விதக்கோ ச வூபஸந்தோ ஹோதி, ஸஞ்ஞா ச வூபஸந்தா ஹோதி, தப்பச்சயாபி வேத³யிதங்; அப்பத்தஸ்ஸ பத்தியா அத்தி² ஆயாமங் 1, தஸ்மிம்பி டா²னே அனுப்பத்தே தப்பச்சயாபி வேத³யித’’’ந்தி. து³தியங்.
Atha kho bhagavā tassa temāsassa accayena paṭisallānā vuṭṭhito bhikkhū āmantesi – ‘‘yena svāhaṃ, bhikkhave, vihārena paṭhamābhisambuddho viharāmi, tassa padesena vihāsiṃ. So evaṃ pajānāmi – ‘micchādiṭṭhipaccayāpi vedayitaṃ; micchādiṭṭhivūpasamapaccayāpi vedayitaṃ; sammādiṭṭhipaccayāpi vedayitaṃ; sammādiṭṭhivūpasamapaccayāpi vedayitaṃ…pe… micchāsamādhipaccayāpi vedayitaṃ; micchāsamādhivūpasamapaccayāpi vedayitaṃ, sammāsamādhipaccayāpi vedayitaṃ; sammāsamādhivūpasamapaccayāpi vedayitaṃ; chandapaccayāpi vedayitaṃ; chandavūpasamapaccayāpi vedayitaṃ; vitakkapaccayāpi vedayitaṃ; vitakkavūpasamapaccayāpi vedayitaṃ; saññāpaccayāpi vedayitaṃ; saññāvūpasamapaccayāpi vedayitaṃ; chando ca avūpasanto hoti, vitakko ca avūpasanto hoti, saññā ca avūpasantā hoti, tappaccayāpi vedayitaṃ; chando ca vūpasanto hoti , vitakko ca vūpasanto hoti, saññā ca vūpasantā hoti, tappaccayāpi vedayitaṃ; appattassa pattiyā atthi āyāmaṃ 2, tasmimpi ṭhāne anuppatte tappaccayāpi vedayita’’’nti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. து³தியவிஹாரஸுத்தவண்ணனா • 2. Dutiyavihārasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. து³தியவிஹாரஸுத்தவண்ணனா • 2. Dutiyavihārasuttavaṇṇanā
