| Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౨. దుతియవిహారసుత్తం
2. Dutiyavihārasuttaṃ
౧౨. సావత్థినిదానం. ‘‘ఇచ్ఛామహం, భిక్ఖవే, తేమాసం పటిసల్లియితుం. నమ్హి కేనచి ఉపసఙ్కమితబ్బో, అఞ్ఞత్ర ఏకేన పిణ్డపాతనీహారకేనా’’తి . ‘‘ఏవం, భన్తే’’తి ఖో తే భిక్ఖూ భగవతో పటిస్సుత్వా నాస్సుధ కోచి భగవన్తం ఉపసఙ్కమతి, అఞ్ఞత్ర ఏకేన పిణ్డపాతనీహారకేన.
12. Sāvatthinidānaṃ. ‘‘Icchāmahaṃ, bhikkhave, temāsaṃ paṭisalliyituṃ. Namhi kenaci upasaṅkamitabbo, aññatra ekena piṇḍapātanīhārakenā’’ti . ‘‘Evaṃ, bhante’’ti kho te bhikkhū bhagavato paṭissutvā nāssudha koci bhagavantaṃ upasaṅkamati, aññatra ekena piṇḍapātanīhārakena.
అథ ఖో భగవా తస్స తేమాసస్స అచ్చయేన పటిసల్లానా వుట్ఠితో భిక్ఖూ ఆమన్తేసి – ‘‘యేన స్వాహం, భిక్ఖవే, విహారేన పఠమాభిసమ్బుద్ధో విహరామి, తస్స పదేసేన విహాసిం. సో ఏవం పజానామి – ‘మిచ్ఛాదిట్ఠిపచ్చయాపి వేదయితం; మిచ్ఛాదిట్ఠివూపసమపచ్చయాపి వేదయితం; సమ్మాదిట్ఠిపచ్చయాపి వేదయితం; సమ్మాదిట్ఠివూపసమపచ్చయాపి వేదయితం…పే॰… మిచ్ఛాసమాధిపచ్చయాపి వేదయితం; మిచ్ఛాసమాధివూపసమపచ్చయాపి వేదయితం, సమ్మాసమాధిపచ్చయాపి వేదయితం; సమ్మాసమాధివూపసమపచ్చయాపి వేదయితం; ఛన్దపచ్చయాపి వేదయితం; ఛన్దవూపసమపచ్చయాపి వేదయితం; వితక్కపచ్చయాపి వేదయితం; వితక్కవూపసమపచ్చయాపి వేదయితం; సఞ్ఞాపచ్చయాపి వేదయితం; సఞ్ఞావూపసమపచ్చయాపి వేదయితం; ఛన్దో చ అవూపసన్తో హోతి, వితక్కో చ అవూపసన్తో హోతి, సఞ్ఞా చ అవూపసన్తా హోతి, తప్పచ్చయాపి వేదయితం; ఛన్దో చ వూపసన్తో హోతి , వితక్కో చ వూపసన్తో హోతి, సఞ్ఞా చ వూపసన్తా హోతి, తప్పచ్చయాపి వేదయితం; అప్పత్తస్స పత్తియా అత్థి ఆయామం 1, తస్మిమ్పి ఠానే అనుప్పత్తే తప్పచ్చయాపి వేదయిత’’’న్తి. దుతియం.
Atha kho bhagavā tassa temāsassa accayena paṭisallānā vuṭṭhito bhikkhū āmantesi – ‘‘yena svāhaṃ, bhikkhave, vihārena paṭhamābhisambuddho viharāmi, tassa padesena vihāsiṃ. So evaṃ pajānāmi – ‘micchādiṭṭhipaccayāpi vedayitaṃ; micchādiṭṭhivūpasamapaccayāpi vedayitaṃ; sammādiṭṭhipaccayāpi vedayitaṃ; sammādiṭṭhivūpasamapaccayāpi vedayitaṃ…pe… micchāsamādhipaccayāpi vedayitaṃ; micchāsamādhivūpasamapaccayāpi vedayitaṃ, sammāsamādhipaccayāpi vedayitaṃ; sammāsamādhivūpasamapaccayāpi vedayitaṃ; chandapaccayāpi vedayitaṃ; chandavūpasamapaccayāpi vedayitaṃ; vitakkapaccayāpi vedayitaṃ; vitakkavūpasamapaccayāpi vedayitaṃ; saññāpaccayāpi vedayitaṃ; saññāvūpasamapaccayāpi vedayitaṃ; chando ca avūpasanto hoti, vitakko ca avūpasanto hoti, saññā ca avūpasantā hoti, tappaccayāpi vedayitaṃ; chando ca vūpasanto hoti , vitakko ca vūpasanto hoti, saññā ca vūpasantā hoti, tappaccayāpi vedayitaṃ; appattassa pattiyā atthi āyāmaṃ 2, tasmimpi ṭhāne anuppatte tappaccayāpi vedayita’’’nti. Dutiyaṃ.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౨. దుతియవిహారసుత్తవణ్ణనా • 2. Dutiyavihārasuttavaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౨. దుతియవిహారసుత్తవణ్ణనా • 2. Dutiyavihārasuttavaṇṇanā
