| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. து³தியயோதா⁴ஜீவஸுத்தவண்ணனா
6. Dutiyayodhājīvasuttavaṇṇanā
76. ச²ட்டே² அஸிசம்மங் க³ஹெத்வாதி அஸிஞ்ச சம்மஞ்ச க³ஹெத்வா. த⁴னுகலாபங் ஸன்னய்ஹித்வாதி த⁴னுஞ்ச ஸரகலாபஞ்ச ஸன்னய்ஹித்வா. வியூள்ஹந்தி யுத்³த⁴ஸன்னிவேஸவேஸேன டி²தங். ஸங்கா³மங் ஓதரதீதி மஹாயுத்³த⁴ங் ஓதரதி. உஸ்ஸஹதி வாயமதீதி உஸ்ஸாஹஞ்ச வாயாமஞ்ச கரோதி. ஹனந்தீதி கா⁴தெந்தி. பரியாபாதெ³ந்தீதி பரியாபாத³யந்தி. உபலிக்க²ந்தீதி விஜ்ஜ²ந்தி. அபனெந்தீதி ஸகஸேனங் க³ஹெத்வா க³ச்ச²ந்தி. அபனெத்வா ஞாதகானங் நெந்தீதி ஸகஸேனங் நெத்வா ததோ ஞாதகானங் ஸந்திகங் நெந்தி. நீயமானோதி அத்தனோ கே³ஹங் வா ஸேஸஞாதிஸந்திகங் வா நிய்யமானோ. உபட்ட²ஹந்தி பரிசரந்தீதி பஹாரஸோத⁴னவணகப்பனாதீ³னி கரொந்தா ஜக்³க³ந்தி கோ³பயந்தி.
76. Chaṭṭhe asicammaṃ gahetvāti asiñca cammañca gahetvā. Dhanukalāpaṃ sannayhitvāti dhanuñca sarakalāpañca sannayhitvā. Viyūḷhanti yuddhasannivesavesena ṭhitaṃ. Saṅgāmaṃ otaratīti mahāyuddhaṃ otarati. Ussahati vāyamatīti ussāhañca vāyāmañca karoti. Hanantīti ghātenti. Pariyāpādentīti pariyāpādayanti. Upalikkhantīti vijjhanti. Apanentīti sakasenaṃ gahetvā gacchanti. Apanetvā ñātakānaṃ nentīti sakasenaṃ netvā tato ñātakānaṃ santikaṃ nenti. Nīyamānoti attano gehaṃ vā sesañātisantikaṃ vā niyyamāno. Upaṭṭhahanti paricarantīti pahārasodhanavaṇakappanādīni karontā jagganti gopayanti.
அரக்கி²தேனேவ காயேனாதி அரக்கி²தேன காயத்³வாரேன. அரக்கி²தாய வாசாயாதி அரக்கி²தேன வசீத்³வாரேன. அரக்கி²தேன சித்தேனாதி அரக்கி²தேன மனொத்³வாரேன. அனுபட்டி²தாய ஸதியாதி ஸதிங் ஸுபட்டி²தங் அகத்வா. அஸங்வுதேஹி இந்த்³ரியேஹீதி மனச்ச²ட்டே²ஹி இந்த்³ரியேஹி அபிஹிதேஹி அகோ³பிதேஹி. ராகோ³ சித்தங் அனுத்³த⁴ங்ஸேதீதி ராகோ³ உப்பஜ்ஜமானோவ ஸமத²விபஸ்ஸனாசித்தங் த⁴ங்ஸேதி, தூ³ரே கி²பதி. ராக³பரியுட்டி²தொம்ஹி, ஆவுஸோ, ராக³பரேதோதி அஹங், ஆவுஸோ, ராகே³ன ரத்தோ, ராகே³ன அனுக³தோ.
Arakkhiteneva kāyenāti arakkhitena kāyadvārena. Arakkhitāya vācāyāti arakkhitena vacīdvārena. Arakkhitena cittenāti arakkhitena manodvārena. Anupaṭṭhitāya satiyāti satiṃ supaṭṭhitaṃ akatvā. Asaṃvutehiindriyehīti manacchaṭṭhehi indriyehi apihitehi agopitehi. Rāgo cittaṃ anuddhaṃsetīti rāgo uppajjamānova samathavipassanācittaṃ dhaṃseti, dūre khipati. Rāgapariyuṭṭhitomhi, āvuso, rāgaparetoti ahaṃ, āvuso, rāgena ratto, rāgena anugato.
அட்டி²கங்கலூபமாதிஆதீ³ஸு அட்டி²கங்கலூபமா அப்பஸ்ஸாத³ட்டே²ன. மங்ஸபேஸூபமா ப³ஹுஸாதா⁴ரணட்டே²ன. திணுக்கூபமா அனுத³ஹனட்டே²ன. அங்கா³ரகாஸூபமா மஹாபி⁴தாபட்டே²ன. ஸுபினகூபமா இத்தரபச்சுபட்டா²னட்டே²ன. யாசிதகூபமா தாவகாலிகட்டே²ன. ருக்க²ப²லூபமா ஸப்³ப³ங்க³பச்சங்க³பலிப⁴ஞ்ஜனட்டே²ன. அஸிஸூனூபமா அதி⁴குட்டனட்டே²ன. ஸத்திஸூலூபமா வினிவிஜ்ஜ²னட்டே²ன. ஸப்பஸிரூபமா ஸாஸங்கஸப்படிப⁴யட்டே²ன . உஸ்ஸஹிஸ்ஸாமீதி உஸ்ஸாஹங் கரிஸ்ஸாமி. தா⁴ரயிஸ்ஸாமீதி ஸமணபா⁴வங் தா⁴ரயிஸ்ஸாமி. அபி⁴ரமிஸ்ஸாமீதி அபி⁴ரதிங் உப்பாதெ³ஸ்ஸாமி ந உக்கண்டி²ஸ்ஸாமி. ஸேஸமெத்த² உத்தானத்த²மேவ. இமஸ்மிங் ஸுத்தே வட்டவிவட்டங் கதி²தந்தி.
Aṭṭhikaṅkalūpamātiādīsu aṭṭhikaṅkalūpamā appassādaṭṭhena. Maṃsapesūpamā bahusādhāraṇaṭṭhena. Tiṇukkūpamā anudahanaṭṭhena. Aṅgārakāsūpamā mahābhitāpaṭṭhena. Supinakūpamā ittarapaccupaṭṭhānaṭṭhena. Yācitakūpamā tāvakālikaṭṭhena. Rukkhaphalūpamā sabbaṅgapaccaṅgapalibhañjanaṭṭhena. Asisūnūpamā adhikuṭṭanaṭṭhena. Sattisūlūpamā vinivijjhanaṭṭhena. Sappasirūpamā sāsaṅkasappaṭibhayaṭṭhena . Ussahissāmīti ussāhaṃ karissāmi. Dhārayissāmīti samaṇabhāvaṃ dhārayissāmi. Abhiramissāmīti abhiratiṃ uppādessāmi na ukkaṇṭhissāmi. Sesamettha uttānatthameva. Imasmiṃ sutte vaṭṭavivaṭṭaṃ kathitanti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. து³தியயோதா⁴ஜீவஸுத்தங் • 6. Dutiyayodhājīvasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. து³தியயோதா⁴ஜீவஸுத்தவண்ணனா • 6. Dutiyayodhājīvasuttavaṇṇanā
