| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. து³தியயோதா⁴ஜீவஸுத்தவண்ணனா
6. Dutiyayodhājīvasuttavaṇṇanā
76. ச²ட்டே² சம்மந்தி இமினா சம்மமயங் சம்மமிதி ஸிப்³பி³தங், அஞ்ஞங் வா கேடகப²லகாதி³ங் ஸங்க³ண்ஹாதி. த⁴னுகலாபங் ஸன்னய்ஹித்வாதி த⁴னுஞ்சேவ தூணிரஞ்ச ஸன்னய்ஹித்வா ஸஜ்ஜெத்வா. த⁴னுத³ண்ட³ஸ்ஸ ஜியாயத்தபா⁴வகரணாதி³பி ஹி த⁴னுனோ ஸன்னய்ஹனங். தேனேவாஹ ‘‘த⁴னுஞ்ச ஸரகலாபஞ்ச ஸன்னய்ஹித்வா’’தி. யுத்³த⁴ஸன்னிவேஸேன டி²தந்தி த்³வின்னங் ஸேனானங் ப்³யூஹனஸங்விதா⁴னநயேன கதோ யோ ஸன்னிவேஸோ, தஸ்ஸ வஸேன டி²தங், ஸேனாப்³யூஹஸங்விதா⁴னவஸேன ஸன்னிவிட்ட²ந்தி வுத்தங் ஹோதி. உஸ்ஸாஹஞ்ச வாயாமஞ்ச கரோதீதி யுஜ்ஜ²னவஸேன உஸ்ஸாஹங் வாயாமஞ்ச கரோதி. பரியாபாதெ³ந்தீதி மரணபரியந்திகங் அபரங் பாபெந்தி. தேனாஹ ‘‘பரியாபாத³யந்தீ’’தி, ஜீவிதங் பரியாபாத³யந்தி மரணங் படிபஜ்ஜாபெந்தீதி வுத்தங் ஹோதி.
76. Chaṭṭhe cammanti iminā cammamayaṃ cammamiti sibbitaṃ, aññaṃ vā keṭakaphalakādiṃ saṅgaṇhāti. Dhanukalāpaṃ sannayhitvāti dhanuñceva tūṇirañca sannayhitvā sajjetvā. Dhanudaṇḍassa jiyāyattabhāvakaraṇādipi hi dhanuno sannayhanaṃ. Tenevāha ‘‘dhanuñca sarakalāpañca sannayhitvā’’ti. Yuddhasannivesena ṭhitanti dvinnaṃ senānaṃ byūhanasaṃvidhānanayena kato yo sanniveso, tassa vasena ṭhitaṃ, senābyūhasaṃvidhānavasena sanniviṭṭhanti vuttaṃ hoti. Ussāhañca vāyāmañca karotīti yujjhanavasena ussāhaṃ vāyāmañca karoti. Pariyāpādentīti maraṇapariyantikaṃ aparaṃ pāpenti. Tenāha ‘‘pariyāpādayantī’’ti, jīvitaṃ pariyāpādayanti maraṇaṃ paṭipajjāpentīti vuttaṃ hoti.
அரக்கி²தேனேவ காயேனாதிஆதீ³ஸு ஹத்த²பாதே³ கீளாபெந்தோ கீ³வங் விபரிவத்தெந்தோ காயங் ந ரக்க²தி நாம. நானப்பகாரங் து³ட்டு²ல்லங் கரொந்தோ வாசங் ந ரக்க²தி நாம. காமவிதக்காத³யோ விதக்கெந்தோ சித்தங் ந ரக்க²தி நாம. அனுபட்டி²தாய ஸதியாதி காயக³தாய ஸதியா அனுபட்டி²தாய. ராகே³ன அனுக³தோதி ராகே³ன அனுபஹதோ. ராக³பரேதோதி வா ராகே³ன பு²ட்டோ² பு²ட்ட²விஸேன விய ஸப்பேன.
Arakkhitenevakāyenātiādīsu hatthapāde kīḷāpento gīvaṃ viparivattento kāyaṃ na rakkhati nāma. Nānappakāraṃ duṭṭhullaṃ karonto vācaṃ na rakkhati nāma. Kāmavitakkādayo vitakkento cittaṃ na rakkhati nāma. Anupaṭṭhitāya satiyāti kāyagatāya satiyā anupaṭṭhitāya. Rāgena anugatoti rāgena anupahato. Rāgaparetoti vā rāgena phuṭṭho phuṭṭhavisena viya sappena.
அனுத³ஹனட்டே²னாதி அனுபாயப்படிபத்தியா. ஸம்பதி ஆயதிஞ்ச மஹாபி⁴தாபட்டே²ன. அனவத்தி²தஸபா⁴வதாய இத்தரபச்சுபட்டா²னட்டே²ன. முஹுத்தரமணீயதாய தாவகாலிகட்டே²ன. ப்³யத்தேஹி அபி⁴ப⁴வனீயதாய ஸப்³ப³ங்க³பச்சங்க³பலிப⁴ஞ்ஜனட்டே²ன. சே²த³னபே⁴த³னாதி³அதி⁴கரணபா⁴வேன உக்³க⁴ட்டனஸதி³ஸதாய அதி⁴குட்டனட்டே²ன. அவணே வணங் உப்பாதெ³த்வா அந்தோ அனுபவிஸனஸபா⁴வதாய வினிவிஜ்ஜ²னட்டே²ன. தி³ட்ட²த⁴ம்மிகஸம்பராயிக அனத்த²னிமித்ததாய ஸாஸங்கஸப்படிப⁴யட்டே²ன.
Anudahanaṭṭhenāti anupāyappaṭipattiyā. Sampati āyatiñca mahābhitāpaṭṭhena. Anavatthitasabhāvatāya ittarapaccupaṭṭhānaṭṭhena. Muhuttaramaṇīyatāya tāvakālikaṭṭhena. Byattehi abhibhavanīyatāya sabbaṅgapaccaṅgapalibhañjanaṭṭhena. Chedanabhedanādiadhikaraṇabhāvena ugghaṭṭanasadisatāya adhikuṭṭanaṭṭhena. Avaṇe vaṇaṃ uppādetvā anto anupavisanasabhāvatāya vinivijjhanaṭṭhena. Diṭṭhadhammikasamparāyika anatthanimittatāya sāsaṅkasappaṭibhayaṭṭhena.
து³தியயோதா⁴ஜீவஸுத்தவண்ணனா நிட்டி²தா.
Dutiyayodhājīvasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. து³தியயோதா⁴ஜீவஸுத்தங் • 6. Dutiyayodhājīvasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. து³தியயோதா⁴ஜீவஸுத்தவண்ணனா • 6. Dutiyayodhājīvasuttavaṇṇanā
