| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៦. ទុតិយយោធាជីវសុត្តវណ្ណនា
6. Dutiyayodhājīvasuttavaṇṇanā
៧៦. ឆដ្ឋេ ចម្មន្តិ ឥមិនា ចម្មមយំ ចម្មមិតិ សិព្ពិតំ, អញ្ញំ វា កេដកផលកាទិំ សង្គណ្ហាតិ។ ធនុកលាបំ សន្នយ្ហិត្វាតិ ធនុញ្ចេវ តូណិរញ្ច សន្នយ្ហិត្វា សជ្ជេត្វា។ ធនុទណ្ឌស្ស ជិយាយត្តភាវករណាទិបិ ហិ ធនុនោ សន្នយ្ហនំ។ តេនេវាហ ‘‘ធនុញ្ច សរកលាបញ្ច សន្នយ្ហិត្វា’’តិ។ យុទ្ធសន្និវេសេន ឋិតន្តិ ទ្វិន្នំ សេនានំ ព្យូហនសំវិធាននយេន កតោ យោ សន្និវេសោ, តស្ស វសេន ឋិតំ, សេនាព្យូហសំវិធានវសេន សន្និវិដ្ឋន្តិ វុត្តំ ហោតិ។ ឧស្សាហញ្ច វាយាមញ្ច ករោតីតិ យុជ្ឈនវសេន ឧស្សាហំ វាយាមញ្ច ករោតិ។ បរិយាបាទេន្តីតិ មរណបរិយន្តិកំ អបរំ បាបេន្តិ។ តេនាហ ‘‘បរិយាបាទយន្តី’’តិ, ជីវិតំ បរិយាបាទយន្តិ មរណំ បដិបជ្ជាបេន្តីតិ វុត្តំ ហោតិ។
76. Chaṭṭhe cammanti iminā cammamayaṃ cammamiti sibbitaṃ, aññaṃ vā keṭakaphalakādiṃ saṅgaṇhāti. Dhanukalāpaṃ sannayhitvāti dhanuñceva tūṇirañca sannayhitvā sajjetvā. Dhanudaṇḍassa jiyāyattabhāvakaraṇādipi hi dhanuno sannayhanaṃ. Tenevāha ‘‘dhanuñca sarakalāpañca sannayhitvā’’ti. Yuddhasannivesena ṭhitanti dvinnaṃ senānaṃ byūhanasaṃvidhānanayena kato yo sanniveso, tassa vasena ṭhitaṃ, senābyūhasaṃvidhānavasena sanniviṭṭhanti vuttaṃ hoti. Ussāhañca vāyāmañca karotīti yujjhanavasena ussāhaṃ vāyāmañca karoti. Pariyāpādentīti maraṇapariyantikaṃ aparaṃ pāpenti. Tenāha ‘‘pariyāpādayantī’’ti, jīvitaṃ pariyāpādayanti maraṇaṃ paṭipajjāpentīti vuttaṃ hoti.
អរក្ខិតេនេវ កាយេនាតិអាទីសុ ហត្ថបាទេ កីឡាបេន្តោ គីវំ វិបរិវត្តេន្តោ កាយំ ន រក្ខតិ នាម។ នានប្បការំ ទុដ្ឋុល្លំ ករោន្តោ វាចំ ន រក្ខតិ នាម។ កាមវិតក្កាទយោ វិតក្កេន្តោ ចិត្តំ ន រក្ខតិ នាម។ អនុបដ្ឋិតាយ សតិយាតិ កាយគតាយ សតិយា អនុបដ្ឋិតាយ។ រាគេន អនុគតោតិ រាគេន អនុបហតោ។ រាគបរេតោតិ វា រាគេន ផុដ្ឋោ ផុដ្ឋវិសេន វិយ សប្បេន។
Arakkhitenevakāyenātiādīsu hatthapāde kīḷāpento gīvaṃ viparivattento kāyaṃ na rakkhati nāma. Nānappakāraṃ duṭṭhullaṃ karonto vācaṃ na rakkhati nāma. Kāmavitakkādayo vitakkento cittaṃ na rakkhati nāma. Anupaṭṭhitāya satiyāti kāyagatāya satiyā anupaṭṭhitāya. Rāgena anugatoti rāgena anupahato. Rāgaparetoti vā rāgena phuṭṭho phuṭṭhavisena viya sappena.
អនុទហនដ្ឋេនាតិ អនុបាយប្បដិបត្តិយា។ សម្បតិ អាយតិញ្ច មហាភិតាបដ្ឋេន។ អនវត្ថិតសភាវតាយ ឥត្តរបច្ចុបដ្ឋានដ្ឋេន។ មុហុត្តរមណីយតាយ តាវកាលិកដ្ឋេន។ ព្យត្តេហិ អភិភវនីយតាយ សព្ពង្គបច្ចង្គបលិភញ្ជនដ្ឋេន។ ឆេទនភេទនាទិអធិករណភាវេន ឧគ្ឃដ្ដនសទិសតាយ អធិកុដ្ដនដ្ឋេន។ អវណេ វណំ ឧប្បាទេត្វា អន្តោ អនុបវិសនសភាវតាយ វិនិវិជ្ឈនដ្ឋេន។ ទិដ្ឋធម្មិកសម្បរាយិក អនត្ថនិមិត្តតាយ សាសង្កសប្បដិភយដ្ឋេន។
Anudahanaṭṭhenāti anupāyappaṭipattiyā. Sampati āyatiñca mahābhitāpaṭṭhena. Anavatthitasabhāvatāya ittarapaccupaṭṭhānaṭṭhena. Muhuttaramaṇīyatāya tāvakālikaṭṭhena. Byattehi abhibhavanīyatāya sabbaṅgapaccaṅgapalibhañjanaṭṭhena. Chedanabhedanādiadhikaraṇabhāvena ugghaṭṭanasadisatāya adhikuṭṭanaṭṭhena. Avaṇe vaṇaṃ uppādetvā anto anupavisanasabhāvatāya vinivijjhanaṭṭhena. Diṭṭhadhammikasamparāyika anatthanimittatāya sāsaṅkasappaṭibhayaṭṭhena.
ទុតិយយោធាជីវសុត្តវណ្ណនា និដ្ឋិតា។
Dutiyayodhājīvasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៦. ទុតិយយោធាជីវសុត្តំ • 6. Dutiyayodhājīvasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៦. ទុតិយយោធាជីវសុត្តវណ្ណនា • 6. Dutiyayodhājīvasuttavaṇṇanā
