| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
6. දුතියයොධාජීවසුත්‌තවණ්‌ණනා
6. Dutiyayodhājīvasuttavaṇṇanā
76. ඡට්‌ඨෙ චම්‌මන්‌ති ඉමිනා චම්‌මමයං චම්‌මමිති සිබ්‌බිතං, අඤ්‌ඤං වා කෙටකඵලකාදිං සඞ්‌ගණ්‌හාති. ධනුකලාපං සන්‌නය්‌හිත්‌වාති ධනුඤ්‌චෙව තූණිරඤ්‌ච සන්‌නය්‌හිත්‌වා සජ්‌ජෙත්‌වා. ධනුදණ්‌ඩස්‌ස ජියායත්‌තභාවකරණාදිපි හි ධනුනො සන්‌නය්‌හනං. තෙනෙවාහ ‘‘ධනුඤ්‌ච සරකලාපඤ්‌ච සන්‌නය්‌හිත්‌වා’’ති. යුද්‌ධසන්‌නිවෙසෙන ඨිතන්‌ති ද්‌වින්‌නං සෙනානං බ්‍යූහනසංවිධානනයෙන කතො යො සන්‌නිවෙසො, තස්‌ස වසෙන ඨිතං, සෙනාබ්‍යූහසංවිධානවසෙන සන්‌නිවිට්‌ඨන්‌ති වුත්‌තං හොති. උස්‌සාහඤ්‌ච වායාමඤ්‌ච කරොතීති යුජ්‌ඣනවසෙන උස්‌සාහං වායාමඤ්‌ච කරොති. පරියාපාදෙන්‌තීති මරණපරියන්‌තිකං අපරං පාපෙන්‌ති. තෙනාහ ‘‘පරියාපාදයන්‌තී’’ති, ජීවිතං පරියාපාදයන්‌ති මරණං පටිපජ්‌ජාපෙන්‌තීති වුත්‌තං හොති.
76. Chaṭṭhe cammanti iminā cammamayaṃ cammamiti sibbitaṃ, aññaṃ vā keṭakaphalakādiṃ saṅgaṇhāti. Dhanukalāpaṃ sannayhitvāti dhanuñceva tūṇirañca sannayhitvā sajjetvā. Dhanudaṇḍassa jiyāyattabhāvakaraṇādipi hi dhanuno sannayhanaṃ. Tenevāha ‘‘dhanuñca sarakalāpañca sannayhitvā’’ti. Yuddhasannivesena ṭhitanti dvinnaṃ senānaṃ byūhanasaṃvidhānanayena kato yo sanniveso, tassa vasena ṭhitaṃ, senābyūhasaṃvidhānavasena sanniviṭṭhanti vuttaṃ hoti. Ussāhañca vāyāmañca karotīti yujjhanavasena ussāhaṃ vāyāmañca karoti. Pariyāpādentīti maraṇapariyantikaṃ aparaṃ pāpenti. Tenāha ‘‘pariyāpādayantī’’ti, jīvitaṃ pariyāpādayanti maraṇaṃ paṭipajjāpentīti vuttaṃ hoti.
අරක්‌ඛිතෙනෙව කායෙනාතිආදීසු හත්‌ථපාදෙ කීළාපෙන්‌තො ගීවං විපරිවත්‌තෙන්‌තො කායං න රක්‌ඛති නාම. නානප්‌පකාරං දුට්‌ඨුල්‌ලං කරොන්‌තො වාචං න රක්‌ඛති නාම. කාමවිතක්‌කාදයො විතක්‌කෙන්‌තො චිත්‌තං න රක්‌ඛති නාම. අනුපට්‌ඨිතාය සතියාති කායගතාය සතියා අනුපට්‌ඨිතාය. රාගෙන අනුගතොති රාගෙන අනුපහතො. රාගපරෙතොති වා රාගෙන ඵුට්‌ඨො ඵුට්‌ඨවිසෙන විය සප්‌පෙන.
Arakkhitenevakāyenātiādīsu hatthapāde kīḷāpento gīvaṃ viparivattento kāyaṃ na rakkhati nāma. Nānappakāraṃ duṭṭhullaṃ karonto vācaṃ na rakkhati nāma. Kāmavitakkādayo vitakkento cittaṃ na rakkhati nāma. Anupaṭṭhitāya satiyāti kāyagatāya satiyā anupaṭṭhitāya. Rāgena anugatoti rāgena anupahato. Rāgaparetoti vā rāgena phuṭṭho phuṭṭhavisena viya sappena.
අනුදහනට්‌ඨෙනාති අනුපායප්‌පටිපත්‌තියා. සම්‌පති ආයතිඤ්‌ච මහාභිතාපට්‌ඨෙන. අනවත්‌ථිතසභාවතාය ඉත්‌තරපච්‌චුපට්‌ඨානට්‌ඨෙන. මුහුත්‌තරමණීයතාය තාවකාලිකට්‌ඨෙන. බ්‍යත්‌තෙහි අභිභවනීයතාය සබ්‌බඞ්‌ගපච්‌චඞ්‌ගපලිභඤ්‌ජනට්‌ඨෙන. ඡෙදනභෙදනාදිඅධිකරණභාවෙන උග්‌ඝට්‌ටනසදිසතාය අධිකුට්‌ටනට්‌ඨෙන. අවණෙ වණං උප්‌පාදෙත්‌වා අන්‌තො අනුපවිසනසභාවතාය විනිවිජ්‌ඣනට්‌ඨෙන. දිට්‌ඨධම්‌මිකසම්‌පරායික අනත්‌ථනිමිත්‌තතාය සාසඞ්‌කසප්‌පටිභයට්‌ඨෙන.
Anudahanaṭṭhenāti anupāyappaṭipattiyā. Sampati āyatiñca mahābhitāpaṭṭhena. Anavatthitasabhāvatāya ittarapaccupaṭṭhānaṭṭhena. Muhuttaramaṇīyatāya tāvakālikaṭṭhena. Byattehi abhibhavanīyatāya sabbaṅgapaccaṅgapalibhañjanaṭṭhena. Chedanabhedanādiadhikaraṇabhāvena ugghaṭṭanasadisatāya adhikuṭṭanaṭṭhena. Avaṇe vaṇaṃ uppādetvā anto anupavisanasabhāvatāya vinivijjhanaṭṭhena. Diṭṭhadhammikasamparāyika anatthanimittatāya sāsaṅkasappaṭibhayaṭṭhena.
දුතියයොධාජීවසුත්‌තවණ්‌ණනා නිට්‌ඨිතා.
Dutiyayodhājīvasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 6. දුතියයොධාජීවසුත්‌තං • 6. Dutiyayodhājīvasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 6. දුතියයොධාජීවසුත්‌තවණ්‌ණනා • 6. Dutiyayodhājīvasuttavaṇṇanā
