| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
8. து³ட்ட²தோ³ஸஸிக்கா²பத³ங்
8. Duṭṭhadosasikkhāpadaṃ
380. 1 தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆயஸ்மதா த³ப்³பே³ன மல்லபுத்தேன ஜாதியா ஸத்தவஸ்ஸேன அரஹத்தங் ஸச்சி²கதங் ஹோதி. யங் கிஞ்சி 2 ஸாவகேன பத்தப்³ப³ங் ஸப்³ப³ங் தேன அனுப்பத்தங் ஹோதி. நத்தி² சஸ்ஸ கிஞ்சி உத்தரி கரணீயங், கதஸ்ஸ வா பதிசயோ. அத² கோ² ஆயஸ்மதோ த³ப்³ப³ஸ்ஸ மல்லபுத்தஸ்ஸ ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘‘மயா கோ² ஜாதியா ஸத்தவஸ்ஸேன அரஹத்தங் ஸச்சி²கதங். யங் கிஞ்சி ஸாவகேன பத்தப்³ப³ங் ஸப்³ப³ங் மயா அனுப்பத்தங். நத்தி² ச மே கிஞ்சி உத்தரி கரணீயங், கதஸ்ஸ வா பதிசயோ. கின்னு கோ² அஹங் ஸங்க⁴ஸ்ஸ வெய்யாவச்சங் கரெய்ய’’ந்தி?
380.3 Tena samayena buddho bhagavā rājagahe viharati veḷuvane kalandakanivāpe. Tena kho pana samayena āyasmatā dabbena mallaputtena jātiyā sattavassena arahattaṃ sacchikataṃ hoti. Yaṃ kiñci 4 sāvakena pattabbaṃ sabbaṃ tena anuppattaṃ hoti. Natthi cassa kiñci uttari karaṇīyaṃ, katassa vā paticayo. Atha kho āyasmato dabbassa mallaputtassa rahogatassa paṭisallīnassa evaṃ cetaso parivitakko udapādi – ‘‘mayā kho jātiyā sattavassena arahattaṃ sacchikataṃ. Yaṃ kiñci sāvakena pattabbaṃ sabbaṃ mayā anuppattaṃ. Natthi ca me kiñci uttari karaṇīyaṃ, katassa vā paticayo. Kinnu kho ahaṃ saṅghassa veyyāvaccaṃ kareyya’’nti?
அத² கோ² ஆயஸ்மதோ த³ப்³ப³ஸ்ஸ மல்லபுத்தஸ்ஸ ஏதத³ஹோஸி – ‘‘யங்னூனாஹங் ஸங்க⁴ஸ்ஸ ஸேனாஸனஞ்ச பஞ்ஞபெய்யங் ப⁴த்தானி ச உத்³தி³ஸெய்ய’’ந்தி. அத² கோ² ஆயஸ்மா த³ப்³போ³ மல்லபுத்தோ ஸாயன்ஹஸமயங் படிஸல்லானா வுட்டி²தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா த³ப்³போ³ மல்லபுத்தோ ப⁴க³வந்தங் ஏதத³வோச – ‘‘இத⁴ மய்ஹங், ப⁴ந்தே, ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ மயா கோ² ஜாதியா ஸத்தவஸ்ஸேன அரஹத்தங் ஸச்சி²கதங், யங் கிஞ்சி ஸாவகேன பத்தப்³ப³ங், ஸப்³ப³ங் மயா அனுபத்தங், நத்தி² ச மே கிஞ்சி உத்தரி கரணீயங், கதஸ்ஸ வா பதிசயோ, கிங் நு கோ² அஹங் ஸங்க⁴ஸ்ஸ வெய்யாவச்சங் கரெய்ய’’ந்தி. தஸ்ஸ மய்ஹங் ப⁴ந்தே, ஏதத³ஹோஸி யங்னூனாஹங் ‘‘ஸங்க⁴ஸ்ஸ ஸேனாஸனஞ்ச பஞ்ஞபெய்யங் ப⁴த்தானி ச உத்³தி³ஸெய்யந்தி. இச்சா²மஹங், ப⁴ந்தே, ஸங்க⁴ஸ்ஸ ஸேனாஸனஞ்ச பஞ்ஞபேதுங் ப⁴த்தானி ச உத்³தி³ஸிது’’ந்தி. ‘‘ஸாது⁴ ஸாது⁴, த³ப்³ப³. தேன ஹி த்வங், த³ப்³ப³, ஸங்க⁴ஸ்ஸ ஸேனாஸனஞ்ச பஞ்ஞபேஹி ப⁴த்தானி ச உத்³தி³ஸா’’தி. ‘‘ஏவங், ப⁴ந்தே’’தி கோ² ஆயஸ்மா த³ப்³போ³ மல்லபுத்தோ ப⁴க³வதோ பச்சஸ்ஸோஸி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, ஸங்கோ⁴ த³ப்³ப³ங் மல்லபுத்தங் ஸேனாஸனபஞ்ஞாபகஞ்ச ப⁴த்துத்³தே³ஸகஞ்ச ஸம்மன்னது. ஏவஞ்ச பன, பி⁴க்க²வே, ஸம்மன்னிதப்³போ³. பட²மங் த³ப்³போ³ மல்லபுத்தோ யாசிதப்³போ³. யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
Atha kho āyasmato dabbassa mallaputtassa etadahosi – ‘‘yaṃnūnāhaṃ saṅghassa senāsanañca paññapeyyaṃ bhattāni ca uddiseyya’’nti. Atha kho āyasmā dabbo mallaputto sāyanhasamayaṃ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā dabbo mallaputto bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi mayā kho jātiyā sattavassena arahattaṃ sacchikataṃ, yaṃ kiñci sāvakena pattabbaṃ, sabbaṃ mayā anupattaṃ, natthi ca me kiñci uttari karaṇīyaṃ, katassa vā paticayo, kiṃ nu kho ahaṃ saṅghassa veyyāvaccaṃ kareyya’’nti. Tassa mayhaṃ bhante, etadahosi yaṃnūnāhaṃ ‘‘saṅghassa senāsanañca paññapeyyaṃ bhattāni ca uddiseyyanti. Icchāmahaṃ, bhante, saṅghassa senāsanañca paññapetuṃ bhattāni ca uddisitu’’nti. ‘‘Sādhu sādhu, dabba. Tena hi tvaṃ, dabba, saṅghassa senāsanañca paññapehi bhattāni ca uddisā’’ti. ‘‘Evaṃ, bhante’’ti kho āyasmā dabbo mallaputto bhagavato paccassosi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘tena hi, bhikkhave, saṅgho dabbaṃ mallaputtaṃ senāsanapaññāpakañca bhattuddesakañca sammannatu. Evañca pana, bhikkhave, sammannitabbo. Paṭhamaṃ dabbo mallaputto yācitabbo. Yācitvā byattena bhikkhunā paṭibalena saṅgho ñāpetabbo –
381. ‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லங் ஸங்கோ⁴ ஆயஸ்மந்தங் த³ப்³ப³ங் மல்லபுத்தங் ஸேனாஸனபஞ்ஞாபகஞ்ச ப⁴த்துத்³தே³ஸகஞ்ச ஸம்மன்னெய்ய. ஏஸா ஞத்தி.
381. ‘‘Suṇātu me, bhante, saṅgho. Yadi saṅghassa pattakallaṃ saṅgho āyasmantaṃ dabbaṃ mallaputtaṃ senāsanapaññāpakañca bhattuddesakañca sammanneyya. Esā ñatti.
‘‘ஸுணாது மே, ப⁴ந்தே, ஸங்கோ⁴. ஸங்கோ⁴ ஆயஸ்மந்தங் த³ப்³ப³ங் மல்லபுத்தங் ஸேனாஸனபஞ்ஞாபகஞ்ச ப⁴த்துத்³தே³ஸகஞ்ச ஸம்மன்னதி. யஸ்ஸாயஸ்மதோ க²மதி ஆயஸ்மதோ த³ப்³ப³ஸ்ஸ மல்லபுத்தஸ்ஸ ஸேனாஸனபஞ்ஞாபகஸ்ஸ ச ப⁴த்துத்³தே³ஸகஸ்ஸ ச ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Saṅgho āyasmantaṃ dabbaṃ mallaputtaṃ senāsanapaññāpakañca bhattuddesakañca sammannati. Yassāyasmato khamati āyasmato dabbassa mallaputtassa senāsanapaññāpakassa ca bhattuddesakassa ca sammuti, so tuṇhassa; yassa nakkhamati, so bhāseyya.
‘‘ஸம்மதோ ஸங்கே⁴ன ஆயஸ்மா த³ப்³போ³ மல்லபுத்தோ ஸேனாஸனபஞ்ஞாபகோ ச ப⁴த்துத்³தே³ஸகோ ச. க²மதி ஸங்க⁴ஸ்ஸ, தஸ்மா துண்ஹீ , ஏவமேதங் தா⁴ரயாமீ’’தி.
‘‘Sammato saṅghena āyasmā dabbo mallaputto senāsanapaññāpako ca bhattuddesako ca. Khamati saṅghassa, tasmā tuṇhī , evametaṃ dhārayāmī’’ti.
382. ஸம்மதோ ச பனாயஸ்மா த³ப்³போ³ மல்லபுத்தோ ஸபா⁴கா³னங் பி⁴க்கூ²னங் ஏகஜ்ஜ²ங் ஸேனாஸனங் பஞ்ஞபேதி. யே தே பி⁴க்கூ² ஸுத்தந்திகா தேஸங் ஏகஜ்ஜ²ங் ஸேனாஸனங் பஞ்ஞபேதி – ‘‘தே அஞ்ஞமஞ்ஞங் ஸுத்தந்தங் ஸங்கா³யிஸ்ஸந்தீ’’தி. யே தே பி⁴க்கூ² வினயத⁴ரா தேஸங் ஏகஜ்ஜ²ங் ஸேனாஸனங் பஞ்ஞபேதி – ‘‘தே அஞ்ஞமஞ்ஞங் வினயங் வினிச்சி²னிஸ்ஸந்தீ’’தி 5. யே தே பி⁴க்கூ² த⁴ம்மகதி²கா தேஸங் ஏகஜ்ஜ²ங் ஸேனாஸனங் பஞ்ஞபேதி – ‘‘தே அஞ்ஞமஞ்ஞங் த⁴ம்மங் ஸாகச்சி²ஸ்ஸந்தீ’’தி. யே தே பி⁴க்கூ² ஜா²யினோ தேஸங் ஏகஜ்ஜ²ங் ஸேனாஸனங் பஞ்ஞபேதி – ‘‘தே அஞ்ஞமஞ்ஞங் ந ப்³யாபா³தி⁴ஸ்ஸந்தீ’’தி 6. யே தே பி⁴க்கூ² திரச்சா²னகதி²கா காயத³ள்ஹிப³ஹுலா 7 விஹரந்தி தேஸம்பி ஏகஜ்ஜ²ங் ஸேனாஸனங் பஞ்ஞபேதி – ‘‘இமாயபிமே ஆயஸ்மந்தோ ரதியா அச்சி²ஸ்ஸந்தீ’’தி. யேபி தே பி⁴க்கூ² விகாலே ஆக³ச்ச²ந்தி தேஸம்பி தேஜோதா⁴துங் ஸமாபஜ்ஜித்வா தேனேவ ஆலோகேன ஸேனாஸனங் பஞ்ஞபேதி. அபிஸு பி⁴க்கூ² ஸஞ்சிச்ச விகாலே ஆக³ச்ச²ந்தி – ‘‘மயங் ஆயஸ்மதோ த³ப்³ப³ஸ்ஸ மல்லபுத்தஸ்ஸ இத்³தி⁴பாடிஹாரியங் பஸ்ஸிஸ்ஸாமா’’தி.
382. Sammato ca panāyasmā dabbo mallaputto sabhāgānaṃ bhikkhūnaṃ ekajjhaṃ senāsanaṃ paññapeti. Ye te bhikkhū suttantikā tesaṃ ekajjhaṃ senāsanaṃ paññapeti – ‘‘te aññamaññaṃ suttantaṃ saṅgāyissantī’’ti. Ye te bhikkhū vinayadharā tesaṃ ekajjhaṃ senāsanaṃ paññapeti – ‘‘te aññamaññaṃ vinayaṃ vinicchinissantī’’ti 8. Ye te bhikkhū dhammakathikā tesaṃ ekajjhaṃ senāsanaṃ paññapeti – ‘‘te aññamaññaṃ dhammaṃ sākacchissantī’’ti. Ye te bhikkhū jhāyino tesaṃ ekajjhaṃ senāsanaṃ paññapeti – ‘‘te aññamaññaṃ na byābādhissantī’’ti 9. Ye te bhikkhū tiracchānakathikā kāyadaḷhibahulā 10 viharanti tesampi ekajjhaṃ senāsanaṃ paññapeti – ‘‘imāyapime āyasmanto ratiyā acchissantī’’ti. Yepi te bhikkhū vikāle āgacchanti tesampi tejodhātuṃ samāpajjitvā teneva ālokena senāsanaṃ paññapeti. Apisu bhikkhū sañcicca vikāle āgacchanti – ‘‘mayaṃ āyasmato dabbassa mallaputtassa iddhipāṭihāriyaṃ passissāmā’’ti.
தே ஆயஸ்மந்தங் த³ப்³ப³ங் மல்லபுத்தங் உபஸங்கமித்வா ஏவங் வத³ந்தி – ‘‘அம்ஹாகங், ஆவுஸோ த³ப்³ப³, ஸேனாஸனங் பஞ்ஞபேஹீ’’தி. தே ஆயஸ்மா த³ப்³போ³ மல்லபுத்தோ ஏவங் வதே³தி – ‘‘கத்தா²யஸ்மந்தா இச்ச²ந்தி, கத்த² பஞ்ஞபேமீ’’தி? தே ஸஞ்சிச்ச தூ³ரே அபதி³ஸந்தி – ‘‘அம்ஹாகங், ஆவுஸோ த³ப்³ப³, கி³ஜ்ஜ²கூடே பப்³ப³தே ஸேனாஸனங் பஞ்ஞபேஹி. அம்ஹாகங், ஆவுஸோ, சோரபபாதே ஸேனாஸனங் பஞ்ஞபேஹி. அம்ஹாகங், ஆவுஸோ, இஸிகி³லிபஸ்ஸே காளஸிலாயங் ஸேனாஸனங் பஞ்ஞபேஹி. அம்ஹாகங், ஆவுஸோ, வேபா⁴ரபஸ்ஸே ஸத்தபண்ணிகு³ஹாயங் ஸேனாஸனங் பஞ்ஞபேஹி. அம்ஹாகங், ஆவுஸோ, ஸீதவனே ஸப்பஸொண்டி³கபப்³பா⁴ரே ஸேனாஸனங் பஞ்ஞபேஹி. அம்ஹாகங், ஆவுஸோ, கோ³தமககந்த³ராயங் ஸேனாஸனங் பஞ்ஞபேஹி. அம்ஹாகங், ஆவுஸோ, திந்து³ககந்த³ராயங் ஸேனாஸனங் பஞ்ஞபேஹி. அம்ஹாகங், ஆவுஸோ, தபோத³கந்த³ராயங் ஸேனாஸனங் பஞ்ஞபேஹி. அம்ஹாகங், ஆவுஸோ, தபோதா³ராமே ஸேனாஸனங் பஞ்ஞபேஹி. அம்ஹாகங், ஆவுஸோ, ஜீவகம்ப³வனே ஸேனாஸனங் பஞ்ஞபேஹி. அம்ஹாகங், ஆவுஸோ, மத்³த³குச்சி²ஸ்மிங் மிக³தா³யே ஸேனாஸனங் பஞ்ஞபேஹீ’’தி.
Te āyasmantaṃ dabbaṃ mallaputtaṃ upasaṅkamitvā evaṃ vadanti – ‘‘amhākaṃ, āvuso dabba, senāsanaṃ paññapehī’’ti. Te āyasmā dabbo mallaputto evaṃ vadeti – ‘‘katthāyasmantā icchanti, kattha paññapemī’’ti? Te sañcicca dūre apadisanti – ‘‘amhākaṃ, āvuso dabba, gijjhakūṭe pabbate senāsanaṃ paññapehi. Amhākaṃ, āvuso, corapapāte senāsanaṃ paññapehi. Amhākaṃ, āvuso, isigilipasse kāḷasilāyaṃ senāsanaṃ paññapehi. Amhākaṃ, āvuso, vebhārapasse sattapaṇṇiguhāyaṃ senāsanaṃ paññapehi. Amhākaṃ, āvuso, sītavane sappasoṇḍikapabbhāre senāsanaṃ paññapehi. Amhākaṃ, āvuso, gotamakakandarāyaṃ senāsanaṃ paññapehi. Amhākaṃ, āvuso, tindukakandarāyaṃ senāsanaṃ paññapehi. Amhākaṃ, āvuso, tapodakandarāyaṃ senāsanaṃ paññapehi. Amhākaṃ, āvuso, tapodārāme senāsanaṃ paññapehi. Amhākaṃ, āvuso, jīvakambavane senāsanaṃ paññapehi. Amhākaṃ, āvuso, maddakucchismiṃ migadāye senāsanaṃ paññapehī’’ti.
தேஸங் ஆயஸ்மா த³ப்³போ³ மல்லபுத்தோ தேஜோதா⁴துங் ஸமாபஜ்ஜித்வா அங்கு³லியா ஜலமானாய புரதோ புரதோ க³ச்ச²தி. தேபி தேனேவ ஆலோகேன ஆயஸ்மதோ த³ப்³ப³ஸ்ஸ மல்லபுத்தஸ்ஸ பிட்டி²தோ பிட்டி²தோ க³ச்ச²ந்தி. தேஸங் ஆயஸ்மா த³ப்³போ³ மல்லபுத்தோ ஏவங் ஸேனாஸனங் பஞ்ஞபேதி – ‘‘அயங் மஞ்சோ, இத³ங் பீட²ங், அயங் பி⁴ஸி, இத³ங் பி³ம்போ³ஹனங், இத³ங் வச்சட்டா²னங், இத³ங் பஸ்ஸாவட்டா²னங் , இத³ங் பானீயங், இத³ங் பரிபோ⁴ஜனீயங், அயங் கத்தரத³ண்டோ³, இத³ங் ஸங்க⁴ஸ்ஸ கதிகஸண்டா²னங், இமங் காலங் பவிஸிதப்³ப³ங், இமங் காலங் நிக்க²மிதப்³ப³’’ந்தி. தேஸங் ஆயஸ்மா த³ப்³போ³ மல்லபுத்தோ ஏவங் ஸேனாஸனங் பஞ்ஞபெத்வா புனதே³வ வேளுவனங் பச்சாக³ச்ச²தி.
Tesaṃ āyasmā dabbo mallaputto tejodhātuṃ samāpajjitvā aṅguliyā jalamānāya purato purato gacchati. Tepi teneva ālokena āyasmato dabbassa mallaputtassa piṭṭhito piṭṭhito gacchanti. Tesaṃ āyasmā dabbo mallaputto evaṃ senāsanaṃ paññapeti – ‘‘ayaṃ mañco, idaṃ pīṭhaṃ, ayaṃ bhisi, idaṃ bimbohanaṃ, idaṃ vaccaṭṭhānaṃ, idaṃ passāvaṭṭhānaṃ , idaṃ pānīyaṃ, idaṃ paribhojanīyaṃ, ayaṃ kattaradaṇḍo, idaṃ saṅghassa katikasaṇṭhānaṃ, imaṃ kālaṃ pavisitabbaṃ, imaṃ kālaṃ nikkhamitabba’’nti. Tesaṃ āyasmā dabbo mallaputto evaṃ senāsanaṃ paññapetvā punadeva veḷuvanaṃ paccāgacchati.
383. தேன கோ² பன ஸமயேன மெத்தியபூ⁴மஜகா 11 பி⁴க்கூ² நவகா சேவ ஹொந்தி அப்பபுஞ்ஞா ச. யானி ஸங்க⁴ஸ்ஸ லாமகானி ஸேனாஸனானி தானி தேஸங் பாபுணந்தி லாமகானி ச ப⁴த்தானி. தேன கோ² பன ஸமயேன ராஜக³ஹே மனுஸ்ஸா இச்ச²ந்தி தே²ரானங் பி⁴க்கூ²னங் அபி⁴ஸங்கா²ரிகங் பிண்ட³பாதங் தா³துங் ஸப்பிம்பி தேலம்பி உத்தரிப⁴ங்க³ம்பி. மெத்தியபூ⁴மஜகானங் பன பி⁴க்கூ²னங் பாகதிகங் தெ³ந்தி யதா²ரந்த⁴ங் கணாஜகங் பி³லங்க³து³தியங். தே பச்சா²ப⁴த்தங் பிண்ட³பாதப்படிக்கந்தா தே²ரே பி⁴க்கூ² புச்ச²ந்தி – ‘‘தும்ஹாகங், ஆவுஸோ, ப⁴த்தக்³கே³ கிங் அஹோஸி? தும்ஹாகங், ஆவுஸோ, ப⁴த்தக்³கே³ கிங் அஹோஸீ’’தி? ஏகச்சே தே²ரா ஏவங் வத³ந்தி – ‘‘அம்ஹாகங், ஆவுஸோ, ஸப்பி அஹோஸி தேலங் அஹோஸி உத்தரிப⁴ங்க³ங் அஹோஸீ’’தி. மெத்தியபூ⁴மஜகா பன பி⁴க்கூ² ஏவங் வத³ந்தி – ‘‘அம்ஹாகங், ஆவுஸோ, ந கிஞ்சி அஹோஸி, பாகதிகங் யதா²ரந்த⁴ங் கணாஜகங் பி³லங்க³து³திய’’ந்தி.
383. Tena kho pana samayena mettiyabhūmajakā 12 bhikkhū navakā ceva honti appapuññā ca. Yāni saṅghassa lāmakāni senāsanāni tāni tesaṃ pāpuṇanti lāmakāni ca bhattāni. Tena kho pana samayena rājagahe manussā icchanti therānaṃ bhikkhūnaṃ abhisaṅkhārikaṃ piṇḍapātaṃ dātuṃ sappimpi telampi uttaribhaṅgampi. Mettiyabhūmajakānaṃ pana bhikkhūnaṃ pākatikaṃ denti yathārandhaṃ kaṇājakaṃ bilaṅgadutiyaṃ. Te pacchābhattaṃ piṇḍapātappaṭikkantā there bhikkhū pucchanti – ‘‘tumhākaṃ, āvuso, bhattagge kiṃ ahosi? Tumhākaṃ, āvuso, bhattagge kiṃ ahosī’’ti? Ekacce therā evaṃ vadanti – ‘‘amhākaṃ, āvuso, sappi ahosi telaṃ ahosi uttaribhaṅgaṃ ahosī’’ti. Mettiyabhūmajakā pana bhikkhū evaṃ vadanti – ‘‘amhākaṃ, āvuso, na kiñci ahosi, pākatikaṃ yathārandhaṃ kaṇājakaṃ bilaṅgadutiya’’nti.
தேன கோ² பன ஸமயேன கல்யாணப⁴த்திகோ க³ஹபதி ஸங்க⁴ஸ்ஸ சதுக்கப⁴த்தங் தே³தி நிச்சப⁴த்தங். ஸோ ப⁴த்தக்³கே³ ஸபுத்ததா³ரோ உபதிட்டி²த்வா பரிவிஸதி . அஞ்ஞே ஓத³னேன புச்ச²ந்தி, அஞ்ஞே ஸூபேன புச்ச²ந்தி, அஞ்ஞே தேலேன புச்ச²ந்தி, அஞ்ஞே உத்தரிப⁴ங்கே³ன புச்ச²ந்தி. தேன கோ² பன ஸமயேன கல்யாணப⁴த்திகஸ்ஸ க³ஹபதினோ ப⁴த்தங் ஸ்வாதனாய மெத்தியபூ⁴மஜகானங் பி⁴க்கூ²னங் உத்³தி³ட்ட²ங் ஹோதி. அத² கோ² கல்யாணப⁴த்திகோ க³ஹபதி ஆராமங் அக³மாஸி கேனசிதே³வ கரணீயேன. ஸோ யேனாயஸ்மா த³ப்³போ³ மல்லபுத்தோ தேனுபஸங்கமி; உபஸங்கமித்வா ஆயஸ்மந்தங் த³ப்³ப³ங் மல்லபுத்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² கல்யாணப⁴த்திகங் க³ஹபதிங் ஆயஸ்மா த³ப்³போ³ மல்லபுத்தோ த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² கல்யாணப⁴த்திகோ க³ஹபதி ஆயஸ்மதா த³ப்³பே³ன மல்லபுத்தேன த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹங்ஸிதோ ஆயஸ்மந்தங் த³ப்³ப³ங் மல்லபுத்தங் ஏதத³வோச – ‘‘கஸ்ஸ, ப⁴ந்தே, அம்ஹாகங் க⁴ரே ஸ்வாதனாய ப⁴த்தங் உத்³தி³ட்ட²’’ந்தி? ‘‘மெத்தியபூ⁴மஜகானங் கோ², க³ஹபதி, பி⁴க்கூ²னங் தும்ஹாகங் க⁴ரே ஸ்வாதனாய ப⁴த்தங் உத்³தி³ட்ட²’’ந்தி. அத² கோ² கல்யாணப⁴த்திகோ க³ஹபதி அனத்தமனோ அஹோஸி – ‘‘கத²ஞ்ஹி நாம பாபபி⁴க்கூ² அம்ஹாகங் க⁴ரே பு⁴ஞ்ஜிஸ்ஸந்தீ’’தி! க⁴ரங் க³ந்த்வா தா³ஸிங் ஆணாபேஸி – ‘‘யே, ஜே, ஸ்வே ப⁴த்திகா ஆக³ச்ச²ந்தி தே கொட்ட²கே ஆஸனங் பஞ்ஞபெத்வா கணாஜகேன பி³லங்க³து³தியேன பரிவிஸா’’தி. ‘‘ஏவங் அய்யா’’தி கோ² ஸா தா³ஸீ கல்யாணப⁴த்திகஸ்ஸ க³ஹபதினோ பச்சஸ்ஸோஸி.
Tena kho pana samayena kalyāṇabhattiko gahapati saṅghassa catukkabhattaṃ deti niccabhattaṃ. So bhattagge saputtadāro upatiṭṭhitvā parivisati . Aññe odanena pucchanti, aññe sūpena pucchanti, aññe telena pucchanti, aññe uttaribhaṅgena pucchanti. Tena kho pana samayena kalyāṇabhattikassa gahapatino bhattaṃ svātanāya mettiyabhūmajakānaṃ bhikkhūnaṃ uddiṭṭhaṃ hoti. Atha kho kalyāṇabhattiko gahapati ārāmaṃ agamāsi kenacideva karaṇīyena. So yenāyasmā dabbo mallaputto tenupasaṅkami; upasaṅkamitvā āyasmantaṃ dabbaṃ mallaputtaṃ abhivādetvā ekamantaṃ nisīdi. Ekamantaṃ nisinnaṃ kho kalyāṇabhattikaṃ gahapatiṃ āyasmā dabbo mallaputto dhammiyā kathāya sandassesi samādapesi samuttejesi sampahaṃsesi. Atha kho kalyāṇabhattiko gahapati āyasmatā dabbena mallaputtena dhammiyā kathāya sandassito samādapito samuttejito sampahaṃsito āyasmantaṃ dabbaṃ mallaputtaṃ etadavoca – ‘‘kassa, bhante, amhākaṃ ghare svātanāya bhattaṃ uddiṭṭha’’nti? ‘‘Mettiyabhūmajakānaṃ kho, gahapati, bhikkhūnaṃ tumhākaṃ ghare svātanāya bhattaṃ uddiṭṭha’’nti. Atha kho kalyāṇabhattiko gahapati anattamano ahosi – ‘‘kathañhi nāma pāpabhikkhū amhākaṃ ghare bhuñjissantī’’ti! Gharaṃ gantvā dāsiṃ āṇāpesi – ‘‘ye, je, sve bhattikā āgacchanti te koṭṭhake āsanaṃ paññapetvā kaṇājakena bilaṅgadutiyena parivisā’’ti. ‘‘Evaṃ ayyā’’ti kho sā dāsī kalyāṇabhattikassa gahapatino paccassosi.
அத² கோ² மெத்தியபூ⁴மஜகா பி⁴க்கூ² – ‘‘ஹிய்யோ கோ², ஆவுஸோ, அம்ஹாகங் கல்யாணப⁴த்திகஸ்ஸ க³ஹபதினோ க⁴ரே ப⁴த்தங் உத்³தி³ட்ட²ங், ஸ்வே அம்ஹே கல்யாணப⁴த்திகோ க³ஹபதி ஸபுத்ததா³ரோ உபதிட்டி²த்வா பரிவிஸிஸ்ஸதி; அஞ்ஞே ஓத³னேன புச்சி²ஸ்ஸந்தி, அஞ்ஞே ஸூபேன புச்சி²ஸ்ஸந்தி, அஞ்ஞே தேலேன புச்சி²ஸ்ஸந்தி, அஞ்ஞே உத்தரிப⁴ங்கே³ன புச்சி²ஸ்ஸந்தீ’’தி. தே தேனேவ ஸோமனஸ்ஸேன ந சித்தரூபங் ரத்தியா ஸுபிங்ஸு. அத² கோ² மெத்தியபூ⁴மஜகா பி⁴க்கூ² புப்³ப³ண்ஹஸமயங் நிவாஸெத்வா பத்தசீவரங் ஆதா³ய யேன கல்யாணப⁴த்திகஸ்ஸ க³ஹபதினோ நிவேஸனங் தேனுபஸங்கமிங்ஸு. அத்³த³ஸா கோ² ஸா தா³ஸீ மெத்தியபூ⁴மஜகே பி⁴க்கூ² தூ³ரதோவ ஆக³ச்ச²ந்தே. தி³ஸ்வான கொட்ட²கே ஆஸனங் பஞ்ஞபெத்வா மெத்தியபூ⁴மஜகே பி⁴க்கூ² ஏதத³வோச – ‘‘நிஸீத³த², ப⁴ந்தே’’தி. அத² கோ² மெத்தியபூ⁴மஜகானங் பி⁴க்கூ²னங் ஏதத³ஹோஸி – ‘‘நிஸ்ஸங்ஸயங் கோ² ந தாவ ப⁴த்தங் ஸித்³த⁴ங் ப⁴விஸ்ஸதி! யதா² 13 மயங் கொட்ட²கே நிஸீதெ³ய்யாமா’’தி 14. அத² கோ² ஸா தா³ஸீ கணாஜகேன பி³லங்க³து³தியேன உபக³ச்சி² – ‘‘பு⁴ஞ்ஜத², ப⁴ந்தே’’தி. ‘‘மயங் கோ², ப⁴கி³னி, நிச்சப⁴த்திகா’’தி. ‘‘ஜானாமி அய்யா நிச்சப⁴த்திகாத்த². அபிசாஹங் ஹிய்யோவ க³ஹபதினா ஆணத்தா – ‘யே, ஜே, ஸ்வே ப⁴த்திகா ஆக³ச்ச²ந்தி தே கொட்ட²கே ஆஸனங் பஞ்ஞபெத்வா கணாஜகேன பி³லங்க³து³தியேன பரிவிஸா’தி. பு⁴ஞ்ஜத², ப⁴ந்தே’’தி. அத² கோ² மெத்தியபூ⁴மஜகா பி⁴க்கூ² – ‘‘ஹிய்யோ கோ², ஆவுஸோ, கல்யாணப⁴த்திகோ க³ஹபதி ஆராமங் அக³மாஸி த³ப்³ப³ஸ்ஸ மல்லபுத்தஸ்ஸ ஸந்திகே. நிஸ்ஸங்ஸயங் கோ² மயங் த³ப்³பே³ன மல்லபுத்தேன க³ஹபதினோ அந்தரே 15 பரிபி⁴ன்னா’’தி. தே தேனேவ தோ³மனஸ்ஸேன ந சித்தரூபங் பு⁴ஞ்ஜிங்ஸு. அத² கோ² மெத்தியபூ⁴மஜகா பி⁴க்கூ² பச்சா²ப⁴த்தங் பிண்ட³பாதப்படிக்கந்தா ஆராமங் க³ந்த்வா பத்தசீவரங் படிஸாமெத்வா ப³ஹாராமகொட்ட²கே ஸங்கா⁴டிபல்லத்தி²காய நிஸீதி³ங்ஸு துண்ஹீபூ⁴தா மங்குபூ⁴தா பத்தக்க²ந்தா⁴ அதோ⁴முகா² பஜ்ஜா²யந்தா அப்படிபா⁴னா.
Atha kho mettiyabhūmajakā bhikkhū – ‘‘hiyyo kho, āvuso, amhākaṃ kalyāṇabhattikassa gahapatino ghare bhattaṃ uddiṭṭhaṃ, sve amhe kalyāṇabhattiko gahapati saputtadāro upatiṭṭhitvā parivisissati; aññe odanena pucchissanti, aññe sūpena pucchissanti, aññe telena pucchissanti, aññe uttaribhaṅgena pucchissantī’’ti. Te teneva somanassena na cittarūpaṃ rattiyā supiṃsu. Atha kho mettiyabhūmajakā bhikkhū pubbaṇhasamayaṃ nivāsetvā pattacīvaraṃ ādāya yena kalyāṇabhattikassa gahapatino nivesanaṃ tenupasaṅkamiṃsu. Addasā kho sā dāsī mettiyabhūmajake bhikkhū dūratova āgacchante. Disvāna koṭṭhake āsanaṃ paññapetvā mettiyabhūmajake bhikkhū etadavoca – ‘‘nisīdatha, bhante’’ti. Atha kho mettiyabhūmajakānaṃ bhikkhūnaṃ etadahosi – ‘‘nissaṃsayaṃ kho na tāva bhattaṃ siddhaṃ bhavissati! Yathā 16 mayaṃ koṭṭhake nisīdeyyāmā’’ti 17. Atha kho sā dāsī kaṇājakena bilaṅgadutiyena upagacchi – ‘‘bhuñjatha, bhante’’ti. ‘‘Mayaṃ kho, bhagini, niccabhattikā’’ti. ‘‘Jānāmi ayyā niccabhattikāttha. Apicāhaṃ hiyyova gahapatinā āṇattā – ‘ye, je, sve bhattikā āgacchanti te koṭṭhake āsanaṃ paññapetvā kaṇājakena bilaṅgadutiyena parivisā’ti. Bhuñjatha, bhante’’ti. Atha kho mettiyabhūmajakā bhikkhū – ‘‘hiyyo kho, āvuso, kalyāṇabhattiko gahapati ārāmaṃ agamāsi dabbassa mallaputtassa santike. Nissaṃsayaṃ kho mayaṃ dabbena mallaputtena gahapatino antare 18 paribhinnā’’ti. Te teneva domanassena na cittarūpaṃ bhuñjiṃsu. Atha kho mettiyabhūmajakā bhikkhū pacchābhattaṃ piṇḍapātappaṭikkantā ārāmaṃ gantvā pattacīvaraṃ paṭisāmetvā bahārāmakoṭṭhake saṅghāṭipallatthikāya nisīdiṃsu tuṇhībhūtā maṅkubhūtā pattakkhandhā adhomukhā pajjhāyantā appaṭibhānā.
அத² கோ² மெத்தியா பி⁴க்கு²னீ யேன மெத்தியபூ⁴மஜகா பி⁴க்கூ² தேனுபஸங்கமி; உபஸங்கமித்வா மெத்தியபூ⁴மஜகே பி⁴க்கூ² ஏதத³வோச – ‘‘வந்தா³மி, அய்யா’’தி. ஏவங் வுத்தே மெத்தியபூ⁴மஜகா பி⁴க்கூ² நாலபிங்ஸு. து³தியம்பி கோ²…பே॰… ததியம்பி கோ² மெத்தியா பி⁴க்கு²னீ மெத்தியபூ⁴மஜகே பி⁴க்கூ² ஏதத³வோச – ‘‘வந்தா³மி, அய்யா’’தி. ததியம்பி கோ² மெத்தியபூ⁴மஜகா பி⁴க்கூ² நாலபிங்ஸு. ‘‘க்யாஹங் அய்யானங் அபரஜ்ஜா²மி? கிஸ்ஸ மங் அய்யா நாலபந்தீ’’தி? ‘‘ததா² ஹி பன த்வங், ப⁴கி³னி, அம்ஹே த³ப்³பே³ன மல்லபுத்தேன விஹேடீ²யமானே அஜ்ஜு²பெக்க²ஸீ’’தி? ‘‘க்யாஹங், அய்யா, கரோமீ’’தி? ‘‘ஸசே கோ² த்வங், ப⁴கி³னி, இச்செ²ய்யாஸி அஜ்ஜேவ ப⁴க³வா த³ப்³ப³ங் மல்லபுத்தங் நாஸாபெய்யா’’தி. ‘‘க்யாஹங், அய்யா, கரோமி, கிங் மயா ஸக்கா காது’’ந்தி? ‘‘ஏஹி த்வங், ப⁴கி³னி, யேன ப⁴க³வா தேனுபஸங்கம; உபஸங்கமித்வா ப⁴க³வந்தங் ஏவங் வதே³ஹி – ‘இத³ங், ப⁴ந்தே, நச்ச²ன்னங் நப்பதிரூபங். யாயங், ப⁴ந்தே, தி³ஸா அப⁴யா அனீதிகா அனுபத்³த³வா ஸாயங் தி³ஸா ஸப⁴யா ஸஈதிகா ஸஉபத்³த³வா. யதோ நிவாதங் ததோ ஸவாதங் 19. உத³கங் மஞ்ஞே ஆதி³த்தங். அய்யேனம்ஹி த³ப்³பே³ன மல்லபுத்தேன தூ³ஸிதா’’’தி. ‘‘ஏவங், அய்யா’’தி கோ² மெத்தியா பி⁴க்கு²னீ மெத்தியபூ⁴மஜகானங் பி⁴க்கூ²னங் படிஸ்ஸுத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தா கோ² மெத்தியா பி⁴க்கு²னீ ப⁴க³வந்தங் ஏதத³வோச – ‘‘இத³ங், ப⁴ந்தே, நச்ச²ன்னங் நப்பதிரூபங். யாயங், ப⁴ந்தே, தி³ஸா அப⁴யா அனீதிகா அனுபத்³த³வா ஸாயங் தி³ஸா ஸப⁴யா ஸஈதிகா ஸஉபத்³த³வா. யதோ நிவாதங் ததோ ஸவாதங். உத³கங் மஞ்ஞே ஆதி³த்தங்! அய்யேனம்ஹி த³ப்³பே³ன மல்லபுத்தேன தூ³ஸிதா’’தி.
Atha kho mettiyā bhikkhunī yena mettiyabhūmajakā bhikkhū tenupasaṅkami; upasaṅkamitvā mettiyabhūmajake bhikkhū etadavoca – ‘‘vandāmi, ayyā’’ti. Evaṃ vutte mettiyabhūmajakā bhikkhū nālapiṃsu. Dutiyampi kho…pe… tatiyampi kho mettiyā bhikkhunī mettiyabhūmajake bhikkhū etadavoca – ‘‘vandāmi, ayyā’’ti. Tatiyampi kho mettiyabhūmajakā bhikkhū nālapiṃsu. ‘‘Kyāhaṃ ayyānaṃ aparajjhāmi? Kissa maṃ ayyā nālapantī’’ti? ‘‘Tathā hi pana tvaṃ, bhagini, amhe dabbena mallaputtena viheṭhīyamāne ajjhupekkhasī’’ti? ‘‘Kyāhaṃ, ayyā, karomī’’ti? ‘‘Sace kho tvaṃ, bhagini, iccheyyāsi ajjeva bhagavā dabbaṃ mallaputtaṃ nāsāpeyyā’’ti. ‘‘Kyāhaṃ, ayyā, karomi, kiṃ mayā sakkā kātu’’nti? ‘‘Ehi tvaṃ, bhagini, yena bhagavā tenupasaṅkama; upasaṅkamitvā bhagavantaṃ evaṃ vadehi – ‘idaṃ, bhante, nacchannaṃ nappatirūpaṃ. Yāyaṃ, bhante, disā abhayā anītikā anupaddavā sāyaṃ disā sabhayā saītikā saupaddavā. Yato nivātaṃ tato savātaṃ 20. Udakaṃ maññe ādittaṃ. Ayyenamhi dabbena mallaputtena dūsitā’’’ti. ‘‘Evaṃ, ayyā’’ti kho mettiyā bhikkhunī mettiyabhūmajakānaṃ bhikkhūnaṃ paṭissutvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho mettiyā bhikkhunī bhagavantaṃ etadavoca – ‘‘idaṃ, bhante, nacchannaṃ nappatirūpaṃ. Yāyaṃ, bhante, disā abhayā anītikā anupaddavā sāyaṃ disā sabhayā saītikā saupaddavā. Yato nivātaṃ tato savātaṃ. Udakaṃ maññe ādittaṃ! Ayyenamhi dabbena mallaputtena dūsitā’’ti.
384. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா ஆயஸ்மந்தங் த³ப்³ப³ங் மல்லபுத்தங் படிபுச்சி² – ‘‘ஸரஸி த்வங், த³ப்³ப³, ஏவரூபங் கத்தா யதா²யங் பி⁴க்கு²னீ ஆஹா’’தி? ‘‘யதா² மங், ப⁴ந்தே, ப⁴க³வா ஜானாதீ’’தி. து³தியம்பி கோ² ப⁴க³வா…பே॰… ததியம்பி கோ² ப⁴க³வா ஆயஸ்மந்தங் த³ப்³ப³ங் மல்லபுத்தங் ஏதத³வோச – ‘‘ஸரஸி த்வங், த³ப்³ப³, ஏவரூபங் கத்தா யதா²யங் பி⁴க்கு²னீ ஆஹா’’தி? ‘‘யதா² மங், ப⁴ந்தே, ப⁴க³வா ஜானாதீ’’தி. ‘‘ந கோ², த³ப்³ப³, த³ப்³பா³ ஏவங் நிப்³பே³டெ²ந்தி. ஸசே தயா கதங் கதந்தி வதே³ஹி, ஸசே தயா அகதங் அகதந்தி வதே³ஹீ’’தி. ‘‘யதோ அஹங், ப⁴ந்தே, ஜாதோ நாபி⁴ஜானாமி ஸுபினந்தேனபி மேது²னங் த⁴ம்மங் படிஸேவிதா, பகே³வ ஜாக³ரோ’’தி! அத² கோ² ப⁴க³வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, மெத்தியங் பி⁴க்கு²னிங் நாஸேத² . இமே ச பி⁴க்கூ² அனுயுஞ்ஜதா²’’தி. இத³ங் வத்வா ப⁴க³வா உட்டா²யாஸனா விஹாரங் பாவிஸி.
384. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ dabbaṃ mallaputtaṃ paṭipucchi – ‘‘sarasi tvaṃ, dabba, evarūpaṃ kattā yathāyaṃ bhikkhunī āhā’’ti? ‘‘Yathā maṃ, bhante, bhagavā jānātī’’ti. Dutiyampi kho bhagavā…pe… tatiyampi kho bhagavā āyasmantaṃ dabbaṃ mallaputtaṃ etadavoca – ‘‘sarasi tvaṃ, dabba, evarūpaṃ kattā yathāyaṃ bhikkhunī āhā’’ti? ‘‘Yathā maṃ, bhante, bhagavā jānātī’’ti. ‘‘Na kho, dabba, dabbā evaṃ nibbeṭhenti. Sace tayā kataṃ katanti vadehi, sace tayā akataṃ akatanti vadehī’’ti. ‘‘Yato ahaṃ, bhante, jāto nābhijānāmi supinantenapi methunaṃ dhammaṃ paṭisevitā, pageva jāgaro’’ti! Atha kho bhagavā bhikkhū āmantesi – ‘‘tena hi, bhikkhave, mettiyaṃ bhikkhuniṃ nāsetha . Ime ca bhikkhū anuyuñjathā’’ti. Idaṃ vatvā bhagavā uṭṭhāyāsanā vihāraṃ pāvisi.
அத² கோ² தே பி⁴க்கூ² மெத்தியங் பி⁴க்கு²னிங் நாஸேஸுங். அத² கோ² மெத்தியபூ⁴மஜகா பி⁴க்கூ² தே பி⁴க்கூ² ஏதத³வோசுங் – ‘‘மாவுஸோ, மெத்தியங் பி⁴க்கு²னிங் நாஸேத². ந ஸா கிஞ்சி அபரஜ்ஜ²தி. அம்ஹேஹி ஸா உஸ்ஸாஹிதா குபிதேஹி அனத்தமனேஹி சாவனாதி⁴ப்பாயேஹீ’’தி. ‘‘கிங் பன தும்ஹே, ஆவுஸோ, ஆயஸ்மந்தங் த³ப்³ப³ங் மல்லபுத்தங் அமூலகேன பாராஜிகேன த⁴ம்மேன அனுத்³த⁴ங்ஸேதா²’’தி? ‘‘ஏவமாவுஸோ’’தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம மெத்தியபூ⁴மஜகா பி⁴க்கூ² ஆயஸ்மந்தங் த³ப்³ப³ங் மல்லபுத்தங் அமூலகேன பாராஜிகேன த⁴ம்மேன அனுத்³த⁴ங்ஸெஸ்ஸந்தீ’’தி! அத² கோ² தே பி⁴க்கூ² மெத்தியபூ⁴மஜகே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர தும்ஹே, பி⁴க்க²வே, த³ப்³ப³ங் மல்லபுத்தங் அமூலகேன பாராஜிகேன த⁴ம்மேன அனுத்³த⁴ங்ஸேதா²’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… ‘‘கத²ஞ்ஹி நாம தும்ஹே, மோக⁴புரிஸா, த³ப்³ப³ங் மல்லபுத்தங் அமூலகேன பாராஜிகேன த⁴ம்மேன அனுத்³த⁴ங்ஸெஸ்ஸத²! நேதங், மோக⁴புரிஸா, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
Atha kho te bhikkhū mettiyaṃ bhikkhuniṃ nāsesuṃ. Atha kho mettiyabhūmajakā bhikkhū te bhikkhū etadavocuṃ – ‘‘māvuso, mettiyaṃ bhikkhuniṃ nāsetha. Na sā kiñci aparajjhati. Amhehi sā ussāhitā kupitehi anattamanehi cāvanādhippāyehī’’ti. ‘‘Kiṃ pana tumhe, āvuso, āyasmantaṃ dabbaṃ mallaputtaṃ amūlakena pārājikena dhammena anuddhaṃsethā’’ti? ‘‘Evamāvuso’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma mettiyabhūmajakā bhikkhū āyasmantaṃ dabbaṃ mallaputtaṃ amūlakena pārājikena dhammena anuddhaṃsessantī’’ti! Atha kho te bhikkhū mettiyabhūmajake bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, dabbaṃ mallaputtaṃ amūlakena pārājikena dhammena anuddhaṃsethā’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma tumhe, moghapurisā, dabbaṃ mallaputtaṃ amūlakena pārājikena dhammena anuddhaṃsessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
385. யோ பன பி⁴க்கு² பி⁴க்கு²ங் து³ட்டோ² தோ³ஸோ அப்பதீதோ அமூலகேன பாராஜிகேன த⁴ம்மேன அனுத்³த⁴ங்ஸெய்ய – ‘அப்பேவ நாம நங் இமம்ஹா ப்³ரஹ்மசரியா சாவெய்ய’ந்தி, ததோ அபரேன ஸமயேன ஸமனுக்³கா³ஹீயமானோ வா அஸமனுக்³கா³ஹீயமானோ வா அமூலகஞ்சேவ தங் அதி⁴கரணங் ஹோதி பி⁴க்கு² ச தோ³ஸங் பதிட்டா²தி, ஸங்கா⁴தி³ஸேஸோ’’தி.
385.Yo pana bhikkhu bhikkhuṃ duṭṭho doso appatīto amūlakena pārājikena dhammena anuddhaṃseyya – ‘appeva nāma naṃ imamhā brahmacariyā cāveyya’nti, tato aparena samayena samanuggāhīyamāno vā asamanuggāhīyamāno vā amūlakañceva taṃ adhikaraṇaṃ hoti bhikkhu ca dosaṃ patiṭṭhāti, saṅghādiseso’’ti.
386. யோ பனாதி யோ யாதி³ஸோ…பே॰… பி⁴க்கூ²தி…பே॰… அயங் இமஸ்மிங் அத்தே² அதி⁴ப்பேதோ பி⁴க்கூ²தி.
386.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
பி⁴க்கு²ந்தி அஞ்ஞங் பி⁴க்கு²ங்.
Bhikkhunti aññaṃ bhikkhuṃ.
து³ட்டோ² தோ³ஸோதி குபிதோ அனத்தமனோ அனபி⁴ரத்³தோ⁴ ஆஹதசித்தோ கி²லஜாதோ.
Duṭṭho dosoti kupito anattamano anabhiraddho āhatacitto khilajāto.
அப்பதீதோதி தேன ச கோபேன தேன ச தோ³ஸேன தாய ச அனத்தமனதாய தாய ச அனபி⁴ரத்³தி⁴யா அப்பதீதோ ஹோதி.
Appatītoti tena ca kopena tena ca dosena tāya ca anattamanatāya tāya ca anabhiraddhiyā appatīto hoti.
அமூலகங் நாம அதி³ட்ட²ங் அஸுதங் அபரிஸங்கிதங்.
Amūlakaṃ nāma adiṭṭhaṃ asutaṃ aparisaṅkitaṃ.
பாராஜிகேன த⁴ம்மேனாதி சதுன்னங் அஞ்ஞதரேன.
Pārājikena dhammenāti catunnaṃ aññatarena.
அனுத்³த⁴ங்ஸெய்யாதி சோதே³தி வா சோதா³பேதி வா.
Anuddhaṃseyyāti codeti vā codāpeti vā.
அப்பேவ நாம நங் இமம்ஹா ப்³ரஹ்மசரியா சாவெய்யந்தி பி⁴க்கு²பா⁴வா சாவெய்யங், ஸமணத⁴ம்மா சாவெய்யங், ஸீலக்க²ந்தா⁴ சாவெய்யங், தபோகு³ணா சாவெய்யங்.
Appeva nāma naṃ imamhā brahmacariyā cāveyyanti bhikkhubhāvā cāveyyaṃ, samaṇadhammā cāveyyaṃ, sīlakkhandhā cāveyyaṃ, tapoguṇā cāveyyaṃ.
ததோ அபரேன ஸமயேனாதி யஸ்மிங் க²ணே அனுத்³த⁴ங்ஸிதோ ஹோதி தங் க²ணங் தங் லயங் தங் முஹுத்தங் வீதிவத்தே.
Tatoaparena samayenāti yasmiṃ khaṇe anuddhaṃsito hoti taṃ khaṇaṃ taṃ layaṃ taṃ muhuttaṃ vītivatte.
ஸமனுக்³கா³ஹீயமானோதி யேன வத்து²னா அனுத்³த⁴ங்ஸிதோ ஹோதி தஸ்மிங் வத்து²ஸ்மிங் ஸமனுக்³கா³ஹீயமானோ.
Samanuggāhīyamānoti yena vatthunā anuddhaṃsito hoti tasmiṃ vatthusmiṃ samanuggāhīyamāno.
அஸமனுக்³கா³ஹீயமானோதி ந கேனசி வுச்சமானோ.
Asamanuggāhīyamānoti na kenaci vuccamāno.
அதி⁴கரணங் நாம சத்தாரி அதி⁴கரணானி – விவாதா³தி⁴கரணங், அனுவாதா³தி⁴கரணங், ஆபத்தாதி⁴கரணங், கிச்சாதி⁴கரணங்.
Adhikaraṇaṃ nāma cattāri adhikaraṇāni – vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇaṃ.
பி⁴க்கு² ச தோ³ஸங் பதிட்டா²தீதி துச்ச²கங் மயா ப⁴ணிதங், முஸா மயா ப⁴ணிதங், அபூ⁴தங் மயா ப⁴ணிதங், அஜானந்தேன மயா ப⁴ணிதங்.
Bhikkhu ca dosaṃ patiṭṭhātīti tucchakaṃ mayā bhaṇitaṃ, musā mayā bhaṇitaṃ, abhūtaṃ mayā bhaṇitaṃ, ajānantena mayā bhaṇitaṃ.
ஸங்கா⁴தி³ஸேஸோதி…பே॰… தேனபி வுச்சதி ஸங்கா⁴தி³ஸேஸோதி.
Saṅghādisesoti…pe… tenapi vuccati saṅghādisesoti.
387. அதி³ட்ட²ஸ்ஸ ஹோதி பாராஜிகங் த⁴ம்மங் அஜ்ஜா²பஜ்ஜந்தோ. தஞ்சே சோதே³தி – ‘‘தி³ட்டோ² மயா, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ங் உபோஸதோ² வா பவாரணா வா ஸங்க⁴கம்மங் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.
387. Adiṭṭhassa hoti pārājikaṃ dhammaṃ ajjhāpajjanto. Tañce codeti – ‘‘diṭṭho mayā, pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
அஸுதஸ்ஸ ஹோதி – ‘‘பாராஜிகங் த⁴ம்மங் அஜ்ஜா²பன்னோ’’தி. தஞ்சே சோதே³தி – ‘‘ஸுதோ மயா, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ங் உபோஸதோ² வா பவாரணா வா ஸங்க⁴கம்மங் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.
Asutassa hoti – ‘‘pārājikaṃ dhammaṃ ajjhāpanno’’ti. Tañce codeti – ‘‘suto mayā, pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
அபரிஸங்கிதஸ்ஸ ஹோதி – ‘‘பாராஜிகங் த⁴ம்மங் அஜ்ஜா²பன்னோ’’தி. தஞ்சே சோதே³தி – ‘‘பரிஸங்கிதோ மயா, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ங் உபோஸதோ² வா பவாரணா வா ஸங்க⁴கம்மங் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.
Aparisaṅkitassa hoti – ‘‘pārājikaṃ dhammaṃ ajjhāpanno’’ti. Tañce codeti – ‘‘parisaṅkito mayā, pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
அதி³ட்ட²ஸ்ஸ ஹோதி பாராஜிகங் த⁴ம்மங் அஜ்ஜா²பஜ்ஜந்தோ. தஞ்சே சோதே³தி – ‘‘தி³ட்டோ² மயா ஸுதோ ச, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Adiṭṭhassa hoti pārājikaṃ dhammaṃ ajjhāpajjanto. Tañce codeti – ‘‘diṭṭho mayā suto ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.
அதி³ட்ட²ஸ்ஸ ஹோதி பாராஜிகங் த⁴ம்மங் அஜ்ஜா²பஜ்ஜந்தோ. தஞ்சே சோதே³தி – ‘‘தி³ட்டோ² மயா பரிஸங்கிதோ ச, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Adiṭṭhassa hoti pārājikaṃ dhammaṃ ajjhāpajjanto. Tañce codeti – ‘‘diṭṭho mayā parisaṅkito ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.
அதி³ட்ட²ஸ்ஸ ஹோதி பாராஜிகங் த⁴ம்மங் அஜ்ஜா²பஜ்ஜந்தோ. தஞ்சே சோதே³தி – ‘‘தி³ட்டோ² மயா ஸுதோ ச பரிஸங்கிதோ ச, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Adiṭṭhassa hoti pārājikaṃ dhammaṃ ajjhāpajjanto. Tañce codeti – ‘‘diṭṭho mayā suto ca parisaṅkito ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.
அஸுதஸ்ஸ ஹோதி – ‘‘பாராஜிகங் த⁴ம்மங் அஜ்ஜா²பன்னோ’’தி. தஞ்சே சோதே³தி – ‘‘ஸுதோ மயா பரிஸங்கிதோ ச…பே॰… ஸுதோ மயா தி³ட்டோ² ச…பே॰… ஸுதோ மயா பரிஸங்கிதோ ச தி³ட்டோ² ச, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Asutassa hoti – ‘‘pārājikaṃ dhammaṃ ajjhāpanno’’ti. Tañce codeti – ‘‘suto mayā parisaṅkito ca…pe… suto mayā diṭṭho ca…pe… suto mayā parisaṅkito ca diṭṭho ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.
அபரிஸங்கிதஸ்ஸ ஹோதி – ‘‘பாராஜிகங் த⁴ம்மங் அஜ்ஜா²பன்னோ’’தி. தஞ்சே சோதே³தி – ‘‘பரிஸங்கிதோ மயா தி³ட்டோ² ச…பே॰… பரிஸங்கிதோ மயா ஸுதோ ச…பே॰… பரிஸங்கிதோ மயா தி³ட்டோ² ச ஸுதோ ச, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Aparisaṅkitassa hoti – ‘‘pārājikaṃ dhammaṃ ajjhāpanno’’ti. Tañce codeti – ‘‘parisaṅkito mayā diṭṭho ca…pe… parisaṅkito mayā suto ca…pe… parisaṅkito mayā diṭṭho ca suto ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.
தி³ட்ட²ஸ்ஸ ஹோதி பாராஜிகங் த⁴ம்மங் அஜ்ஜா²பஜ்ஜந்தோ. தஞ்சே சோதே³தி – ‘‘ஸுதோ மயா பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Diṭṭhassa hoti pārājikaṃ dhammaṃ ajjhāpajjanto. Tañce codeti – ‘‘suto mayā pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.
தி³ட்ட²ஸ்ஸ ஹோதி பாராஜிகங் த⁴ம்மங் அஜ்ஜா²பஜ்ஜந்தோ. தஞ்சே சோதே³தி – ‘‘பரிஸங்கிதோ மயா, பாராஜிகங் த⁴ம்மங் அஜ்ஜா²பன்னோஸி’’…பே॰… ‘‘ஸுதோ மயா பரிஸங்கிதோ ச, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Diṭṭhassa hoti pārājikaṃ dhammaṃ ajjhāpajjanto. Tañce codeti – ‘‘parisaṅkito mayā, pārājikaṃ dhammaṃ ajjhāpannosi’’…pe… ‘‘suto mayā parisaṅkito ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.
ஸுதஸ்ஸ ஹோதி – ‘‘பாராஜிகங் த⁴ம்மங் அஜ்ஜா²பன்னோ’’தி. தஞ்சே சோதே³தி – ‘‘பரிஸங்கிதோ மயா, பாராஜிகங் த⁴ம்மங் அஜ்ஜா²பன்னோஸி…பே॰… தி³ட்டோ² மயா, பாராஜிகங் த⁴ம்மங் அஜ்ஜா²பன்னோஸி…பே॰… பரிஸங்கிதோ மயா தி³ட்டோ² ச, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Sutassa hoti – ‘‘pārājikaṃ dhammaṃ ajjhāpanno’’ti. Tañce codeti – ‘‘parisaṅkito mayā, pārājikaṃ dhammaṃ ajjhāpannosi…pe… diṭṭho mayā, pārājikaṃ dhammaṃ ajjhāpannosi…pe… parisaṅkito mayā diṭṭho ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.
பரிஸங்கிதஸ்ஸ ஹோதி – ‘‘பாராஜிகங் த⁴ம்மங் அஜ்ஜா²பன்னோ’’தி. தஞ்சே சோதே³தி – ‘‘தி³ட்டோ² மயா, பாராஜிகங் த⁴ம்மங் அஜ்ஜா²பன்னோஸி…பே॰… ஸுதோ மயா, பாராஜிகங் த⁴ம்மங் அஜ்ஜா²பன்னோஸி…பே॰… தி³ட்டோ² மயா ஸுதோ ச, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Parisaṅkitassa hoti – ‘‘pārājikaṃ dhammaṃ ajjhāpanno’’ti. Tañce codeti – ‘‘diṭṭho mayā, pārājikaṃ dhammaṃ ajjhāpannosi…pe… suto mayā, pārājikaṃ dhammaṃ ajjhāpannosi…pe… diṭṭho mayā suto ca, pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.
தி³ட்ட²ஸ்ஸ ஹோதி பாராஜிகங் த⁴ம்மங் அஜ்ஜா²பஜ்ஜந்தோ. தி³ட்டே² வேமதிகோ தி³ட்ட²ங் நோ கப்பேதி தி³ட்ட²ங் நஸ்ஸரதி தி³ட்ட²ங் பமுட்டோ² ஹோதி…பே॰… ஸுதே வேமதிகோ ஸுதங் நோ கப்பேதி ஸுதங் நஸ்ஸரதி ஸுதங் பமுட்டோ² ஹோதி…பே॰… பரிஸங்கிதே வேமதிகோ பரிஸங்கிதங் நோ கப்பேதி பரிஸங்கிதங் நஸ்ஸரதி பரிஸங்கிதங் பமுட்டோ² ஹோதி. தஞ்சே சோதே³தி – ‘‘பரிஸங்கிதோ மயா தி³ட்டோ² ச…பே॰… பரிஸங்கிதோ மயா ஸுதோ ச…பே॰… பரிஸங்கிதோ மயா தி³ட்டோ² ச ஸுதோ ச, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ங் உபோஸதோ² வா பவாரணா வா ஸங்க⁴கம்மங் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.
Diṭṭhassa hoti pārājikaṃ dhammaṃ ajjhāpajjanto. Diṭṭhe vematiko diṭṭhaṃ no kappeti diṭṭhaṃ nassarati diṭṭhaṃ pamuṭṭho hoti…pe… sute vematiko sutaṃ no kappeti sutaṃ nassarati sutaṃ pamuṭṭho hoti…pe… parisaṅkite vematiko parisaṅkitaṃ no kappeti parisaṅkitaṃ nassarati parisaṅkitaṃ pamuṭṭho hoti. Tañce codeti – ‘‘parisaṅkito mayā diṭṭho ca…pe… parisaṅkito mayā suto ca…pe… parisaṅkito mayā diṭṭho ca suto ca, pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
388. அதி³ட்ட²ஸ்ஸ ஹோதி பாராஜிகங் த⁴ம்மங் அஜ்ஜா²பஜ்ஜந்தோ. தஞ்சே சோதா³பேதி – ‘‘தி³ட்டோ²ஸி, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ங் உபோஸதோ² வா பவாரணா வா ஸங்க⁴கம்மங் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.
388. Adiṭṭhassa hoti pārājikaṃ dhammaṃ ajjhāpajjanto. Tañce codāpeti – ‘‘diṭṭhosi, pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
அஸுதஸ்ஸ ஹோதி – ‘‘பாராஜிகங் த⁴ம்மங் அஜ்ஜா²பன்னோ’’தி…பே॰… அபரிஸங்கிதஸ்ஸ ஹோதி – ‘‘பாராஜிகங் த⁴ம்மங் அஜ்ஜா²பன்னோ’’தி. தஞ்சே சோதா³பேதி – ‘‘பரிஸங்கிதோஸி, பாராஜிகங் த⁴ம்மங் அஜ்ஜா²பன்னோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Asutassa hoti – ‘‘pārājikaṃ dhammaṃ ajjhāpanno’’ti…pe… aparisaṅkitassa hoti – ‘‘pārājikaṃ dhammaṃ ajjhāpanno’’ti. Tañce codāpeti – ‘‘parisaṅkitosi, pārājikaṃ dhammaṃ ajjhāpannosi’’…pe… āpatti vācāya, vācāya saṅghādisesassa.
அதி³ட்ட²ஸ்ஸ ஹோதி பாராஜிகங் த⁴ம்மங் அஜ்ஜா²பஜ்ஜந்தோ. தஞ்சே சோதா³பேதி – ‘‘தி³ட்டோ²ஸி ஸுதோஸி…பே॰… தி³ட்டோ²ஸி பரிஸங்கிதோஸி…பே॰… தி³ட்டோ²ஸி ஸுதோஸி பரிஸங்கிதோஸி, பாராஜிகங் த⁴ம்மங் அஜ்ஜா²பன்னோஸி’’…பே॰… அஸுதஸ்ஸ ஹோதி – ‘‘பாராஜிகங் த⁴ம்மங் அஜ்ஜா²பன்னோ’’தி…பே॰… அபரிஸங்கிதஸ்ஸ ஹோதி – ‘‘பாராஜிகங் த⁴ம்மங் அஜ்ஜா²பன்னோ’’தி. தஞ்சே சோதா³பேதி – ‘‘பரிஸங்கிதோஸி, தி³ட்டோ²ஸி…பே॰… பரிஸங்கிதோஸி, ஸுதோஸி…பே॰… பரிஸங்கிதோஸி, தி³ட்டோ²ஸி, ஸுதோஸி, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Adiṭṭhassa hoti pārājikaṃ dhammaṃ ajjhāpajjanto. Tañce codāpeti – ‘‘diṭṭhosi sutosi…pe… diṭṭhosi parisaṅkitosi…pe… diṭṭhosi sutosi parisaṅkitosi, pārājikaṃ dhammaṃ ajjhāpannosi’’…pe… asutassa hoti – ‘‘pārājikaṃ dhammaṃ ajjhāpanno’’ti…pe… aparisaṅkitassa hoti – ‘‘pārājikaṃ dhammaṃ ajjhāpanno’’ti. Tañce codāpeti – ‘‘parisaṅkitosi, diṭṭhosi…pe… parisaṅkitosi, sutosi…pe… parisaṅkitosi, diṭṭhosi, sutosi, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.
தி³ட்ட²ஸ்ஸ ஹோதி பாராஜிகங் த⁴ம்மங் அஜ்ஜா²பஜ்ஜந்தோ. தஞ்சே சோதா³பேதி – ‘‘ஸுதோஸி’’…பே॰… தஞ்சே சோதா³பேதி – ‘‘பரிஸங்கிதோஸி’’…பே॰… தஞ்சே சோதா³பேதி – ‘‘ஸுதோஸி, பரிஸங்கிதோஸி, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Diṭṭhassa hoti pārājikaṃ dhammaṃ ajjhāpajjanto. Tañce codāpeti – ‘‘sutosi’’…pe… tañce codāpeti – ‘‘parisaṅkitosi’’…pe… tañce codāpeti – ‘‘sutosi, parisaṅkitosi, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.
ஸுதஸ்ஸ ஹோதி – ‘‘பாராஜிகங் த⁴ம்மங் அஜ்ஜா²பன்னோ’’தி…பே॰… பரிஸங்கிதஸ்ஸ ஹோதி – ‘‘பாராஜிகங் த⁴ம்மங் அஜ்ஜா²பன்னோ’’தி. தஞ்சே ‘‘தி³ட்டோ²ஸி’’…பே॰… தஞ்சே சோதா³பேதி – ‘‘ஸுதோஸி’’…பே॰… தஞ்சே சோதா³பேதி – ‘‘தி³ட்டோ²ஸி, ஸுதோஸி, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி’’…பே॰… ஆபத்தி வாசாய, வாசாய ஸங்கா⁴தி³ஸேஸஸ்ஸ.
Sutassa hoti – ‘‘pārājikaṃ dhammaṃ ajjhāpanno’’ti…pe… parisaṅkitassa hoti – ‘‘pārājikaṃ dhammaṃ ajjhāpanno’’ti. Tañce ‘‘diṭṭhosi’’…pe… tañce codāpeti – ‘‘sutosi’’…pe… tañce codāpeti – ‘‘diṭṭhosi, sutosi, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.
தி³ட்ட²ஸ்ஸ ஹோதி பாராஜிகங் த⁴ம்மங் அஜ்ஜா²பஜ்ஜந்தோ. தி³ட்டே² வேமதிகோ தி³ட்ட²ங் நோ கப்பேதி தி³ட்ட²ங் நஸ்ஸரதி தி³ட்ட²ங் பமுட்டோ² ஹோதி…பே॰… ஸுதே வேமதிகோ ஸுதங் நோ கப்பேதி ஸுதங் நஸ்ஸரதி ஸுதங் பமுட்டோ² ஹோதி…பே॰… பரிஸங்கிதே வேமதிகோ பரிஸங்கிதங் நோ கப்பேதி பரிஸங்கிதங் நஸ்ஸரதி பரிஸங்கிதங் பமுட்டோ² ஹோதி. தஞ்சே சோதா³பேதி – ‘‘பரிஸங்கிதோஸி, தி³ட்டோ²ஸி’’…பே॰… பரிஸங்கிதங் பமுட்டோ² ஹோதி, தஞ்சே சோதா³பேதி – ‘‘பரிஸங்கிதோஸி ஸுதோஸி’’…பே॰… பரிஸங்கிதங் பமுட்டோ² ஹோதி, தஞ்சே சோதா³பேதி – ‘‘பரிஸங்கிதோஸி, தி³ட்டோ²ஸி, ஸுதோஸி, பாராஜிகங் த⁴ம்மங் அஜ்ஜா²பன்னோஸி, அஸ்ஸமணோஸி, அஸக்யபுத்தியோஸி, நத்தி² தயா ஸத்³தி⁴ங் உபோஸதோ² வா பவாரணா வா ஸங்க⁴கம்மங் வா’’தி, ஆபத்தி வாசாய, வாசாய ஸங்கா⁴தி³ஸேஸஸ்ஸ.
Diṭṭhassa hoti pārājikaṃ dhammaṃ ajjhāpajjanto. Diṭṭhe vematiko diṭṭhaṃ no kappeti diṭṭhaṃ nassarati diṭṭhaṃ pamuṭṭho hoti…pe… sute vematiko sutaṃ no kappeti sutaṃ nassarati sutaṃ pamuṭṭho hoti…pe… parisaṅkite vematiko parisaṅkitaṃ no kappeti parisaṅkitaṃ nassarati parisaṅkitaṃ pamuṭṭho hoti. Tañce codāpeti – ‘‘parisaṅkitosi, diṭṭhosi’’…pe… parisaṅkitaṃ pamuṭṭho hoti, tañce codāpeti – ‘‘parisaṅkitosi sutosi’’…pe… parisaṅkitaṃ pamuṭṭho hoti, tañce codāpeti – ‘‘parisaṅkitosi, diṭṭhosi, sutosi, pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.
389. அஸுத்³தே⁴ ஸுத்³த⁴தி³ட்டி², ஸுத்³தே⁴ அஸுத்³த⁴தி³ட்டி², அஸுத்³தே⁴ அஸுத்³த⁴தி³ட்டி², ஸுத்³தே⁴ ஸுத்³த⁴தி³ட்டி².
389. Asuddhe suddhadiṭṭhi, suddhe asuddhadiṭṭhi, asuddhe asuddhadiṭṭhi, suddhe suddhadiṭṭhi.
அஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ அனோகாஸங் காராபெத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸேன து³க்கடஸ்ஸ.
Asuddho hoti puggalo aññataraṃ pārājikaṃ dhammaṃ ajjhāpanno. Tañce suddhadiṭṭhi samāno anokāsaṃ kārāpetvā cāvanādhippāyo vadeti, āpatti saṅghādisesena dukkaṭassa.
அஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ ஓகாஸங் காராபெத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸஸ்ஸ.
Asuddho hoti puggalo aññataraṃ pārājikaṃ dhammaṃ ajjhāpanno. Tañce suddhadiṭṭhi samāno okāsaṃ kārāpetvā cāvanādhippāyo vadeti, āpatti saṅghādisesassa.
அஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ அனோகாஸங் காராபெத்வா அக்கோஸாதி⁴ப்பாயோ வதே³தி, ஆபத்தி ஓமஸவாதே³ன து³க்கடஸ்ஸ.
Asuddho hoti puggalo aññataraṃ pārājikaṃ dhammaṃ ajjhāpanno. Tañce suddhadiṭṭhi samāno anokāsaṃ kārāpetvā akkosādhippāyo vadeti, āpatti omasavādena dukkaṭassa.
அஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ ஓகாஸங் காராபெத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸ.
Asuddho hoti puggalo aññataraṃ pārājikaṃ dhammaṃ ajjhāpanno. Tañce suddhadiṭṭhi samāno okāsaṃ kārāpetvā akkosādhippāyo vadeti, āpatti omasavādassa.
ஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அனஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ அனோகாஸங் காராபெத்வா சாவனாதி⁴ப்பாயோ வதே³தி, ஆபத்தி து³க்கடஸ்ஸ.
Suddho hoti puggalo aññataraṃ pārājikaṃ dhammaṃ anajjhāpanno. Tañce asuddhadiṭṭhi samāno anokāsaṃ kārāpetvā cāvanādhippāyo vadeti, āpatti dukkaṭassa.
ஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அனஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ ஓகாஸங் காராபெத்வா சாவனாதி⁴ப்பாயோ வதே³தி, அனாபத்தி.
Suddho hoti puggalo aññataraṃ pārājikaṃ dhammaṃ anajjhāpanno. Tañce asuddhadiṭṭhi samāno okāsaṃ kārāpetvā cāvanādhippāyo vadeti, anāpatti.
ஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அனஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ அனோகாஸங் காராபெத்வா அக்கோஸாதி⁴ப்பாயோ வதே³தி, ஆபத்தி ஓமஸவாதே³ன து³க்கடஸ்ஸ.
Suddho hoti puggalo aññataraṃ pārājikaṃ dhammaṃ anajjhāpanno. Tañce asuddhadiṭṭhi samāno anokāsaṃ kārāpetvā akkosādhippāyo vadeti, āpatti omasavādena dukkaṭassa.
ஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அனஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ ஓகாஸங் காராபெத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸ.
Suddho hoti puggalo aññataraṃ pārājikaṃ dhammaṃ anajjhāpanno. Tañce asuddhadiṭṭhi samāno okāsaṃ kārāpetvā akkosādhippāyo vadeti, āpatti omasavādassa.
அஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ அனோகாஸங் காராபெத்வா சாவனாதி⁴ப்பாயோ வதே³தி, ஆபத்தி து³க்கடஸ்ஸ.
Asuddho hoti puggalo aññataraṃ pārājikaṃ dhammaṃ ajjhāpanno. Tañce asuddhadiṭṭhi samāno anokāsaṃ kārāpetvā cāvanādhippāyo vadeti, āpatti dukkaṭassa.
அஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ ஓகாஸங் காராபெத்வா சாவனாதி⁴ப்பாயோ வதே³தி, அனாபத்தி.
Asuddho hoti puggalo aññataraṃ pārājikaṃ dhammaṃ ajjhāpanno. Tañce asuddhadiṭṭhi samāno okāsaṃ kārāpetvā cāvanādhippāyo vadeti, anāpatti.
அஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ அனோகாஸங் காராபெத்வா அக்கோஸாதி⁴ப்பாயோ வதே³தி, ஆபத்தி ஓமஸவாதே³ன து³க்கடஸ்ஸ.
Asuddho hoti puggalo aññataraṃ pārājikaṃ dhammaṃ ajjhāpanno. Tañce asuddhadiṭṭhi samāno anokāsaṃ kārāpetvā akkosādhippāyo vadeti, āpatti omasavādena dukkaṭassa.
அஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அஜ்ஜா²பன்னோ. தஞ்சே அஸுத்³த⁴தி³ட்டி² ஸமானோ ஓகாஸங் காராபெத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸ.
Asuddho hoti puggalo aññataraṃ pārājikaṃ dhammaṃ ajjhāpanno. Tañce asuddhadiṭṭhi samāno okāsaṃ kārāpetvā akkosādhippāyo vadeti, āpatti omasavādassa.
ஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அனஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ அனோகாஸங் காராபெத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸேன து³க்கடஸ்ஸ.
Suddho hoti puggalo aññataraṃ pārājikaṃ dhammaṃ anajjhāpanno. Tañce suddhadiṭṭhi samāno anokāsaṃ kārāpetvā cāvanādhippāyo vadeti, āpatti saṅghādisesena dukkaṭassa.
ஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அனஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ ஓகாஸங் காராபெத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸஸ்ஸ.
Suddho hoti puggalo aññataraṃ pārājikaṃ dhammaṃ anajjhāpanno. Tañce suddhadiṭṭhi samāno okāsaṃ kārāpetvā cāvanādhippāyo vadeti, āpatti saṅghādisesassa.
ஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அனஜ்ஜா²பன்னோ. தஞ்சே ஸுத்³த⁴தி³ட்டி² ஸமானோ அனோகாஸங் காராபெத்வா அக்கோஸாதி⁴ப்பாயோ வதே³தி, ஆபத்தி ஓமஸவாதே³ன து³க்கடஸ்ஸ.
Suddho hoti puggalo aññataraṃ pārājikaṃ dhammaṃ anajjhāpanno. Tañce suddhadiṭṭhi samāno anokāsaṃ kārāpetvā akkosādhippāyo vadeti, āpatti omasavādena dukkaṭassa.
ஸுத்³தோ⁴ ஹோதி புக்³க³லோ அஞ்ஞதரங் பாராஜிகங் த⁴ம்மங் அனஜ்ஜா²பன்னோ தஞ்சே ஸுத்³த⁴தி³ட்டி² ஸமானோ ஓகாஸங் காராபெத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸ.
Suddho hoti puggalo aññataraṃ pārājikaṃ dhammaṃ anajjhāpanno tañce suddhadiṭṭhi samāno okāsaṃ kārāpetvā akkosādhippāyo vadeti, āpatti omasavādassa.
390. அனாபத்தி ஸுத்³தே⁴ அஸுத்³த⁴தி³ட்டி²ஸ்ஸ, அஸுத்³தே⁴ அஸுத்³த⁴தி³ட்டி²ஸ்ஸ, உம்மத்தகஸ்ஸ, ஆதி³கம்மிகஸ்ஸாதி.
390. Anāpatti suddhe asuddhadiṭṭhissa, asuddhe asuddhadiṭṭhissa, ummattakassa, ādikammikassāti.
து³ட்ட²தோ³ஸஸிக்கா²பத³ங் நிட்டி²தங் அட்ட²மங்.
Duṭṭhadosasikkhāpadaṃ niṭṭhitaṃ aṭṭhamaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 8. பட²மது³ட்ட²தோ³ஸஸிக்கா²பத³வண்ணனா • 8. Paṭhamaduṭṭhadosasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 8. பட²மது³ட்ட²தோ³ஸஸிக்கா²பத³வண்ணனா • 8. Paṭhamaduṭṭhadosasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 8. பட²மது³ட்ட²தோ³ஸஸிக்கா²பத³வண்ணனா • 8. Paṭhamaduṭṭhadosasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 8. பட²மது³ட்ட²தோ³ஸஸிக்கா²பத³வண்ணனா • 8. Paṭhamaduṭṭhadosasikkhāpadavaṇṇanā
