Library / Tipiṭaka / तिपिटक • Tipiṭaka / महाविभङ्ग • Mahāvibhaṅga

    ८. दुट्ठदोससिक्खापदं

    8. Duṭṭhadosasikkhāpadaṃ

    ३८०. 1 तेन समयेन बुद्धो भगवा राजगहे विहरति वेळुवने कलन्दकनिवापे। तेन खो पन समयेन आयस्मता दब्बेन मल्‍लपुत्तेन जातिया सत्तवस्सेन अरहत्तं सच्छिकतं होति। यं किञ्‍चि 2 सावकेन पत्तब्बं सब्बं तेन अनुप्पत्तं होति। नत्थि चस्स किञ्‍चि उत्तरि करणीयं, कतस्स वा पतिचयो। अथ खो आयस्मतो दब्बस्स मल्‍लपुत्तस्स रहोगतस्स पटिसल्‍लीनस्स एवं चेतसो परिवितक्‍को उदपादि – ‘‘मया खो जातिया सत्तवस्सेन अरहत्तं सच्छिकतं। यं किञ्‍चि सावकेन पत्तब्बं सब्बं मया अनुप्पत्तं। नत्थि च मे किञ्‍चि उत्तरि करणीयं, कतस्स वा पतिचयो। किन्‍नु खो अहं सङ्घस्स वेय्यावच्‍चं करेय्य’’न्ति?

    380.3 Tena samayena buddho bhagavā rājagahe viharati veḷuvane kalandakanivāpe. Tena kho pana samayena āyasmatā dabbena mallaputtena jātiyā sattavassena arahattaṃ sacchikataṃ hoti. Yaṃ kiñci 4 sāvakena pattabbaṃ sabbaṃ tena anuppattaṃ hoti. Natthi cassa kiñci uttari karaṇīyaṃ, katassa vā paticayo. Atha kho āyasmato dabbassa mallaputtassa rahogatassa paṭisallīnassa evaṃ cetaso parivitakko udapādi – ‘‘mayā kho jātiyā sattavassena arahattaṃ sacchikataṃ. Yaṃ kiñci sāvakena pattabbaṃ sabbaṃ mayā anuppattaṃ. Natthi ca me kiñci uttari karaṇīyaṃ, katassa vā paticayo. Kinnu kho ahaṃ saṅghassa veyyāvaccaṃ kareyya’’nti?

    अथ खो आयस्मतो दब्बस्स मल्‍लपुत्तस्स एतदहोसि – ‘‘यंनूनाहं सङ्घस्स सेनासनञ्‍च पञ्‍ञपेय्यं भत्तानि च उद्दिसेय्य’’न्ति। अथ खो आयस्मा दब्बो मल्‍लपुत्तो सायन्हसमयं पटिसल्‍लाना वुट्ठितो येन भगवा तेनुपसङ्कमि; उपसङ्कमित्वा भगवन्तं अभिवादेत्वा एकमन्तं निसीदि। एकमन्तं निसिन्‍नो खो आयस्मा दब्बो मल्‍लपुत्तो भगवन्तं एतदवोच – ‘‘इध मय्हं, भन्ते, रहोगतस्स पटिसल्‍लीनस्स एवं चेतसो परिवितक्‍को उदपादि मया खो जातिया सत्तवस्सेन अरहत्तं सच्छिकतं, यं किञ्‍चि सावकेन पत्तब्बं, सब्बं मया अनुपत्तं, नत्थि च मे किञ्‍चि उत्तरि करणीयं, कतस्स वा पतिचयो, किं नु खो अहं सङ्घस्स वेय्यावच्‍चं करेय्य’’न्ति। तस्स मय्हं भन्ते, एतदहोसि यंनूनाहं ‘‘सङ्घस्स सेनासनञ्‍च पञ्‍ञपेय्यं भत्तानि च उद्दिसेय्यन्ति। इच्छामहं, भन्ते, सङ्घस्स सेनासनञ्‍च पञ्‍ञपेतुं भत्तानि च उद्दिसितु’’न्ति। ‘‘साधु साधु, दब्ब। तेन हि त्वं, दब्ब, सङ्घस्स सेनासनञ्‍च पञ्‍ञपेहि भत्तानि च उद्दिसा’’ति। ‘‘एवं, भन्ते’’ति खो आयस्मा दब्बो मल्‍लपुत्तो भगवतो पच्‍चस्सोसि। अथ खो भगवा एतस्मिं निदाने एतस्मिं पकरणे धम्मिं कथं कत्वा भिक्खू आमन्तेसि – ‘‘तेन हि, भिक्खवे, सङ्घो दब्बं मल्‍लपुत्तं सेनासनपञ्‍ञापकञ्‍च भत्तुद्देसकञ्‍च सम्मन्‍नतु। एवञ्‍च पन, भिक्खवे, सम्मन्‍नितब्बो। पठमं दब्बो मल्‍लपुत्तो याचितब्बो। याचित्वा ब्यत्तेन भिक्खुना पटिबलेन सङ्घो ञापेतब्बो –

    Atha kho āyasmato dabbassa mallaputtassa etadahosi – ‘‘yaṃnūnāhaṃ saṅghassa senāsanañca paññapeyyaṃ bhattāni ca uddiseyya’’nti. Atha kho āyasmā dabbo mallaputto sāyanhasamayaṃ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā dabbo mallaputto bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi mayā kho jātiyā sattavassena arahattaṃ sacchikataṃ, yaṃ kiñci sāvakena pattabbaṃ, sabbaṃ mayā anupattaṃ, natthi ca me kiñci uttari karaṇīyaṃ, katassa vā paticayo, kiṃ nu kho ahaṃ saṅghassa veyyāvaccaṃ kareyya’’nti. Tassa mayhaṃ bhante, etadahosi yaṃnūnāhaṃ ‘‘saṅghassa senāsanañca paññapeyyaṃ bhattāni ca uddiseyyanti. Icchāmahaṃ, bhante, saṅghassa senāsanañca paññapetuṃ bhattāni ca uddisitu’’nti. ‘‘Sādhu sādhu, dabba. Tena hi tvaṃ, dabba, saṅghassa senāsanañca paññapehi bhattāni ca uddisā’’ti. ‘‘Evaṃ, bhante’’ti kho āyasmā dabbo mallaputto bhagavato paccassosi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘tena hi, bhikkhave, saṅgho dabbaṃ mallaputtaṃ senāsanapaññāpakañca bhattuddesakañca sammannatu. Evañca pana, bhikkhave, sammannitabbo. Paṭhamaṃ dabbo mallaputto yācitabbo. Yācitvā byattena bhikkhunā paṭibalena saṅgho ñāpetabbo –

    ३८१. ‘‘सुणातु मे, भन्ते, सङ्घो। यदि सङ्घस्स पत्तकल्‍लं सङ्घो आयस्मन्तं दब्बं मल्‍लपुत्तं सेनासनपञ्‍ञापकञ्‍च भत्तुद्देसकञ्‍च सम्मन्‍नेय्य। एसा ञत्ति।

    381. ‘‘Suṇātu me, bhante, saṅgho. Yadi saṅghassa pattakallaṃ saṅgho āyasmantaṃ dabbaṃ mallaputtaṃ senāsanapaññāpakañca bhattuddesakañca sammanneyya. Esā ñatti.

    ‘‘सुणातु मे, भन्ते, सङ्घो। सङ्घो आयस्मन्तं दब्बं मल्‍लपुत्तं सेनासनपञ्‍ञापकञ्‍च भत्तुद्देसकञ्‍च सम्मन्‍नति। यस्सायस्मतो खमति आयस्मतो दब्बस्स मल्‍लपुत्तस्स सेनासनपञ्‍ञापकस्स च भत्तुद्देसकस्स च सम्मुति, सो तुण्हस्स; यस्स नक्खमति, सो भासेय्य।

    ‘‘Suṇātu me, bhante, saṅgho. Saṅgho āyasmantaṃ dabbaṃ mallaputtaṃ senāsanapaññāpakañca bhattuddesakañca sammannati. Yassāyasmato khamati āyasmato dabbassa mallaputtassa senāsanapaññāpakassa ca bhattuddesakassa ca sammuti, so tuṇhassa; yassa nakkhamati, so bhāseyya.

    ‘‘सम्मतो सङ्घेन आयस्मा दब्बो मल्‍लपुत्तो सेनासनपञ्‍ञापको च भत्तुद्देसको च। खमति सङ्घस्स, तस्मा तुण्ही , एवमेतं धारयामी’’ति।

    ‘‘Sammato saṅghena āyasmā dabbo mallaputto senāsanapaññāpako ca bhattuddesako ca. Khamati saṅghassa, tasmā tuṇhī , evametaṃ dhārayāmī’’ti.

    ३८२. सम्मतो च पनायस्मा दब्बो मल्‍लपुत्तो सभागानं भिक्खूनं एकज्झं सेनासनं पञ्‍ञपेति। ये ते भिक्खू सुत्तन्तिका तेसं एकज्झं सेनासनं पञ्‍ञपेति – ‘‘ते अञ्‍ञमञ्‍ञं सुत्तन्तं सङ्गायिस्सन्ती’’ति। ये ते भिक्खू विनयधरा तेसं एकज्झं सेनासनं पञ्‍ञपेति – ‘‘ते अञ्‍ञमञ्‍ञं विनयं विनिच्छिनिस्सन्ती’’ति 5। ये ते भिक्खू धम्मकथिका तेसं एकज्झं सेनासनं पञ्‍ञपेति – ‘‘ते अञ्‍ञमञ्‍ञं धम्मं साकच्छिस्सन्ती’’ति। ये ते भिक्खू झायिनो तेसं एकज्झं सेनासनं पञ्‍ञपेति – ‘‘ते अञ्‍ञमञ्‍ञं न ब्याबाधिस्सन्ती’’ति 6। ये ते भिक्खू तिरच्छानकथिका कायदळ्हिबहुला 7 विहरन्ति तेसम्पि एकज्झं सेनासनं पञ्‍ञपेति – ‘‘इमायपिमे आयस्मन्तो रतिया अच्छिस्सन्ती’’ति। येपि ते भिक्खू विकाले आगच्छन्ति तेसम्पि तेजोधातुं समापज्‍जित्वा तेनेव आलोकेन सेनासनं पञ्‍ञपेति। अपिसु भिक्खू सञ्‍चिच्‍च विकाले आगच्छन्ति – ‘‘मयं आयस्मतो दब्बस्स मल्‍लपुत्तस्स इद्धिपाटिहारियं पस्सिस्सामा’’ति।

    382. Sammato ca panāyasmā dabbo mallaputto sabhāgānaṃ bhikkhūnaṃ ekajjhaṃ senāsanaṃ paññapeti. Ye te bhikkhū suttantikā tesaṃ ekajjhaṃ senāsanaṃ paññapeti – ‘‘te aññamaññaṃ suttantaṃ saṅgāyissantī’’ti. Ye te bhikkhū vinayadharā tesaṃ ekajjhaṃ senāsanaṃ paññapeti – ‘‘te aññamaññaṃ vinayaṃ vinicchinissantī’’ti 8. Ye te bhikkhū dhammakathikā tesaṃ ekajjhaṃ senāsanaṃ paññapeti – ‘‘te aññamaññaṃ dhammaṃ sākacchissantī’’ti. Ye te bhikkhū jhāyino tesaṃ ekajjhaṃ senāsanaṃ paññapeti – ‘‘te aññamaññaṃ na byābādhissantī’’ti 9. Ye te bhikkhū tiracchānakathikā kāyadaḷhibahulā 10 viharanti tesampi ekajjhaṃ senāsanaṃ paññapeti – ‘‘imāyapime āyasmanto ratiyā acchissantī’’ti. Yepi te bhikkhū vikāle āgacchanti tesampi tejodhātuṃ samāpajjitvā teneva ālokena senāsanaṃ paññapeti. Apisu bhikkhū sañcicca vikāle āgacchanti – ‘‘mayaṃ āyasmato dabbassa mallaputtassa iddhipāṭihāriyaṃ passissāmā’’ti.

    ते आयस्मन्तं दब्बं मल्‍लपुत्तं उपसङ्कमित्वा एवं वदन्ति – ‘‘अम्हाकं, आवुसो दब्ब, सेनासनं पञ्‍ञपेही’’ति। ते आयस्मा दब्बो मल्‍लपुत्तो एवं वदेति – ‘‘कत्थायस्मन्ता इच्छन्ति, कत्थ पञ्‍ञपेमी’’ति? ते सञ्‍चिच्‍च दूरे अपदिसन्ति – ‘‘अम्हाकं, आवुसो दब्ब, गिज्झकूटे पब्बते सेनासनं पञ्‍ञपेहि। अम्हाकं, आवुसो, चोरपपाते सेनासनं पञ्‍ञपेहि। अम्हाकं, आवुसो, इसिगिलिपस्से काळसिलायं सेनासनं पञ्‍ञपेहि। अम्हाकं, आवुसो, वेभारपस्से सत्तपण्णिगुहायं सेनासनं पञ्‍ञपेहि। अम्हाकं, आवुसो, सीतवने सप्पसोण्डिकपब्भारे सेनासनं पञ्‍ञपेहि। अम्हाकं, आवुसो, गोतमककन्दरायं सेनासनं पञ्‍ञपेहि। अम्हाकं, आवुसो, तिन्दुककन्दरायं सेनासनं पञ्‍ञपेहि। अम्हाकं, आवुसो, तपोदकन्दरायं सेनासनं पञ्‍ञपेहि। अम्हाकं, आवुसो, तपोदारामे सेनासनं पञ्‍ञपेहि। अम्हाकं, आवुसो, जीवकम्बवने सेनासनं पञ्‍ञपेहि। अम्हाकं, आवुसो, मद्दकुच्छिस्मिं मिगदाये सेनासनं पञ्‍ञपेही’’ति।

    Te āyasmantaṃ dabbaṃ mallaputtaṃ upasaṅkamitvā evaṃ vadanti – ‘‘amhākaṃ, āvuso dabba, senāsanaṃ paññapehī’’ti. Te āyasmā dabbo mallaputto evaṃ vadeti – ‘‘katthāyasmantā icchanti, kattha paññapemī’’ti? Te sañcicca dūre apadisanti – ‘‘amhākaṃ, āvuso dabba, gijjhakūṭe pabbate senāsanaṃ paññapehi. Amhākaṃ, āvuso, corapapāte senāsanaṃ paññapehi. Amhākaṃ, āvuso, isigilipasse kāḷasilāyaṃ senāsanaṃ paññapehi. Amhākaṃ, āvuso, vebhārapasse sattapaṇṇiguhāyaṃ senāsanaṃ paññapehi. Amhākaṃ, āvuso, sītavane sappasoṇḍikapabbhāre senāsanaṃ paññapehi. Amhākaṃ, āvuso, gotamakakandarāyaṃ senāsanaṃ paññapehi. Amhākaṃ, āvuso, tindukakandarāyaṃ senāsanaṃ paññapehi. Amhākaṃ, āvuso, tapodakandarāyaṃ senāsanaṃ paññapehi. Amhākaṃ, āvuso, tapodārāme senāsanaṃ paññapehi. Amhākaṃ, āvuso, jīvakambavane senāsanaṃ paññapehi. Amhākaṃ, āvuso, maddakucchismiṃ migadāye senāsanaṃ paññapehī’’ti.

    तेसं आयस्मा दब्बो मल्‍लपुत्तो तेजोधातुं समापज्‍जित्वा अङ्गुलिया जलमानाय पुरतो पुरतो गच्छति। तेपि तेनेव आलोकेन आयस्मतो दब्बस्स मल्‍लपुत्तस्स पिट्ठितो पिट्ठितो गच्छन्ति। तेसं आयस्मा दब्बो मल्‍लपुत्तो एवं सेनासनं पञ्‍ञपेति – ‘‘अयं मञ्‍चो, इदं पीठं, अयं भिसि, इदं बिम्बोहनं, इदं वच्‍चट्ठानं, इदं पस्सावट्ठानं , इदं पानीयं, इदं परिभोजनीयं, अयं कत्तरदण्डो, इदं सङ्घस्स कतिकसण्ठानं, इमं कालं पविसितब्बं, इमं कालं निक्खमितब्ब’’न्ति। तेसं आयस्मा दब्बो मल्‍लपुत्तो एवं सेनासनं पञ्‍ञपेत्वा पुनदेव वेळुवनं पच्‍चागच्छति।

    Tesaṃ āyasmā dabbo mallaputto tejodhātuṃ samāpajjitvā aṅguliyā jalamānāya purato purato gacchati. Tepi teneva ālokena āyasmato dabbassa mallaputtassa piṭṭhito piṭṭhito gacchanti. Tesaṃ āyasmā dabbo mallaputto evaṃ senāsanaṃ paññapeti – ‘‘ayaṃ mañco, idaṃ pīṭhaṃ, ayaṃ bhisi, idaṃ bimbohanaṃ, idaṃ vaccaṭṭhānaṃ, idaṃ passāvaṭṭhānaṃ , idaṃ pānīyaṃ, idaṃ paribhojanīyaṃ, ayaṃ kattaradaṇḍo, idaṃ saṅghassa katikasaṇṭhānaṃ, imaṃ kālaṃ pavisitabbaṃ, imaṃ kālaṃ nikkhamitabba’’nti. Tesaṃ āyasmā dabbo mallaputto evaṃ senāsanaṃ paññapetvā punadeva veḷuvanaṃ paccāgacchati.

    ३८३. तेन खो पन समयेन मेत्तियभूमजका 11 भिक्खू नवका चेव होन्ति अप्पपुञ्‍ञा च। यानि सङ्घस्स लामकानि सेनासनानि तानि तेसं पापुणन्ति लामकानि च भत्तानि। तेन खो पन समयेन राजगहे मनुस्सा इच्छन्ति थेरानं भिक्खूनं अभिसङ्खारिकं पिण्डपातं दातुं सप्पिम्पि तेलम्पि उत्तरिभङ्गम्पि। मेत्तियभूमजकानं पन भिक्खूनं पाकतिकं देन्ति यथारन्धं कणाजकं बिलङ्गदुतियं। ते पच्छाभत्तं पिण्डपातप्पटिक्‍कन्ता थेरे भिक्खू पुच्छन्ति – ‘‘तुम्हाकं, आवुसो, भत्तग्गे किं अहोसि? तुम्हाकं, आवुसो, भत्तग्गे किं अहोसी’’ति? एकच्‍चे थेरा एवं वदन्ति – ‘‘अम्हाकं, आवुसो, सप्पि अहोसि तेलं अहोसि उत्तरिभङ्गं अहोसी’’ति। मेत्तियभूमजका पन भिक्खू एवं वदन्ति – ‘‘अम्हाकं, आवुसो, न किञ्‍चि अहोसि, पाकतिकं यथारन्धं कणाजकं बिलङ्गदुतिय’’न्ति।

    383. Tena kho pana samayena mettiyabhūmajakā 12 bhikkhū navakā ceva honti appapuññā ca. Yāni saṅghassa lāmakāni senāsanāni tāni tesaṃ pāpuṇanti lāmakāni ca bhattāni. Tena kho pana samayena rājagahe manussā icchanti therānaṃ bhikkhūnaṃ abhisaṅkhārikaṃ piṇḍapātaṃ dātuṃ sappimpi telampi uttaribhaṅgampi. Mettiyabhūmajakānaṃ pana bhikkhūnaṃ pākatikaṃ denti yathārandhaṃ kaṇājakaṃ bilaṅgadutiyaṃ. Te pacchābhattaṃ piṇḍapātappaṭikkantā there bhikkhū pucchanti – ‘‘tumhākaṃ, āvuso, bhattagge kiṃ ahosi? Tumhākaṃ, āvuso, bhattagge kiṃ ahosī’’ti? Ekacce therā evaṃ vadanti – ‘‘amhākaṃ, āvuso, sappi ahosi telaṃ ahosi uttaribhaṅgaṃ ahosī’’ti. Mettiyabhūmajakā pana bhikkhū evaṃ vadanti – ‘‘amhākaṃ, āvuso, na kiñci ahosi, pākatikaṃ yathārandhaṃ kaṇājakaṃ bilaṅgadutiya’’nti.

    तेन खो पन समयेन कल्याणभत्तिको गहपति सङ्घस्स चतुक्‍कभत्तं देति निच्‍चभत्तं। सो भत्तग्गे सपुत्तदारो उपतिट्ठित्वा परिविसति । अञ्‍ञे ओदनेन पुच्छन्ति, अञ्‍ञे सूपेन पुच्छन्ति, अञ्‍ञे तेलेन पुच्छन्ति, अञ्‍ञे उत्तरिभङ्गेन पुच्छन्ति। तेन खो पन समयेन कल्याणभत्तिकस्स गहपतिनो भत्तं स्वातनाय मेत्तियभूमजकानं भिक्खूनं उद्दिट्ठं होति। अथ खो कल्याणभत्तिको गहपति आरामं अगमासि केनचिदेव करणीयेन। सो येनायस्मा दब्बो मल्‍लपुत्तो तेनुपसङ्कमि; उपसङ्कमित्वा आयस्मन्तं दब्बं मल्‍लपुत्तं अभिवादेत्वा एकमन्तं निसीदि। एकमन्तं निसिन्‍नं खो कल्याणभत्तिकं गहपतिं आयस्मा दब्बो मल्‍लपुत्तो धम्मिया कथाय सन्दस्सेसि समादपेसि समुत्तेजेसि सम्पहंसेसि। अथ खो कल्याणभत्तिको गहपति आयस्मता दब्बेन मल्‍लपुत्तेन धम्मिया कथाय सन्दस्सितो समादपितो समुत्तेजितो सम्पहंसितो आयस्मन्तं दब्बं मल्‍लपुत्तं एतदवोच – ‘‘कस्स, भन्ते, अम्हाकं घरे स्वातनाय भत्तं उद्दिट्ठ’’न्ति? ‘‘मेत्तियभूमजकानं खो, गहपति, भिक्खूनं तुम्हाकं घरे स्वातनाय भत्तं उद्दिट्ठ’’न्ति। अथ खो कल्याणभत्तिको गहपति अनत्तमनो अहोसि – ‘‘कथञ्हि नाम पापभिक्खू अम्हाकं घरे भुञ्‍जिस्सन्ती’’ति! घरं गन्त्वा दासिं आणापेसि – ‘‘ये, जे, स्वे भत्तिका आगच्छन्ति ते कोट्ठके आसनं पञ्‍ञपेत्वा कणाजकेन बिलङ्गदुतियेन परिविसा’’ति। ‘‘एवं अय्या’’ति खो सा दासी कल्याणभत्तिकस्स गहपतिनो पच्‍चस्सोसि।

    Tena kho pana samayena kalyāṇabhattiko gahapati saṅghassa catukkabhattaṃ deti niccabhattaṃ. So bhattagge saputtadāro upatiṭṭhitvā parivisati . Aññe odanena pucchanti, aññe sūpena pucchanti, aññe telena pucchanti, aññe uttaribhaṅgena pucchanti. Tena kho pana samayena kalyāṇabhattikassa gahapatino bhattaṃ svātanāya mettiyabhūmajakānaṃ bhikkhūnaṃ uddiṭṭhaṃ hoti. Atha kho kalyāṇabhattiko gahapati ārāmaṃ agamāsi kenacideva karaṇīyena. So yenāyasmā dabbo mallaputto tenupasaṅkami; upasaṅkamitvā āyasmantaṃ dabbaṃ mallaputtaṃ abhivādetvā ekamantaṃ nisīdi. Ekamantaṃ nisinnaṃ kho kalyāṇabhattikaṃ gahapatiṃ āyasmā dabbo mallaputto dhammiyā kathāya sandassesi samādapesi samuttejesi sampahaṃsesi. Atha kho kalyāṇabhattiko gahapati āyasmatā dabbena mallaputtena dhammiyā kathāya sandassito samādapito samuttejito sampahaṃsito āyasmantaṃ dabbaṃ mallaputtaṃ etadavoca – ‘‘kassa, bhante, amhākaṃ ghare svātanāya bhattaṃ uddiṭṭha’’nti? ‘‘Mettiyabhūmajakānaṃ kho, gahapati, bhikkhūnaṃ tumhākaṃ ghare svātanāya bhattaṃ uddiṭṭha’’nti. Atha kho kalyāṇabhattiko gahapati anattamano ahosi – ‘‘kathañhi nāma pāpabhikkhū amhākaṃ ghare bhuñjissantī’’ti! Gharaṃ gantvā dāsiṃ āṇāpesi – ‘‘ye, je, sve bhattikā āgacchanti te koṭṭhake āsanaṃ paññapetvā kaṇājakena bilaṅgadutiyena parivisā’’ti. ‘‘Evaṃ ayyā’’ti kho sā dāsī kalyāṇabhattikassa gahapatino paccassosi.

    अथ खो मेत्तियभूमजका भिक्खू – ‘‘हिय्यो खो, आवुसो, अम्हाकं कल्याणभत्तिकस्स गहपतिनो घरे भत्तं उद्दिट्ठं, स्वे अम्हे कल्याणभत्तिको गहपति सपुत्तदारो उपतिट्ठित्वा परिविसिस्सति; अञ्‍ञे ओदनेन पुच्छिस्सन्ति, अञ्‍ञे सूपेन पुच्छिस्सन्ति, अञ्‍ञे तेलेन पुच्छिस्सन्ति, अञ्‍ञे उत्तरिभङ्गेन पुच्छिस्सन्ती’’ति। ते तेनेव सोमनस्सेन न चित्तरूपं रत्तिया सुपिंसु। अथ खो मेत्तियभूमजका भिक्खू पुब्बण्हसमयं निवासेत्वा पत्तचीवरं आदाय येन कल्याणभत्तिकस्स गहपतिनो निवेसनं तेनुपसङ्कमिंसु। अद्दसा खो सा दासी मेत्तियभूमजके भिक्खू दूरतोव आगच्छन्ते। दिस्वान कोट्ठके आसनं पञ्‍ञपेत्वा मेत्तियभूमजके भिक्खू एतदवोच – ‘‘निसीदथ, भन्ते’’ति। अथ खो मेत्तियभूमजकानं भिक्खूनं एतदहोसि – ‘‘निस्संसयं खो न ताव भत्तं सिद्धं भविस्सति! यथा 13 मयं कोट्ठके निसीदेय्यामा’’ति 14। अथ खो सा दासी कणाजकेन बिलङ्गदुतियेन उपगच्छि – ‘‘भुञ्‍जथ, भन्ते’’ति। ‘‘मयं खो, भगिनि, निच्‍चभत्तिका’’ति। ‘‘जानामि अय्या निच्‍चभत्तिकात्थ। अपिचाहं हिय्योव गहपतिना आणत्ता – ‘ये, जे, स्वे भत्तिका आगच्छन्ति ते कोट्ठके आसनं पञ्‍ञपेत्वा कणाजकेन बिलङ्गदुतियेन परिविसा’ति। भुञ्‍जथ, भन्ते’’ति। अथ खो मेत्तियभूमजका भिक्खू – ‘‘हिय्यो खो, आवुसो, कल्याणभत्तिको गहपति आरामं अगमासि दब्बस्स मल्‍लपुत्तस्स सन्तिके। निस्संसयं खो मयं दब्बेन मल्‍लपुत्तेन गहपतिनो अन्तरे 15 परिभिन्‍ना’’ति। ते तेनेव दोमनस्सेन न चित्तरूपं भुञ्‍जिंसु। अथ खो मेत्तियभूमजका भिक्खू पच्छाभत्तं पिण्डपातप्पटिक्‍कन्ता आरामं गन्त्वा पत्तचीवरं पटिसामेत्वा बहारामकोट्ठके सङ्घाटिपल्‍लत्थिकाय निसीदिंसु तुण्हीभूता मङ्कुभूता पत्तक्खन्धा अधोमुखा पज्झायन्ता अप्पटिभाना।

    Atha kho mettiyabhūmajakā bhikkhū – ‘‘hiyyo kho, āvuso, amhākaṃ kalyāṇabhattikassa gahapatino ghare bhattaṃ uddiṭṭhaṃ, sve amhe kalyāṇabhattiko gahapati saputtadāro upatiṭṭhitvā parivisissati; aññe odanena pucchissanti, aññe sūpena pucchissanti, aññe telena pucchissanti, aññe uttaribhaṅgena pucchissantī’’ti. Te teneva somanassena na cittarūpaṃ rattiyā supiṃsu. Atha kho mettiyabhūmajakā bhikkhū pubbaṇhasamayaṃ nivāsetvā pattacīvaraṃ ādāya yena kalyāṇabhattikassa gahapatino nivesanaṃ tenupasaṅkamiṃsu. Addasā kho sā dāsī mettiyabhūmajake bhikkhū dūratova āgacchante. Disvāna koṭṭhake āsanaṃ paññapetvā mettiyabhūmajake bhikkhū etadavoca – ‘‘nisīdatha, bhante’’ti. Atha kho mettiyabhūmajakānaṃ bhikkhūnaṃ etadahosi – ‘‘nissaṃsayaṃ kho na tāva bhattaṃ siddhaṃ bhavissati! Yathā 16 mayaṃ koṭṭhake nisīdeyyāmā’’ti 17. Atha kho sā dāsī kaṇājakena bilaṅgadutiyena upagacchi – ‘‘bhuñjatha, bhante’’ti. ‘‘Mayaṃ kho, bhagini, niccabhattikā’’ti. ‘‘Jānāmi ayyā niccabhattikāttha. Apicāhaṃ hiyyova gahapatinā āṇattā – ‘ye, je, sve bhattikā āgacchanti te koṭṭhake āsanaṃ paññapetvā kaṇājakena bilaṅgadutiyena parivisā’ti. Bhuñjatha, bhante’’ti. Atha kho mettiyabhūmajakā bhikkhū – ‘‘hiyyo kho, āvuso, kalyāṇabhattiko gahapati ārāmaṃ agamāsi dabbassa mallaputtassa santike. Nissaṃsayaṃ kho mayaṃ dabbena mallaputtena gahapatino antare 18 paribhinnā’’ti. Te teneva domanassena na cittarūpaṃ bhuñjiṃsu. Atha kho mettiyabhūmajakā bhikkhū pacchābhattaṃ piṇḍapātappaṭikkantā ārāmaṃ gantvā pattacīvaraṃ paṭisāmetvā bahārāmakoṭṭhake saṅghāṭipallatthikāya nisīdiṃsu tuṇhībhūtā maṅkubhūtā pattakkhandhā adhomukhā pajjhāyantā appaṭibhānā.

    अथ खो मेत्तिया भिक्खुनी येन मेत्तियभूमजका भिक्खू तेनुपसङ्कमि; उपसङ्कमित्वा मेत्तियभूमजके भिक्खू एतदवोच – ‘‘वन्दामि, अय्या’’ति। एवं वुत्ते मेत्तियभूमजका भिक्खू नालपिंसु। दुतियम्पि खो…पे॰… ततियम्पि खो मेत्तिया भिक्खुनी मेत्तियभूमजके भिक्खू एतदवोच – ‘‘वन्दामि, अय्या’’ति। ततियम्पि खो मेत्तियभूमजका भिक्खू नालपिंसु। ‘‘क्याहं अय्यानं अपरज्झामि? किस्स मं अय्या नालपन्ती’’ति? ‘‘तथा हि पन त्वं, भगिनि, अम्हे दब्बेन मल्‍लपुत्तेन विहेठीयमाने अज्झुपेक्खसी’’ति? ‘‘क्याहं, अय्या, करोमी’’ति? ‘‘सचे खो त्वं, भगिनि, इच्छेय्यासि अज्‍जेव भगवा दब्बं मल्‍लपुत्तं नासापेय्या’’ति। ‘‘क्याहं, अय्या, करोमि, किं मया सक्‍का कातु’’न्ति? ‘‘एहि त्वं, भगिनि, येन भगवा तेनुपसङ्कम; उपसङ्कमित्वा भगवन्तं एवं वदेहि – ‘इदं, भन्ते, नच्छन्‍नं नप्पतिरूपं। यायं, भन्ते, दिसा अभया अनीतिका अनुपद्दवा सायं दिसा सभया सईतिका सउपद्दवा। यतो निवातं ततो सवातं 19। उदकं मञ्‍ञे आदित्तं। अय्येनम्हि दब्बेन मल्‍लपुत्तेन दूसिता’’’ति। ‘‘एवं, अय्या’’ति खो मेत्तिया भिक्खुनी मेत्तियभूमजकानं भिक्खूनं पटिस्सुत्वा येन भगवा तेनुपसङ्कमि; उपसङ्कमित्वा भगवन्तं अभिवादेत्वा एकमन्तं अट्ठासि। एकमन्तं ठिता खो मेत्तिया भिक्खुनी भगवन्तं एतदवोच – ‘‘इदं, भन्ते, नच्छन्‍नं नप्पतिरूपं। यायं, भन्ते, दिसा अभया अनीतिका अनुपद्दवा सायं दिसा सभया सईतिका सउपद्दवा। यतो निवातं ततो सवातं। उदकं मञ्‍ञे आदित्तं! अय्येनम्हि दब्बेन मल्‍लपुत्तेन दूसिता’’ति।

    Atha kho mettiyā bhikkhunī yena mettiyabhūmajakā bhikkhū tenupasaṅkami; upasaṅkamitvā mettiyabhūmajake bhikkhū etadavoca – ‘‘vandāmi, ayyā’’ti. Evaṃ vutte mettiyabhūmajakā bhikkhū nālapiṃsu. Dutiyampi kho…pe… tatiyampi kho mettiyā bhikkhunī mettiyabhūmajake bhikkhū etadavoca – ‘‘vandāmi, ayyā’’ti. Tatiyampi kho mettiyabhūmajakā bhikkhū nālapiṃsu. ‘‘Kyāhaṃ ayyānaṃ aparajjhāmi? Kissa maṃ ayyā nālapantī’’ti? ‘‘Tathā hi pana tvaṃ, bhagini, amhe dabbena mallaputtena viheṭhīyamāne ajjhupekkhasī’’ti? ‘‘Kyāhaṃ, ayyā, karomī’’ti? ‘‘Sace kho tvaṃ, bhagini, iccheyyāsi ajjeva bhagavā dabbaṃ mallaputtaṃ nāsāpeyyā’’ti. ‘‘Kyāhaṃ, ayyā, karomi, kiṃ mayā sakkā kātu’’nti? ‘‘Ehi tvaṃ, bhagini, yena bhagavā tenupasaṅkama; upasaṅkamitvā bhagavantaṃ evaṃ vadehi – ‘idaṃ, bhante, nacchannaṃ nappatirūpaṃ. Yāyaṃ, bhante, disā abhayā anītikā anupaddavā sāyaṃ disā sabhayā saītikā saupaddavā. Yato nivātaṃ tato savātaṃ 20. Udakaṃ maññe ādittaṃ. Ayyenamhi dabbena mallaputtena dūsitā’’’ti. ‘‘Evaṃ, ayyā’’ti kho mettiyā bhikkhunī mettiyabhūmajakānaṃ bhikkhūnaṃ paṭissutvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho mettiyā bhikkhunī bhagavantaṃ etadavoca – ‘‘idaṃ, bhante, nacchannaṃ nappatirūpaṃ. Yāyaṃ, bhante, disā abhayā anītikā anupaddavā sāyaṃ disā sabhayā saītikā saupaddavā. Yato nivātaṃ tato savātaṃ. Udakaṃ maññe ādittaṃ! Ayyenamhi dabbena mallaputtena dūsitā’’ti.

    ३८४. अथ खो भगवा एतस्मिं निदाने एतस्मिं पकरणे भिक्खुसङ्घं सन्‍निपातापेत्वा आयस्मन्तं दब्बं मल्‍लपुत्तं पटिपुच्छि – ‘‘सरसि त्वं, दब्ब, एवरूपं कत्ता यथायं भिक्खुनी आहा’’ति? ‘‘यथा मं, भन्ते, भगवा जानाती’’ति। दुतियम्पि खो भगवा…पे॰… ततियम्पि खो भगवा आयस्मन्तं दब्बं मल्‍लपुत्तं एतदवोच – ‘‘सरसि त्वं, दब्ब, एवरूपं कत्ता यथायं भिक्खुनी आहा’’ति? ‘‘यथा मं, भन्ते, भगवा जानाती’’ति। ‘‘न खो, दब्ब, दब्बा एवं निब्बेठेन्ति। सचे तया कतं कतन्ति वदेहि, सचे तया अकतं अकतन्ति वदेही’’ति। ‘‘यतो अहं, भन्ते, जातो नाभिजानामि सुपिनन्तेनपि मेथुनं धम्मं पटिसेविता, पगेव जागरो’’ति! अथ खो भगवा भिक्खू आमन्तेसि – ‘‘तेन हि, भिक्खवे, मेत्तियं भिक्खुनिं नासेथ । इमे च भिक्खू अनुयुञ्‍जथा’’ति। इदं वत्वा भगवा उट्ठायासना विहारं पाविसि।

    384. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ dabbaṃ mallaputtaṃ paṭipucchi – ‘‘sarasi tvaṃ, dabba, evarūpaṃ kattā yathāyaṃ bhikkhunī āhā’’ti? ‘‘Yathā maṃ, bhante, bhagavā jānātī’’ti. Dutiyampi kho bhagavā…pe… tatiyampi kho bhagavā āyasmantaṃ dabbaṃ mallaputtaṃ etadavoca – ‘‘sarasi tvaṃ, dabba, evarūpaṃ kattā yathāyaṃ bhikkhunī āhā’’ti? ‘‘Yathā maṃ, bhante, bhagavā jānātī’’ti. ‘‘Na kho, dabba, dabbā evaṃ nibbeṭhenti. Sace tayā kataṃ katanti vadehi, sace tayā akataṃ akatanti vadehī’’ti. ‘‘Yato ahaṃ, bhante, jāto nābhijānāmi supinantenapi methunaṃ dhammaṃ paṭisevitā, pageva jāgaro’’ti! Atha kho bhagavā bhikkhū āmantesi – ‘‘tena hi, bhikkhave, mettiyaṃ bhikkhuniṃ nāsetha . Ime ca bhikkhū anuyuñjathā’’ti. Idaṃ vatvā bhagavā uṭṭhāyāsanā vihāraṃ pāvisi.

    अथ खो ते भिक्खू मेत्तियं भिक्खुनिं नासेसुं। अथ खो मेत्तियभूमजका भिक्खू ते भिक्खू एतदवोचुं – ‘‘मावुसो, मेत्तियं भिक्खुनिं नासेथ। न सा किञ्‍चि अपरज्झति। अम्हेहि सा उस्साहिता कुपितेहि अनत्तमनेहि चावनाधिप्पायेही’’ति। ‘‘किं पन तुम्हे, आवुसो, आयस्मन्तं दब्बं मल्‍लपुत्तं अमूलकेन पाराजिकेन धम्मेन अनुद्धंसेथा’’ति? ‘‘एवमावुसो’’ति। ये ते भिक्खू अप्पिच्छा…पे॰… ते उज्झायन्ति खिय्यन्ति विपाचेन्ति – ‘‘कथञ्हि नाम मेत्तियभूमजका भिक्खू आयस्मन्तं दब्बं मल्‍लपुत्तं अमूलकेन पाराजिकेन धम्मेन अनुद्धंसेस्सन्ती’’ति! अथ खो ते भिक्खू मेत्तियभूमजके भिक्खू अनेकपरियायेन विगरहित्वा भगवतो एतमत्थं आरोचेसुं…पे॰… ‘‘सच्‍चं किर तुम्हे, भिक्खवे, दब्बं मल्‍लपुत्तं अमूलकेन पाराजिकेन धम्मेन अनुद्धंसेथा’’ति? ‘‘सच्‍चं, भगवा’’ति। विगरहि बुद्धो भगवा…पे॰… ‘‘कथञ्हि नाम तुम्हे, मोघपुरिसा, दब्बं मल्‍लपुत्तं अमूलकेन पाराजिकेन धम्मेन अनुद्धंसेस्सथ! नेतं, मोघपुरिसा, अप्पसन्‍नानं वा पसादाय…पे॰… एवञ्‍च पन, भिक्खवे, इमं सिक्खापदं उद्दिसेय्याथ –

    Atha kho te bhikkhū mettiyaṃ bhikkhuniṃ nāsesuṃ. Atha kho mettiyabhūmajakā bhikkhū te bhikkhū etadavocuṃ – ‘‘māvuso, mettiyaṃ bhikkhuniṃ nāsetha. Na sā kiñci aparajjhati. Amhehi sā ussāhitā kupitehi anattamanehi cāvanādhippāyehī’’ti. ‘‘Kiṃ pana tumhe, āvuso, āyasmantaṃ dabbaṃ mallaputtaṃ amūlakena pārājikena dhammena anuddhaṃsethā’’ti? ‘‘Evamāvuso’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma mettiyabhūmajakā bhikkhū āyasmantaṃ dabbaṃ mallaputtaṃ amūlakena pārājikena dhammena anuddhaṃsessantī’’ti! Atha kho te bhikkhū mettiyabhūmajake bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, dabbaṃ mallaputtaṃ amūlakena pārājikena dhammena anuddhaṃsethā’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma tumhe, moghapurisā, dabbaṃ mallaputtaṃ amūlakena pārājikena dhammena anuddhaṃsessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –

    ३८५. यो पन भिक्खु भिक्खुं दुट्ठो दोसो अप्पतीतो अमूलकेन पाराजिकेन धम्मेन अनुद्धंसेय्य – ‘अप्पेव नाम नं इमम्हा ब्रह्मचरिया चावेय्य’न्ति, ततो अपरेन समयेन समनुग्गाहीयमानो वा असमनुग्गाहीयमानो वा अमूलकञ्‍चेव तं अधिकरणं होति भिक्खु च दोसं पतिट्ठाति, सङ्घादिसेसो’’ति।

    385.Yo pana bhikkhu bhikkhuṃ duṭṭho doso appatīto amūlakena pārājikena dhammena anuddhaṃseyya – ‘appeva nāma naṃ imamhā brahmacariyā cāveyya’nti, tato aparena samayena samanuggāhīyamāno vā asamanuggāhīyamāno vā amūlakañceva taṃ adhikaraṇaṃ hoti bhikkhu ca dosaṃ patiṭṭhāti, saṅghādiseso’’ti.

    ३८६. यो पनाति यो यादिसो…पे॰… भिक्खूति…पे॰… अयं इमस्मिं अत्थे अधिप्पेतो भिक्खूति।

    386.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.

    भिक्खुन्ति अञ्‍ञं भिक्खुं।

    Bhikkhunti aññaṃ bhikkhuṃ.

    दुट्ठो दोसोति कुपितो अनत्तमनो अनभिरद्धो आहतचित्तो खिलजातो।

    Duṭṭho dosoti kupito anattamano anabhiraddho āhatacitto khilajāto.

    अप्पतीतोति तेन च कोपेन तेन च दोसेन ताय च अनत्तमनताय ताय च अनभिरद्धिया अप्पतीतो होति।

    Appatītoti tena ca kopena tena ca dosena tāya ca anattamanatāya tāya ca anabhiraddhiyā appatīto hoti.

    अमूलकं नाम अदिट्ठं असुतं अपरिसङ्कितं।

    Amūlakaṃ nāma adiṭṭhaṃ asutaṃ aparisaṅkitaṃ.

    पाराजिकेन धम्मेनाति चतुन्‍नं अञ्‍ञतरेन।

    Pārājikena dhammenāti catunnaṃ aññatarena.

    अनुद्धंसेय्याति चोदेति वा चोदापेति वा।

    Anuddhaṃseyyāti codeti vā codāpeti vā.

    अप्पेव नाम नं इमम्हा ब्रह्मचरिया चावेय्यन्ति भिक्खुभावा चावेय्यं, समणधम्मा चावेय्यं, सीलक्खन्धा चावेय्यं, तपोगुणा चावेय्यं।

    Appeva nāma naṃ imamhā brahmacariyā cāveyyanti bhikkhubhāvā cāveyyaṃ, samaṇadhammā cāveyyaṃ, sīlakkhandhā cāveyyaṃ, tapoguṇā cāveyyaṃ.

    ततो अपरेन समयेनाति यस्मिं खणे अनुद्धंसितो होति तं खणं तं लयं तं मुहुत्तं वीतिवत्ते।

    Tatoaparena samayenāti yasmiṃ khaṇe anuddhaṃsito hoti taṃ khaṇaṃ taṃ layaṃ taṃ muhuttaṃ vītivatte.

    समनुग्गाहीयमानोति येन वत्थुना अनुद्धंसितो होति तस्मिं वत्थुस्मिं समनुग्गाहीयमानो।

    Samanuggāhīyamānoti yena vatthunā anuddhaṃsito hoti tasmiṃ vatthusmiṃ samanuggāhīyamāno.

    असमनुग्गाहीयमानोति न केनचि वुच्‍चमानो।

    Asamanuggāhīyamānoti na kenaci vuccamāno.

    अधिकरणं नाम चत्तारि अधिकरणानि – विवादाधिकरणं, अनुवादाधिकरणं, आपत्ताधिकरणं, किच्‍चाधिकरणं।

    Adhikaraṇaṃ nāma cattāri adhikaraṇāni – vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇaṃ.

    भिक्खु च दोसं पतिट्ठातीति तुच्छकं मया भणितं, मुसा मया भणितं, अभूतं मया भणितं, अजानन्तेन मया भणितं।

    Bhikkhu ca dosaṃ patiṭṭhātīti tucchakaṃ mayā bhaṇitaṃ, musā mayā bhaṇitaṃ, abhūtaṃ mayā bhaṇitaṃ, ajānantena mayā bhaṇitaṃ.

    सङ्घादिसेसोति…पे॰… तेनपि वुच्‍चति सङ्घादिसेसोति।

    Saṅghādisesoti…pe… tenapi vuccati saṅghādisesoti.

    ३८७. अदिट्ठस्स होति पाराजिकं धम्मं अज्झापज्‍जन्तो। तञ्‍चे चोदेति – ‘‘दिट्ठो मया, पाराजिकं धम्मं अज्झापन्‍नोसि, अस्समणोसि, असक्यपुत्तियोसि, नत्थि तया सद्धिं उपोसथो वा पवारणा वा सङ्घकम्मं वा’’ति, आपत्ति वाचाय, वाचाय सङ्घादिसेसस्स।

    387. Adiṭṭhassa hoti pārājikaṃ dhammaṃ ajjhāpajjanto. Tañce codeti – ‘‘diṭṭho mayā, pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.

    असुतस्स होति – ‘‘पाराजिकं धम्मं अज्झापन्‍नो’’ति। तञ्‍चे चोदेति – ‘‘सुतो मया, पाराजिकं धम्मं अज्झापन्‍नोसि, अस्समणोसि, असक्यपुत्तियोसि, नत्थि तया सद्धिं उपोसथो वा पवारणा वा सङ्घकम्मं वा’’ति, आपत्ति वाचाय, वाचाय सङ्घादिसेसस्स।

    Asutassa hoti – ‘‘pārājikaṃ dhammaṃ ajjhāpanno’’ti. Tañce codeti – ‘‘suto mayā, pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.

    अपरिसङ्कितस्स होति – ‘‘पाराजिकं धम्मं अज्झापन्‍नो’’ति। तञ्‍चे चोदेति – ‘‘परिसङ्कितो मया, पाराजिकं धम्मं अज्झापन्‍नोसि, अस्समणोसि, असक्यपुत्तियोसि, नत्थि तया सद्धिं उपोसथो वा पवारणा वा सङ्घकम्मं वा’’ति, आपत्ति वाचाय, वाचाय सङ्घादिसेसस्स।

    Aparisaṅkitassa hoti – ‘‘pārājikaṃ dhammaṃ ajjhāpanno’’ti. Tañce codeti – ‘‘parisaṅkito mayā, pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.

    अदिट्ठस्स होति पाराजिकं धम्मं अज्झापज्‍जन्तो। तञ्‍चे चोदेति – ‘‘दिट्ठो मया सुतो च, पाराजिकं धम्मं अज्झापन्‍नोसि, अस्समणोसि’’…पे॰… आपत्ति वाचाय, वाचाय सङ्घादिसेसस्स।

    Adiṭṭhassa hoti pārājikaṃ dhammaṃ ajjhāpajjanto. Tañce codeti – ‘‘diṭṭho mayā suto ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.

    अदिट्ठस्स होति पाराजिकं धम्मं अज्झापज्‍जन्तो। तञ्‍चे चोदेति – ‘‘दिट्ठो मया परिसङ्कितो च, पाराजिकं धम्मं अज्झापन्‍नोसि, अस्समणोसि’’…पे॰… आपत्ति वाचाय, वाचाय सङ्घादिसेसस्स।

    Adiṭṭhassa hoti pārājikaṃ dhammaṃ ajjhāpajjanto. Tañce codeti – ‘‘diṭṭho mayā parisaṅkito ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.

    अदिट्ठस्स होति पाराजिकं धम्मं अज्झापज्‍जन्तो। तञ्‍चे चोदेति – ‘‘दिट्ठो मया सुतो च परिसङ्कितो च, पाराजिकं धम्मं अज्झापन्‍नोसि, अस्समणोसि’’…पे॰… आपत्ति वाचाय, वाचाय सङ्घादिसेसस्स।

    Adiṭṭhassa hoti pārājikaṃ dhammaṃ ajjhāpajjanto. Tañce codeti – ‘‘diṭṭho mayā suto ca parisaṅkito ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.

    असुतस्स होति – ‘‘पाराजिकं धम्मं अज्झापन्‍नो’’ति। तञ्‍चे चोदेति – ‘‘सुतो मया परिसङ्कितो च…पे॰… सुतो मया दिट्ठो च…पे॰… सुतो मया परिसङ्कितो च दिट्ठो च, पाराजिकं धम्मं अज्झापन्‍नोसि, अस्समणोसि’’…पे॰… आपत्ति वाचाय, वाचाय सङ्घादिसेसस्स।

    Asutassa hoti – ‘‘pārājikaṃ dhammaṃ ajjhāpanno’’ti. Tañce codeti – ‘‘suto mayā parisaṅkito ca…pe… suto mayā diṭṭho ca…pe… suto mayā parisaṅkito ca diṭṭho ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.

    अपरिसङ्कितस्स होति – ‘‘पाराजिकं धम्मं अज्झापन्‍नो’’ति। तञ्‍चे चोदेति – ‘‘परिसङ्कितो मया दिट्ठो च…पे॰… परिसङ्कितो मया सुतो च…पे॰… परिसङ्कितो मया दिट्ठो च सुतो च, पाराजिकं धम्मं अज्झापन्‍नोसि, अस्समणोसि’’…पे॰… आपत्ति वाचाय, वाचाय सङ्घादिसेसस्स।

    Aparisaṅkitassa hoti – ‘‘pārājikaṃ dhammaṃ ajjhāpanno’’ti. Tañce codeti – ‘‘parisaṅkito mayā diṭṭho ca…pe… parisaṅkito mayā suto ca…pe… parisaṅkito mayā diṭṭho ca suto ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.

    दिट्ठस्स होति पाराजिकं धम्मं अज्झापज्‍जन्तो। तञ्‍चे चोदेति – ‘‘सुतो मया पाराजिकं धम्मं अज्झापन्‍नोसि, अस्समणोसि’’…पे॰… आपत्ति वाचाय, वाचाय सङ्घादिसेसस्स।

    Diṭṭhassa hoti pārājikaṃ dhammaṃ ajjhāpajjanto. Tañce codeti – ‘‘suto mayā pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.

    दिट्ठस्स होति पाराजिकं धम्मं अज्झापज्‍जन्तो। तञ्‍चे चोदेति – ‘‘परिसङ्कितो मया, पाराजिकं धम्मं अज्झापन्‍नोसि’’…पे॰… ‘‘सुतो मया परिसङ्कितो च, पाराजिकं धम्मं अज्झापन्‍नोसि, अस्समणोसि’’…पे॰… आपत्ति वाचाय, वाचाय सङ्घादिसेसस्स।

    Diṭṭhassa hoti pārājikaṃ dhammaṃ ajjhāpajjanto. Tañce codeti – ‘‘parisaṅkito mayā, pārājikaṃ dhammaṃ ajjhāpannosi’’…pe… ‘‘suto mayā parisaṅkito ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.

    सुतस्स होति – ‘‘पाराजिकं धम्मं अज्झापन्‍नो’’ति। तञ्‍चे चोदेति – ‘‘परिसङ्कितो मया, पाराजिकं धम्मं अज्झापन्‍नोसि…पे॰… दिट्ठो मया, पाराजिकं धम्मं अज्झापन्‍नोसि…पे॰… परिसङ्कितो मया दिट्ठो च, पाराजिकं धम्मं अज्झापन्‍नोसि, अस्समणोसि’’…पे॰… आपत्ति वाचाय, वाचाय सङ्घादिसेसस्स।

    Sutassa hoti – ‘‘pārājikaṃ dhammaṃ ajjhāpanno’’ti. Tañce codeti – ‘‘parisaṅkito mayā, pārājikaṃ dhammaṃ ajjhāpannosi…pe… diṭṭho mayā, pārājikaṃ dhammaṃ ajjhāpannosi…pe… parisaṅkito mayā diṭṭho ca, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.

    परिसङ्कितस्स होति – ‘‘पाराजिकं धम्मं अज्झापन्‍नो’’ति। तञ्‍चे चोदेति – ‘‘दिट्ठो मया, पाराजिकं धम्मं अज्झापन्‍नोसि…पे॰… सुतो मया, पाराजिकं धम्मं अज्झापन्‍नोसि…पे॰… दिट्ठो मया सुतो च, पाराजिकं धम्मं अज्झापन्‍नोसि, अस्समणोसि, असक्यपुत्तियोसि’’…पे॰… आपत्ति वाचाय, वाचाय सङ्घादिसेसस्स।

    Parisaṅkitassa hoti – ‘‘pārājikaṃ dhammaṃ ajjhāpanno’’ti. Tañce codeti – ‘‘diṭṭho mayā, pārājikaṃ dhammaṃ ajjhāpannosi…pe… suto mayā, pārājikaṃ dhammaṃ ajjhāpannosi…pe… diṭṭho mayā suto ca, pārājikaṃ dhammaṃ ajjhāpannosi, assamaṇosi, asakyaputtiyosi’’…pe… āpatti vācāya, vācāya saṅghādisesassa.

    दिट्ठस्स होति पाराजिकं धम्मं अज्झापज्‍जन्तो। दिट्ठे वेमतिको दिट्ठं नो कप्पेति दिट्ठं नस्सरति दिट्ठं पमुट्ठो होति…पे॰… सुते वेमतिको सुतं नो कप्पेति सुतं नस्सरति सुतं पमुट्ठो होति…पे॰… परिसङ्किते वेमतिको परिसङ्कितं नो कप्पेति परिसङ्कितं नस्सरति परिसङ्कितं पमुट्ठो होति। तञ्‍चे चोदेति – ‘‘परिसङ्कितो मया दिट्ठो च…पे॰… परिसङ्कितो मया सुतो च…पे॰… परिसङ्कितो मया दिट्ठो च सुतो च, पाराजिकं धम्मं अज्झापन्‍नोसि, अस्समणोसि, असक्यपुत्तियोसि, नत्थि तया सद्धिं उपोसथो वा पवारणा वा सङ्घकम्मं वा’’ति, आपत्ति वाचाय, वाचाय सङ्घादिसेसस्स।

    Diṭṭhassa hoti pārājikaṃ dhammaṃ ajjhāpajjanto. Diṭṭhe vematiko diṭṭhaṃ no kappeti diṭṭhaṃ nassarati diṭṭhaṃ pamuṭṭho hoti…pe… sute vematiko sutaṃ no kappeti sutaṃ nassarati sutaṃ pamuṭṭho hoti…pe… parisaṅkite vematiko parisaṅkitaṃ no kappeti parisaṅkitaṃ nassarati parisaṅkitaṃ pamuṭṭho hoti. Tañce codeti – ‘‘parisaṅkito mayā diṭṭho ca…pe… parisaṅkito mayā suto ca…pe… parisaṅkito mayā diṭṭho ca suto ca, pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.

    ३८८. अदिट्ठस्स होति पाराजिकं धम्मं अज्झापज्‍जन्तो। तञ्‍चे चोदापेति – ‘‘दिट्ठोसि, पाराजिकं धम्मं अज्झापन्‍नोसि, अस्समणोसि, असक्यपुत्तियोसि, नत्थि तया सद्धिं उपोसथो वा पवारणा वा सङ्घकम्मं वा’’ति, आपत्ति वाचाय, वाचाय सङ्घादिसेसस्स।

    388. Adiṭṭhassa hoti pārājikaṃ dhammaṃ ajjhāpajjanto. Tañce codāpeti – ‘‘diṭṭhosi, pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.

    असुतस्स होति – ‘‘पाराजिकं धम्मं अज्झापन्‍नो’’ति…पे॰… अपरिसङ्कितस्स होति – ‘‘पाराजिकं धम्मं अज्झापन्‍नो’’ति। तञ्‍चे चोदापेति – ‘‘परिसङ्कितोसि, पाराजिकं धम्मं अज्झापन्‍नोसि’’…पे॰… आपत्ति वाचाय, वाचाय सङ्घादिसेसस्स।

    Asutassa hoti – ‘‘pārājikaṃ dhammaṃ ajjhāpanno’’ti…pe… aparisaṅkitassa hoti – ‘‘pārājikaṃ dhammaṃ ajjhāpanno’’ti. Tañce codāpeti – ‘‘parisaṅkitosi, pārājikaṃ dhammaṃ ajjhāpannosi’’…pe… āpatti vācāya, vācāya saṅghādisesassa.

    अदिट्ठस्स होति पाराजिकं धम्मं अज्झापज्‍जन्तो। तञ्‍चे चोदापेति – ‘‘दिट्ठोसि सुतोसि…पे॰… दिट्ठोसि परिसङ्कितोसि…पे॰… दिट्ठोसि सुतोसि परिसङ्कितोसि, पाराजिकं धम्मं अज्झापन्‍नोसि’’…पे॰… असुतस्स होति – ‘‘पाराजिकं धम्मं अज्झापन्‍नो’’ति…पे॰… अपरिसङ्कितस्स होति – ‘‘पाराजिकं धम्मं अज्झापन्‍नो’’ति। तञ्‍चे चोदापेति – ‘‘परिसङ्कितोसि, दिट्ठोसि…पे॰… परिसङ्कितोसि, सुतोसि…पे॰… परिसङ्कितोसि, दिट्ठोसि, सुतोसि, पाराजिकं धम्मं अज्झापन्‍नोसि, अस्समणोसि’’…पे॰… आपत्ति वाचाय, वाचाय सङ्घादिसेसस्स।

    Adiṭṭhassa hoti pārājikaṃ dhammaṃ ajjhāpajjanto. Tañce codāpeti – ‘‘diṭṭhosi sutosi…pe… diṭṭhosi parisaṅkitosi…pe… diṭṭhosi sutosi parisaṅkitosi, pārājikaṃ dhammaṃ ajjhāpannosi’’…pe… asutassa hoti – ‘‘pārājikaṃ dhammaṃ ajjhāpanno’’ti…pe… aparisaṅkitassa hoti – ‘‘pārājikaṃ dhammaṃ ajjhāpanno’’ti. Tañce codāpeti – ‘‘parisaṅkitosi, diṭṭhosi…pe… parisaṅkitosi, sutosi…pe… parisaṅkitosi, diṭṭhosi, sutosi, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.

    दिट्ठस्स होति पाराजिकं धम्मं अज्झापज्‍जन्तो। तञ्‍चे चोदापेति – ‘‘सुतोसि’’…पे॰… तञ्‍चे चोदापेति – ‘‘परिसङ्कितोसि’’…पे॰… तञ्‍चे चोदापेति – ‘‘सुतोसि, परिसङ्कितोसि, पाराजिकं धम्मं अज्झापन्‍नोसि, अस्समणोसि’’…पे॰… आपत्ति वाचाय, वाचाय सङ्घादिसेसस्स।

    Diṭṭhassa hoti pārājikaṃ dhammaṃ ajjhāpajjanto. Tañce codāpeti – ‘‘sutosi’’…pe… tañce codāpeti – ‘‘parisaṅkitosi’’…pe… tañce codāpeti – ‘‘sutosi, parisaṅkitosi, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.

    सुतस्स होति – ‘‘पाराजिकं धम्मं अज्झापन्‍नो’’ति…पे॰… परिसङ्कितस्स होति – ‘‘पाराजिकं धम्मं अज्झापन्‍नो’’ति। तञ्‍चे ‘‘दिट्ठोसि’’…पे॰… तञ्‍चे चोदापेति – ‘‘सुतोसि’’…पे॰… तञ्‍चे चोदापेति – ‘‘दिट्ठोसि, सुतोसि, पाराजिकं धम्मं अज्झापन्‍नोसि, अस्समणोसि’’…पे॰… आपत्ति वाचाय, वाचाय सङ्घादिसेसस्स।

    Sutassa hoti – ‘‘pārājikaṃ dhammaṃ ajjhāpanno’’ti…pe… parisaṅkitassa hoti – ‘‘pārājikaṃ dhammaṃ ajjhāpanno’’ti. Tañce ‘‘diṭṭhosi’’…pe… tañce codāpeti – ‘‘sutosi’’…pe… tañce codāpeti – ‘‘diṭṭhosi, sutosi, pārājikaṃ dhammaṃ ajjhāpannosi, assamaṇosi’’…pe… āpatti vācāya, vācāya saṅghādisesassa.

    दिट्ठस्स होति पाराजिकं धम्मं अज्झापज्‍जन्तो। दिट्ठे वेमतिको दिट्ठं नो कप्पेति दिट्ठं नस्सरति दिट्ठं पमुट्ठो होति…पे॰… सुते वेमतिको सुतं नो कप्पेति सुतं नस्सरति सुतं पमुट्ठो होति…पे॰… परिसङ्किते वेमतिको परिसङ्कितं नो कप्पेति परिसङ्कितं नस्सरति परिसङ्कितं पमुट्ठो होति। तञ्‍चे चोदापेति – ‘‘परिसङ्कितोसि, दिट्ठोसि’’…पे॰… परिसङ्कितं पमुट्ठो होति, तञ्‍चे चोदापेति – ‘‘परिसङ्कितोसि सुतोसि’’…पे॰… परिसङ्कितं पमुट्ठो होति, तञ्‍चे चोदापेति – ‘‘परिसङ्कितोसि, दिट्ठोसि, सुतोसि, पाराजिकं धम्मं अज्झापन्‍नोसि, अस्समणोसि, असक्यपुत्तियोसि, नत्थि तया सद्धिं उपोसथो वा पवारणा वा सङ्घकम्मं वा’’ति, आपत्ति वाचाय, वाचाय सङ्घादिसेसस्स।

    Diṭṭhassa hoti pārājikaṃ dhammaṃ ajjhāpajjanto. Diṭṭhe vematiko diṭṭhaṃ no kappeti diṭṭhaṃ nassarati diṭṭhaṃ pamuṭṭho hoti…pe… sute vematiko sutaṃ no kappeti sutaṃ nassarati sutaṃ pamuṭṭho hoti…pe… parisaṅkite vematiko parisaṅkitaṃ no kappeti parisaṅkitaṃ nassarati parisaṅkitaṃ pamuṭṭho hoti. Tañce codāpeti – ‘‘parisaṅkitosi, diṭṭhosi’’…pe… parisaṅkitaṃ pamuṭṭho hoti, tañce codāpeti – ‘‘parisaṅkitosi sutosi’’…pe… parisaṅkitaṃ pamuṭṭho hoti, tañce codāpeti – ‘‘parisaṅkitosi, diṭṭhosi, sutosi, pārājikaṃ dhammaṃ ajjhāpannosi, assamaṇosi, asakyaputtiyosi, natthi tayā saddhiṃ uposatho vā pavāraṇā vā saṅghakammaṃ vā’’ti, āpatti vācāya, vācāya saṅghādisesassa.

    ३८९. असुद्धे सुद्धदिट्ठि, सुद्धे असुद्धदिट्ठि, असुद्धे असुद्धदिट्ठि, सुद्धे सुद्धदिट्ठि।

    389. Asuddhe suddhadiṭṭhi, suddhe asuddhadiṭṭhi, asuddhe asuddhadiṭṭhi, suddhe suddhadiṭṭhi.

    असुद्धो होति पुग्गलो अञ्‍ञतरं पाराजिकं धम्मं अज्झापन्‍नो। तञ्‍चे सुद्धदिट्ठि समानो अनोकासं कारापेत्वा चावनाधिप्पायो वदेति, आपत्ति सङ्घादिसेसेन दुक्‍कटस्स।

    Asuddho hoti puggalo aññataraṃ pārājikaṃ dhammaṃ ajjhāpanno. Tañce suddhadiṭṭhi samāno anokāsaṃ kārāpetvā cāvanādhippāyo vadeti, āpatti saṅghādisesena dukkaṭassa.

    असुद्धो होति पुग्गलो अञ्‍ञतरं पाराजिकं धम्मं अज्झापन्‍नो। तञ्‍चे सुद्धदिट्ठि समानो ओकासं कारापेत्वा चावनाधिप्पायो वदेति, आपत्ति सङ्घादिसेसस्स।

    Asuddho hoti puggalo aññataraṃ pārājikaṃ dhammaṃ ajjhāpanno. Tañce suddhadiṭṭhi samāno okāsaṃ kārāpetvā cāvanādhippāyo vadeti, āpatti saṅghādisesassa.

    असुद्धो होति पुग्गलो अञ्‍ञतरं पाराजिकं धम्मं अज्झापन्‍नो। तञ्‍चे सुद्धदिट्ठि समानो अनोकासं कारापेत्वा अक्‍कोसाधिप्पायो वदेति, आपत्ति ओमसवादेन दुक्‍कटस्स।

    Asuddho hoti puggalo aññataraṃ pārājikaṃ dhammaṃ ajjhāpanno. Tañce suddhadiṭṭhi samāno anokāsaṃ kārāpetvā akkosādhippāyo vadeti, āpatti omasavādena dukkaṭassa.

    असुद्धो होति पुग्गलो अञ्‍ञतरं पाराजिकं धम्मं अज्झापन्‍नो। तञ्‍चे सुद्धदिट्ठि समानो ओकासं कारापेत्वा अक्‍कोसाधिप्पायो वदेति, आपत्ति ओमसवादस्स।

    Asuddho hoti puggalo aññataraṃ pārājikaṃ dhammaṃ ajjhāpanno. Tañce suddhadiṭṭhi samāno okāsaṃ kārāpetvā akkosādhippāyo vadeti, āpatti omasavādassa.

    सुद्धो होति पुग्गलो अञ्‍ञतरं पाराजिकं धम्मं अनज्झापन्‍नो। तञ्‍चे असुद्धदिट्ठि समानो अनोकासं कारापेत्वा चावनाधिप्पायो वदेति, आपत्ति दुक्‍कटस्स।

    Suddho hoti puggalo aññataraṃ pārājikaṃ dhammaṃ anajjhāpanno. Tañce asuddhadiṭṭhi samāno anokāsaṃ kārāpetvā cāvanādhippāyo vadeti, āpatti dukkaṭassa.

    सुद्धो होति पुग्गलो अञ्‍ञतरं पाराजिकं धम्मं अनज्झापन्‍नो। तञ्‍चे असुद्धदिट्ठि समानो ओकासं कारापेत्वा चावनाधिप्पायो वदेति, अनापत्ति।

    Suddho hoti puggalo aññataraṃ pārājikaṃ dhammaṃ anajjhāpanno. Tañce asuddhadiṭṭhi samāno okāsaṃ kārāpetvā cāvanādhippāyo vadeti, anāpatti.

    सुद्धो होति पुग्गलो अञ्‍ञतरं पाराजिकं धम्मं अनज्झापन्‍नो। तञ्‍चे असुद्धदिट्ठि समानो अनोकासं कारापेत्वा अक्‍कोसाधिप्पायो वदेति, आपत्ति ओमसवादेन दुक्‍कटस्स।

    Suddho hoti puggalo aññataraṃ pārājikaṃ dhammaṃ anajjhāpanno. Tañce asuddhadiṭṭhi samāno anokāsaṃ kārāpetvā akkosādhippāyo vadeti, āpatti omasavādena dukkaṭassa.

    सुद्धो होति पुग्गलो अञ्‍ञतरं पाराजिकं धम्मं अनज्झापन्‍नो। तञ्‍चे असुद्धदिट्ठि समानो ओकासं कारापेत्वा अक्‍कोसाधिप्पायो वदेति, आपत्ति ओमसवादस्स।

    Suddho hoti puggalo aññataraṃ pārājikaṃ dhammaṃ anajjhāpanno. Tañce asuddhadiṭṭhi samāno okāsaṃ kārāpetvā akkosādhippāyo vadeti, āpatti omasavādassa.

    असुद्धो होति पुग्गलो अञ्‍ञतरं पाराजिकं धम्मं अज्झापन्‍नो। तञ्‍चे असुद्धदिट्ठि समानो अनोकासं कारापेत्वा चावनाधिप्पायो वदेति, आपत्ति दुक्‍कटस्स।

    Asuddho hoti puggalo aññataraṃ pārājikaṃ dhammaṃ ajjhāpanno. Tañce asuddhadiṭṭhi samāno anokāsaṃ kārāpetvā cāvanādhippāyo vadeti, āpatti dukkaṭassa.

    असुद्धो होति पुग्गलो अञ्‍ञतरं पाराजिकं धम्मं अज्झापन्‍नो। तञ्‍चे असुद्धदिट्ठि समानो ओकासं कारापेत्वा चावनाधिप्पायो वदेति, अनापत्ति।

    Asuddho hoti puggalo aññataraṃ pārājikaṃ dhammaṃ ajjhāpanno. Tañce asuddhadiṭṭhi samāno okāsaṃ kārāpetvā cāvanādhippāyo vadeti, anāpatti.

    असुद्धो होति पुग्गलो अञ्‍ञतरं पाराजिकं धम्मं अज्झापन्‍नो। तञ्‍चे असुद्धदिट्ठि समानो अनोकासं कारापेत्वा अक्‍कोसाधिप्पायो वदेति, आपत्ति ओमसवादेन दुक्‍कटस्स।

    Asuddho hoti puggalo aññataraṃ pārājikaṃ dhammaṃ ajjhāpanno. Tañce asuddhadiṭṭhi samāno anokāsaṃ kārāpetvā akkosādhippāyo vadeti, āpatti omasavādena dukkaṭassa.

    असुद्धो होति पुग्गलो अञ्‍ञतरं पाराजिकं धम्मं अज्झापन्‍नो। तञ्‍चे असुद्धदिट्ठि समानो ओकासं कारापेत्वा अक्‍कोसाधिप्पायो वदेति, आपत्ति ओमसवादस्स।

    Asuddho hoti puggalo aññataraṃ pārājikaṃ dhammaṃ ajjhāpanno. Tañce asuddhadiṭṭhi samāno okāsaṃ kārāpetvā akkosādhippāyo vadeti, āpatti omasavādassa.

    सुद्धो होति पुग्गलो अञ्‍ञतरं पाराजिकं धम्मं अनज्झापन्‍नो। तञ्‍चे सुद्धदिट्ठि समानो अनोकासं कारापेत्वा चावनाधिप्पायो वदेति, आपत्ति सङ्घादिसेसेन दुक्‍कटस्स।

    Suddho hoti puggalo aññataraṃ pārājikaṃ dhammaṃ anajjhāpanno. Tañce suddhadiṭṭhi samāno anokāsaṃ kārāpetvā cāvanādhippāyo vadeti, āpatti saṅghādisesena dukkaṭassa.

    सुद्धो होति पुग्गलो अञ्‍ञतरं पाराजिकं धम्मं अनज्झापन्‍नो। तञ्‍चे सुद्धदिट्ठि समानो ओकासं कारापेत्वा चावनाधिप्पायो वदेति, आपत्ति सङ्घादिसेसस्स।

    Suddho hoti puggalo aññataraṃ pārājikaṃ dhammaṃ anajjhāpanno. Tañce suddhadiṭṭhi samāno okāsaṃ kārāpetvā cāvanādhippāyo vadeti, āpatti saṅghādisesassa.

    सुद्धो होति पुग्गलो अञ्‍ञतरं पाराजिकं धम्मं अनज्झापन्‍नो। तञ्‍चे सुद्धदिट्ठि समानो अनोकासं कारापेत्वा अक्‍कोसाधिप्पायो वदेति, आपत्ति ओमसवादेन दुक्‍कटस्स।

    Suddho hoti puggalo aññataraṃ pārājikaṃ dhammaṃ anajjhāpanno. Tañce suddhadiṭṭhi samāno anokāsaṃ kārāpetvā akkosādhippāyo vadeti, āpatti omasavādena dukkaṭassa.

    सुद्धो होति पुग्गलो अञ्‍ञतरं पाराजिकं धम्मं अनज्झापन्‍नो तञ्‍चे सुद्धदिट्ठि समानो ओकासं कारापेत्वा अक्‍कोसाधिप्पायो वदेति, आपत्ति ओमसवादस्स।

    Suddho hoti puggalo aññataraṃ pārājikaṃ dhammaṃ anajjhāpanno tañce suddhadiṭṭhi samāno okāsaṃ kārāpetvā akkosādhippāyo vadeti, āpatti omasavādassa.

    ३९०. अनापत्ति सुद्धे असुद्धदिट्ठिस्स, असुद्धे असुद्धदिट्ठिस्स, उम्मत्तकस्स, आदिकम्मिकस्साति।

    390. Anāpatti suddhe asuddhadiṭṭhissa, asuddhe asuddhadiṭṭhissa, ummattakassa, ādikammikassāti.

    दुट्ठदोससिक्खापदं निट्ठितं अट्ठमं।

    Duṭṭhadosasikkhāpadaṃ niṭṭhitaṃ aṭṭhamaṃ.




    Next: ९. दुतियदुट्ठदोससिक्खापदं • 9. Dutiyaduṭṭhadosasikkhāpadaṃ




    Footnotes:
    1. इदं वत्थु चूळव॰ १८९
    2. यञ्‍च किञ्‍चि (सी॰ क॰)
    3. idaṃ vatthu cūḷava. 189
    4. yañca kiñci (sī. ka.)
    5. विनिच्छिस्सन्तीति (क॰)
    6. न ब्याबाहिस्सन्तीति (क॰)
    7. कायदड्ढिबहुला (सी॰)
    8. vinicchissantīti (ka.)
    9. na byābāhissantīti (ka.)
    10. kāyadaḍḍhibahulā (sī.)
    11. भुम्मजका (सी॰ स्या॰)
    12. bhummajakā (sī. syā.)
    13. याव (सी॰)
    14. निसीदापीयेय्यामाति (सी॰), निसीदापीयामाति (स्या॰)
    15. सन्तिके (स्या॰ कं॰ क॰)
    16. yāva (sī.)
    17. nisīdāpīyeyyāmāti (sī.), nisīdāpīyāmāti (syā.)
    18. santike (syā. kaṃ. ka.)
    19. पवातं (सी॰ स्या॰)
    20. pavātaṃ (sī. syā.)



    Related texts:



    अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महाविभङ्ग-अट्ठकथा • Mahāvibhaṅga-aṭṭhakathā / ८. पठमदुट्ठदोससिक्खापदवण्णना • 8. Paṭhamaduṭṭhadosasikkhāpadavaṇṇanā

    टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / ८. पठमदुट्ठदोससिक्खापदवण्णना • 8. Paṭhamaduṭṭhadosasikkhāpadavaṇṇanā

    टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / ८. पठमदुट्ठदोससिक्खापदवण्णना • 8. Paṭhamaduṭṭhadosasikkhāpadavaṇṇanā

    टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / ८. पठमदुट्ठदोससिक्खापदवण्णना • 8. Paṭhamaduṭṭhadosasikkhāpadavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact