| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
8. து³ட்ட²தோ³ஸஸிக்கா²பத³வண்ணனா
8. Duṭṭhadosasikkhāpadavaṇṇanā
‘‘கஸ்மா மம வந்த³னாதீ³னி…பே॰… ‘க⁴டிதேயேவ ஸீஸங் ஏதீ’தி வுத்தத்தா அந்திமவத்து²அஜ்ஜா²பன்னகங் வந்தி³துங் ந வட்டதீ’’தி வத³ந்தி, தங் ந க³ஹேதப்³ப³ங். பரிவாராவஸானே உபாலிபஞ்சகே ‘‘கதி நு கோ², ப⁴ந்தே, அவந்தி³யா’’திஆதி³னா (பரி॰ 467) வுத்தபாளியங் அவுத்தத்தா, ‘‘பச்சா² உபஸம்பன்னேன புரே உபஸம்பன்னோ வந்தி³யோ’’தி (பரி॰ 468) வுத்தத்தா ச, தஸ்மா ஏவ இமிஸ்ஸங் கங்கா²விதரணியங் ‘‘உபஸம்பன்னோதி ஸங்க்²யுபக³மன’’ந்தி வுத்தங். ஸுத்தாதி⁴ப்பாயோ பன ஏவங் க³ஹேதப்³போ³ – அவந்த³ந்தோ ஸாமீசிப்படிக்கே²பஸங்கா²தாய சோத³னாய சோதே³தி நாமாதி த³ஸ்ஸனத்த²ங் வுத்தந்தி. தஸ்மா ஏவ ‘‘எத்தாவதா ச சோத³னா நாம ஹோதீ’’தி வுத்தங். இத⁴ அதி⁴ப்பேதங் ஆபத்திஆபஜ்ஜனாகாரங் த³ஸ்ஸேதுங் ‘‘‘கஸ்மா மம வந்த³னாதீ³னி ந கரோஸீ’திஆதி³ வுத்த’’ந்தி லிகி²தங்.
‘‘Kasmā mama vandanādīni…pe… ‘ghaṭiteyeva sīsaṃ etī’ti vuttattā antimavatthuajjhāpannakaṃ vandituṃ na vaṭṭatī’’ti vadanti, taṃ na gahetabbaṃ. Parivārāvasāne upālipañcake ‘‘kati nu kho, bhante, avandiyā’’tiādinā (pari. 467) vuttapāḷiyaṃ avuttattā, ‘‘pacchā upasampannena pure upasampanno vandiyo’’ti (pari. 468) vuttattā ca, tasmā eva imissaṃ kaṅkhāvitaraṇiyaṃ ‘‘upasampannoti saṅkhyupagamana’’nti vuttaṃ. Suttādhippāyo pana evaṃ gahetabbo – avandanto sāmīcippaṭikkhepasaṅkhātāya codanāya codeti nāmāti dassanatthaṃ vuttanti. Tasmā eva ‘‘ettāvatā ca codanā nāma hotī’’ti vuttaṃ. Idha adhippetaṃ āpattiāpajjanākāraṃ dassetuṃ ‘‘‘kasmā mama vandanādīni na karosī’tiādi vutta’’nti likhitaṃ.
கதூபஸம்பத³ந்தி யஸ்ஸ உபஸம்பதா³ ருஹதி, தங், பண்ட³காத³யோ. ட²பனக்கெ²த்தந்தி எத்த² ஸப்³ப³ஸங்கா³ஹிகங், புக்³க³லிகஞ்சாதி து³வித⁴ங் பவாரணாட²பனங். தத்த² ஸப்³ப³ஸங்கா³ஹிகே ‘‘ஸுணாது மே, ப⁴ந்தே, ஸங்கோ⁴…பே॰… தேவாசிகங் பவாரே’’தி ஸு-காரதோ யாவ ரே-காரோ. புக்³க³லிகட²பனே பன ‘‘ஸங்க⁴ங், ப⁴ந்தே, பவாரேமி…பே॰… பஸ்ஸந்தோ படீ’’தி ஸங்-காரதோ யாவ அயங் ஸப்³ப³பச்சி²மோ டி-காரோ, எத்த²ந்தரே ஏகபதே³பி ட²பெந்தேன ட²பிதா ஹோதி. உபோஸதே² பன இமினானுஸாரேன விஸேஸோ வேதி³தப்³போ³ ‘‘கரெய்யா’’தி ரே-காரே அனதிக்கமந்தே.
Katūpasampadanti yassa upasampadā ruhati, taṃ, paṇḍakādayo. Ṭhapanakkhettanti ettha sabbasaṅgāhikaṃ, puggalikañcāti duvidhaṃ pavāraṇāṭhapanaṃ. Tattha sabbasaṅgāhike ‘‘suṇātu me, bhante, saṅgho…pe… tevācikaṃ pavāre’’ti su-kārato yāva re-kāro. Puggalikaṭhapane pana ‘‘saṅghaṃ, bhante, pavāremi…pe… passanto paṭī’’ti saṃ-kārato yāva ayaṃ sabbapacchimo ṭi-kāro, etthantare ekapadepi ṭhapentena ṭhapitā hoti. Uposathe pana iminānusārena viseso veditabbo ‘‘kareyyā’’ti re-kāre anatikkamante.
து³ட்ட²தோ³ஸஸிக்கா²பத³வண்ணனா நிட்டி²தா.
Duṭṭhadosasikkhāpadavaṇṇanā niṭṭhitā.
