| Library / Tipiṭaka / ติปิฎก • Tipiṭaka / กงฺขาวิตรณี-ปุราณ-ฎีกา • Kaṅkhāvitaraṇī-purāṇa-ṭīkā |
๘. ทุฎฺฐโทสสิกฺขาปทวณฺณนา
8. Duṭṭhadosasikkhāpadavaṇṇanā
‘‘กสฺมา มม วนฺทนาทีนิ…เป.… ‘ฆฎิเตเยว สีสํ เอตี’ติ วุตฺตตฺตา อนฺติมวตฺถุอชฺฌาปนฺนกํ วนฺทิตุํ น วฎฺฎตี’’ติ วทนฺติ, ตํ น คเหตพฺพํฯ ปริวาราวสาเน อุปาลิปญฺจเก ‘‘กติ นุ โข, ภเนฺต, อวนฺทิยา’’ติอาทินา (ปริ. ๔๖๗) วุตฺตปาฬิยํ อวุตฺตตฺตา, ‘‘ปจฺฉา อุปสมฺปเนฺนน ปุเร อุปสมฺปโนฺน วนฺทิโย’’ติ (ปริ. ๔๖๘) วุตฺตตฺตา จ, ตสฺมา เอว อิมิสฺสํ กงฺขาวิตรณิยํ ‘‘อุปสมฺปโนฺนติ สงฺขฺยุปคมน’’นฺติ วุตฺตํฯ สุตฺตาธิปฺปาโย ปน เอวํ คเหตโพฺพ – อวนฺทโนฺต สามีจิปฺปฎิเกฺขปสงฺขาตาย โจทนาย โจเทติ นามาติ ทสฺสนตฺถํ วุตฺตนฺติฯ ตสฺมา เอว ‘‘เอตฺตาวตา จ โจทนา นาม โหตี’’ติ วุตฺตํฯ อิธ อธิเปฺปตํ อาปตฺติอาปชฺชนาการํ ทเสฺสตุํ ‘‘‘กสฺมา มม วนฺทนาทีนิ น กโรสี’ติอาทิ วุตฺต’’นฺติ ลิขิตํฯ
‘‘Kasmā mama vandanādīni…pe… ‘ghaṭiteyeva sīsaṃ etī’ti vuttattā antimavatthuajjhāpannakaṃ vandituṃ na vaṭṭatī’’ti vadanti, taṃ na gahetabbaṃ. Parivārāvasāne upālipañcake ‘‘kati nu kho, bhante, avandiyā’’tiādinā (pari. 467) vuttapāḷiyaṃ avuttattā, ‘‘pacchā upasampannena pure upasampanno vandiyo’’ti (pari. 468) vuttattā ca, tasmā eva imissaṃ kaṅkhāvitaraṇiyaṃ ‘‘upasampannoti saṅkhyupagamana’’nti vuttaṃ. Suttādhippāyo pana evaṃ gahetabbo – avandanto sāmīcippaṭikkhepasaṅkhātāya codanāya codeti nāmāti dassanatthaṃ vuttanti. Tasmā eva ‘‘ettāvatā ca codanā nāma hotī’’ti vuttaṃ. Idha adhippetaṃ āpattiāpajjanākāraṃ dassetuṃ ‘‘‘kasmā mama vandanādīni na karosī’tiādi vutta’’nti likhitaṃ.
กตูปสมฺปทนฺติ ยสฺส อุปสมฺปทา รุหติ, ตํ, ปณฺฑกาทโยฯ ฐปนเกฺขตฺตนฺติ เอตฺถ สพฺพสงฺคาหิกํ, ปุคฺคลิกญฺจาติ ทุวิธํ ปวารณาฐปนํฯ ตตฺถ สพฺพสงฺคาหิเก ‘‘สุณาตุ เม, ภเนฺต, สโงฺฆ…เป.… เตวาจิกํ ปวาเร’’ติ สุ-การโต ยาว เร-กาโรฯ ปุคฺคลิกฐปเน ปน ‘‘สงฺฆํ, ภเนฺต, ปวาเรมิ…เป.… ปสฺสโนฺต ปฎี’’ติ สํ-การโต ยาว อยํ สพฺพปจฺฉิโม ฎิ-กาโร, เอตฺถนฺตเร เอกปเทปิ ฐเปเนฺตน ฐปิตา โหติฯ อุโปสเถ ปน อิมินานุสาเรน วิเสโส เวทิตโพฺพ ‘‘กเรยฺยา’’ติ เร-กาเร อนติกฺกมเนฺตฯ
Katūpasampadanti yassa upasampadā ruhati, taṃ, paṇḍakādayo. Ṭhapanakkhettanti ettha sabbasaṅgāhikaṃ, puggalikañcāti duvidhaṃ pavāraṇāṭhapanaṃ. Tattha sabbasaṅgāhike ‘‘suṇātu me, bhante, saṅgho…pe… tevācikaṃ pavāre’’ti su-kārato yāva re-kāro. Puggalikaṭhapane pana ‘‘saṅghaṃ, bhante, pavāremi…pe… passanto paṭī’’ti saṃ-kārato yāva ayaṃ sabbapacchimo ṭi-kāro, etthantare ekapadepi ṭhapentena ṭhapitā hoti. Uposathe pana iminānusārena viseso veditabbo ‘‘kareyyā’’ti re-kāre anatikkamante.
ทุฎฺฐโทสสิกฺขาปทวณฺณนา นิฎฺฐิตาฯ
Duṭṭhadosasikkhāpadavaṇṇanā niṭṭhitā.
