| Library / Tipiṭaka / තිපිටක • Tipiṭaka / කඞ්‌ඛාවිතරණී-පුරාණ-ටීකා • Kaṅkhāvitaraṇī-purāṇa-ṭīkā |
8. දුට්‌ඨදොසසික්‌ඛාපදවණ්‌ණනා
8. Duṭṭhadosasikkhāpadavaṇṇanā
‘‘කස්‌මා මම වන්‌දනාදීනි…පෙ.… ‘ඝටිතෙයෙව සීසං එතී’ති වුත්‌තත්‌තා අන්‌තිමවත්‌ථුඅජ්‌ඣාපන්‌නකං වන්‌දිතුං න වට්‌ටතී’’ති වදන්‌ති, තං න ගහෙතබ්‌බං. පරිවාරාවසානෙ උපාලිපඤ්‌චකෙ ‘‘කති නු ඛො, භන්‌තෙ, අවන්‌දියා’’තිආදිනා (පරි. 467) වුත්‌තපාළියං අවුත්‌තත්‌තා, ‘‘පච්‌ඡා උපසම්‌පන්‌නෙන පුරෙ උපසම්‌පන්‌නො වන්‌දියො’’ති (පරි. 468) වුත්‌තත්‌තා ච, තස්‌මා එව ඉමිස්‌සං කඞ්‌ඛාවිතරණියං ‘‘උපසම්‌පන්‌නොති සඞ්‌ඛ්‍යුපගමන’’න්‌ති වුත්‌තං. සුත්‌තාධිප්‌පායො පන එවං ගහෙතබ්‌බො – අවන්‌දන්‌තො සාමීචිප්‌පටික්‌ඛෙපසඞ්‌ඛාතාය චොදනාය චොදෙති නාමාති දස්‌සනත්‌ථං වුත්‌තන්‌ති. තස්‌මා එව ‘‘එත්‌තාවතා ච චොදනා නාම හොතී’’ති වුත්‌තං. ඉධ අධිප්‌පෙතං ආපත්‌තිආපජ්‌ජනාකාරං දස්‌සෙතුං ‘‘‘කස්‌මා මම වන්‌දනාදීනි න කරොසී’තිආදි වුත්‌ත’’න්‌ති ලිඛිතං.
‘‘Kasmā mama vandanādīni…pe… ‘ghaṭiteyeva sīsaṃ etī’ti vuttattā antimavatthuajjhāpannakaṃ vandituṃ na vaṭṭatī’’ti vadanti, taṃ na gahetabbaṃ. Parivārāvasāne upālipañcake ‘‘kati nu kho, bhante, avandiyā’’tiādinā (pari. 467) vuttapāḷiyaṃ avuttattā, ‘‘pacchā upasampannena pure upasampanno vandiyo’’ti (pari. 468) vuttattā ca, tasmā eva imissaṃ kaṅkhāvitaraṇiyaṃ ‘‘upasampannoti saṅkhyupagamana’’nti vuttaṃ. Suttādhippāyo pana evaṃ gahetabbo – avandanto sāmīcippaṭikkhepasaṅkhātāya codanāya codeti nāmāti dassanatthaṃ vuttanti. Tasmā eva ‘‘ettāvatā ca codanā nāma hotī’’ti vuttaṃ. Idha adhippetaṃ āpattiāpajjanākāraṃ dassetuṃ ‘‘‘kasmā mama vandanādīni na karosī’tiādi vutta’’nti likhitaṃ.
කතූපසම්‌පදන්‌ති යස්‌ස උපසම්‌පදා රුහති, තං, පණ්‌ඩකාදයො. ඨපනක්‌ඛෙත්‌තන්‌ති එත්‌ථ සබ්‌බසඞ්‌ගාහිකං, පුග්‌ගලිකඤ්‌චාති දුවිධං පවාරණාඨපනං. තත්‌ථ සබ්‌බසඞ්‌ගාහිකෙ ‘‘සුණාතු මෙ, භන්‌තෙ, සඞ්‌ඝො…පෙ.… තෙවාචිකං පවාරෙ’’ති සු-කාරතො යාව රෙ-කාරො. පුග්‌ගලිකඨපනෙ පන ‘‘සඞ්‌ඝං, භන්‌තෙ, පවාරෙමි…පෙ.… පස්‌සන්‌තො පටී’’ති සං-කාරතො යාව අයං සබ්‌බපච්‌ඡිමො ටි-කාරො, එත්‌ථන්‌තරෙ එකපදෙපි ඨපෙන්‌තෙන ඨපිතා හොති. උපොසථෙ පන ඉමිනානුසාරෙන විසෙසො වෙදිතබ්‌බො ‘‘කරෙය්‍යා’’ති රෙ-කාරෙ අනතික්‌කමන්‌තෙ.
Katūpasampadanti yassa upasampadā ruhati, taṃ, paṇḍakādayo. Ṭhapanakkhettanti ettha sabbasaṅgāhikaṃ, puggalikañcāti duvidhaṃ pavāraṇāṭhapanaṃ. Tattha sabbasaṅgāhike ‘‘suṇātu me, bhante, saṅgho…pe… tevācikaṃ pavāre’’ti su-kārato yāva re-kāro. Puggalikaṭhapane pana ‘‘saṅghaṃ, bhante, pavāremi…pe… passanto paṭī’’ti saṃ-kārato yāva ayaṃ sabbapacchimo ṭi-kāro, etthantare ekapadepi ṭhapentena ṭhapitā hoti. Uposathe pana iminānusārena viseso veditabbo ‘‘kareyyā’’ti re-kāre anatikkamante.
දුට්‌ඨදොසසික්‌ඛාපදවණ්‌ණනා නිට්‌ඨිතා.
Duṭṭhadosasikkhāpadavaṇṇanā niṭṭhitā.
