| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
३. दुट्ठट्ठकसुत्तं
3. Duṭṭhaṭṭhakasuttaṃ
७८६.
786.
वदन्ति वे दुट्ठमनापि एके, अथोपि वे सच्चमना वदन्ति।
Vadanti ve duṭṭhamanāpi eke, athopi ve saccamanā vadanti;
वादञ्च जातं मुनि नो उपेति, तस्मा मुनी नत्थि खिलो कुहिञ्चि॥
Vādañca jātaṃ muni no upeti, tasmā munī natthi khilo kuhiñci.
७८७.
787.
सकञ्हि दिट्ठिं कथमच्चयेय्य, छन्दानुनीतो रुचिया निविट्ठो।
Sakañhi diṭṭhiṃ kathamaccayeyya, chandānunīto ruciyā niviṭṭho;
सयं समत्तानि पकुब्बमानो, यथा हि जानेय्य तथा वदेय्य॥
Sayaṃ samattāni pakubbamāno, yathā hi jāneyya tathā vadeyya.
७८८.
788.
अनरियधम्मं कुसला तमाहु, यो आतुमानं सयमेव पाव॥
Anariyadhammaṃ kusalā tamāhu, yo ātumānaṃ sayameva pāva.
७८९.
789.
सन्तो च भिक्खु अभिनिब्बुतत्तो, इतिहन्ति सीलेसु अकत्थमानो।
Santo ca bhikkhu abhinibbutatto, itihanti sīlesu akatthamāno;
तमरियधम्मं कुसला वदन्ति, यस्सुस्सदा नत्थि कुहिञ्चि लोके॥
Tamariyadhammaṃ kusalā vadanti, yassussadā natthi kuhiñci loke.
७९०.
790.
पकप्पिता सङ्खता यस्स धम्मा, पुरक्खता 5 सन्ति अवीवदाता।
Pakappitā saṅkhatā yassa dhammā, purakkhatā 6 santi avīvadātā;
यदत्तनि पस्सति आनिसंसं, तं निस्सितो कुप्पपटिच्च सन्तिं॥
Yadattani passati ānisaṃsaṃ, taṃ nissito kuppapaṭicca santiṃ.
७९१.
791.
दिट्ठीनिवेसा न हि स्वातिवत्ता, धम्मेसु निच्छेय्य समुग्गहीतं।
Diṭṭhīnivesā na hi svātivattā, dhammesu niccheyya samuggahītaṃ;
तस्मा नरो तेसु निवेसनेसु, निरस्सती आदियती च धम्मं॥
Tasmā naro tesu nivesanesu, nirassatī ādiyatī ca dhammaṃ.
७९२.
792.
धोनस्स हि नत्थि कुहिञ्चि लोके, पकप्पिता दिट्ठि भवाभवेसु।
Dhonassa hi natthi kuhiñci loke, pakappitā diṭṭhi bhavābhavesu;
मायञ्च मानञ्च पहाय धोनो, स केन गच्छेय्य अनूपयो सो॥
Māyañca mānañca pahāya dhono, sa kena gaccheyya anūpayo so.
७९३.
793.
उपयो हि धम्मेसु उपेति वादं, अनूपयं केन कथं वदेय्य।
Upayo hi dhammesu upeti vādaṃ, anūpayaṃ kena kathaṃ vadeyya;
अत्ता निरत्ता 7 न हि तस्स अत्थि, अधोसि सो दिट्ठिमिधेव सब्बन्ति॥
Attā nirattā 8 na hi tassa atthi, adhosi so diṭṭhimidheva sabbanti.
दुट्ठट्ठकसुत्तं ततियं निट्ठितं।
Duṭṭhaṭṭhakasuttaṃ tatiyaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / ३. दुट्ठट्ठकसुत्तवण्णना • 3. Duṭṭhaṭṭhakasuttavaṇṇanā
