| Library / Tipiṭaka / ติปิฎก • Tipiṭaka / สุตฺตนิปาตปาฬิ • Suttanipātapāḷi |
๓. ทุฎฺฐฎฺฐกสุตฺตํ
3. Duṭṭhaṭṭhakasuttaṃ
๗๘๖.
786.
วทนฺติ เว ทุฎฺฐมนาปิ เอเก, อโถปิ เว สจฺจมนา วทนฺติ;
Vadanti ve duṭṭhamanāpi eke, athopi ve saccamanā vadanti;
วาทญฺจ ชาตํ มุนิ โน อุเปติ, ตสฺมา มุนี นตฺถิ ขิโล กุหิญฺจิฯ
Vādañca jātaṃ muni no upeti, tasmā munī natthi khilo kuhiñci.
๗๘๗.
787.
สกญฺหิ ทิฎฺฐิํ กถมจฺจเยยฺย, ฉนฺทานุนีโต รุจิยา นิวิโฎฺฐ;
Sakañhi diṭṭhiṃ kathamaccayeyya, chandānunīto ruciyā niviṭṭho;
สยํ สมตฺตานิ ปกุพฺพมาโน, ยถา หิ ชาเนยฺย ตถา วเทยฺยฯ
Sayaṃ samattāni pakubbamāno, yathā hi jāneyya tathā vadeyya.
๗๘๘.
788.
อนริยธมฺมํ กุสลา ตมาหุ, โย อาตุมานํ สยเมว ปาวฯ
Anariyadhammaṃ kusalā tamāhu, yo ātumānaṃ sayameva pāva.
๗๘๙.
789.
สโนฺต จ ภิกฺขุ อภินิพฺพุตโตฺต, อิติหนฺติ สีเลสุ อกตฺถมาโน;
Santo ca bhikkhu abhinibbutatto, itihanti sīlesu akatthamāno;
ตมริยธมฺมํ กุสลา วทนฺติ, ยสฺสุสฺสทา นตฺถิ กุหิญฺจิ โลเกฯ
Tamariyadhammaṃ kusalā vadanti, yassussadā natthi kuhiñci loke.
๗๙๐.
790.
ปกปฺปิตา สงฺขตา ยสฺส ธมฺมา, ปุรกฺขตา 5 สนฺติ อวีวทาตา;
Pakappitā saṅkhatā yassa dhammā, purakkhatā 6 santi avīvadātā;
ยทตฺตนิ ปสฺสติ อานิสํสํ, ตํ นิสฺสิโต กุปฺปปฎิจฺจ สนฺติํฯ
Yadattani passati ānisaṃsaṃ, taṃ nissito kuppapaṭicca santiṃ.
๗๙๑.
791.
ทิฎฺฐีนิเวสา น หิ สฺวาติวตฺตา, ธเมฺมสุ นิเจฺฉยฺย สมุคฺคหีตํ;
Diṭṭhīnivesā na hi svātivattā, dhammesu niccheyya samuggahītaṃ;
ตสฺมา นโร เตสุ นิเวสเนสุ, นิรสฺสตี อาทิยตี จ ธมฺมํฯ
Tasmā naro tesu nivesanesu, nirassatī ādiyatī ca dhammaṃ.
๗๙๒.
792.
โธนสฺส หิ นตฺถิ กุหิญฺจิ โลเก, ปกปฺปิตา ทิฎฺฐิ ภวาภเวสุ;
Dhonassa hi natthi kuhiñci loke, pakappitā diṭṭhi bhavābhavesu;
มายญฺจ มานญฺจ ปหาย โธโน, ส เกน คเจฺฉยฺย อนูปโย โสฯ
Māyañca mānañca pahāya dhono, sa kena gaccheyya anūpayo so.
๗๙๓.
793.
อุปโย หิ ธเมฺมสุ อุเปติ วาทํ, อนูปยํ เกน กถํ วเทยฺย;
Upayo hi dhammesu upeti vādaṃ, anūpayaṃ kena kathaṃ vadeyya;
อตฺตา นิรตฺตา 7 น หิ ตสฺส อตฺถิ, อโธสิ โส ทิฎฺฐิมิเธว สพฺพนฺติฯ
Attā nirattā 8 na hi tassa atthi, adhosi so diṭṭhimidheva sabbanti.
ทุฎฺฐฎฺฐกสุตฺตํ ตติยํ นิฎฺฐิตํฯ
Duṭṭhaṭṭhakasuttaṃ tatiyaṃ niṭṭhitaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / สุตฺตนิปาต-อฎฺฐกถา • Suttanipāta-aṭṭhakathā / ๓. ทุฎฺฐฎฺฐกสุตฺตวณฺณนา • 3. Duṭṭhaṭṭhakasuttavaṇṇanā
