| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
3. து³ட்ட²ட்ட²கஸுத்தவண்ணனா
3. Duṭṭhaṭṭhakasuttavaṇṇanā
787. வத³ந்தி வே து³ட்ட²மனாபீதி து³ட்ட²ட்ட²கஸுத்தங். கா உப்பத்தி? ஆதி³கா³தா²ய தாவ உப்பத்தி – முனிஸுத்தனயேன ப⁴க³வதோ பி⁴க்கு²ஸங்க⁴ஸ்ஸ ச உப்பன்னலாப⁴ஸக்காரங் அஸஹமானா தித்தி²யா ஸுந்த³ரிங் பரிப்³பா³ஜிகங் உய்யோஜேஸுங். ஸா கிர ஜனபத³கல்யாணீ ஸேதவத்த²பரிப்³பா³ஜிகாவ அஹோஸி. ஸா ஸுன்ஹாதா ஸுனிவத்தா² மாலாக³ந்த⁴விலேபனவிபூ⁴ஸிதா ப⁴க³வதோ த⁴ம்மங் ஸுத்வா ஸாவத்தி²வாஸீனங் ஜேதவனதோ நிக்க²மனவேலாய ஸாவத்தி²தோ நிக்க²மித்வா ஜேதவனாபி⁴முகீ² க³ச்ச²தி. மனுஸ்ஸேஹி ச ‘‘குஹிங் க³ச்ச²ஸீ’’தி புச்சி²தா ‘‘ஸமணங் கோ³தமங் ஸாவகே சஸ்ஸ ரமயிதுங் க³ச்சா²மீ’’தி வத்வா ஜேதவனத்³வாரகொட்ட²கே விசரித்வா ஜேதவனத்³வாரகொட்ட²கே பித³ஹிதே நக³ரங் பவிஸித்வா பபா⁴தே புன ஜேதவனங் க³ந்த்வா க³ந்த⁴குடிஸமீபே புப்பா²னி விசினந்தீ விய சரதி . பு³த்³து⁴பட்டா²னங் ஆக³தேஹி ச மனுஸ்ஸேஹி ‘‘கிமத்த²ங் ஆக³தாஸீ’’தி புச்சி²தா யங்கிஞ்சிதே³வ ப⁴ணதி. ஏவங் அட்³ட⁴மாஸமத்தே வீதிக்கந்தே தித்தி²யா தங் ஜீவிதா வோரோபெத்வா பரிகா²தடே நிக்கி²பித்வா பபா⁴தே ‘‘ஸுந்த³ரிங் ந பஸ்ஸாமா’’தி கோலாஹலங் கத்வா ரஞ்ஞோ ச ஆரோசெத்வா தேன அனுஞ்ஞாதா ஜேதவனங் பவிஸித்வா விசினந்தா விய தங் நிக்கி²த்தட்டா²னா உத்³த⁴ரித்வா மஞ்சகங் ஆரோபெத்வா நக³ரங் அபி⁴ஹரித்வா உபக்கோஸங் அகங்ஸு. ஸப்³ப³ங் பாளியங் (உதா³॰ 38) ஆக³தனயேனேவ வேதி³தப்³ப³ங்.
787.Vadantive duṭṭhamanāpīti duṭṭhaṭṭhakasuttaṃ. Kā uppatti? Ādigāthāya tāva uppatti – munisuttanayena bhagavato bhikkhusaṅghassa ca uppannalābhasakkāraṃ asahamānā titthiyā sundariṃ paribbājikaṃ uyyojesuṃ. Sā kira janapadakalyāṇī setavatthaparibbājikāva ahosi. Sā sunhātā sunivatthā mālāgandhavilepanavibhūsitā bhagavato dhammaṃ sutvā sāvatthivāsīnaṃ jetavanato nikkhamanavelāya sāvatthito nikkhamitvā jetavanābhimukhī gacchati. Manussehi ca ‘‘kuhiṃ gacchasī’’ti pucchitā ‘‘samaṇaṃ gotamaṃ sāvake cassa ramayituṃ gacchāmī’’ti vatvā jetavanadvārakoṭṭhake vicaritvā jetavanadvārakoṭṭhake pidahite nagaraṃ pavisitvā pabhāte puna jetavanaṃ gantvā gandhakuṭisamīpe pupphāni vicinantī viya carati . Buddhupaṭṭhānaṃ āgatehi ca manussehi ‘‘kimatthaṃ āgatāsī’’ti pucchitā yaṃkiñcideva bhaṇati. Evaṃ aḍḍhamāsamatte vītikkante titthiyā taṃ jīvitā voropetvā parikhātaṭe nikkhipitvā pabhāte ‘‘sundariṃ na passāmā’’ti kolāhalaṃ katvā rañño ca ārocetvā tena anuññātā jetavanaṃ pavisitvā vicinantā viya taṃ nikkhittaṭṭhānā uddharitvā mañcakaṃ āropetvā nagaraṃ abhiharitvā upakkosaṃ akaṃsu. Sabbaṃ pāḷiyaṃ (udā. 38) āgatanayeneva veditabbaṃ.
ப⁴க³வா தங் தி³வஸங் பச்சூஸஸமயே பு³த்³த⁴சக்கு²னா லோகங் வோலோகெந்தோ ‘‘தித்தி²யா அஜ்ஜ அயஸங் உப்பாதெ³ஸ்ஸந்தீ’’தி ஞத்வா ‘‘தேஸங் ஸத்³த³ஹித்வா மாதி³ஸே சித்தங் பகோபெத்வா மஹாஜனோ அபாயாபி⁴முகோ² மா அஹோஸீ’’தி க³ந்த⁴குடித்³வாரங் பித³ஹித்வா அந்தோக³ந்த⁴குடியங்யேவ அச்சி², ந நக³ரங் பிண்டா³ய பாவிஸி. பி⁴க்கூ² பன த்³வாரங் பித³ஹிதங் தி³ஸ்வா புப்³ப³ஸதி³ஸமேவ பவிஸிங்ஸு. மனுஸ்ஸா பி⁴க்கூ² தி³ஸ்வா நானப்பகாரேஹி அக்கோஸிங்ஸு. அத² ஆயஸ்மா ஆனந்தோ³ ப⁴க³வதோ தங் பவத்திங் ஆரோசெத்வா ‘‘தித்தி²யேஹி, ப⁴ந்தே, மஹாஅயஸோ உப்பாதி³தோ, ந ஸக்கா இத⁴ வஸிதுங், விபுலோ ஜம்பு³தீ³போ, அஞ்ஞத்த² க³ச்சா²மா’’தி ஆஹ. தத்த²பி அயஸே உட்டி²தே குஹிங் க³மிஸ்ஸஸி ஆனந்தா³தி? ‘‘அஞ்ஞங் நக³ரங் ப⁴க³வா’’தி. அத² ப⁴க³வா ‘‘ஆக³மேஹி, ஆனந்த³, ஸத்தாஹமேவாயங் ஸத்³தோ³ ப⁴விஸ்ஸதி, ஸத்தாஹச்சயேன யேஹி அயஸோ கதோ, தேஸங்யேவ உபரி பதிஸ்ஸதீ’’தி வத்வா ஆனந்த³த்தே²ரஸ்ஸ த⁴ம்மதே³ஸனத்த²ங் ‘‘வத³ந்தி வே’’தி இமங் கா³த²மபா⁴ஸி.
Bhagavā taṃ divasaṃ paccūsasamaye buddhacakkhunā lokaṃ volokento ‘‘titthiyā ajja ayasaṃ uppādessantī’’ti ñatvā ‘‘tesaṃ saddahitvā mādise cittaṃ pakopetvā mahājano apāyābhimukho mā ahosī’’ti gandhakuṭidvāraṃ pidahitvā antogandhakuṭiyaṃyeva acchi, na nagaraṃ piṇḍāya pāvisi. Bhikkhū pana dvāraṃ pidahitaṃ disvā pubbasadisameva pavisiṃsu. Manussā bhikkhū disvā nānappakārehi akkosiṃsu. Atha āyasmā ānando bhagavato taṃ pavattiṃ ārocetvā ‘‘titthiyehi, bhante, mahāayaso uppādito, na sakkā idha vasituṃ, vipulo jambudīpo, aññattha gacchāmā’’ti āha. Tatthapi ayase uṭṭhite kuhiṃ gamissasi ānandāti? ‘‘Aññaṃ nagaraṃ bhagavā’’ti. Atha bhagavā ‘‘āgamehi, ānanda, sattāhamevāyaṃ saddo bhavissati, sattāhaccayena yehi ayaso kato, tesaṃyeva upari patissatī’’ti vatvā ānandattherassa dhammadesanatthaṃ ‘‘vadanti ve’’ti imaṃ gāthamabhāsi.
தத்த² வத³ந்தீதி ப⁴க³வந்தங் பி⁴க்கு²ஸங்க⁴ஞ்ச உபவத³ந்தி. து³ட்ட²மனாபி ஏகே அதோ²பி வே ஸச்சமனாதி ஏகச்சே து³ட்ட²சித்தா, ஏகச்சே தத²ஸஞ்ஞினோபி ஹுத்வா, தித்தி²யா து³ட்ட²சித்தா, யே தேஸங் வசனங் ஸுத்வா ஸத்³த³ஹிங்ஸு, தே ஸச்சமனாதி அதி⁴ப்பாயோ. வாத³ஞ்ச ஜாதந்தி ஏதங் அக்கோஸவாத³ங் உப்பன்னங். முனி நோ உபேதீதி அகாரகதாய ச அகுப்பனதாய ச பு³த்³த⁴முனி ந உபேதி. தஸ்மா முனீ நத்தி² கி²லோ குஹிஞ்சீதி தேன காரணேன அயங் முனி ராகா³தி³கி²லேஹி நத்தி² கி²லோ குஹிஞ்சீதி வேதி³தப்³போ³.
Tattha vadantīti bhagavantaṃ bhikkhusaṅghañca upavadanti. Duṭṭhamanāpi eke athopi ve saccamanāti ekacce duṭṭhacittā, ekacce tathasaññinopi hutvā, titthiyā duṭṭhacittā, ye tesaṃ vacanaṃ sutvā saddahiṃsu, te saccamanāti adhippāyo. Vādañca jātanti etaṃ akkosavādaṃ uppannaṃ. Muni no upetīti akārakatāya ca akuppanatāya ca buddhamuni na upeti. Tasmā munī natthi khilo kuhiñcīti tena kāraṇena ayaṃ muni rāgādikhilehi natthi khilo kuhiñcīti veditabbo.
788. இமஞ்ச கா³த²ங் வத்வா ப⁴க³வா ஆனந்த³த்தே²ரங் புச்சி², ‘‘ஏவங் கு²ங்ஸெத்வா வம்பெ⁴த்வா வுச்சமானா பி⁴க்கூ², ஆனந்த³, கிங் வத³ந்தீ’’தி. ந கிஞ்சி ப⁴க³வாதி. ‘‘ந, ஆனந்த³, ‘அஹங் ஸீலவா’தி ஸப்³ப³த்த² துண்ஹீ ப⁴விதப்³ப³ங், லோகே ஹி நாபா⁴ஸமானங் ஜானந்தி மிஸ்ஸங் பா³லேஹி பண்டி³த’’ந்தி வத்வா, ‘‘பி⁴க்கூ², ஆனந்த³, தே மனுஸ்ஸே ஏவங் படிசோதெ³ந்தூ’’தி த⁴ம்மதே³ஸனத்தா²ய ‘‘அபூ⁴தவாதீ³ நிரயங் உபேதீ’’தி இமங் கா³த²மபா⁴ஸி. தே²ரோ தங் உக்³க³ஹெத்வா பி⁴க்கூ² ஆஹ – ‘‘மனுஸ்ஸா தும்ஹேஹி இமாய கா³தா²ய படிசோதே³தப்³பா³’’தி. பி⁴க்கூ² ததா² அகங்ஸு. பண்டி³தமனுஸ்ஸா துண்ஹீ அஹேஸுங். ராஜாபி ராஜபுரிஸே ஸப்³ப³தோ பேஸெத்வா யேஸங் து⁴த்தானங் லஞ்ஜங் த³த்வா தித்தி²யா தங் மாராபேஸுங், தே க³ஹெத்வா நிக்³க³ய்ஹ தங் பவத்திங் ஞத்வா தித்தி²யே பரிபா⁴ஸி. மனுஸ்ஸாபி தித்தி²யே தி³ஸ்வா லெட்³டு³னா பஹரந்தி, பங்ஸுனா ஓகிரந்தி ‘‘ப⁴க³வதோ அயஸங் உப்பாதே³ஸு’’ந்தி. ஆனந்த³த்தே²ரோ தங் தி³ஸ்வா ப⁴க³வதோ ஆரோசேஸி, ப⁴க³வா தே²ரஸ்ஸ இமங் கா³த²மபா⁴ஸி ‘‘ஸகஞ்ஹி தி³ட்டி²ங்…பே॰… வதெ³ய்யா’’தி.
788. Imañca gāthaṃ vatvā bhagavā ānandattheraṃ pucchi, ‘‘evaṃ khuṃsetvā vambhetvā vuccamānā bhikkhū, ānanda, kiṃ vadantī’’ti. Na kiñci bhagavāti. ‘‘Na, ānanda, ‘ahaṃ sīlavā’ti sabbattha tuṇhī bhavitabbaṃ, loke hi nābhāsamānaṃ jānanti missaṃ bālehi paṇḍita’’nti vatvā, ‘‘bhikkhū, ānanda, te manusse evaṃ paṭicodentū’’ti dhammadesanatthāya ‘‘abhūtavādī nirayaṃ upetī’’ti imaṃ gāthamabhāsi. Thero taṃ uggahetvā bhikkhū āha – ‘‘manussā tumhehi imāya gāthāya paṭicodetabbā’’ti. Bhikkhū tathā akaṃsu. Paṇḍitamanussā tuṇhī ahesuṃ. Rājāpi rājapurise sabbato pesetvā yesaṃ dhuttānaṃ lañjaṃ datvā titthiyā taṃ mārāpesuṃ, te gahetvā niggayha taṃ pavattiṃ ñatvā titthiye paribhāsi. Manussāpi titthiye disvā leḍḍunā paharanti, paṃsunā okiranti ‘‘bhagavato ayasaṃ uppādesu’’nti. Ānandatthero taṃ disvā bhagavato ārocesi, bhagavā therassa imaṃ gāthamabhāsi ‘‘sakañhi diṭṭhiṃ…pe… vadeyyā’’ti.
தஸ்ஸத்தோ² – யாயங் தி³ட்டி² தித்தி²யஜனஸ்ஸ ‘‘ஸுந்த³ரிங் மாரெத்வா ஸமணானங் ஸக்யபுத்தியானங் அவண்ணங் பகாஸெத்வா ஏதேனுபாயேன லத்³த⁴ங் ஸக்காரங் ஸாதி³யிஸ்ஸாமா’’தி, ஸோ தங் தி³ட்டி²ங் கத²ங் அதிக்கமெய்ய, அத² கோ² ஸோ அயஸோ தமேவ தித்தி²யஜனங் பச்சாக³தோ தங் தி³ட்டி²ங் அச்சேதுங் அஸக்கொந்தங். யோ வா ஸஸ்ஸதாதி³வாதீ³, ஸோபி ஸகங் தி³ட்டி²ங் கத²ங் அச்சயெய்ய தேன தி³ட்டி²ச்ச²ந்தே³ன அனுனீதோ தாய ச தி³ட்டி²ருசியா நிவிட்டோ², அபிச கோ² பன ஸயங் ஸமத்தானி பகுப்³ப³மானோ அத்தனாவ பரிபுண்ணானி தானி தி³ட்டி²க³தானி கரொந்தோ யதா² ஜானெய்ய, ததே²வ வதெ³ய்யாதி.
Tassattho – yāyaṃ diṭṭhi titthiyajanassa ‘‘sundariṃ māretvā samaṇānaṃ sakyaputtiyānaṃ avaṇṇaṃ pakāsetvā etenupāyena laddhaṃ sakkāraṃ sādiyissāmā’’ti, so taṃ diṭṭhiṃ kathaṃ atikkameyya, atha kho so ayaso tameva titthiyajanaṃ paccāgato taṃ diṭṭhiṃ accetuṃ asakkontaṃ. Yo vā sassatādivādī, sopi sakaṃ diṭṭhiṃ kathaṃ accayeyya tena diṭṭhicchandena anunīto tāya ca diṭṭhiruciyā niviṭṭho, apica kho pana sayaṃ samattānipakubbamāno attanāva paripuṇṇāni tāni diṭṭhigatāni karonto yathā jāneyya, tatheva vadeyyāti.
789. அத² ராஜா ஸத்தாஹச்சயேன தங் குணபங் ச²ட்³டா³பெத்வா ஸாயன்ஹஸமயங் விஹாரங் க³ந்த்வா ப⁴க³வந்தங் அபி⁴வாதெ³த்வா ஆஹ – ‘‘நனு, ப⁴ந்தே, ஈதி³ஸே அயஸே உப்பன்னே மய்ஹம்பி ஆரோசேதப்³ப³ங் ஸியா’’தி. ஏவங் வுத்தே ப⁴க³வா, ‘‘ந, மஹாராஜ, ‘அஹங் ஸீலவா கு³ணஸம்பன்னோ’தி பரேஸங் ஆரோசேதுங் அரியானங் பதிரூப’’ந்தி வத்வா தஸ்ஸா அட்டு²ப்பத்தியங் ‘‘யோ அத்தனோ ஸீலவதானீ’’தி அவஸேஸகா³தா²யோ அபா⁴ஸி.
789. Atha rājā sattāhaccayena taṃ kuṇapaṃ chaḍḍāpetvā sāyanhasamayaṃ vihāraṃ gantvā bhagavantaṃ abhivādetvā āha – ‘‘nanu, bhante, īdise ayase uppanne mayhampi ārocetabbaṃ siyā’’ti. Evaṃ vutte bhagavā, ‘‘na, mahārāja, ‘ahaṃ sīlavā guṇasampanno’ti paresaṃ ārocetuṃ ariyānaṃ patirūpa’’nti vatvā tassā aṭṭhuppattiyaṃ ‘‘yo attano sīlavatānī’’ti avasesagāthāyo abhāsi.
தத்த² ஸீலவதானீதி பாதிமொக்கா²தீ³னி ஸீலானி ஆரஞ்ஞிகாதீ³னி து⁴தங்க³வதானி ச. அனானுபுட்டோ²தி அபுச்சி²தோ. பாவாதி வத³தி. அனரியத⁴ம்மங் குஸலா தமாஹு, யோ ஆதுமானங் ஸயமேவ பாவாதி யோ ஏவங் அத்தானங் ஸயமேவ வத³தி, தஸ்ஸ தங் வாத³ங் ‘‘அனரியத⁴ம்மோ ஏஸோ’’தி குஸலா ஏவங் கதெ²ந்தி.
Tattha sīlavatānīti pātimokkhādīni sīlāni āraññikādīni dhutaṅgavatāni ca. Anānupuṭṭhoti apucchito. Pāvāti vadati. Anariyadhammaṃ kusalā tamāhu, yo ātumānaṃ sayameva pāvāti yo evaṃ attānaṃ sayameva vadati, tassa taṃ vādaṃ ‘‘anariyadhammo eso’’ti kusalā evaṃ kathenti.
790. ஸந்தோதி ராகா³தி³கிலேஸவூபஸமேன ஸந்தோ, ததா² அபி⁴னிப்³பு³தத்தோ. இதிஹந்தி ஸீலேஸு அகத்த²மானோதி ‘‘அஹமஸ்மி ஸீலஸம்பன்னோ’’திஆதி³னா நயேன இதி ஸீலேஸு அகத்த²மானோ, ஸீலனிமித்தங் அத்தூபனாயிகங் வாசங் அபா⁴ஸமானோதி வுத்தங் ஹோதி. தமரியத⁴ம்மங் குஸலா வத³ந்தீதி தஸ்ஸ தங் அகத்த²னங் ‘‘அரியத⁴ம்மோ ஏஸோ’’தி பு³த்³தா⁴த³யோ க²ந்தா⁴தி³குஸலா வத³ந்தி. யஸ்ஸுஸ்ஸதா³ நத்தி² குஹிஞ்சி லோகேதி யஸ்ஸ கீ²ணாஸவஸ்ஸ ராகா³த³யோ ஸத்த உஸ்ஸதா³ குஹிஞ்சி லோகே நத்தி², தஸ்ஸ தங் அகத்த²னங் ‘‘அரியத⁴ம்மோ ஏஸோ’’தி ஏவங் குஸலா வத³ந்தீதி ஸம்ப³ந்தோ⁴.
790.Santoti rāgādikilesavūpasamena santo, tathā abhinibbutatto. Itihanti sīlesu akatthamānoti ‘‘ahamasmi sīlasampanno’’tiādinā nayena iti sīlesu akatthamāno, sīlanimittaṃ attūpanāyikaṃ vācaṃ abhāsamānoti vuttaṃ hoti. Tamariyadhammaṃ kusalā vadantīti tassa taṃ akatthanaṃ ‘‘ariyadhammo eso’’ti buddhādayo khandhādikusalā vadanti. Yassussadā natthi kuhiñci loketi yassa khīṇāsavassa rāgādayo satta ussadā kuhiñci loke natthi, tassa taṃ akatthanaṃ ‘‘ariyadhammo eso’’ti evaṃ kusalā vadantīti sambandho.
791. ஏவங் கீ²ணாஸவபடிபத்திங் த³ஸ்ஸெத்வா இதா³னி தி³ட்டி²க³திகானங் தித்தி²யானங் படிபத்திங் ரஞ்ஞோ த³ஸ்ஸெந்தோ ஆஹ – ‘‘பகப்பிதா ஸங்க²தா’’தி. தத்த² பகப்பிதாதி பரிகப்பிதா. ஸங்க²தாதி பச்சயாபி⁴ஸங்க²தா. யஸ்ஸாதி யஸ்ஸ கஸ்ஸசி தி³ட்டி²க³திகஸ்ஸ. த⁴ம்மாதி தி³ட்டி²யோ. புரக்க²தாதி புரதோ கதா. ஸந்தீதி ஸங்விஜ்ஜந்தி. அவீவதா³தாதி அவோதா³தா. யத³த்தனி பஸ்ஸதி ஆனிஸங்ஸங், தங் நிஸ்ஸிதோ குப்பபடிச்சஸந்திந்தி யஸ்ஸேதே தி³ட்டி²த⁴ம்மா புரக்க²தா அவோதா³தா ஸந்தி, ஸோ ஏவங்விதோ⁴ யஸ்மா அத்தனி தஸ்ஸா தி³ட்டி²யா தி³ட்டி²த⁴ம்மிகஞ்ச ஸக்காராதி³ங், ஸம்பராயிகஞ்ச க³திவிஸேஸாதி³ங் ஆனிஸங்ஸங் பஸ்ஸதி, தஸ்மா தஞ்ச ஆனிஸங்ஸங், தஞ்ச குப்பதாய ச படிச்சஸமுப்பன்னதாய ச ஸம்முதிஸந்திதாய ச குப்பபடிச்சஸந்திஸங்கா²தங் தி³ட்டி²ங் நிஸ்ஸிதோவ ஹோதி, ஸோ தன்னிஸ்ஸிதத்தா அத்தானங் வா உக்கங்ஸெய்ய பரே வா வம்பெ⁴ய்ய அபூ⁴தேஹிபி கு³ணதோ³ஸேஹி.
791. Evaṃ khīṇāsavapaṭipattiṃ dassetvā idāni diṭṭhigatikānaṃ titthiyānaṃ paṭipattiṃ rañño dassento āha – ‘‘pakappitā saṅkhatā’’ti. Tattha pakappitāti parikappitā. Saṅkhatāti paccayābhisaṅkhatā. Yassāti yassa kassaci diṭṭhigatikassa. Dhammāti diṭṭhiyo. Purakkhatāti purato katā. Santīti saṃvijjanti. Avīvadātāti avodātā. Yadattani passati ānisaṃsaṃ, taṃ nissito kuppapaṭiccasantinti yassete diṭṭhidhammā purakkhatā avodātā santi, so evaṃvidho yasmā attani tassā diṭṭhiyā diṭṭhidhammikañca sakkārādiṃ, samparāyikañca gativisesādiṃ ānisaṃsaṃ passati, tasmā tañca ānisaṃsaṃ, tañca kuppatāya ca paṭiccasamuppannatāya ca sammutisantitāya ca kuppapaṭiccasantisaṅkhātaṃ diṭṭhiṃ nissitova hoti, so tannissitattā attānaṃ vā ukkaṃseyya pare vā vambheyya abhūtehipi guṇadosehi.
792. ஏவங் நிஸ்ஸிதேன ச தி³ட்டீ²னிவேஸா…பே॰… ஆதி³யதீ ச த⁴ம்மந்தி. தத்த² தி³ட்டீ²னிவேஸாதி இத³ங்ஸச்சாபி⁴னிவேஸஸங்கா²தானி தி³ட்டி²னிவேஸனானி. ந ஹி ஸ்வாதிவத்தாதி ஸுகே²ன அதிவத்திதப்³பா³ ந ஹொந்தி. த⁴ம்மேஸு நிச்செ²ய்ய ஸமுக்³க³ஹீதந்தி த்³வாஸட்டி²தி³ட்டி²த⁴ம்மேஸு தங் தங் ஸமுக்³க³ஹிதங் அபி⁴னிவிட்ட²ங் த⁴ம்மங் நிச்சி²னித்வா பவத்தத்தா தி³ட்டி²னிவேஸா ந ஹி ஸ்வாதிவத்தாதி வுத்தங் ஹோதி. தஸ்மா நரோ தேஸு நிவேஸனேஸு, நிரஸ்ஸதீ ஆதி³யதீ ச த⁴ம்மந்தி யஸ்மா ந ஹி ஸ்வாதிவத்தா , தஸ்மா நரோ தேஸுயேவ தி³ட்டி²னிவேஸனேஸு அஜஸீலகோ³ஸீலகுக்குரஸீலபஞ்சாதபமருப்பபாதஉக்குடிகப்பதா⁴னகண்டகாபஸ்ஸயாதி³பே⁴த³ங் ஸத்தா²ரத⁴ம்மக்கா²னக³ணாதி³பே⁴த³ஞ்ச தங் தங் த⁴ம்மங் நிரஸ்ஸதி ச ஆதி³யதி ச ஜஹதி ச க³ண்ஹாதி ச வனமக்கடோ விய தங் தங் ஸாக²ந்தி வுத்தங் ஹோதி. ஏவங் நிரஸ்ஸந்தோ ச ஆதி³யந்தோ ச அனவட்டி²தசித்தத்தா அஸந்தேஹிபி கு³ணதோ³ஸேஹி அத்தனோ வா பரஸ்ஸ வா யஸாயஸங் உப்பாதெ³ய்ய.
792. Evaṃ nissitena ca diṭṭhīnivesā…pe… ādiyatī ca dhammanti. Tattha diṭṭhīnivesāti idaṃsaccābhinivesasaṅkhātāni diṭṭhinivesanāni. Na hi svātivattāti sukhena ativattitabbā na honti. Dhammesu niccheyya samuggahītanti dvāsaṭṭhidiṭṭhidhammesu taṃ taṃ samuggahitaṃ abhiniviṭṭhaṃ dhammaṃ nicchinitvā pavattattā diṭṭhinivesā na hi svātivattāti vuttaṃ hoti. Tasmā naro tesu nivesanesu, nirassatī ādiyatī ca dhammanti yasmā na hi svātivattā , tasmā naro tesuyeva diṭṭhinivesanesu ajasīlagosīlakukkurasīlapañcātapamaruppapātaukkuṭikappadhānakaṇṭakāpassayādibhedaṃ satthāradhammakkhānagaṇādibhedañca taṃ taṃ dhammaṃ nirassati ca ādiyati ca jahati ca gaṇhāti ca vanamakkaṭo viya taṃ taṃ sākhanti vuttaṃ hoti. Evaṃ nirassanto ca ādiyanto ca anavaṭṭhitacittattā asantehipi guṇadosehi attano vā parassa vā yasāyasaṃ uppādeyya.
793. யோ பனாயங் ஸப்³ப³தி³ட்டி²க³தாதி³தோ³ஸது⁴னநாய பஞ்ஞாய ஸமன்னாக³தத்தா தோ⁴னோ, தஸ்ஸ தோ⁴னஸ்ஸ ஹி…பே॰… அனூபயோ ஸோ. கிங் வுத்தங் ஹோதி? தோ⁴னத⁴ம்மஸமன்னாக³மா தோ⁴னஸ்ஸ து⁴தஸப்³ப³பாபஸ்ஸ அரஹதோ கத்த²சி லோகே தேஸு தேஸு ப⁴வேஸு பகப்பிதா தி³ட்டி² நத்தி², ஸோ தஸ்ஸா தி³ட்டி²யா அபா⁴வேன, யாய ச அத்தனா கதங் பாபகம்மங் படிச்சா²தெ³ந்தா தித்தி²யா மாயாய மானேன வா ஏதங் அக³திங் க³ச்ச²ந்தி, தம்பி மாயஞ்ச மானஞ்ச பஹாய தோ⁴னோ ராகா³தீ³னங் தோ³ஸானங் கேன க³ச்செ²ய்ய, தி³ட்ட²த⁴ம்மே ஸம்பராயே வா நிரயாதீ³ஸு க³திவிஸேஸேஸு கேன ஸங்க²ங் க³ச்செ²ய்ய, அனூபயோ ஸோ, ஸோ ஹி தண்ஹாதி³ட்டி²உபயானங் த்³வின்னங் அபா⁴வேன அனூபயோதி.
793. Yo panāyaṃ sabbadiṭṭhigatādidosadhunanāya paññāya samannāgatattā dhono, tassa dhonassa hi…pe… anūpayo so. Kiṃ vuttaṃ hoti? Dhonadhammasamannāgamā dhonassa dhutasabbapāpassa arahato katthaci loke tesu tesu bhavesu pakappitā diṭṭhi natthi, so tassā diṭṭhiyā abhāvena, yāya ca attanā kataṃ pāpakammaṃ paṭicchādentā titthiyā māyāya mānena vā etaṃ agatiṃ gacchanti, tampi māyañca mānañca pahāya dhono rāgādīnaṃ dosānaṃ kena gaccheyya, diṭṭhadhamme samparāye vā nirayādīsu gativisesesu kena saṅkhaṃ gaccheyya, anūpayo so, so hi taṇhādiṭṭhiupayānaṃ dvinnaṃ abhāvena anūpayoti.
794. யோ பன தேஸங் த்³வின்னங் பா⁴வேன உபயோ ஹோதி, ஸோ உபயோ ஹி…பே॰… தி³ட்டி²மிதே⁴வ ஸப்³ப³ந்தி. தத்த² உபயோதி தண்ஹாதி³ட்டி²னிஸ்ஸிதோ. த⁴ம்மேஸு உபேதி வாத³ந்தி ‘‘ரத்தோ’’தி வா ‘‘து³ட்டோ²’’தி வா ஏவங் தேஸு தேஸு த⁴ம்மேஸு உபேதி வாத³ங். அனூபயங் கேன கத²ங் வதெ³ய்யாதி தண்ஹாதி³ட்டி²பஹானேன அனூபயங் கீ²ணாஸவங் கேன ராகே³ன வா தோ³ஸேன வா கத²ங் ‘‘ரத்தோ’’தி வா ‘‘து³ட்டோ²’’தி வா வதெ³ய்ய, ஏவங் அனுபவஜ்ஜோ ச ஸோ கிங் தித்தி²யா விய கதபடிச்சா²த³கோ ப⁴விஸ்ஸதீதி அதி⁴ப்பாயோ. அத்தா நிரத்தா ந ஹி தஸ்ஸ அத்தீ²தி தஸ்ஸ ஹி அத்ததி³ட்டி² வா உச்சே²த³தி³ட்டி² வா நத்தி², க³ஹணங் முஞ்சனங் வாபி அத்தனிரத்தஸஞ்ஞிதங் நத்தி². கிங்காரணா நத்தீ²தி சே? அதோ⁴ஸி ஸோ தி³ட்டி²மிதே⁴வ ஸப்³ப³ங், யஸ்மா ஸோ இதே⁴வ அத்தபா⁴வே ஞாணவாதேன ஸப்³ப³ங் தி³ட்டி²க³தங் அதோ⁴ஸி, பஜஹி, வினோதே³ஸீதி அரஹத்தனிகூடேன தே³ஸனங் நிட்டா²பேஸி. தங் ஸுத்வா ராஜா அத்தமனோ ப⁴க³வந்தங் அபி⁴வாதெ³த்வா பக்காமீதி.
794. Yo pana tesaṃ dvinnaṃ bhāvena upayo hoti, so upayo hi…pe… diṭṭhimidheva sabbanti. Tattha upayoti taṇhādiṭṭhinissito. Dhammesu upeti vādanti ‘‘ratto’’ti vā ‘‘duṭṭho’’ti vā evaṃ tesu tesu dhammesu upeti vādaṃ. Anūpayaṃ kena kathaṃ vadeyyāti taṇhādiṭṭhipahānena anūpayaṃ khīṇāsavaṃ kena rāgena vā dosena vā kathaṃ ‘‘ratto’’ti vā ‘‘duṭṭho’’ti vā vadeyya, evaṃ anupavajjo ca so kiṃ titthiyā viya katapaṭicchādako bhavissatīti adhippāyo. Attā nirattā na hi tassa atthīti tassa hi attadiṭṭhi vā ucchedadiṭṭhi vā natthi, gahaṇaṃ muñcanaṃ vāpi attanirattasaññitaṃ natthi. Kiṃkāraṇā natthīti ce? Adhosi so diṭṭhimidheva sabbaṃ, yasmā so idheva attabhāve ñāṇavātena sabbaṃ diṭṭhigataṃ adhosi, pajahi, vinodesīti arahattanikūṭena desanaṃ niṭṭhāpesi. Taṃ sutvā rājā attamano bhagavantaṃ abhivādetvā pakkāmīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய து³ட்ட²ட்ட²கஸுத்தவண்ணனா நிட்டி²தா.
Suttanipāta-aṭṭhakathāya duṭṭhaṭṭhakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 3. து³ட்ட²ட்ட²கஸுத்தங் • 3. Duṭṭhaṭṭhakasuttaṃ
